استفسار بخصوص فرامل الجين2

[fmaw99]

السلام عليكم ورحمة الله وبركاته

أعضاء أجمل منتدى، عاوز آخد رأيكم في مشكلة حالية في فرامل عربيتي.
الفرامل من يوم ما إستلمت العربية وهي فوق الممتازة وعندى ثقة رهيبة فيها
بس من كام يوم كنت مسافر ولسه بجمع (حوالي 60 ~ 70 ) وفوجئت بمطب فكبست فرامل (عادي) وفجأة حسيت وكأني دايس على عمود حديد أوله في رجلي ونهايته في الأرض (كأن فيه عمود حديد أنا دايس عليه وبيزحف في الأرض مع حركة العربية).
طبعا سبت الفرامل ومسكتها مرة تانيه وإتكرر نفس الموضوع.

وقفت العربية ونزلت أبص تحتها مالاقيتش حاجه. ركبت تاني وجربت الفرامل، مفيش أى مشكلة وزي الفل.

قلت في نفسي تبقى طوبة زحفت تحت العجل مع مسكة الفرامل المفاجئة (ولو إن ده مش المفروض يحصل مع ال abs) وأكيد الهسهس هوه إللى صور لي إحساس غلط.
المهم إن الموضوع بدأ يتكرر إمبارح واليوم ومش عارف ممكن المشكلة تكون فين.

العربية موديل 2010 وعامله 8600 كم
أرجو سرعة الإفادة
وشكراً مقدماً



تم تغيير العنوان بما يتناسب مع محتوى الموضوع

مشرف القسم ب8
01:15am 25/06/2010

[mido_soliman]

يباشا دة abs حتحس بنبضات تحت رجلك والعجلة حتعد تكلبش وتفك كذا مرة وهوة دة بالظبط احساس ال abs
على فكرة انت مجربتش ال abs قبل كدة لانة مبيشتغلش غير فى الحالات دى بس يعنى لما تكبس وانت على سرعة فوق ال 40
مفاجأة
متقلقش من حاجة وتحياتى

[etsh1413202]

ده فعلا الabs يا باشا متخافش ... هتلائيه بيشتغل اما تكبس فرامل مره واحده

اهم حاجه ان قوة الفرامل معاك كويسه يبقى خلاص لو لاقدر الله الفرامل خفت معاك ولا حاجه يبقى كده فيه مشكله اكيد ........... مع العلم ان الabs بيطول المسافه الى بتقف فيها شويه بسيطه عن الوضع العادى بس بشكل مش ملحوظ

وربنا يسترها عليك

[م.محمد مختار]

أنا حاسس من الوصف ان فيه حاجة غلط!!!

عموماً للاحتياط جرب تطلع طريق " فاضي " وتزود السرعة وتكبس فرامل.. لو اتكرر نفس الوضع على السرعات و الكبس يبقى غالباً طبيعي زي ما الاخوة قالوا لو ساعات وساعات يبقى أكيد في حاجة مش مضبوطة
وربنا يستر

[Ahmed_SpY]

بتحس بخشونة فى الفرامل لما بتدوس ؟

[ahmed_h_g]

متابع ....

[waleedfesal]

بص يا باشا
هو المفروض ان ال abs مابيشتغلش غير لما تدوس جامد و فجأه على دواسة الفرامل
وبتحس ان الدواسه زى مل تكون فيها نبضات بس بسرعه
لكن الفرامل العاديه او الهاديه مابتحسش بأى حاجه
لو فى اى حاجه غير كده يا ريت تفحص الفرامل ضرورى
وربنا يسلم طريقك
وان شاء الله بسيطه

[fmaw99]

شكراً لجميع الردود لكن أنا حاسس إن فعلاً في مشكلة

يباشا دة abs حتحس بنبضات تحت رجلك والعجلة حتعد تكلبش وتفك كذا مرة وهوة دة بالظبط احساس ال abs
على فكرة انت مجربتش ال abs قبل كدة لانة مبيشتغلش غير فى الحالات دى بس يعنى لما تكبس وانت على سرعة فوق ال 40
مفاجأة
متقلقش من حاجة وتحياتى

الحمد لله أنا بسوق من 1997 وركبت عربيات كتير منها الـ abs ومنها من غير. وزي ماحضرتك قلت بالضبط لما الـ abs بيشتغل بتحس بنبضات تحت رجليك لأنه بيمسك ويسيب. لكن إللي حصل معايا نفس الإحساس وكأنك راكب عربيه مافيهاش abs وفرملت فيه تراب وجت تحت العجلة طوبه، فاهتلاقيها بتزحف معاك. نفس الإحساس ده بس كان تحت رجلي في دواسة الفرامل.

ده فعلا الabs يا باشا متخافش ... هتلائيه بيشتغل اما تكبس فرامل مره واحده

اهم حاجه ان قوة الفرامل معاك كويسه يبقى خلاص لو لاقدر الله الفرامل خفت معاك ولا حاجه يبقى كده فيه مشكله اكيد ........... مع العلم ان الabs بيطول المسافه الى بتقف فيها شويه بسيطه عن الوضع العادى بس بشكل مش ملحوظ

وربنا يسترها عليك

الفرامل كويسه طول ما الـabs ماشتغلش. وساعات أه وساعات لأ مع الـ abs

أنا حاسس من الوصف ان فيه حاجة غلط!!!

عموماً للاحتياط جرب تطلع طريق " فاضي " وتزود السرعة وتكبس فرامل.. لو اتكرر نفس الوضع على السرعات و الكبس يبقى غالباً طبيعي زي ما الاخوة قالوا لو ساعات وساعات يبقى أكيد في حاجة مش مضبوطة
وربنا يستر

المشكلة إن أول ما بيحصل ده أنا تلقائي بسيب الفرامل خوفاً مني على نظام الفرامل. وفعلاً الموضوع ده مش ثابت. كمان الموضوع مابيكنش نبضات.

بتحس بخشونة فى الفرامل لما بتدوس ؟

الموضوع وكأنك داسي فرامل على تيل فاضي لو حضرتك سبق لك وجربت المشكلة دي. تحس إنو حديد في حديد

بص يا باشا
هو المفروض ان ال abs مابيشتغلش غير لما تدوس جامد و فجأه على دواسة الفرامل
وبتحس ان الدواسه زى مل تكون فيها نبضات بس بسرعه
لكن الفرامل العاديه او الهاديه مابتحسش بأى حاجه
لو فى اى حاجه غير كده يا ريت تفحص الفرامل ضرورى
وربنا يسلم طريقك
وان شاء الله بسيطه

الموضوع فعلاً محتاج فحص. ياترى لازم التوكيل ولا ممكن أى عفشجي؟!! (علشان موضوع الضمان)

[Ayman_52]

مش هينفع تشخيص بناءا على الكلام , حضرتك احجز صيانه والكشف هيبين لو فى حاجه

و -ان شاء الله- خيــر , تحيــــــــــــاتـــى

[esam123]

الموضوع الى حضرتك ذكرتة خطير ولا يسهان بية دى روح انسان شكوتك مش هتخرج عن 3 حاجات سيرفو الفرامل او ماستر الفرامل او بساتم الفرامل < دشم الفرامل > وتحرك سريعا لان حدث لى ذلك فى مرة وكادت ان تودى بحياتى وربنا سترها الحمدلله

[ahmad alshaaer]

حبيبي هي فرامل الجن 2 كده
وده هيكون رد التوكيل على حضرتك صدقني

اتعامل مع العربيه ان هي دي فراملها
مش قويه اوي يعني

تحيياتي

[fmaw99]

حبيبي هي فرامل الجن 2 كده
وده هيكون رد التوكيل على حضرتك صدقني

اتعامل مع العربيه ان هي دي فراملها
مش قويه اوي يعني

تحيياتي

فعلاً عندك حق.ده إللى حصل بس مش بالضبط

الموضوع الى حضرتك ذكرتة خطير ولا يسهان بية دى روح انسان شكوتك مش هتخرج عن 3 حاجات سيرفو الفرامل او ماستر الفرامل او بساتم الفرامل < دشم الفرامل > وتحرك سريعا لان حدث لى ذلك فى مرة وكادت ان تودى بحياتى وربنا سترها الحمدلله

أنا رحت التوكيل - الصحراوي - علشان أشوف موضوع الفرامل وبالمرة أعمل صيانة الـ 10,000 . وطبعاً كان أول رد "هي دي فرامل العربية الطبيعية. أهو ده الـ ABS" وطبعاً لما حاولت أوضح إن ده مش أول ABS في حياتي كان الرد "متقارنش عربيتنا بعربيات تانيه، هوه ده الـ ABS بتاعنا" وعلشان أكون صادق ولا أبخس الناس حقهم جربولي عربية تانية عامله 450 كم وكان فيها نفس الخشونه، كأن فيه حاجه بتحك في الأرض (أنا بقصد لما الـ ABS يشتغل)

المهم ما علينا. المشكلة الأكبر إن العربية كانت مش بتقف على طول وبتزحف لو دايس وفرملت فجأة. وبعد ما كشفوا عليها إكتشفوا إن التيل تقريباً خلصان ومحتاج يتغير وكمان الطنابير باظت.

والعمل يا جماعة؟ّ
قالوا ولا يهمك، الطنابير ضمان وعلينا يا سيدي ولا تزعل نفسك بس هتدفع تمن التيل الجديد.
يا جماعة، ده لسه يادوب مكمل ال 10,000 كم وأنا جاي في الطريق!!! فيه في الدنيا تيل بيخلص في 10,000 كم؟!!
قالوا، التيل بتاعنا كده. 10 أو 15 بالكتير.
طبعاً دماغي لفت. قلت لهم مش معقول! ماهوا مش طبيعي إني كل ماجي أعمل صيانة أغير التيل.
ردهم كان، ده عادي ....
طيب بكام التيل ده؟!!
ودي أظرف نقطه في الموضوع
ردهم كان:
Line A --> 1250 وده اللي مش بيصفر وطبعاً من غير مصنعية التركيب
Line B --> 250 وده اللي بيصفر وطبعاً من غير مصنعية التركيب
Line C --> 150 وتقريباً ده إللى مش بيوقف

حاولت اتخيل الموقف... كل 10,000 كم أروح أعمل الصيانة والحساب كالآتي:
1. تقريبا 250 مصنعيات
2. 270 زيت
3. 45 فلتر زيت
4. 1330 تيل (10,000 عل حسب كلامهم)
-------------------------------------------------
1895 بدون ضرائب
164.5 ضريبة
--------------------------------------------------
2059.5 بعد الضريبة

ده كل 10,000 كم وبدون حساب الحاجات اللى هتحتاج تتغير من مرة والتانية (فلتر بنزين - فلتر هوا - بوجيهات .....)

حد متخيل. أنا هتجنن - وبصراحة مقفول من العربية دي لدرجة إني قلت لهم إن شاء الله المرة اللى جايه هتلاقوا واحد تاني اللى جاي يعمل الصيانة بالعربية دي لأني هبيعها في أول فرصة.

المهم، حاولت أخليهم يغيروا الطنابير ويسيبوا التيل على أساس إني أتصرف من بره التوكيل وأجيب التيل وأركبه بره. طبعا رفضوا وقالوا يا نغير كله مع بعضه يا إما مافيش حاجه هتتغير - بحجة إن التيل القديم هيبوظ الطنابير الجديدة. وطبعاً هيخرجوا العربية بدون حل المشكلة.

يا جماعه إزاي؟!!!!!!!!!!!!! دي الفرامل. يعني من غيرها مفيش عربية!!!
ردوا إن أنا إللى معطل حل المشكلة. هما إكتشفوا المشكلة وحلها تغيير التيل والطنابير وأنا إللى مش عاوز أغير التيل. يا ناس حرام أدفع 1300 جنيه في تيل هيخلص في 10,000 كم. قالوا ركب الـ Line B. طيب ماهوا بيصفر وممكن ياكل الطنابير تاني. قاولوا بسيطه، في أى مشحمة وحبة ميه من المسدس والصفارة تروح وكله يبقى تمام. وإذا كان على الطنابير، ولا يهمك، بوظها إنت بس بالتيل بتاعنا وإحنا نغيرهالك ضمان.

طبعاً ماكانش قدامي حل غير إني أقبل أركب التيل Line B لأننا آخر الشهر، وحتى لو مش آخره، مش هركب تيل بـ 1300 جنيه.

إيه رأيكوا في إللى بيحصل ده؟ لازم يكون في حل لموضوع التيل ده.
- وهل فعلاً التيل ممكن يكون عمره 10,000 كم بس؟!!!
أنا أخويا معاه إلنترا 2008 ولسه التيل فيه 40% (حسب كلام الجهاز في كشف صيانة 40,000 في غبور)
- وفيه تيل لعربية بـ 90,000 جنيه تمنه 1300 جنيه HOW COME؟!!
- وهل فعلاً الـ ABS بتاع البروتون خشن للدرجة دي؟!!

حد يتصرف يا جماعة

[mido_soliman]

ربنا معاك ومعانا وفعلا انت معاك حق طبعا فى موضوع التيل دة وبصراحة دة استهبال مش ممكن تيل يكون ب 1300 جنية مستحيل ويخلص كل 10000 لية ؟ طب المفروض ان تمنة فية يعنى التيل اللى ب 1300 دة يعد مش اقل من 30000 كدة تكون منطقية لكن يتغير كل 10000 دة خراب بيوت

[m.3abdel3al]

تيل 1300 ( و بيخلص كل 10 الاف كيلو ) حرام

تيل 250 و بيصفر ( ايه الي رماك على المر ...... )

الحل نهدد كلنا اننا ما نعملش صيانة في التوكيل و يورونا هيشتغلوا لمين !!!!!!! او اشتغل صيانة بره و ريح دماغك من الاول

[fmaw99]

تيل 1300 ( و بيخلص كل 10 الاف كيلو ) حرام

تيل 250 و بيصفر ( ايه الي رماك على المر ...... )

الحل نهدد كلنا اننا ما نعملش صيانة في التوكيل و يورونا هيشتغلوا لمين !!!!!!! او اشتغل صيانة بره و ريح دماغك من الاول

والله انا نفسي ما أدخل التوكيل ده مرة تانيه بس الضمان هوه إللى ماسكني من إيدي إللى بتوجعني