اقتراح لملاك الاسبرانزا بخصوص العيوب و الوكيل

[معاذ الشرباصى]

و انا نسيت بس اضيف موضوع مركز حماية المستهلك
الرقم الساخن بتاعهم هو 19588
انتم ممكن تبدأوا بشكاوى فردية ليهم عن تاخر التوكيل فى تغيير العيوب, او مماطلته
لما المركز يلاقى بتاع خمسين عضو متصلين اكيد ميقدرش يطنش

[TAREKSHEIR]

إذاً زى مابقول نهدى شويه ونظم العملية علشان لو وبقول لو إحتجنا للأسلوب ده نستخدمه فى الوقت المناسب لمٌُِِا التوكيل يتقاعس عن آداء الخدمه مش عمُال على بطُال .

[PAYOO]

ربنا يكتر من أمثالك والله يا دكتور معاذ عقليه فعلا منظمه وكلام يدل على الحكمه

وبنا يوفقنا جميعا ونأخذ موقف إيجابي لمواجهة الجشع بكل انواعه

مشكور اخى الكريم على اقتراحك وان شاء الله يرى النور قريبا
معلومه ... الموديلات الجديده ليس لابو الفتوح علاقه بها اقصد الشيرى 1300 دى استيراد من الصين وليس تصنيع محلى

والمستورد شركه cig

وائل باشا حبيب قلبي بتغيب علينا كتير قوي ياريس ، بس كنت عاوز أصحح لك معلومه صغيره يا وائوووول

أضغط على الصور للتكبير

[kamatchodj]

http://www.nilemotors.net/Forum/viewtopic.php?t=2378

يابايو باشا انا اقصد الموديلات اللى فى الموضوع ده


يابايو ياحبيبى والله انت واحشنى اكتر

وغيابى عنكم على عينى بس بصراحه مش عايز اشارك ......

الجو العام غير مريح .... والكلام كتير وبطريقه تعكنن .... طب ليه لزومه بقى..... خلينا اصحاب احسن

[محمدايهاب]

أنا مع معاذ طبعا و أنا شخصيا برشح خالد أباظة خاصة من خلال مجلة عالم السيارات و طبعا ده قبل أما تنزل عربيتين كمان و اتنين كمان و بهكذا فعامل الوقت مهم و أبو الفتوح بعربيته هذه تغاطى كثيرا و اتجه إلى الاعلانات التي للأسف وسيلة خداع للشعب المصري و تقرأ في الاهرام مثلا عن أبوالفتوح فتتعجب من كمية النفاق و الكذب عن الانجاز العظيم الذي يدعي أنه حققه
و ارجو أن تصبح عبارة ( عربية تجسد طموحك ) ذات معنى حقيقي

[محمدايهاب]

حذفت للتكرار
د.ايهاب بدر

[sokasoon]

كلام جميل وانا مع الاستاذ معاذ فى كل كلامه

ومنتظرين التنفيذ لانه هيساعد جداا فى الضغط على التوكيل

[khalidsdk]

المشاكل الشائعة عند الجميع (معظم السيارات) هي :

1) التيل سيئ وبيصفر، وعلاجه تبديله بتيل نوعه جيد.
2) السحب ضعيف وخاصة عند تشغيل التكييف ، والحل ؟!!!.
3) العفشة ناشفة، وحلها تركيب مساعدين وسوست من النوع الجيد
4) التكييف في بعض السيارات صمام الساخن بيدخل على البارد مما يؤدي إلى عدم التبريد ، وحله تغيير الصمام بنوع جيد وشغال.
5) صوت طلمبة البنزين عالي ، والحل تغييرها بنوع جيد كما حدث في الدايو اللانوس من قبل.
6) صوت باور الدركسيون عالي عند لف الدركسيون يمين أو يسار حتى بعد تعديل خراطيم الباور ، والدركسيون بقه تقيل شويه بعد التعديل الأول كان أنعم من كده ، الحل ؟!!!

لو التوكيل حل هذه المشاكل العربية دي حتبقى رقم واحد في مصر في فئتها وسعرها

[معاذ الشرباصى]

يا جماعة انا بس كنت عاوز اوضح وجهة نظرى من موضوع الشكوى ضد الوكيل

يعنى دلوقت اللى الواحد بيسمعه ان العربيات اللى بتطلع دلوقت مفيهاش عيوب او العيوب قليلة او مش كبيرة للدرجة مش زى اول الانتاج

طب عمل ايه مع الملاك الاصليين للعربية, اللى من وجهة نظرى هما السبب الرئيسى فى نجاح العربية. كام عربية صينى شوفنا اعلانتها فى الجرايد و فى كل حتة, و الواحد عمره ما شاف واحدة منها ماشية فى الشارع

انتم احسنتم الظن بابو القتوح, و وثقتم فيه, و فى عربيته و بادرتم بالمغامرة دى, كان لازم يقابلها اهتمام اكبر من الوكيل بالناس اللى كان ليها الفضل الاكبر فى مبيعات العربية

دلوقت انا لما الاقى الناس شارية العربية و ماشية بيها فى الشارع, نفسيا ببدأ اقتنع بيها, و ببدأ اسأل عنها و اتابعها, مش كتر الاعلانات هو اللى بيعمل المبيعات دى, الا كانت الجيلى و ماريو و اخواتها مرميين فى الشارع دلوقت

الوكيل مستهبل جدا مع ملاك السيارة, و فى عدم اهتمام كافى بيهم. يعنى انا قريت مرة عن ان فى اتصال عشوائى بيحصل مع بعض العملاء, كويس بس مش من المفروض ان الاتصال ده يكون للكل, و بالاسبقية, يعنى الناس اللى اشتروا فى الاول و الاحتمال الاكبر انه يكون عندهم مشاكل فى السيارة يكون فى متابعة معاهم احسن من كده؟

مش هنفضل نقول كتر خيره و الناس بتتعب, ده واجبهم, و احنا من النعاطف و الرضا بالقليل, بيخلى الناس دى لما تيجى تطلب حقوقك يعاملك كأنك بتشحت منه او هيعمله زكاه عن صحته و عافيته.

لازم يكون فى قطع غيار متوفرة و بكثرة فى المخازن, و لكل مسمار فى العربية, مش لما حاجة تبوظ ابعت اجيبها و تيجى بعد 3 شهور, و لا كأنها جاية على جمل من الصين

انا مبد~يا مش مقتنع بالعربية, بس اللى مخلينى اكتب هنا, ان ملاك العربية هنا فى الموقع بعتبرهم اخوة لى, و من المنطلق ده اتمنى, بالرغم من عدم اقتناعى بيها, ان تكون عند حسن ظنهم, و ربنا يباركلهم فيها, و يكون فى وقفة حازمة مع الوكيل حتى لا يتم الاستهانة بحقوق الناس و مطالبهم

انا اللى خالانى اكتب تانى موضوع صيانة ال 5000 بتاع الدكتور اسلام, حاجة تفور الدم بجد

http://www.nilemotors.net/Forum/viewtopic.php?t=1121

طب الناس اللى طالع عينها دى مش من حقها عليكم انكم تقفوا جنبهم و تشتكوا الوكيل حتى لو حد منكم معندوش مشاكل, و ده يبقى ابسط حقوق الاخوة فى الله

مش واجب برده الوكيل يعرف انه بيتعامل مع فئة محترمة من الناس عارفة اللى ليها و اللى عليها و تعرف ساعة الجد تاخد حقها, او تسبب له مشاكل فى العلن.

مفيش حاجة اسمها مفيش وكيل بيتلوى ايده, كل وكيل و له نقاط ضعف عديدة, فقط اعرفها و استغلها صح, تاخد حقك و فى نفس الوقت تضمن ان غيرك فى المستقبل ياخد حقه, و اكتر حاجة تخوف ابو الفتوح بالذات سمعته لأنه عند خطط بالتوسع فى انتاج مزيد من السيارات, و حاجة زى كده اكيد مش فى صالحه

محدش مثلا جرب موضوع انه يبعت ايميل لشركة شيرى فى الصين, زى ما ناس عملت قبل كده مع بروتون و فولكس و كان دايما بيكون فى واقفة حازمة من الشركة الام حفاظا على عميلها اولا, و على اسمها و سمعتها و سيارتها ثانيا

لابد من الاعتراف ان مبادىء خدمة العملاء و خدمة ما بعد البيع مفقودة عند معظم الوكلاء, لكن اللى بيزيد الطين بلة, انه كمان يبقى مفقود عند الشركة الام بالصين, و ده اللى انا بظنه (يا رب يخيب ظنى ان شاء الله)

العربية هتم سنة بعد شهر تقريبا, هل فى تقييم موضوعى لاداء الوكيل بخصوص خدمة ملاك السيارة الحاليين او تصلييح العيوب فى السيارات الجديدة, هل يملك احد مثل هذا التقييم او احصائيات للموضوع ده؟

[baher]

انا موش فاهم هيا ايه العيوب اللي هنشكي بيها هنقؤل تيل فرامل والعقشه ناشفه

[dr_bandit]

انا بعت اكتر من اي ميل للشركه الام في الصين بخصوص موضوع التكييف اللي انتو عارفينه وللاسف الشديد محدش رد علية بس المهم في الاخر اللي توصلته من خلال تجربتي مع التوكيل انك بتجرب معاهم الاسلوب المحترم في الاول وتديهم فرصه مش اكتر من اسبوعين مهما كان العيب اللي عندك هايف ومش اكتر من 24 ساعه لو العيب اللي عندك لاقدر الله كبير او خطير ولو متحلش في خلال المده دي للاسف وسوري في اللفظ اللي حقوله لازم تروح تهلل وتزعق وترفع صوتك مع الكبير قبل الصغير كانك بلطجي لسه خارج من السجن وعايز تدخله تاني ساعتها حينفذولك كل اللي انت عايزه وعشان تضمن ان كل حاجه اتنفذت صح خلي ليك عين هناك (زي الكهربائي اللي اتعرفت عليه ده) يبأه انت كده حاربتهم بسلاحهم وفي نفس الوقت اخدت حقك ....ده طبعا راي شخصي مني ومش عارف اذا كان ده هو الصح ولا غلط
شكرا ....
اخوكم اسلام حمدي
اسبرانزاوي رقم 8

[mohamed10]

اعتقد اننى اشعر بالحزن الشديد جدا على مايحدث لمالكى هذه السيارة ، فبعد ان كنت انوى شراء هذه السيارة فقد قمت بتغيير وجهة نظرى تماما ، لاننا كشعب نضع شقا عمرنا فى سيارة تعيننا على مشاكل الحياة اليومية وترحمنا من ذل التاكسيات واستعباد الميكروباصات وهوان الاتوبيسات ، ماكل هذه المشاكل التى يعانى منها هولاء الاعضاء ومتى يتم الحساب لهولاء القابعين فى قصور مشيدة على حساب الناس المطحونيين ، اخيرا اريد ان اوجه سوال الا تعتبروا السيارات اليابانى هى من افضلهم بمعنى اللى يخلينى ادفع 65 الف فى سيارة صينى مااجيب احسن منها دايهاتسو بطرازاتها المختلفة ، وشكرا وربنا يعينكم على ما بالاكم .

[محمد جيد]

اقتراح رائع استاذ معاذ وهتبقى خطوة رائدة لأن السوق المصري كله محتاج هذا الأسلوب مش ابو الفتوح ولا مجال السيارات بس عشان يبقى فيه جماعات ضغط للمستهلك يعملها المنتجين والمستوردين والتجار حساب اؤيدك واحيك ونمنى يبقى لهذا المنتدى الجميل دور فعال فعلا

[معاذ الشرباصى]

استاذ باهر
حضرتك مش هتشتكى ان التيل بيصفر او حاجة صغيرة, انا اللى بتكلم معاه ليه استيراد تيل سىء النوع و تركيبه فى السيارات
و بعد اكتشاف انه سىء لهذه الدرجة, لماذا لم يسارع باحضار نوع تيل احسن؟
بالاضافة ان التيل السىء ده بيأثر على الديسكات الخاصة بالفرامل, هل لما يغير التيل هيغير الديسكات؟

هناك استهانة بالعميل, و بكرر مش من ابو الفتوح بس, من وكلاء كتير

بس ليه انا اتكلمت على الاسبرانزا بالذات, لأنها السيارة محل الانظار حاليا, و ما زال فى مقدور ابو الفتوح انه يثبت ان ممكن سيارة صينى تنجح, لكن هذا لا يتحقق بالاعلانات, و الحملات الدعائية, ده بيتحقق بس بسرعة استجابته لأى نقاط ضعف, او عيوب فى السيارة

هو دلوقت هينزل عربيات جديدة,و طاقة المصنع ثابتة, هل نعتبر ده اعتراف ضمنى من ابو الفتوح انه سيارته و بالاخص A516 لم تنجح النجاح المتوقع؟

لو المصنع بيعمل حوالى 12 الف عربية سنويا و يتم تقسيمهم على 6 موديلات, يبقى ده ايه؟ (لانوس, نوبيرا, 516و 620و 113 و 213)

انا حتى لو مش مقتنع بالعربية زى ما قلت قبل كده, يهمنى على الاقل انه عملائها ينجحوا فى اصلاح ما يرونه من عيوب او نقص فى العربية, و ساعتها فعلا تبقى سيارة منافسة بمعنى الكلمة, مش بس من ناحية السعر, لا كمان جودة و تستحمل

ارجو ان ملاك الاسبرانزا يتقبلوا كلامى بصدر رحب, لان و الله غرضى بس المنفعة العامة.

لو هما شايفين ان كلامى مبالغ فيه او فى حاجة غلط يا ريت حد يصلح لى معلوماتى

[ehabbadr]

كلامك محل احترام من الجميع وده واضح من ردود الاعضاء . اما موضوع الموديلات الجديده دى مش مفاجأة لأنه أعلن قبل كده انه سوف يعرض تباعا موديلات مختلفه و منها 4x4 و ده أول مانزل 516 و 620