قصة صيانة ال 5000كم في الصحراوي

[Hosam]

الف مبروك يا دكتور ان مشكلتك اتحلت و تصرفك كان فى غاية التحضر و فى نفس الوقت انت برده اللى جيبت حقك بنفسك يعنى منتهى الايجابية .. و شكراً على تعبك و مجهودك فى شرح زيارتك للتوكيل .. و بالنسبة للعربيات انا عن نفسى واثق فيها ثقة عمياء و عارف ان احنا شاريين عربيات مش علب كبريت و حضرتك اكدتلى الكلام دا.

[dr_bandit]

الله يبارك فيك يا حسام باشا ومتشكرنيش ده انا اللي لازم اشكركم على وقفكم جنبي واتمنى اكون افدتكم وربنا يبعد عنكم اعطال العربيه سواء من التوكيل او من غيره
اخوكم اسلام حمدي
اسبرانزاوي رقم 8

[ooo]

اولا..........لا شكر على واجب يا مدام وده واجبي لاني انا مش جاي احكي على حاجه واشيلكم همي وخلاص بالعكس انا عايز افيد باي وسيله وباي شكل وربنا يبارك في حضرتك ويكفيكي شر الاعطال اللي في العربيه ويباركلك فيها
ثانيا.....موضوع تعديل التكييف انا كلمتهم في جسر السويس وقالولي ان القطع جايه بكره وهم بعد كده حيبداو يكربوها في العربيات بس انت وانت بتحجزي معاد الصيانه فهميهم انك عايزه تعملي تعديل التكييف وتعديل الدريكسيون ...عشان يعملوا حسابهم ولو ساعتها القطع مش متوفره انصحك انك تستني عشان متروحيش مره عشان الصيانه ومره عشان التعديلات وخليها كلها مره واحده احسن والتعديلات بتتعمل في نفس اليوم ومش محتاجه انك تسيبي العربيه هو تعديل الدريكسيون بياخد حوالي3 ساعات والتكييف بياخد حوالي نص ساعه او ساعه بالكتير ده غير ان صيانة ال5000 نفسها متاخدش وقت لانهم مش بيعملوا فيها حاجه مجرد تربيط للعفشه وتشييك على العربيه ولو عندك اي ملاحظات بيشوفوها
ثالثا...صيانة ال5000 مش لازم عند ال5000 بالظبط بالعكس انت بتعمليها في اي وقت بعد ال5000 لانها زي ماقلقتلك مجرد تشييك على العربيه وعلى الملاحظات بس انت بتعمليها عشان تبقي عامله الصيانه الدوريه بتاعتك بانتظام ومتخرجيش من الضمان وفي نفس الوقت ياخدو منك فلوس برضه لاني بصراحه انا شايف ان 90 جنيه كتير على صيانة ال5000 دي
رابعا ....موضوع ان حضرتك تروحي او زوجك هي المساله من وجهة نظري الشخصيه مش مشالة خناقه داخلها واشوف مين اللي يكسب هم رغم كل ده بيحاولوا يحلو مشاكل كتيره بس هم محتاجين وقت لكن لو الوقت اتاخر زياده عن اللزوم يبأه ساعتها انا ممكن اجي مع حضرتك لانهم دلوقت عرفوني اني بتاع مشاكل وساعتها حيخلصوا كل حاجه :) وان شاء الله ربنا ميجيبش حاجه وحشه مع حضرتك او اي حد من المالكين للعربية ...
وانا تحت امرك في اي ملاحظه او سؤال
اخوكم اسلام حمدي
اسبرانزاوي رقم 8

الف شكر لك مرة اخري وجازاك الله كل خير علي الرد وسرعته.
بصراحة تستاهل الشكر علي استفاضتك في الشرح وده اكيد مش واجبك بس ده كرم منك
وحسن اخلاق.

الفكرة في ان زوجي هو اللي يروح اني بصراحة تامة في اي صيانة (مثلا قبل ذلك كانت
معي هيونداي اكسنت) كانوا اللي يقولوا لي عليه اقول اوكيه . الموضوع مش بيبقي خناقة بس
بيبقي طبعا محتاج واحد
فاهم في العربيات ويقدر يناقش ويصل الي الأمثل .أصل الفكرة عند كتير من الناس للأسف
ان السيدات بتسوق وخلاص بدون ماتفهم حاجة في العربية .
بأشكرك مرة اخري علي عرضك بمرافقتي بجد جازاك الله كل خير وأكيد ان احتجت اي شيء
سوف ابلغك به ان شاء الله.
هو ان شاء الله اروح انا وزوجي بعد امتحانات اولي اعدادي وقبل بدء امتحانات الثانوية العامة
علشان باحتاج طبعا للسيارة ايام الامتحانات العصيبة.
دعواتكم للثانوية العامة .

اسبرانزاوية رقم 28.

[kamatchodj]

يارب وفق اولادك واولادى فى الثانويه العامه

واولاد كل اعضاء الرابطه

واولاد كل المصريين

ويارب فرح قلوبنا بيهم وبارك فيهم ووفقهم ..................

[Abonora]

اخيرا يا دكتور اسلام المشاكل اتحلت والله فعلا انت صبرت كتير والله يكون فى عونك --وربنا ينجح اولادى انا كمان واولادكم يارب - :P

[TAREK ZIAD]

ألف مبروك إسلام باشا و أحييك على صبرك و أخلاقك و مثابرتك، دة فعلا درس لنا كلنا ألا نتكاسل عن السعى وراء حقوقنا. و أشكرك جدا على مشاركتنا لتجربتك بالتفصيل و إيجابيتك الواضحة.
مبروك مرة تانية وأتمنى إنك فعلا تستمتع بالعربية بعد هم التكييف و ربنا يباركلك فيها.
تحياتى
م/طارق زياد

[TAREK ZIAD]

ولقيت كمان الاير باجز مفتوحه واعتقد ان دي العربيه اللي كان بيتكلم عنها واحد من اصحابنا هنا

يا حسام باشا...خبر كويس جدا.....الحمدلله الإير باجز شغالة.... ربنا ما يحوجنا لها و يحفظ الجميع يا رب....على فكرة أنا كنت قلقان وخايف لتكون منظر.....حركة أمريكانى يعنى....طلعت حركة صينى ميه ميه...هاهاها :D :D :D
تحياتى
م/طارق زياد

[fady]

مبروك على التعديلات و ربنا يبارك لك في العربيه
ممكن من فضلك تبعث لنا رقم الاستاذ محمد ابو الخير اللي في المعادي علشان لو احتجنا له في اي ظروف مشابهة
و شكرا جزيلا للشرح الوافي

[Hosam]

ماشى يا باش مهندس طارق ربنا ما يفتحلك ايرباج ابداً.. قصدى يعنى ربنا يجملها بالستر معاك و معانا و مع كل الاخوة الاعضاء و يكفينا شر فتحتها يارب.

[dr_bandit]

انا للاسف معرفش رقم محمد ابو الخير لانه تقريبا كان بيتكلم من رقم بتاع الشركه وكمان انا مسالتش ساعتها ده رقمه وللا لا المهم انت ممكن تطلب خدمة العملاء وتسال عليه حيحولوك ليه على طول وان شاء الله محدش فيكم يحتاج لكده ولو في اي حاجه جديده حبلغكم فورا
اخوكم اسلام حمدي
اسبرانزاوي رقم 8

[dr_bandit]

ازيكم يا جماعة ...........بجد وحشتوني جدا جدا بس والله انا اسف فعلا على تاخري في اي اضافات لاني للاسف كنت مسافر ولسه جاي من حوالي 3 ايام....
المهم استكمالا لقصتي مع التكييف اول مارجعت من السفر جيت اشغل التكييف ....هوب التكييف رجع زي ماكان ....يانهار ابيض(لسه حاستنى شهور تاني عشان المقاومة؟؟؟؟)))
بصراحه حسيت بكذه احساس مع بعض...احباط على غيظ على كراهيه للعربيه...كذه حاجه مع بعض ...ربنا مايوريكم ...المهم رفعت سماعة التليفون وكلمت التوكيل وحجزت معاد..طبعا كان المعاد بعد اسبوع ...المهم انا ساعة ماصلحت التكييف في المره اللي فاتت اخدت رقم الكهربائي اللي كان بيجربه ساعتها ...المهم اتصلت بيه وفكرته بيه ...طبعا هو افتاكرني على طول لاني واضح اني كانت مشكلتي كبيره ومعروفة هناك المهم قلتله اللي حصل رد عليه وقاللي لو تقدر تجيلي الورشه بتاعتي ونشوف ايه المشكله ولو لقيتها كبيره يبأه نعملها في التوكيل احسن...المهم انا استنتجت انه عايز يعمل شغل ومصلحه بس برضه قلت وماله اجرب مش حاخسر حاجه هو كده كده مش حياخد حاجه غصب عني
المهم روحتله الورشه بتاعته في المنيب وفتح الكبوت وغير الفيوز لقينا التكييف اشتغل فانا طبعا فرحت الحمد لله مش مقاومة والموضوع انتهى هو بأه قاللي لا استنى شويه لاني عايز اشوف حاجه
انا فضلت معاه حوالي ساعتين ....وراني المقاومه وعرفت مكانها فين وعرفت وصلات الكهربا اللي في العربيه واتضح شوية حاجات ...
اولا المقاومة نفسها مكانتش متركبه كويس فقلتله دي غلطتك لانك انت المفروض اللي صلحت التكييف في التاوكيل قعد يحلفلي ان مش هو اللي صلحه هو يدوب بس جربه وسلمهولي المهم انا صدقته ...هو بصراحه اللي خلاني انبسطت منه انه قاللي مش المهم انه اتصلح المهم ننعرف هو ليه اصلا باظ...قعد شيك على الضفيره لغاية ماوصلنا ان الضفيره فيها شورت بيعمل قفله مع الهزه الجامده او المطبات العاليه وهو ده اللي بيطير الفييوز او المقاومه ويخلي الكييف يبوظ ..
المهم عالجلي الحكاية دي ونضفلي الفلتر وشيك على كهربة العربيه كلها والحمد لله انا دلوقت ماشي كويس وكله تمام
وعرفت ازاي التكييف باظ وازاي ممكن يتصلح واديته اللي فيه النصيب وهو مش من النوع الخبيث او من الصنايعية اياهم هو ولد غلبان عايز يسترزق (الكلام ده مش دعايه)المهم انا دلوقت عرفت انهم في التوكيل بيعملوا اي حاجه بسرعه ومن غير ضمير بديليل اللي حصلي ده
اسف مره تانيه على الاطالة واتمنى اكون افدتكم وانا تحت امركم في اي استفسار
اخوكم اسلام حمدي
اسبرانزاوي رقم 8

[ehabbadr]

شكرا د. اسلام انت أفدتنا جدا و لو فيها تعب ممكن تصور لنا مكان المقاومه و رقم الفيوز علشان نعرف مكانهم و شكرا مره اخرى

[Driver]

المهم استكمالا لقصتي مع التكييف اول مارجعت من السفر جيت اشغل التكييف ....هوب التكييف رجع زي ماكان ....يانهار ابيض(لسه حاستنى شهور تاني عشان المقاومة؟؟؟؟)))

االه يجازيك يا راجل...قللبت عليا المواجع...آآآآآآآآآآآآآآآآآآآآآآآآآآآآآه

في شهر 4 حصل معايا نفس السيناريو http://www.nilemotors.net/Forum/viewtopic.php?t=2136

وكنت برضه في النيلة مركز الصحراوي...و كانت برضه اللي ما تتسمى المقاومة بتاعت الزفت....وقالولي هنعمل اوردر بيها والكلام اللي بالك منه ده اللي لا بيودي ولا بيجيب..وكان شكلهم اصلا مش عارفين ايه المشكلة ساعتها ولا ايه..بس اخوك كان واصل اصلا لمرحلة الغليان
قعدت اصرخ زي المجنون واشتم العربية والمركز بابشع الالفاظ....هلاقيها منين ولا منين التيل ولا الدركسيون ولا الفتيس ولا ايه...
خرجلي واحد بيسال بأهمية مصطنعة: هوة فيه ايه يا بيه؟؟ كملت سلسلة الانفجارات فيه...لقيته بيبص لواحد معاه كده (اللهو في الاصل كشفلي عليه)...وقالي طب ماتزعلش هنغيرهولك كله....والصراحة دي الحاجة الوحيدة اللي سكتتني و جابولي حاجة اشربها وسجاير كمان :mrgreen:

الغريب يا اخي حاجة....هوة الواحد لازم يكون قذر ولسانه طويل علشان الناس تديله حقه؟؟
طب مانت اتصرفت بهدوء.....كانت النتيجة ايه؟؟ قعدوا يلعبوا بيك 3 شهور...وفي الاخر ايه اللي حصل....
رحت عملت شغل براني و دفعت برضه؟؟ يبقي ايه الفايدة..؟؟

ولمما رحت بعد كده علشان طقم الدبرياج....كانوا مرعوبين لمما شافوني...وكأنهم بيقولوا في بالهم:المجنون جه :roll:

و خللصوني بسرعة لاتتخيلها....

و عقبالك كده زييي لمما تبعها...و نشوف هنجيب ايه سوا يا جميل؟؟

[dr_bandit]

لو انت عندك البرنامج بتاع العربيه اللي كان هنا في المنتدى الكريم حتلاقي المقاومه موجوده تحت عنوان
a/c system--->evaporator assay---->electric speed regulation module
ودي حتلاقيها ورا التابلوه بعد ماتفك الموديول الامامي اللي ورا التابلوه
اما الفيوز فهو الفيوز الاخضر الوحيد اللي في علبة الفيوزات حتلاقيه عليه رقم 30 يعني 30 امبير وده حتلاقيه تاني صف بالطول من بره لجوه وانت واقف بجانب باب السواق
انا حاولت انزل صورته من على البرنامج بس للاسف مش حتشتغل الا عن طريق البرنامج لان امتدادها مش امتداد صوره عاديه وعلى العموم انا ححاول اصورها عن طريق الموبايل وابعتها
ارجو اني اكون افدتكم
شكرا
اخوكم اسلام حمدي
اسبرانزاوي رقم 8

[ehabbadr]

شكرا ليك د.اسلام و برجاء لا تحرمنا من مداخلاتك القيمه و أخر أخبارك