تثق اكثر فى الكورى ام الماليزى؟

[newman]

طب أنا عاوز أسأل سؤال تانى يمكن بعيد عن الموضوع تجيب هارد ديسك للكمبيوتر بتاعك ماليزى و لا كورى طبعا مش هاعلق على السؤال بس كلنا عارفين ماليزيا سابقة فى الموضوع ده أد إيه و بالنسبة للسيارات ماليزيا بتعمل ماركة تانية و بتصدر منها للخارج زى البرودوا و دى بتتمتع بخامات أعلى فى الجودة من بروتون بس وكيلها فى مصر سىء للغاية و غير مهتم بيها و بالنسبة لكوريا فهيا متقدمة نسبيا عن ماليزيا فى صناعة السيارات للبداية المبكرة و الدعم من العمالقة مثل الولايات المتحدة للإستمرار فى الأسواق بقوة بس سيبكم بقى من ده كله إحنا بتوع كلام و خلاص إمتى بقى هانبقى زى كوريا أو ماليزيا علشان فعلا ننتقد عن دراية ده عامل النظافة فى ماليزيا كان أنظف بمراحل من موظفين كبار عندنا سواء فى لبسه و هندامه أو إعتزازه بنفسه و بلده و طبعا نفس الكلام أكيد فى كوريا بس أنا باتكلم على اللى شوفته بعنيا كفايا إن الأوربيين لما كانوا بيروحوا معانا ماليزيا كانوا بفضلوها فى الجمال و النظافة و النظام و الهندام و الأخلاق عن بلادهم يارب نبقى زى ماليزيا و لا كوريا فى يوم من الأيام و بما إنى جربت الهيونداى الكورى متمثلة فى الفرنا الكورى أتوماتيك و كانت ب 90 الف جنيه 2004 قبل بداية التجميع المصرى و حاليا معايا الواجا هانم الماليزى بردوا ب 90 الف جنيه و أتوماتيك 2006 أحب أعبر عن رأى فى الإثنين الفرنا خامات داخلية معقولة أداء متوسط محرك جبار 1600 و ناقل حركة متوسط الأداء و عفشة سيئة و الواجا خامات داخلية جيدة أداء المحرك الميتسوبيشى ال 1600 متوسط ناقل الحركة ميتسوبيشى أداؤه جيد العفشة جيدة الصاج ممتاز.
طبعا دى مقارنة سيارة بسيارة و عن تجربة شخصية لكن مقارنة صناعة السيارات الكورية بصناعة السيارات الماليزية مش عملية سهلة و تحتاج لخبرة كبيرة فى مجال السيارات و ليس مجرد آراء لهواة أمثالى رغم عملى فى مجال الهندسة و بالتحديد فى النقل البحرى لكنى أجد نفسى أقل من أن أقيم تجربتين عظيمتين للصناعة مثل التجربتين الكورية و الماليزية

كلام مظبوط وياريت نبقى زيهم بدل ماحنا عمالين نكلم وخلاص

[mohamedhamam]

الصناعة الكورية بصفة عامة و منها صناعة السيارات كلها مبنية على المواصفات القياسية اليابانية و هى أرقى و أكثر مواصفات قياسية موجودة فى العالم كله تراعى معايير الجودة و عليه فالصناعة الكورية صناعة محترمة و واعدة جداً فى المستقبل و الدليل ما وصلت إليه اليوم الدايو و الهيونداى و الكيا حيث أصبحوا من مصاف كبريات الشركات العاملة فى مجال صناعة السيارات فى العالم اليوم

[tigernet]

اثق فى الكورى

[abou_ruqi]

في ماليزيا خطة اسمها 2020 والغرض منها ان ماليزيا تصل إلى مرتبة اليابان و الصين اقتصاديا و تقدما
وطبعا حيحلوا محل كوريا الجنوبية في كل شيئ

والبداية مبشرة في موضوع السيارات , فالماليزيون يعتقدون انهم صنعوا اول سيارة تتستطيع ان تقف على نفس مستوى السيارة اليابانية وبذلك يكونوا سبقوا كل الاسيوي

وهي بروتون ساتريا نيو
PROTON Holdings Berhad - Highlights & Features

وانا اعتقد ان بردوا صنعت سيارة جميلة و مبشرة ومحترمة جدا في السوق الماليزيا وهي ألزا
Perodua : Perodua Alza - Versatile As You
بالإضافة لسيارة بروتون اللي معجب بيها برضه و هي اكسورا
PROTON Holdings Berhad - Highlights & Features

وان شاء الله نشوف بروتون وبردوا في مستوى مرسيدس وبي ام عن قريب بإن الله

[spiderloking]

والنبي الناس اللي بتتكلم علي بروتون قبل ما تفتي و تقارن و تقولك بروتون عربيات مش حلوه تركب العربيه الاول و بعدين تتكلم انما تتكلم كدا و خلاص يبقي سيادتك بتفتي و احنا اكتر شعب بيحب يفتي اساسا و عاملين نفسنا فاهمين و خلاص

[SALAHHAKIM]

السلام عليكم
كوريا الجنوبية تُعتبر بدايته الحقيقية زي بروتون بالظبط في موضوع التصنيع
أول سيارة من هيونداي بالموتور كانت عام 1989 تقريبا أو 1990 .... حاجة زي كدا و كانت هيونداي بوني موديل من موديلاته . و بعدين أكسل . .... و كوريا الجنوبية بتتطور بطريقة رهيبة خصوصا أنا أمريكا فاتحلها السوق الأمريكي على البحري لتطوير كوريا الجنوبية نكاية في كوريا الشمالية . و ده سبب من أسباب التطور الرهيب اللي حاصل في كوريا الجنوبية في كل شئ مش السيارات فقط .

لما نيجي نتكلم عن ماليزيا .
يا جماعة ماليزيا جديدة في السوق المصري إنما مثلا بتبيع عربيات في أنجلترا من 20 سنة
يعني مش شركة جديدة .... الشركة عمرها 28 سنة تقريبا و بدأت مع ميتسوبيشي
و بعدين أشترت لوتس .... يعني مش ناقصهم خبرة و لا حاجة للناس اللي بتقول أن الشركة لسة قدامها شوية و الكلام ده .


لو حضراتكم بتتكلموا على تاريخ التأسيس
طيب سؤال

هل صناعة ميتسوبيشي اليابانية أفضل أم هيونداي الكورية الجنوبية ؟؟؟
( أنا شايف أن السؤال ده غلط .... بالظبط زي سؤال رأس الموضوع !! )
طيب ليه غلط ؟
علشان ممكن ميتسوبيشي تطلع موديل زبالة ............. و تيجي شركة لسة فاتحة أمبارح تطلع موديل حكاية .
و الشركة اللي لسة فاتحة أمبارح دي ممكن تكون واخدة خبرة بتعاونها و شراكتها مع شركة تانية أكثر خبرة في السوق .

ميتسوبيشي اليابانية تأسست سنة 1973 .... هيونداي سنة 1967 .... النصر سنة 1960 ..... بروتون سنة 1981

يعني الموضوع مش موضوع سنة تأسيس
أهي النصر أقدم منهم كلهم .....
هل تثق في منتجات شركة النصر أكثر من منتجات كوريا الجنوبية ؟؟؟؟


عربيات بروتون ( جين 2 هاتش باك و سيدان ) مشكلتها الوحيدة و الأساسية هي بعض عيوب التقفيل اللي بتظهر مع ناس و ناس لاءة .... و الواحد مش بيحاول يقلل من حاجة زي دي و لكن برضه لازم كل حاجة تأخد وضعها الطبيعي بدون تضخيم و الناس بتفتكر أن أحنا متحمسين و خلاص و بندافع و خلاص .

طيب ليه الواحد شايف أن لف بكرة شيكارتون على قفل الكنبة الخلفية لمنع التزييق مش مشكلة .
علشان أنا ركبت مثلا الأكسنت الجديدة ( فئة حجمية أقل من الجين 2 )
و شوفت المميزات الآتية فيها :
تقفيل جيد جدا
سحب موتور غير معقول بالاضافة لنعومة الموتور في دورانة

و لكن لم أجد الآتي
كماليات مناسبة ووسائل أمان
اتزان على الطريق و تماسك العربية في الأرض .....
و صاج ضعيف بيتأثر بأي لمسة و مع مرور الزمن بتلاقيه حصل في تموجات .

يبقى أجيب لفة شيكارتون بخمسين قرش و ألفها على قفل الحديد الصغير علشان أمنع التزييق ( اللي مظهرش عندي الحمد لله ) ولا أشتري عربية تانية خالص أقل في الركوبة من ناحية الأداء و الاتزان ؟؟؟؟؟
طبعا كل واحد له وجهة نظر ..... بس ياريت الناس تحترم وجهات النظر المقابلة و بلاش كلمة الناس بتدافع بحماس و تقلل من العيوب و كلام زي ده علشان بيزعل و الله .
لأن اللي أنا شايفه صح .......... أنت ممكن تشوفه غلط .

بروتون بتحاول تعمل معادلة
بتديك عربية ثابتة زي الألماني .... صاجها قوي زي الألماني ..... و موتور كويس من تصميم لوتس ( يعني خبرة في مجال سيارات السباق ) ....و كماليات كاملة من مجامعية ..... ووسائل أمان ..... و سعر مناسب لكل ده .... و ده بييجي على حساب جودة التقفيل أحيانا و أحيان أخرى بيجي على حساب أسترخاص بعض خامات الصالون الداخلية .

إنما من ناحية الخبرة ..... الخبرة موجودة عند ماليزيا و لكن هما بيحاولوا ينافسوا في السعر و عمل اسم مناسب في السوق و تحقيق المعادلة بتاعتهم ( توفير سيارة رياضية لكل الناس بسعر مناسب )

صناعة كوريا من الصناعات المحترمة جدا و اللي أنا شايف أنها تقف رأس برأس لمنتجات اليابان .... في كل حاجة مش العربيات بس .

على فكرة أحنا فيه حاجات كتيرة ما نعرفهاش عن ماليزيا و ازاي ان ماليزيا دولة متطورة و متقدمة و لها مجالات تفوق مثل الألكترونيات مثلا .

سؤال بقى مهم
اشمعنى ماليزيا اللي بنقارنها بكوريا ؟؟؟
يعني أشمعنى بجد ..... ده سؤال مهم و مش عارف مش لاقي أي مغزى من مقارنة الدولتين ؟؟؟

فيه حاجة تانية عايز أضيفها
أن ماليزيا دولة إسلامية ..... و كوريا غير إسلامية
و كوريا حليف قوي جدا للولايات المتحدة الصهيونية .... و أحنا عارفين أن الصهاينة اليهود كل همهم محاربة المسلمين في كل مكان في العالم و العمل على عدم تطوير اي دولة اسلامية في أي شئ
مثل ما حدث بين باكستان و الهند عند التجارب النووية
امريكا واقفة مع الهند ضد باكستان ؟؟؟؟ محدش سأل نفسه السؤال ده ؟؟؟ و إسرائيل عايزة تضرب مفاعل باكستان و مفاعل ايران زي ما ضربوا مفاعل سوريا و مفاعل العراق .

ده مخطط .
و ينطبق الكلام هنا على ماليزيا
لن يفتحوا لها السوق الكبير مثلا مثلما فعلوا مع كوريا في بدايتها ( تركوا كوريا تقدم موديلات متأخرة جدا بالنسبة للسوق الأمريكي في ابلداية علشان تقدر كوريا تبيع و تنافس و تعمل أسم و كل ده نكاية في كوريا الشمالية )

أنا قلت الكلام السياسي ده علشان بس الناس تقدر تفهم الدنيا ماشية ازاي ...لأن الموضوع مش صناعة بس !!! الموضوع فيه عوامل تانية كتيرة زي السياسة اللي تقدر تخلي بلد زراعي كامل زي كوريا الجنوبية يبقى وحش صناعي له صناعات متطورة و تتفوق على بعض صناعات الدول العتيقة .

يبقى الموضوع مش بالخبرة بس .... و مش بسنة التأسيس بس .... و مش بموقع الشركة المُنتجة بس

الموضوع سياسي + عمل جاد و أبحاث علمية .

-----------------------------------

الأفضل مقارنة سيارتين .... مش بلدين .
و تحياتي لكم جميعا .... وتقبلوا وافر التحية
أخوكم توت

على فكرة
أنا بأثق في الأثنين .... و أنا شايف أن الأثنين حلوين جدا فيما يقدموه من مميزات تختلف من سيارة لأخرى .

تسلم ايدك

[ramy01011]

الكوري يكسب لانة عمل طفرة في عربياته ابتداء من 2010 و هيونداي بقي ليها مكانة عالمية

[lanos2004]

المقارنه لا تصلح اصلا--كوريا فى المقدمه بفرق شاسع--عاوزين تقارنوا شركات ومصانع عملاقه بعربيه واحدة او اتنين ماليزى

[mo7hamedemad]

الماليزى

[S O P H O S]

الكروي هيكسب
بس مجرد ان الماليزي فالوقت القصير ليه ده ويتقارن بسهولة مع الكوري
ده لوحده انجاز يحترم عليه المالزين ...
مجرد راي

[ahmad--ezzat]

كوري طبعا,,,ياراجل دي شركه هيونداي مسحت التويوتا في دول الخليج والعالم,,,الماليزي في الطريق ان شاٱ الله ويارب يقفلوا عربيات عدددل

[alzelafy]

الجنازة حارة و الميت كلب

[hamaad]

ليه هيونداى متقدمة عشان عمل جاد بدون نوم او انهزام ولا معرفة شى الا العمل طبعا اكثر بكتير من الماليزين ماليزيا بتحاول تسرع من خطواته ولكن كوريا سريعة جدا بدون راحة وهذا هو الاختلاف ولكن السيارة الكورية مهما كان ضعفية جدا فى الاداء وشوف اداء الوجان فى السوق المصرى سريعة جدا فى البيع وهزمت سيارات كتيرة كورية بقالهم سنين كتير هزمت لانوس وفيرنا سيارات لا تنفع مع كامل تقديرى لسيارات الماليزية اجمل بكتير من الكورى ده مجرد راى

[kotimg2]

اليابانى طبعا من حيث الاعتمادية

[Forever.Leo]

الكوري اكيد ، و ده من وزن الماركات الكوري عالميا و كحصص بالسوق