رعشة غريبة في الدركسيون وانا واقف

[Melad Sedky]

صباح الفل عليكم جميعا.. اليكم التجربة المريرة اللي مريت بيها واللي حصل معايا.
انا كشفت علي العفشة في اكتر من مكان عشان اتأكد من سبب المشكلة.
1. بتاع ضط الزوايا قاللي دي مشكلة في الباور.
2. محمد مهران (من أشهر ميكانيكية الاسبرانزا) قاللي الرعشة دي طبيعي في العربية بسبب ال abs.

ما كدبتش خبر .. وروحت لواحد مشهورفي مجال الباور والعفشة .. متخصص بقي .. عشان يشوف المشكلة فين.
اول ما كشف علي العربية .. قاللي دي شكلها منظم الباور .. لازم أنزل العفشة وأشوف وانا شغال فيها ايه بالظبط .. قولتله ماشي .. فك العفشة كلها قدام .. وقاللي المشكلة سببها حلزونة الدريكسيون .. وقام مغيرها.
قفل العربية وطلعنا جربنا .. زي الفل .. كله تمام ..وقفت حاسبته ومشيت مفيش 100 متر .. لقيت الدريكسيون تقل والرعشة رجعت تاني.
قومت لافف ورجعتله .. قال يبقي نشوف الباور كله بقي .. فك الباور كله حتة حتة ونضفه .. وراجع علي الدورة كلها وعلي ماكينة الباور .. وكان كله تمام وزي الفل .. نقفل ونجرب والعربية متعلقة ع الكوريك .. زي الفل .. تنزل ع الارض .. العيب موجود. قال نشوف الحساسات وننضفها .. نضفناها كلها بالاسبراي وبرضه مفيش فايدة.
وفضلنا ع الحال ده من 3 الضهر لحد 12 بالليل وفي الاخر الراجل سكت وقال شوف يمكن مشكلة في الميكانيكا .. ومشيت بنفس المشكلة والباور اتقل من الاول ولهف مني يومها مصنعية وقطع غيار 400 جنيه.
تاني يوم روحت لمحمد رشاد .. راجل زوق وفاهم وزي الفل وانا زبونه .. اول ما قولتله اتضايق قوي وقاللي حرام كل ده
وقال دي مشكلة في البطاحات وبليها .. فك واشتغل وشحم وظبط .. وراجع ع الباور وغيرلي بلف فيه.. نجرب .. تمام زي الفل .. حاسبته علي 100 جنيه وشكرته ومشيت.
مفيش بعدها ب 10 كيلو .. والعيب رجع تاني .. يا لهوووووووووي.
الباور اتقل من الاول .. وفيه زنة .. والعربية الصبح اول ما بدورها الباور بيكون فاصل شوية وبعدها يشتغل .. والرعشة موجودة وازفت من الاول .. الحقوني يا جماعة .. دا بجد خراب بيوت .. 500 جنيه علي عيب محدش فاهمه والعربية متصلحتش.

[hemaa_82]

زنة يبقي في حمل علي طرمبة البور ....
الاسباب:-
سدد في خراطيم ...
نقص زيت ...
بص بعينك في زيت في مخزن زيت البور اعلي من المنيمم ولا لا .... و هل الزيت احمر ولا لا ...

لو كله سليم و لسة ممكن تبقي الطرمبة بتودع بقي ... مش شايف اي حاجة تاني محتملة .....


مع مراعاة ان المفروض بعد اللبسة اللي انت لبستها امبارح عفشتك كلها سليمة و في التمام .....

[abdulhafeez]

انا فاكر حصل معايا حاجة زي كدا كنت لما الف الدركسيون وبعد نص لفة كدا يبدأ العجل يرج في مكانه لحد ما يوصل للآخر ... كنت لسة في الضمان وساعتها غيرولي طرمبة الباور كلها من غي فلوس والعيب راح ....

على العموم لو طلع طرمبة باور فانا سمعت ان بيركبلها طرمبة باور اللانوس والنوبيرا بدون اي تعديل ....

[Eng.Geo]

معلش هسأل شوية أسئلة
هي اسبيرانزا ايه ؟
الصوت ده وانت واقف وبتلف الدركسيون ولا بتتحرك وبتلف الدركسيون ؟
وانت واقف خالص ال rpm علي كام ؟ وانت واقف وبتلف الدركسيون علي كام ؟ ساعة الرعشة بيبقي علي كام ؟
هقولك علي كام تشخيص من اللي أتشخصوا كانوا غلط
مش abs لأن ال abs مش بيشتغل طول الوقت ومستحيل هيشتغل وانت واقف أصلا ... ده لازم العربية تبقي بتجري وانت دوست عالأخر والعجل كان هيزحف .... ولو انت 516 فانت معندكش abs أصلا
مش بلي البطاحاجت عشان بيسمع في الدركسيون ... ده بيبقي صوت تزييق في الكبوت

[hugan]

ياهندسه
ال 516 فيها abs
ومن شركه بوش الالمانيه

[Melad Sedky]

انا فاكر حصل معايا حاجة زي كدا كنت لما الف الدركسيون وبعد نص لفة كدا يبدأ العجل يرج في مكانه لحد ما يوصل للآخر ... كنت لسة في الضمان وساعتها غيرولي طرمبة الباور كلها من غي فلوس والعيب راح ....

على العموم لو طلع طرمبة باور فانا سمعت ان بيركبلها طرمبة باور اللانوس والنوبيرا بدون اي تعديل ....

بالظبط كدة ايوة .. هو دا اللي بيحصل معايا بالظبط .. يعني كدة طرمبة الباور؟

[Melad Sedky]

معلش هسأل شوية أسئلة
هي اسبيرانزا ايه ؟
الصوت ده وانت واقف وبتلف الدركسيون ولا بتتحرك وبتلف الدركسيون ؟
وانت واقف خالص ال rpm علي كام ؟ وانت واقف وبتلف الدركسيون علي كام ؟ ساعة الرعشة بيبقي علي كام ؟
هقولك علي كام تشخيص من اللي أتشخصوا كانوا غلط
مش abs لأن ال abs مش بيشتغل طول الوقت ومستحيل هيشتغل وانت واقف أصلا ... ده لازم العربية تبقي بتجري وانت دوست عالأخر والعجل كان هيزحف .... ولو انت 516 فانت معندكش abs أصلا
مش بلي البطاحاجت عشان بيسمع في الدركسيون ... ده بيبقي صوت تزييق في الكبوت

هي اسبيرانزا ايه ؟ a516
الصوت ده وانت واقف وبتلف الدركسيون ولا بتتحرك وبتلف الدركسيون ؟
وانا واقف بمجرد الف الطارة اول نص لفة يمين او شمال وتفضل الرجة دي موجودة في الطارة والكاوتشات
وانت واقف خالص ال rpm علي كام ؟ وانت واقف وبتلف الدركسيون علي كام ؟ ساعة الرعشة بيبقي علي كام ؟
انا اللي اخدت بالي منه اني وانا واقف في الطيعي بيكون علي 0.8 .. ولما بلف الطارة الrpm بيقل لحد حوالي 0.6
هقولك علي كام تشخيص من اللي أتشخصوا كانوا غلط
مش abs لأن ال abs مش بيشتغل طول الوقت ومستحيل هيشتغل وانت واقف أصلا ... ده لازم العربية تبقي بتجري وانت دوست عالأخر والعجل كان هيزحف .... ولو انت 516 فانت معندكش abs أصلا
فيها abs وشغال مش مفصول وسليم واداؤه ممتاز
مش بلي البطاحاجت عشان بيسمع في الدركسيون ... ده بيبقي صوت تزييق في الكبوت
اللي كشفت عليه هو الاتي:
1. دورة الباور كاملة عند متخصص باور .. وقال كل حاجة سليمة
2. حلزونة الدركسيون غيرتها
3. البطاحات وبليها كله سليم وتم تشحيمهم

[mrastra]

مش abs لأن ال abs مش بيشتغل طول الوقت ومستحيل هيشتغل وانت واقف أصلا ... ده لازم العربية تبقي بتجري وانت دوست عالأخر والعجل كان هيزحف .... ولو انت 516 فانت معندكش abs أصلا
مش بلي البطاحاجت عشان بيسمع في الدركسيون ... ده بيبقي صوت تزييق في الكبوت

المهم ان حضرتك قلت على دة لا وعلى دة لا وما قلتش سبب مشكلة الراجل

[Melad Sedky]

يا حضرات انا شايف ان المشكلة غالبا في طرمبة الباور .. الزيت مش بينقص .. والدركسيون تقيل عن الطبيعي .. والرعشة مارحيتش.
والكلام دا بناء على تجربة أحد الاعضاء الافاضل معانا هنا في المنتدى حصلت معاه نفس المشكلة
واوول الشهر ان شاء الله هروح اشوف هعمل فيها ايه
وربنا يرحمنا من فتي الصنايعية واشتغالاتهم
الواحد بس لو يفهم في العربيات كويس يروح للصنايعي يقولله اعمللي كذا وبس .. ويوفر مصاريف ووقت ومجهود وصدااااااااااع واشتغالات