الرجاء الافاده بخصوص الاسبرانزا a113!!!!

[x_gomgom]

السلام عليكم ......
اولا احب اشكر كل الرجاله اللي بتشرف على النتدي المبدع و المفيد جدا......
و اكيد طبعاً الاخوه اللي بجد هما نور المنتدي دا....
انا كل مشكلتي كلاتي... انا معايا حوالي 55 الف و كنت بلف في السوق بجد لقيت ال A113 شكلها تحفه و مواصفاتها حلوه و مع صديق ليا و الحمد لله تمام و الله يباركله فيها...هيا دلوقتي ب 52900
يا ريت ملاك العربيه يقولولي ايه رأيهم بصراحه فيها و هل يعتمد عليها (انا كان معايا لادا نيفا و بعديها 2107 اكيد فاهمني) و خايف بصراحه من الصيني و قطع الغيار...
طيب ايه نظمها بناكل بنزين؟ بتعمل كلم في الصفيحه؟؟؟ ايه اخبار اسعار قطع الغيار؟؟؟ ايه العيوب اللي شايفينها فيها (غير انها صيني و الكلام دا و الله انا شبعت منه لما جيت اشتري الادا اهم حاجه ان يكون اللي بيقول الكلام دا مالك فعلي جربها)
يا رييت اخوانا ملاك a113 يفيدوني في الموضوع دا.... و الف شكر مقدماً

[MoToRiZeR]

العربية مع أقرب صديق لي و سقتها كتير و عارف كل حاجة فيها من ساعة ما جت حتي ساعات انا اللي بروح أعملها الصيانة في التوكيل .. المهم

هي معاه من ساعة ما نزلت لأنه إشتراها من أول دفعة صيني نزلت كانت تقفيل صيني .
المشاكل اللي في العربية معظمها سوء خامات .. يعني هي داخلة في سنتين أهوه .. ما شاء الله كموتور مبتقولش لأ .. عفشتها ناشفة شوية .. سوء الخامات بقي يتمثل في مثلاَ الكاوتش اللي بيقفل الشنطة و الأبواب مع جسم العربية هتلاقيه بيقع .. مرة طوبة خبطت في قربة مياه المساحات خرمتها .. علبة الشكمان بتتخرم برضه كتير .. حتي الكاوتش ظهرت فيه بقاليل بسرعة و إنتهي عمره الإفتراضي و هيغيره .. مشكلتها فعلاَ في جودة بعض الخامات .

و هو عنده مشاكل تانية في الكهربا بس ده بسبب إنه لعب فيها برة و ركب زينون فا برجل الكهربا و خلي العدادات تفصل ساعات و هو ماشي و العربية تقطع .. و ده كان بسبب اللعب في الكهربا ..

هي كموتور و من جوة حلوة جداَ و كماليات حلوة .. بس هتتعبك في شوية حاجات هايفة هتظهر كل شوية بسبب سوء بعض الخامات .. لو ميهمكش الموضوع ده و هتتعامل معاها عادي يبقي توكل علي الله .

[x_gomgom]

طيب هل المشاكل دي اتحلت في الموديلات الجديده 2009؟؟
و هل موديل 2009 دا متجمع في مصر؟ و الاستهلاك في البنزين ايه ظروفه....
شاكر جدا لردك و اهتمامك

[MoToRiZeR]

مقدرش أفتيلك في النقطة دي بصراحة لأني معرفش حد عنده الموديل الجديد بس هي بقت تقفيل مصري فعلاَ .
بالنسبة لإستهلاك البنزين معقول جداَ مش بلاعة و مش إقتصادية أوي برضه .

[x_gomgom]

تقريباً كام في ال 20 لتر؟
و شكراً جزيلا علي اهتمامك.....

[MoToRiZeR]

تقريباَ 280 في الصفيحة (رقم تقريبي يزيد ساعات و ينقص ساعات)
و العفو يا ريت أقدر أفيدك أكتر .

[x_gomgom]

الف الف شكر بجد و اسف لتعبك معايا..
و يا ريت باقي الملاك يشاركونا رأيهم عن العربيه

[x_gomgom]

فييين الردود يا رجاله؟؟؟؟
محدش هنا معاه العربيه دي ولا ايه؟؟؟

[x_gomgom]

هي العربيه مش منتشره هنا في المنتدي شكلها كده.......
انا مندوب المبيعات اللي في ابو غالي قايل انهم بايعين 20,000 في سنه..... بس شكلها كدا كلام اعلانات......
يا ريت الردود االي عنده معلومه يفيدنا....
و ايه رأيكم ال A133 ولا chevrolet spark 1000cc احسن؟؟؟
مع العلم انهم تقريبا نفس السعر.....
برجاء الاهتمام

[x_gomgom]

واضح ان كدا محدش معاه العربيه دي و مفيش معلومات عنها.......
يا جماعه طيب اي مساعده

[Hacker5]

أسال فى منتدى نادى اسبيرانزا افضل لان ملاك السيارة مش منتشرين فى المنتدى
فا ممكن حضرتك تسأل فى المنتدى بتاعها فى نادى اسبيرانزا

[x_gomgom]

دا منتدي تاني خارج هذا المنتدي؟؟؟
طيب يا ريت لو في لينك او شئ للافاده
شكراً

[Hacker5]

تم الرد على الخاص

[x_gomgom]

شكراً جزيلا لكم جميعاً

[boora87]

ya basha ana m3aya elcar b2ala sana w el7 zy elfol mafesh 3'er elcasset kan baz w et3'ayyar fe eltawkel w kollo fe eldman w ,,el3yob ,,el3afsha f3ln nashfa shewayya w law t3'ayar elkawetsh kman yeb2a kollo kda zy elfol