حرامي حاول يسرق الام 11 بتاعتي

[teha]

من كام يوم كدة كنت سهران شوية و حوالي على الساعة 1ونص كدة سمعت فجاه صوت الكلكس بتاع العربية بتاعتي بيضرب ورا بعض (للعلم الانذار هوه الكلكس) و الصوت ده كان بيطلع ساعات لو فتحت الشنطة من الريموت و كان الانذار شغال .
المهم طبعا انا اتخضيت و طلعت اجري على البلكونة بصيت لقيت في حد طالع يجري من العربية بتاعتي وشايل شوية جاجات وحضها كدة و بيجري طبعا انا قعدت اقول حرامي و قمت نازل طبعا جري على العربية.
طبعا ملقتش الحرامي و بصيت لقيت الازاز بتاعي مكسور و درج التبلوه مفتوح و متاخد كل اللي فيه و الدرج اللي في نص ده اللي فوق الكاسيت مفتوح و متاخد منه الفلاشة و الكابل بتاعها .
حاولت انظف الكرسي من الازاز و اطلع بالعربية اجري ورا الحرامي لقيت ايدي هتتعور و لازم انظف بالراحة المهم نظفت العربية و رحت القسم وطبعا ياريتني ما رحت عديت على كذا واحد لحد ما وصلت للظابط و في الاخر الظابط قالي مفيش حد موجود عشان تعمل محضر و قالي تعالى بكرة و رحت بكرة برده كان الشخص المجهول لسة مجاش عشان المحضر فنفضت و قلت الحق اروح اصلح الازاز.
كلمت كذا مركز ضيانة عشان اسال على الازاز فطلع مفيش الا في ابو رواش قمت اخد بعضي و طالع على هناك و الحمدلله الازاز اتعمل سعره 76 جنيه و تركيبه 90 جنيه مش عارف ازاي بس الحمدلله انها على قد كدة.
الحرامي سرق دفتر الصيانة و ضمان الكاسيت و البطارية و الفواتير بتاعت الصيانة و الفلاشة والكابل بتاعها و بتاع الموببايل و علبة مناديل تقولي حرامي ايه ده مش عارف.
قالولي الحل بتاع دفتر الضمان اني اروح لمركز الصيانة اللي بعمل في الصيانات الدورية واطلب منهم يطلعولي صور من الفواتير بتاعت الصيانات الدورية و الفواتير تبقى بدل الدقتر.

بس بصراحة الانذار ده انا كنت بقول ايه الفضيحة كل مقفل العربية تزعق بس لله الحمد طلع فضيحة لاي حرامي.

اللهم لك الحمد و قدر الله و ماشاء فعل و اللهم اجرني في مصيبتي و اخلفني خير منها

[osman66]

ده حرامى متخلف الحمد لله

[shaddadfalcon1]

الحاله مخليه الناس تاخد اي حاجه

من شهر بالظبط شقتي اتسرقت واتاخد فلوس ودهب مراتي وكاميرا
الحرامي مسبش حتي شوية اربع وانصص بتوع العيال

[teha]

لا حول و لا قوة الا بالله و ده محدش كان في الشقة و لا مسافرين و لا ايه

[ecybrarian]

اجاركم الله..وعوضكم خيرا..السرقة حصلت فين؟ وانهي قسم دا إللي مارضيش يعمل لك محضر؟؟

[teha]

التجمع الثالث - القطامية

هوه الراجل مشكورا اخد رقمي و قالي هنتصل بيك اول ما نجيب الحرامي و متقلقش هنجبلك حقك.

[TAMERHASSAN]

الحمد لله

[MoHaMed HaMeD]

الحمد لله ع كل شىء وانا جارك ف التجمع الخامس واهلا بيك
وقدر الله وماشاء فعل

[teha]

اهلا بيك يا جاري العزيز على فكرة واحد صاحبي حصل معاه نفس الموقف عند جامع الحمد اللي عند مترو في التجمع .
داخل يصلي الظهر طلع لقي الازاز مكسور و سارفين كيسة صغيرة كان فيها سندوتشات مراته عملهاله .
والعربية اللي جنبه اتسرقت برده بس ديه كان فيها 3000 جنيه .
انا بقولك عشان برده تاخد بالك .

وربنا يهدي المسلمين جمعيا و يصرف عنا السوء.

[nour_nrc]

سبحانك اللهم وبحمدك ، أشهد أن لا إله إلا أنت أستغفرك وأتوب إليك

[shaddadfalcon1]

لا حول و لا قوة الا بالله و ده محدش كان في الشقة و لا مسافرين و لا ايه

كنت بره البيت عشان احتي بتوضع في المستشفي وزوجتي كانت نايمه مع اختي والحمد لله انهم كانو قافلين علي نفسهم الأوضه

الباشا دخل علي والدي وهو نايم واخد الفلوس اللي كان رايح بيها المستشفي وبعد كده طلع علي شقتي ونفضها تماما وخلع

[teha]

معلش للاسئلة الكتيرة هوه دخل من الباب و لا منين و لو من الباب هوه مكنش مقفول بقفل عادي عني زي اي باب و لا ايه اللي حصل.
و الذهب و الفلوس كانوا في الدولاب عادي في مكانهم الطبيعي و لا كنت مخبيهم .
انا بس عاوز اعرف همه بيفكروا ازاي عشان انا عندي شقة مقفولة جنب بيت ماما و بابا يعني في نفس العمارة و كل يومين اسمع ان في شقة اتسرقت حلولينا .
انا بسال عشان الواحد بس ياخد حذره و ياخد بالاسباب و جزاك الله خيرا.

[shaddadfalcon1]

معلش للاسئلة الكتيرة هوه دخل من الباب و لا منين و لو من الباب هوه مكنش مقفول بقفل عادي عني زي اي باب و لا ايه اللي حصل.
و الذهب و الفلوس كانوا في الدولاب عادي في مكانهم الطبيعي و لا كنت مخبيهم .
انا بس عاوز اعرف همه بيفكروا ازاي عشان انا عندي شقة مقفولة جنب بيت ماما و بابا يعني في نفس العمارة و كل يومين اسمع ان في شقة اتسرقت حلولينا .
انا بسال عشان الواحد بس ياخد حذره و ياخد بالاسباب و جزاك الله خيرا.

البيت بتاعنا دورين وفي سلم داخلي واللي يبقي في الدور التاني يقدر يدخل في البيت من تحت لان مفيش قفل علي الباب اللي علي السلم
في بيت دور جنبنا وممكن حد ينط منه عندنا وده اللي غالبا الحرامي استخدمه عشان يدخل
وبالصدفه مفتاح شقتي كان في الصاله في الدور الأول والله اعلم دخل بيه ولا دخل ازاي
الحرامي خرج من الدور الأول من شباط اوضه وكان فيه اثار عنف علي الشباك بس الظابط قال ان ده تمويه وهما مدخلوش منه

امال بالنسبه للفلوس والدهب فلو محطوطين في سابع ارض كانو هيتجابو لان الحرامي مسابش خرم ابره مقلبش فيه

حتي البامبرز بتاع ابني لقيته مقطعه حتت وكاني هشيل فيه فلوس
من الأخر كان قالب الشقه واخد راحته علي الأخر لدرجه انه من استظراف اهله لقيته تاني المخده وحاططها في شنطة السفر اللي كان فيها هدوم وكانه بيقول انا مجتش ناحيتها اهو

واخرتها لما مسكناه بعديها باسبوع بعد ماكان خلاص سرق 5 شقق دفعه واحده ومسكناه اتحكم عليه بشهر سجن عشان البشوات مش فاضييتن يتحرو ويخلوه يعترف

[egypt0777]

ده حرامى متخلف الحمد لله

الحمد لله انها جت على قد الورق

و اكيد الحرامى ده تبع التوكيل --- عشان كده سرق كل دفاتر الضمان و الصيانه

[gladuter]

الحمد لله ربنا ستر