ما هو تقييمك لوكيل سبيرانزا و مراكز الخدمه

[H_ARAMZY]

انا بتعامل مع مركز ابوالفتوح في الإسكندرية في شارع كلية الطب
الناس هناك زي الفل بصراحة وبخاصة البشمهندس أحمد
ناس زي الفل

ممكن يا باشا رقم موبايل المهندس أحمد

[basem_s73]

اللة بص انا ارتحت فى مركز العباسية مدير المركز رجل محترم جدا وبتابعوا العربية وبيهتموا بيهها لو قطعة الغيار مش موجودة ابو رواش بقوا زى الزفت وعالطول خناقات مع العملاء وكذا مرة العملاء يجيبولهم البوليس قبل الثورة طبعا والكيلو 30 احسن من ابو رواش لكن بتاع العباسية تحس انهم بيشتغلو وعندهم ضمير

[aaaa2000]

والله انا با أشكركم جدا انا كنت رايح اشترى واحده 516 النهارده بس قلت اشوف رأى الناس
انتوا انقذتونى رغم انى دافع عربون بس مبلغ صغير مش مهم انا ها اتصا ألغى الشرا
الحمد لله واشكركم مره تانيه

[akmm]

عامه كل التوكيلات فى مصر سيئه ......... وكل توكيل يمتاز بنوعيه من السوء اكتر من غيره ولكنهم مجتمعين على انهم ادونا العربيات ده هبه من عندهم واننا لازم نبوس اديهم على عطيتهم . حسبى الله ونعم الوكيل فيهم .

[aboomarahmad]

انا قلت بدل ما اشارك في الإستطلاع بس....انقل لحضراتكم تجربتي الأخيرة بالتفصيل
التاريخ الثلاثاء 16/4/2013 قراءة عداد 24.300كم
بدأت الرحلة الساعة 7.40 من بيتي في م.ج. وصلت بسبب حادثة على المحور الساعة10.30
طبعا واصل تعبان لأجدهم بالداخل في الإستقبال يقولولي:
1- ان الصيانة المجانية خلصت امس وهذا عكس ماقالوه لي عندما حجزت السبت الماضي مع الأستاذ المختص بالرد على تليفونات الحجز بأن آخرها 16/4 يعني الثلاثاء اليوم وليس امس الإثنين وبالتالي بعدما كنت اريد الجيء غدا الأربعاء لإرتباطي بمواعيد عمل فقمت بتأجيلها لآتي اليوم.......... بعد محايلات الدنيا مشيت كأنها مجاملة مش غلطة منهم....
2- استلموا العربية الساعة 10,30 وانتهت من الصيانة المجانية الساعة 3 العصر!! ليه مش عارف لكني بسبب غلطة أخرى سيأتي ذكرها اتأخرت أكتر وخرجت الساعة 3,20 عصرا
3- اكتشفت انخلاع غطاء الموتور الأسود البلاستيك من احد جوانبه ولما بلغت المهندس المختص قال مش من عندنا هي داخلة كدة!!!!!!!...سألت ممكن يتصلح قال لأ يتغير خالص!!!!
طبعا انا لم اكن املك التأكيد انه قبلها كان سليم ولا لأ لأني دايما بتعامل مع ابورواش فعلا ما استلمتهاش منهم قبل كدة... لذلك سكت وانا متضايق
موظف خدمة العملاء قالي انه ممكن يتصلح بس الوقت اتاخر فلما آجي المرة الجاية يعملوه!!!!!!!...
4- لما جيت استلم تصريح الخروج فوجئت بيهم بيطالبوني بـ80ج. قيمة تغيير دلاية خلفية شمال!!!! ياجماعة انا جاي اعمل صيانة مجانية....لأ انت غيرتها المهندس بيقول كدة
ولو شاكك روح للمهندس....بردو رحت لخدمة العملاء ومن هنا لهناك اكتشفوا انها غلطة تشابه اسماء وعمل مرتجع وعدت....الحكاية دي أخدت نص ساعة لوحدها وانا اصلا متأخر...
5- غسلوا العربية لأن ده من ضمن الصيانة المجاني...لكن فوجئت بعامل الغسيل جاي واقف فوق دماغي: تعالى خد العربية من المغسلة!!!!! يا عمي مش انا اللي باخدها....المفروض حد يجيبها ويحطها في البارك وانا استلمها من هناك!!!!! لأ تعالى خدها عشان تطمن....فهمت انه عاوز قرشين....رحت اخدتها وماكنش معايا فكة اخد الـ 50ج. يفكها ورجع 40 بس على اساس انه عايز الـ 10 كاملة!!!!! بقشيش 10ج. ماشي!!!....بردو سكت واخدتها لأني كنت خلاص عايز امشي بأي طريقة
في الرجوع البوابات كانت زحمة بشكل غير طبيعي والطريق بعد كدة كان زي الزفت المهم دخلت بيتي 5.15
الخلاصة: انا ما ارتحتش خالص في المكان لكل ما سبق وبصراحة ماحسيتش لا بالجودة ولا بالعناية اللي كنت منتظرها وخاصة اني لقيت العربية من جوة فيها مية من الغسيل على الموكيت وكمان لقيتهم خلعين حاجة كنت مركبها في العربية ومرمية على الأرض...ده غير كل ما سبق ذكره
ده غير المشوار...بصراحة انا ندمت اني رحت...وفرت صيانة بسيطة مجاني لكن خسرت اعصابي ويوم كامل واستهلاك سيارة في الزحمة 3ساعات رايح وزيهم تقريبا راجع
مع اني كنت من انصار التعامل مع التوكيل بشهادة العضاء في الجروب وياما كنت بأدافع عن التوكيل بإعتبارهم اكتر ناس حافظين العربية لكن بصراحة ربنا ما يحوجني لهم تاني...دي آخر مرة..................والله أعلم
م.ياسر جادو

[رأفت]

أشكركم على هذا التقرير الوافى الذى جعلنى أتراجع بشكل نهائى عن شراء سيارة تيجو 2014 .. وسوف أتوكل على الله فى شراء سيارة ياريس تويوتا 2014 .. خلينى فى حضن تويوتا أفضل .

[DEVIL333]

سى .

[MACATHIUS]

مركز خدمة جسر السويس

انا جربت مركز خدمة جسر السويس اللى الشارع بتاعه على ناصيته مسجد و الشارع دا مليان مراكز خدمة لماركات عربيات كتير... اديله تقييم 50% عشان المعاملة مش قد كدة و المكان برده مش نضيف و كمان الموظفين بتفضل تستناهم لغاية ما يتواجدوا على مكاتبهم. هى مش وحشين اوى بس مش دا المطلوب من مركز خدمة دفعتله و انا خارج 2700 جنيه صيانة ال 45000 كيلو. الحقيقة انا جربت توكيل و مراكز خدمة رينو و عرفت يعنى ايه معاملة محترمة و يعنى ايه اهتمام بيك و تليفونات مستمرة كأن العربية بنتهم العزيزة. اما اسبيرانزا فتحس فى المركز انهم مشغولين بحاجة تانية غير شغلهم..

[ايمن حسني]

انا كنت ناوي اشتري اسبرانزا انفي لكن بعد ما قرأته عن المعاملة السيئة في مراكز الخدمة وسوء الادارة وعدم الاكتراث بمشاكل مالكي السيارات التي هي بالاساس نتيجة سوء تقفيل الشركة المنتجة فلن اشتري اي سيارة اسبرانزا لانها مع الاسف تقفيلها سيء وتوكيلها اسوء

[hugan]

انا كنت ناوي اشتري اسبرانزا انفي لكن بعد ما قرأته عن المعاملة السيئة في مراكز الخدمة وسوء الادارة وعدم الاكتراث بمشاكل مالكي السيارات التي هي بالاساس نتيجة سوء تقفيل الشركة المنتجة فلن اشتري اي سيارة اسبرانزا لانها مع الاسف تقفيلها سيء وتوكيلها اسوء

معاك حق
ريحت نفسك

[محمد البلاسي]

تحس ان اللي شغال في التوكيل انو بتاع ابوه
حاجه غريبة المفروض المديرين المسئولين عن التوكيلات ينتبهو جيدا لهؤلاء لانهم بطريقتهم دي بيقللو مبيعات الشركة