صور شاسيه و تعليق الاسبيرانزا A113

[cpt_shawky]

[PRO-DRIVE]

ياخوفي لحد من ملاك العربيه يطلع او يخبط في رصيف :)

[fiatmomo]

انا شوفت الصور دية قبل كدة ... وانبهرت الحقيقة من تصميم الشاسيه من قدام .... مواسير وملحومه فى بعض زى عربيات البجى اليدوية الصنع ...

الشاسية من قدام عبارة عن مواسير ملحومه فى بعض و منفصل عن باقى شاسية العربية ومربوط ب مسمارين ؟؟؟؟؟؟؟؟؟ ازاااااااااااى دية تستحمل 4 لا خمس سنين ؟؟؟

ايه الهبل دة ؟


دية مفهاش ادنى انواع القوه ولا التحمل ؟؟؟؟

[Karim_Monir]

محمد للامانة كان لازم تقول انها من تصوير استاذ ماجد قبل ما يبيع عربيتة
وده للتنوية فقط

[noni67]

مش احنا اتفقنا ان اللى مش يعرف ما يفتيش
مين قال ان المواسير دى هى شاسية العربية من ادام
يا جماعه اللى مش مهندس سيارات ما يفتيش
المواسير اللى الاستاذ بيتكلم عليها دى حمالة المحرك فقط
مالهاش علاقة لا بالشاسية لا من ادام ولا من ورا الشاسية ده حاجه تانية خالص
وكمان فى الأخر يقول ايه الهبل ده
ربنا يسامحك
على العموم على رأى المثل اللى ما يعرفش يقول عدس

[yasserayad]

الصور قريبه جدا والواحد مش فاهم حاجه
يعنى ايه يعنى كويسه ولا اى كلام
ياباشمهندس

[Khalid_Mostafa]

مش احنا اتفقنا ان اللى مش يعرف ما يفتيش
مين قال ان المواسير دى هى شاسية العربية من ادام
يا جماعه اللى مش مهندس سيارات ما يفتيش
المواسير اللى الاستاذ بيتكلم عليها دى حمالة المحرك فقط
مالهاش علاقة لا بالشاسية لا من ادام ولا من ورا الشاسية ده حاجه تانية خالص
وكمان فى الأخر يقول ايه الهبل ده
ربنا يسامحك
على العموم على رأى المثل اللى ما يعرفش يقول عدس

بالراحه علينا بس يا عم ..هي العربية كانت من بقية صحابك !!!!
مايقول الي يقوله ...انت زعلان اوي كده ليه !!؟؟؟
والصراحه هو معاه حق..التعليق الي ورا عادي و مشابه لأغلب السيارات الهاتشباك
اما من ادام فبصراحه شكله غريب فعلاً و مسخره...
ثم غريب اوي ان كرتيرة زيت الموتور تبقي حديد زهر بالشكل ده...يعني لو خبطه من تحت مش حتطبق زي بقيت العربيات...حتتشرخ فوراً

[fiatmomo]

مش احنا اتفقنا ان اللى مش يعرف ما يفتيش
مين قال ان المواسير دى هى شاسية العربية من ادام
يا جماعه اللى مش مهندس سيارات ما يفتيش
المواسير اللى الاستاذ بيتكلم عليها دى حمالة المحرك فقط
مالهاش علاقة لا بالشاسية لا من ادام ولا من ورا الشاسية ده حاجه تانية خالص
وكمان فى الأخر يقول ايه الهبل ده
ربنا يسامحك
على العموم على رأى المثل اللى ما يعرفش يقول عدس

حقك عليا يا استاذ نونى :)

بس الى اعرفه اسفل السيارة بالكامل يعتبر شاسيه السياره ... والجزئه دية ( الى شايلة الموتور ) فى اكتر من موقع وفى اكتر من تعليق اسمها شاسيه الموتور ... لكن مش هية فعلا العربية مش متحمله على الجزئية دية ... وبتراجع عن كلامى فى الجزئية دية تحديدا ....

لكن مش هية دية القضيه .

انا نزلت تحت كذا عربية من عربيات اصحابى فى محطات البنزين وشوفت شكلها من قدام ازاى ... العربيات دية ( لانوس - ويرا - 128 - 131 - شاهين - ريتمو ) . سيبك من الشاهين و ال131 لانهم دفع خلفى وبالطبيعة اختلاف وضعية المحرك وطريقه تثبيتة .
خلينا فى الانوس والويرا .... اسمحلى وللمره التانية ( مفهومش الهبل الى معمول فى الاسبرانزا 113 ) دة حتى الانوس الىناس كتير بتقول عفشتها ضعيفه وتصميمها كذا وكذا .... شكل تصميم الشاسية من قدام وطريقه تثبيت المقصات .. توحيلك انها تستحمل !!! وديه مش محتاجه مهندس سيارات علاشان يعرفها ..

فى اقرب فرصة بأذن الله ححاول ارفعلك صور للويرا والانوس من تحت عامله ازاى ... وحسيبلك التعليق !
وعلى فكرة انا مش ضد العربيات الصينى .. لانى الشيرى a11 عربية جيده وبشكر فيها من ساعة مانزلت على اساس انها مبنيه على شاسية سيات توليدو وعملية وسعرها قليل
1600 وتكيف وبور استيرنج ب 58 الف جنيه ( مع التحفظ الكبير على قوه تحملها للصدمات ودرجة امانها )
الاسبرانزا a113( الى هية شيرى برده ) وصلت دلوقتى 52 الف جنية !!! وبالمنظر ده !

اختصارا للكلام

اولا انا بتأسفلك لو كنت افتيت فى حاجة وهية مش بظبوطة 100 %
ثانيا ماتقولش ان المواسير الملحومه دية ملهاش علاقة بالشاسيه ... انتا كدة حضرتك الى بتفتى ( هو الموتور بيتحمل على الهوا مثلا ! ) وبعدين بص العجل متثبت فيها ازاى وشكل المقص ونظام التعليق كله من قدام عامل ازاى !!!!!!!!
ثالثا انتا بتقول ربنا يسامحنى ! هو انا غلط فيك لاسمح لله !!! ربنا يسامحنا كلنا .. بس انا مش شايف منطق انك تقولى كدة على شان بقول ايه الهبل دة على تصميم عربيه
رابعا انا مش بحب العدس:D
خامسا ديه الاهم اتمنى انك متكبرش الموضوع وروق اعصابك وهدى نفسك ... دية حتة حديد على اربع عجلات

وكامل تحياتى واحترامى لحضرتك

شكراً:)

[eng_mkhalaf]

أية يا جماعة براحة المواضيع مش مستاهلة - كلها عربيات فى الأخر واحنا عندننا 128 من سنة 74 يعنى أقلها يا طنط وبتجرى زى القردة وبتسافر وبتروح أى حتة أحنا عاوزنها - كلة فى الكلتش

[ماجد يوسف وهبه]

فعلا دى الصور بتاعت عربيتى قبل ما أبيعها

حملتوها أزاى دى على الموقع دا أنا حاولت كتير لكن حجم الصورة الكبير منعنى

هحاول أفسر شويه للناس اللى مش عارفه ده كويس ولا وحش

أهم صورة هى صورة الرابعة من الأول الملاحظات كالتالى:

1- شايفين شداد العجله معدى من تحت ماسورة الشاسيه والصورة طبعا والعربيه واقفه وطبعا العجلة فى المطبات طالعه ونازلة وماسورة الشاسيه ثابته فى مكانها لكن شداد العجله طالع نازل مع العجلة يعنى لو مطب جامد شويه هلاقى الشداد خبط فى الماسورة والنتيجه أما الشداد يتنى أو ينخلع من مكانه. وعلشان كده أنا كنت بحس بالمطب كأنه خبط فى الشاسيه. تفتكروا ممكن يكون حمايه للمساعد علشان ماينضغطش على الآخر ويضرب؟ واهو يحمل شويه على المساعد الطبيعى اللى عند البنى آدم اللى بيقعد عليه وأهو شيلنى وأشيلك.

2- الماسورة اللى أنتم شايفنها دى شايله الموتور بالفتيس، بعلبه الدريكسيون ، بنظام التعليق بالكامل وكل ده مربوط بمسمارين أولا دى أول مرة أشوف نظام المسامير ده وثانيا أفرض المسامير دى هوت شويه ومش هقول فكت ايه اللى يحصل مش عارف. أنا متهيألى بما أنها جر أمامى انا كان ممكن أشوف آلات الجر بالموتور بكل حاجه معاه بتجرى قدامى وتسبق العربيه.

3- كنت خايف أوى وأنا ماشى لأنه لا يوجد أى نوع من أنواع الحمايه أسفل الموتور. ممكن يكون ده مناسب لبعض الدول بس مأعتقدش أبدا ده يناسب بلدنا.

4- لحامات المواسير نفسها يمكن تكون مش واضحه فى الصورة ولكن مع التدقيق نجد انها ملحومه بطريقه يدويه (على شبلونه يعنى). طبعا لا يمكن تلاقى الطريقه دى مستخدمه دلوقت على الأقل مش فى الأجزاء المهمه اللى زى دى. ممكن مثلا فى أجزاء الحمايه تحت الموتور. مهما كان دقة الشبلونه لا يمكن تضاهى دقة الروبوت ده انا مش مستبعد انهم يكونوا لحموها بعد ما ركبوا كل حاجه.

5- كل ده كوم وحته الحديده بتاعه شداد البرياج كوم تانى. مش قادرين يخلوها حديد مجلفن أو حتى يدهونوها زى المواسير أخواتها ليه شكلها عامل كده زى اللى جايب حته حديد خردة يكمل بيها شغله.

وياريت حد من الخبراء يفيدنا عن هذا النظام أو لو حد عنده رأى يقوله

أخيرا، أرجوكم محدش ياخد الكلام ده كأنى بتكلم عن حد قريبه من العائله. السيارات بصفه عامه دى أداه جماد يعنى لا يحس ولا يرى ولايشعر (يعنى محدش يخاف على شعور عربيته مش هتزعل) و فى الآخر ممكن أكون غلطان.

على فكرة أنا حتى بعد ما جبت النيسان لو واحد قال لى دى عربيه فيها عيوب كتير هوافقه بس أنا متأقلم على هذه العيوب ومبسوط بيها (شكلها قديم مثلا، كل اللى راكبينها عواجيز) فكل واحد حر فى رأيه ويجب أن يحترم (بضم الياء)

قلبتوا عليا المواجع بعت ما كنت قربت أنساها

[Khalid_Mostafa]

صح الكلام يا استاذ ماجد

[eng_mkhalaf]

قلبتوا عليا المواجع بعت ما كنت قربت أنساها

:) - يتحسسنى أنك كنت راكب كابوس - هو انت مركبتش 128 عادة قبل كدة - يا عم الحمد لله على إى شىء وربنا يباركلك فى الصنى

[sab3aawy]

تسمحولى اعلق يا شباب؟

بالنسبة لموضوع القنطرة ( اللى هم الماسورتين الحديد اللى متحمل عليهم الموتور) فدة مش اختراع شيرى ولا حاجة، فيه عربيات مشهودة فيها الموتور والمقصات وعلبة الديريكسيون متحملين على قنطرة مربوطة فى العربية بنفس الطريقة (ألشاهين) كما ان الصنى فيها قنطرة مقاربة فى الشكل متحمل عليها كتير من العفشة، اما كونها مربوطة بمسامير فهو ميزة وليس عيب لأن ده هيسهل الفك والتركيب والصيانة، ويمكن يكون عند حضراتكم فكرة عن الطفرة اللى حصلت فى سهولة سمكرة العربيات بعد ما اصبحت الرفارف الأمامية مربوطة بمسامير

بالمناسبة، اى مهندس ميكانيكا يعرف ان المواسير بتكون اقوى فى تحملها لعزم الإلتواء والثنى من الصاج المفرود وبالتالى القنطرة المعمولة من مواسير بتكون امتن من الشاسيه المفرود المعمول من نفس سمك الصاج وذلك لاتفاع قيمة ما يسمى (عزم القصور ) لشكل المقطع الدائرى عن المقطع المفرود

انا اللى اقدر اشوفه من الصور واعلق عليه هو كارتيرة الزيت الأنتيمونيا ودى فى منتهى الخطورة لانها لو اتكسرت لا يمكن لحامها كما ان الخبطة السفلية اللى تعوج الكارتيرة الصاج وبس تكسر الكارتيرة دى، كذلك قلاووظ طبة الزيت هيتنحل مع كتر مرات فك وتركيب الطبة لغيار الزيت

الإنتقاد التانى هو قصر مشوار المقص بشدة لأن دراع المقط من أول العجلة لحد القنطرة قصير جدا وده هيخلى العربية ناشفة جدا فى المطبات،

ده اللى اقدر اطلع بيه من الصورة لكن غير كدة التجربة الفعلية هى المحك

[Khalid_Mostafa]

انا اللى اقدر اشوفه من الصور واعبق عليه هو كارتيرة الزيت الأنتيمونيا ودى فى منتهى الخطورة لانها لو اتكسرت لا يمكن لحامها كما ان الخبطة السفلية اللى تعوج الكارتيرة الصاج وبس تكسر الكارتيرة دى

نفس الكلام ده كان تعليقي برضه

بالمناسبة، اى مهندس ميكانيكا يعرف ان المواسير بتكون اقوى فى تحملها لعزم الإلتواء والثنى من الصاج المفرود والباتلى القنصرة المعمولة من مواسير بتكون امتن من الشاسيه المفرود المعمول من نفس سمك الصاج وذلك لاتفاع قيمة ما يسمى (عزم القصور ) لشكل المقطع الدائرى عن المقطع المفرود

ديه بقي الي عايز اسأل فيه...صحيح ان القنطره المواسير حتكون اقوي من العلب الصاج (كما هو معمول به في اغلب السيارات) ولكن لي سؤالين :
1-هل المطلوب ان القنطره تكون بهذه القوة ؟؟ (في حالة التصادم مثلاً ونقط الإنهيار و الكلام ده)
2-ما تأثير ذلك علي الوزن

[CryptonX]

يا جماعة كويس ان الاستاذ سبعاوي اتكلم

انا بعت الصور دي لمنتدى شيري الصيني في مهندس سيارات هناك بيفيدني جدا في المعلومات حول الصيني عامة و الشيري خاصة !

و لما وريته الصور و تعليقاتنا عليها

بصراحة بدون زعل رد عليا قال : " الناس الي بتقول انها ملحومة في الشارع دي يا اما ماشفتش عربيات جديدة من تحت قبل كدة , يا اما ميعرفوش حاجة في شاسيه السيارات "

و تعليقه الوحيد كان زي تعليق الاستاذ سبعاوي بالظبط بخصوص الكارتيرة الصاج .

بس وقالي ياريت تجيبوا سيارة من نفس الفئة و تقارنوا العفشة بيها ( بيكانتو - التو - اونو )

و هو كان يأمل بس ان شيري تصفح المنطقة دي اكتر في الموديلات الفادمة
و هو بيعمل في مركز صيانة في الصين و عمل صيانات كتيرة لشيري A1 وعمر مافي حد اشتكى من موضوع العفشة ده .

-----------

انا نقلت رسالته كما هي ( ترجمتها بس ) ده مش رأي انا ركبت العربية نصف ساعة في مدينة نصر و لم يتضح لي اي عيب غير انها غير مريحة في المطبات .

بس ارجع برده و اقارنها باونو و لا التو .. و الاتنين حدث ولا حرج في الراحة :) ( زفت ! )