تقرير عن تنظيف الريداتير ودوة المياه ل 516

[elkomyalto]

السلام عليكم وحمة الله

احب ان اقدم لكم التقرير الثانى لى وهو كيفية تنظيف الريداتير ودورة المياه

طبعا انتوا فاكرين موضوعى عن الذى حدث لى وانا فى مركز المتحده ( المفاجأه )

والحمد لله كان خير .... فقلت اعمل بالنصيحه وانظف دورة المياه والريداتير

فذهبت الى الاسطى سيد بتاع الريداتير ال ساكن بجوارى وقلتله عايز انظف دورة المياه والريداتير

والراجل قالى اتفضل يا باشا وبدأ فى حل الريداتير وترك المياه تنزل من فتحات دورة الميه

ثم اخذ الريداتير الى الورشه لكى يبدأ فى تنظيفه

واليكم خطوات التنظيف مع بعض الصور :::


اولا حكتلوا على ال حصل معايا فى المتحده قالى الحمد لله انها عدت على خير

وبعدها احضر حاجه اسمها ( نفط ) هى عباره عن سولار نظيف جدا واضافها داخل الريداتير بعد ان سد الفاتحه السفليه للريداتير بسداده عملها عنده ثم بعد ان اضافها كلها سد الفاتحه العلويه للريداتير ايضا
ثم بدأ يقلب الريداتير لاعلى ولاسفل وعلى الجانبين حتى يدخل هذا النفط فى جميع مواسير الريداتير
وهذه صورة زجاجة النفط





وهنا وهو بيضعها فى الريداتير بعد ان سد الفاتحه السفليه




ثم بعد التقليب فى الرريداتير نزل منه شوية زيت كانوا فى الريداتير ها هما كما فى الصوره
بعد ان فضاهم فى جركن مفتوح




ثم احضر بعدها مية نار وخفها جدا مع انى اعترضت معاه على مية النار لانى اسمع انها بتأكل مواسير الريداتير وبتبوظه من الداخل فقالى الكلام ده لو كان تركزها عالى وسبتها فتره طويله فى الريداتير
المهم صبها فى الريداتير وكما فعل مع النفط فعل ايضا مع مية النار كما بالصوره





ثم وجه على الريداتير البشبورى بتاع النار مع المرور على وجه الريداتير بطريقه سريعه
كما بالصوره ....







ثم بعد ذلك فضى الميه فى الجركن وكانت نازله من الريداتير لونها ما بين البرتقالى والاصفر من الصدأ
كما بالصوه ...





بعد ذلك رش مية النار ال نازله من الريداتير على وش الريداتير من الخارج
كما بالصوره ...





ثم بدأ فى غسيل الريداتير من الخارج بالخرطوم ثم من الداخل
كما بالصو ر.... وكما ترون كمية التراب الكبيره ال نازله من الرريداتير من الخاج










وده مكان الريداتير فى العربيه خليته ينظف السربنتسنه بتاع التكييف من الخارج بالمياه
قبل تركيب الريداتير ...




وبعد ما ركب الريداتير بدأ فى ملى القربه مياه مع ترك الكوتشه العليا للريداتير مفتوحه
مع وضع منظف صابون فى القربه لكى ينظف دورة التبريد ... وعند سؤالى له لماذا لا نضع اى ماده
منظفه فى دورة التبريد غير الصابون ... ؟ قالى هتبوظ الجوانات والكوتش بتاع الدوره

واليكم الصورة ..




و ده صابون سائل





دى الكوتشه ال داخله على الريداتير طبعا سيبها مفتوحه مش متوصله بالريداتير حتى تنظف الدوره
كويس مع وضع الخرطوم فى القربه وتركه شغال ...









وبعد ما تأكدنا من نظافة الدوره وذلك بعد خروج كل الصابون ركب الكاوتشه فى الرريداتير ثم وضع علبتين مياه خضراء (كانز ) يقال انها امريكى لانها مكتوب عليها صنع فى امريكا سعر العلبه 15 جنيه كما هو واضح بالصوره ..










ثم وضع العلبتين فى القربه وزودها بالميه العاديه من الخرطوم الى العلامه فى القربه وترك العربيه دايره حتى تسخن وتشتغل المروحه مع تفريغ الهواء ....





وقالى تمام كده وحاول تنظف الريداتير كل 6 شهور علشان الصدأ
وبذلك تم تنظيف الريداتير ودورة التبريد واخذ 50 جنيه

ارجوا ان اكون قد افدتكم ...ومن عنده اى ذياده لا يبخل بها علينا
حتى الكل يستفاد

والى اللقاء فى تقرير اخر
اخوكم محمد الكومى

[دكتور خالد]

بالتوفيق ان شاء الله و تكون المشكلة اتحلت

[megaman]

مكانه فين الراجل ده يا باشا لو سمحت وبعد اذنك انت كنت بتستخدم ميه خضرا قبل كده ولا لا

[hugan]

تقرير ممتاز
واضح انه صنايعي نضيف وشغال بضمير

[AMGAD1521977]

انا جربت الموضوع ده قبل كده بس من غير ما افك الرادياتير و بحط مياه خضراء من الزيرو و عملت غسيل دورة تبريد فى محطة موبيل عن طريق ماكينة مخصوصة لغسيل دورة التبريد و فكيت بس اربة المياه و غسلتها بس ماشاء الله تقرير 100 100 الله ينور عليك و مبروك عليك الرادياتير بعد تنظيف دورة التبريد و تحياتى لك

[elkomyalto]

بالتوفيق ان شاء الله و تكون المشكلة اتحلت

الحمد لله انا شايف ان الاداء تحسن فى دورة الميه
شكرا دكتور احمد على المشاركه

[elkomyalto]

مكانه فين الراجل ده يا باشا لو سمحت وبعد اذنك انت كنت بتستخدم ميه خضرا قبل كده ولا لا

مكانه عندى بالهرم لو عايز ترحله تحت امرك

وانا كنت لسه شارى العربيه قريبا وكان صاحبها بيحطلها ميه عاديه من الحنفيه

[elkomyalto]

تقرير ممتاز
واضح انه صنايعي نضيف وشغال بضمير

استاذنا الكبير هوجان

شكرا ياباشا .... فعلا هو صنايعى كويس

[elkomyalto]

انا جربت الموضوع ده قبل كده بس من غير ما افك الرادياتير و بحط مياه خضراء من الزيرو و عملت غسيل دورة تبريد فى محطة موبيل عن طريق ماكينة مخصوصة لغسيل دورة التبريد و فكيت بس اربة المياه و غسلتها بس ماشاء الله تقرير 100 100 الله ينور عليك و مبروك عليك الرادياتير بعد تنظيف دورة التبريد و تحياتى لك

شكرا استاذ امجد

على فكره لازم تفك الريداتير وينضف كويس لانه بيتراكم فيه الصدأ والشوائب
ومينفعش معاه موضوع المكينه

[faroojj]

ملحوظة خطيرة جداً :
يتم إضافة ماء مقطر إلى المياه الخضراء المركزة نظرا لخلوهه من الأملاح بعكس الماء العادى المليء بالأملاح و الذى يسد مواسيير الريداتير

[ashrafandarwa]

مكانه عندى بالهرم لو عايز ترحله تحت امرك

وانا كنت لسه شارى العربيه قريبا وكان صاحبها بيحطلها ميه عاديه من الحنفيه

معالى الباشا .. بعد اذن حضرتك فين فى الهرم لان الواحد ممكن يروحله بدل شغل محطات الوقود وشكرا لحضرتك

[elkomyalto]

معالى الباشا .. بعد اذن حضرتك فين فى الهرم لان الواحد ممكن يروحله بدل شغل محطات الوقود وشكرا لحضرتك

فى الميروطيه بجوار المدرسه اليابانيه
وهبعتلك تليفونى على الخاص
لو عايزنى اوصلك له اى خدمه

[shur3000]

بعد اذنك اية فايةدة انى بعد ما انضف احط مية حنفية كدة كدة هتصدى طب ما تحط مية مقطرة انضف

[محمود سامح]

شكرااا مغلومات قيمة جدااااا

[ashrafandarwa]

فى الميروطيه بجوار المدرسه اليابانيه
وهبعتلك تليفونى على الخاص
لو عايزنى اوصلك له اى خدمه

الف شكر معالى الباشا ربنا يكرمك دائما ان شاء الله