عايز مساعدة قبل ما اشتري ساجا

[ashraf_aly]

السلام عليكم ورحمة الله وبركاته يا بروتوناوية

انا الحمد لله خلاص اقتنعت بالساجا بعد كل الكلام اللي قريته عنها هنا وخلاص نويت اكون بإذن الله بروتوني ساجاوي

انا لسه جديد هنا معاكم وفيه اسئلة كتيييير عايزكم تساعدوني فيها

1- انا من اللي قريته لاقيت ان فيها كمبيوتر رحلات وناس قالت لأ مفيهاش وناس قالت فيها بس مبيجيبش استهلاك البنزين وكلام كتير
انا دلوقتي عايز اعرف فيها ولا نفيهاش ولو فيها ايه مميزات بالظبط يعني فيه ايه ومفيهوش ايه (يعني هل هوه زي ال gen2 ولا لأ ولو كان لأ ايه الفرق)

2- لما اروح اشتري اللي عرفته ان افضل فرع ابو رواش واني اروح ل م/محسن وسمعت كتير عن م/ايمن لكن محدش قال اتصل عليه ازاي ولا اعمل ايه لما اروح اشتري

3- ايه الاوراق او اي حاجة مطلوبة اخدها معايا وانا رايح اشتري

4- امتي ممكن استلم العربية وهل لو هاستني فترة حجز هادفع المبلغ كله ولا جزء بس بحجز بيه وبيكون الاستلام امتي يعني بعد اد ايه من يوم الحجز

5- ايه المميزات اللي ممكن احصل عليها نتيجة اني في نايل موتورز وازاي احصل علي البادج بتاعها

ياريت مساعدة ضروري يا رجالة البروتون علشان اكون معاكم قريب بإذن الله

[krim71]

و انا زيه بالظبط بالظبط بالظبط

[marsguy]

أنا هجاوب عن اللي أنا عارفه بس:

لأ يا سيدي مافهاش كومبيوتر رحلات، فيها عداد كيلومترات عادي جداً

مش عارف هاتستلم إمتى، الموضوع ده يتوقف على الكميه المتاحه من العربيه والطلبات اللي عليها، بس لو هاتحجز هاتدفع مبلغ بسيط للحجز، 500 ولا ألف جنيه وهاتاخد بيه وصل وهايتخصم من ثمن العربيه الإجمالي.

[Abo.Mayyam]

السلام عليكم ورحمة الله وبركاته يا بروتوناوية

انا الحمد لله خلاص اقتنعت بالساجا بعد كل الكلام اللي قريته عنها هنا وخلاص نويت اكون بإذن الله بروتوني ساجاوي

انا لسه جديد هنا معاكم وفيه اسئلة كتيييير عايزكم تساعدوني فيها

1- انا من اللي قريته لاقيت ان فيها كمبيوتر رحلات وناس قالت لأ مفيهاش وناس قالت فيها بس مبيجيبش استهلاك البنزين وكلام كتير
انا دلوقتي عايز اعرف فيها ولا نفيهاش ولو فيها ايه مميزات بالظبط يعني فيه ايه ومفيهوش ايه (يعني هل هوه زي ال gen2 ولا لأ ولو كان لأ ايه الفرق)

2- لما اروح اشتري اللي عرفته ان افضل فرع ابو رواش واني اروح ل م/محسن وسمعت كتير عن م/ايمن لكن محدش قال اتصل عليه ازاي ولا اعمل ايه لما اروح اشتري
الصحراوى أحسن مكان مع أ.محسن 0105119209

3- ايه الاوراق او اي حاجة مطلوبة اخدها معايا وانا رايح اشتري
1000 جنيه وبطاقتك

4- امتي ممكن استلم العربية وهل لو هاستني فترة حجز هادفع المبلغ كله ولا جزء بس بحجز بيه وبيكون الاستلام امتي يعني بعد اد ايه من يوم الحجز
كلم أ. محسن هيفيدك

5- ايه المميزات اللي ممكن احصل عليها نتيجة اني في نايل موتورز وازاي احصل علي البادج بتاعها
ممكن تكلم أيمن Ayman_52 عشان يمكن يكون فى خصم ويحاول يظبطك فيه
وممكن تاخد منه إستيكر المنتدى وده بيديك خصم 10% على قطع الغيار فى الصيانات بعد كده

ياريت مساعدة ضروري يا رجالة البروتون علشان اكون معاكم قريب بإذن الله

وعليكم السلام ورحمة الله وبركاته
أهلا بيك يا باشا وإن شاء الله تبقى بروتونى أصيل قريبا

شوف إجاباتى فوق ياباشا.

[powerofhelll]

فيها عداد رحلات بيعرض المسافه المقطوعه بس مفيش متوسط استهلاك البنزين و ساعه

[mo7hamedemad]

والله الموضوع دة الى يقدر يفيدكم فية هوة استاذ عمرو وانا لسة مقابلة النهاردة ف التوكيل وهوة انسان عندة حب شديد انة يساعد الناس

[ashraf_aly]

شكرا ليكم كلكم علي ردودكم وفعلا هوه دة المعروف عن رجالة البروتون

وادعولي بقي اني انضم ليكم قريب بإذن الله

بس لو ممكن تقولي يا ا/ محمد عماد اتصل علي ا/عمرو ازاي او اقدر اوصله ازاي؟

[ashraf_aly]

السلام عليكم
معلش يا جماعة هي الساجا الجنوط ليها غطاء ولا لأ يعني الجنط ليه غطا بيتركب ولا الجنط ملوش غطا وهوه منه فيه جنط وشكل

[marsguy]

الجنط منه فيه

الجنط جنط بجد، مش جنط تعبان وليه طاسه

[krim71]

عارفين بجد بجد ايه عيب الساجا بالنسبالي؟؟؟ رغم اني ناوي عليها....
التابلو بتاعها....
شكله من اوائل التسعينات كده مش شبه التابلوهات الجديدة بس يمكن علشان هي رخيصة فمتكلفوش في تصميمه و عموماً اهم حاجة الشكل الخارجي مش مشكلة التابلو قدام سهل و عملي

[amr1973]

مساء الخير على الجميع شكرا ليكم كلكم و يا معلم لو انت عايز الاستاذ عمرو اهو جة لحد عندك
ردا على كل الاسئلة

1- العربية فيها عداد رحلات عادى يعنى المسافة الاجمالية و تريب اللى هيا المسافة المقطوعه لكل رحلة و فيها كمان ساعه و طبعا تختلف عن البيرسونا و الجين تو من حيث ان البيرسونا و الجين فيها معدل استهلاك
2- بخصوص الجنوط طبعا بيجي معاها 4 جنط ركبين بالفعل و اربع غطيان صغيرين للجنوط صغيرين اللى بيقفلوا على صامولة صرة العجل
3- طبعا افضل مكان ابو رواش و تروح هناك للاستاذ محسن صالح و ياريت تكلم ايمن الاول عشان يقدر يعمل لك خصم كويس و انا هابعت لك النمرة
4- ممكن تدفع مقدم حجز 500 جنية و هاتكمل لما تستلم على ما اعتقد الاستلام فى خلال شهر لان الدفعه الاولى كلها خلصت
5-طيب نيجى بقى لموضوع التابلوة و انه من خامة مش تمام و انه شكلة قديم اولا انه من خامة مش تمام انا مش شايف ده و ممكن تسالوا اللى معاهم العربية اما الشكل فدى ازواق يعنى مثلا انا عاجبنى جدا شكل التابلوة و ممكن مش يعجب غيرى و هكذا وكمان لو دققتوا هاتلاقو ان التابلوة دة موجود فى الافيو و اللوجان
6- عشان الجميع الدفعة القادمة هايتم تغير علبة الدركسيون بعلبة اخرى بعد التعديل و على فكرة انا ركبت العلبة الجديدة و تمام جدا
7 - لو حبيت اى سؤال انا فى الخدمة ورقمى 0126525352و ياريت تطلع على الموضوع ده هايفيدك بجد http://www.nilemotors.net/Nile/13019...post3872429798

[krim71]

ايه حكاية علبة الدريكسيون دي؟؟؟؟

[amr1973]

حكاية علبة الدركسيون اقولها لك انا بصراحة

بعد نفاذ الدفعة الاولى من الساجا لاحظ المهندسين بالتوكيل وجود مشكلة بعلبة الدركسيون مش فى كل العربيات لا بعضها فبداو لما العربية تروح تعمل صيانة الالف العلبة اللى فيها مشكلة تتغير بعلبة جديدة تم تعديلها عشان تتلافى العيب و بالتالى طلبوا فى الدفعات الجديدة من العربيات ان علب الدركسيون تيجى من الموديل اللى تم تعديلة
ملحوظة لما المهندسين بيشوفوا العلبة انها تحتاج الى تغيير بتتغير فى الحال ده كل الموضوع

[ashraf_aly]

السلام عليكم ورحمة الله وبركاته

يا جماعة والله بجد انتم ناس محترمة جدا وانا اتشرفت اني عرفت ناس زييكم
بصراحة عمري ما شوفت ناس متعاونة وبتخدم كدة ومبتزهقش من الاسئلة في اي منتدي زيكم هنا وكلامكم عن م/ايمن و م/محسن و م/امر خلاني احب العربية والتوكيل كمان رغم الكلام اللي بيتقال عن التوكيل الا اني متطمن لوجود الناس دة هناك

انا الصراحة معجب جدا بالعربية واستفساري عن موضوع الطاسات دة كان لاني مبحبش الطاسات دة اصلا لانها مش عملية وزعلت لما لاقيت عداد الرحلات مفيهوش متوسط استهلاك البنزين وبالنسبة للتابلوه انا الصراحة شكله عاجبني الي حد كبير وعاجبني المساحات الكبيرة اللي موجودة فيه

بس انا عندي استفسار تاني انا عارف استفساراتي كترت بس معلش

طالما مفيش حساب متوسط استهلاك البنزين اقدر احسب العربية معدل استهلاك البنزين منين خصوصا اني شوفت مواضيع لناس معاها ساجا وكانوا كاتبين معدل الاستهلاك فياريت بس حد يقولي بيتحسب ازاي

بجد ربنا يكرمكم ويجازيكم خير وشكرا علي المساعدة

[powerofhelll]

بتفول العربيه و تصفر عداد الرحلات و تمشي لغايت لما تيجي تفول تاني و تحسب حطيت كام لتر و عملت بيهم كام كيلو