سؤال لكل مالكي جين 2 !! مانيوال ولا اتوماتيك ؟؟ ايهما افضل ؟؟؟

[solghof]

سؤال لكل مالكي جين 2 !! مانيوال ولا اتوماتيك ؟؟ ايهما افضل ؟؟؟
من حيث التسارع انا طبعا عارف ان المانيوال اسرع بس هل الفرق كبير بينهم ؟؟
من حيث استهلاك البنزين ؟؟ مين افضل ياريت توضحولي بالتفصيل ؟؟
طيب لو عايز اقرص علي العربية شوية علشان اتخطي العربجية بتوع الميكروباصات الاتوماتيك هاتنفعني ولا لازم مانيوال ؟
طيب لو هشد بيها مع حد علي الطريق هل الاتوماتيك معقوله برضوا في الشد ولا ابطأ بكتير من المانيوال ؟؟
اصل سوقت عربيات اتوماتيك زي الانسر وكده بتبقي طلعتها بطييييييييييييئة اوي لدرجة ان كل العربيات بتطلع منك
وانتا عارف الناس مابترحمش حد
وال Top speed بتاعة الاتوماتيك كام ؟؟
ومن 0-100 في كام ثانية
وهل الاتوماتيك بتاعها فيه مشاكل
اصلي بسمع ان اي عربية اتوماتيك تحت ال 100 الف بيبقي الاتوماتيك بتاعها مش حلو وليه اعطال gear box وكلام من ده
معلش ياجماعة طولت عليكم
اصل بصراحة خرجت في الزحمة النهاردة وقرفت من سواقة المانيوال
بالرغم من اني بحب المانيوال علشان بتقدر تقرص علي الموتور
( انا لسة ماجبتش جين 2 بس لسة بفكر ومحتار ياريت تفيدوني )

[sayed911]

والله يا اخي انا ها اقول لحضرتك على اللي اعرفه برضوا عشان انا متأكد منوا قصة مين افضل دي ترجع لحضرتك انتا بالتأكيد لأنو انتا اللي ها تحدد استخدامك يعني انا واحد من الناس اللي قدامي الإتنين ها آخد الأوتوماتيك عشان مش ها اقنع نفسي اني في زحوة القاهرة ها اجيب عربية مانيوال وفيه ناس مش بتعرف تسوق الأوتوماتيك واخد على انو هوة اللي يبقى متحكم في معاد النقلة وهكذا فكل القصة دي انتا حضرتك اللي بتحددها اما بالنسبة لقصة التسارع فالمتور الكامبرو اكيد معروف هوا ايه ولكن ان لم يكن لدي معلومات كافية عن تسارعه وسرعته القصوى ولكن اكيد الإخوة اللي معاهم الجين تو ها يفيدوا حضرتك ولكن انا عايز أأكد لحضرتك انو فكرة الفتيس اللي بيبوظ ده انساها خالص لأنو لو كانت اي عربية تحت الـ 100 الف باظت يبقى كنت ها تلاقي الأوبترا باظت والصني والبيكنتو والجيتز وغيروا وغيروا وغيروا وصدقني العيب 90% بيبقى فينا احنا لأنو الناس فاكرة مادام اوتوماتيك يبقى الـ d والعربية بتمشي مش عارفين انو المطلع ليه حاجة والعربية تنزل الهند امتى وتوقف العربية على ايه وهكذا ولكن انسى خالص قصة الفتيس اللي بيبوظ واكيد برضوا الإخوة اللي معاهم الجين تو ها يفيدوك ان شاء الله وبالتوفيق اخي ...

[spiderloking]

سؤال لكل مالكي جين 2 !! مانيوال ولا اتوماتيك ؟؟ ايهما افضل ؟؟؟
الاتنين كويسيين جدا في الجين 2

من حيث التسارع انا طبعا عارف ان المانيوال اسرع بس هل الفرق كبير بينهم ؟؟
الفرق مش كبير اوي بس انت لو عاوز تسارع اكتر و اسرع يبقي مانيوال بس الفرق مش كبير اوي زي ما قولتلك و لو عاوز تريح دماغك من الزحمه يبقي هات اوتوماتيك
من حيث استهلاك البنزين ؟؟ مين افضل ياريت توضحولي بالتفصيل ؟؟
طبعا الاستهلاك في المانيوال اقل من الاوتوماتيك الاوتوماتيك في اول 5000 هيكون زياده اكتر نسبيا بس بتقل شويه شويه لما تحرق بنزين اكتر و بعد ال5000 مش هتحس بفرق كبير بين الاتنين في الاستهلاك و المعدل هيبقي طبيعي بتاع الاوتوماتيك
طيب لو عايز اقرص علي العربية شوية علشان اتخطي العربجية بتوع الميكروباصات الاتوماتيك هاتنفعني ولا لازم مانيوال ؟
طبعا هتقدر تقرص كفايا عندك الكيك داون في الاوتوماتيك و ما اجراك ما هو الكيك داون بتاع الجين 2 محدش يقدر يتكلم فيه جامد جدا بصراحه و لو علي انك تطلع منهم لأ هتطلع ان شاء الله اكيد
طيب لو هشد بيها مع حد علي الطريق هل الاتوماتيك معقوله برضوا في الشد ولا ابطأ بكتير من المانيوال ؟؟
لو هتشد مع مانيوال يبقي ممكن يطلع منك في الاول بس لو مع اوتوماتيك زيك يبقي اكيد هتطلع منوا الجين 2 اساسا عربيه رياضيه و موتورها كام برو مصمم انو يكون موتور رياضي يعني تقدر تقول هيه احسن من كل العربيات الاوتوماتيك اللي في نفس سعرها
اصل سوقت عربيات اتوماتيك زي الانسر وكده بتبقي طلعتها بطييييييييييييئة اوي لدرجة ان كل العربيات بتطلع منك
وانتا عارف الناس مابترحمش حد
وال Top speed بتاعة الاتوماتيك كام ؟؟
ومن 0-100 في كام ثانية
التوب سبيد في الاوتوماتيك انا شوفت واحد جاب بيها 190 مشوفتش اكتر من كدا بصراحه بس في ناس جابت بيها 200 بس في المانيوال
و من حيث بتجيب 100 في كام ثانيه من وضع الثبات اعتقد المانيوال في 13 ثانيه و الاوتوماتيك من حوالي 15 الي 20 ثانيه بردوا تقدر ترجع للكتيب بتاع السياره في المعلومه ديه بالظبط

وهل الاتوماتيك بتاعها فيه مشاكل
اصلي بسمع ان اي عربية اتوماتيك تحت ال 100 الف بيبقي الاتوماتيك بتاعها مش حلو وليه اعطال gear box وكلام من ده
لأ مفيهوش مشاكل ناس كتير هنا معاها العربيه من زمان و لحد دلوقتي مشوفتش ولا حد اشتكي من الاوتوماتيك او من عطل في الفتيس والكلام ده قليل اوي لما تسمع عن عطل في الاوتوماتيك بتاع الجين 2
معلش ياجماعة طولت عليكم
اصل بصراحة خرجت في الزحمة النهاردة وقرفت من سواقة المانيوال
بالرغم من اني بحب المانيوال علشان بتقدر تقرص علي الموتور

( انا لسة ماجبتش جين 2 بس لسة بفكر ومحتار ياريت تفيدوني )
لأ ان شاء الله تجيبها و بأذن الله العربيه تعجبك انصحك بردوا تنزل تبص عليها و يبقي كويس كمان لو تجربها بنفسك و اكيد هترتاحلها ان شاء الله و هتعجبك لو عاوز نصيحتي الشخصيه تجيب العربيه لأنوا بجد عربيه ممتازه في سعرها و امكانياتها ده غير ثباتها الرهيب و كمان قطع الغيار بتاعتها انتشرت اوي الفتره ديه و مشاكلها مش كتير يعني مش هتندم ان شاء الله لو جبتها و بردوا الاختيار ليك

[solghof]

افهم من كلامك اني لو استخدمت ال D في الطرق العادية
والغيار 2 في المطالع
وال P عند الركن
يبقي كده هحافظ علي ال AT GearBox بنسبة عالية جدااا ؟؟
طيب لو هستخدم الغيار 2 في الخروج من الشوارع الجانبية علشان D بيبقي بطئ شوية وانتا عارف الناس في الشوارع نظام حلق حوش
واللي يلحق يطلع الاول
هل ده هيأثر علي العربية
علما بأنني سوقت عربيات اتوماتيك زي الكورولا 2008 مانيوال واتوماتيك معا MMT
لكن بتلخم لما باجي طالع من شارع جانبي لأن العربية بتبقي بطيئة شوية انتا عارف طلعة الاتوماتيك
والناس بتبقي اخر تعاون معاك زي مانتا عارف لو مش هتاخد حقك بدراعك يبقي ممكن تبات في الشارع الجانبي للصبح

[solghof]

الف شكر يا باشا spiderloking

[solghof]

ممكن حد يقولي ازاي بيتعمل الكيك داون بتاع الجين 2 لأني انا بصراحة بطيخة جدا في المواضيع دي
يعني بدوس الينزين علي الاخر
ولا بدوس دوستين علي الاخر لحد ما الانجكشن يفضل شغال باقصي سرعة
وطبعا ياريت تقولولي ازاي الغيه
لأن اللي حضر العفريت لازم يعرف يصرفه :)
شكرااااا

[spiderloking]

بص يا سيدي الكيك داون بتفتحوا و انت مثلا علي سرعه 60 او 80 كدا يعني يعني العربيه تكون واخده سرعه متكونش ماشي بيها بطيئ و تفتحوا لأنوا مش هيعمل حاجه بتفتحوا ازاي بقي بتدوس علي دواسه البنزين لحد الاخر هتلاقي العربيه بتشد بسرعه اوي و الار بي ام هيعلي و صوت الموتور هيعلي معاك اول ما تحس انها بدأت تاخد سرعه و تسمع صوت الموتور علي اوي تشيل رجلك و تحطها تاني مره كمان هتلاقيها طلعت معاك من 60 مثلا لحد 120 في وقت قياسي حوالي 5 او 6 ثواني بالكتير

[vodanet]

بدوس اخر دواسه البنزين وتفضل دايس

[solghof]

طيب ياريت حد كمان يطمنا هل الجين 2 الاتوماتيك تخلو من المشاكل اللي ممكن تعقد الواحد ؟؟
ولا اريح دماغي واجيب مانوال واتسحمل القرف والزحمة

[solghof]

ياجماعة اثناء قرائتي علي المواقع سمعت ان في حاجة اسمها over drive
يعني ايه ياجماعة وهل دي اوبشن ولا طريقة من طرق قيادة السيارة
ولو اوبشن هل هيا موجودة في الجين 2 الاتوماتيك

[mido_soliman]

سؤال لكل مالكي جين 2 !! مانيوال ولا اتوماتيك ؟؟ ايهما افضل ؟؟؟
من حيث التسارع انا طبعا عارف ان المانيوال اسرع بس هل الفرق كبير بينهم ؟؟
الفرق كبير تحت ال 100 كيلو لصالح المانوال فوق ال100 الاتنين واحد
من حيث استهلاك البنزين ؟؟ مين افضل ياريت توضحولي بالتفصيل ؟؟
الفرق لا يذكر ما بين الاتنين
طيب لو عايز اقرص علي العربية شوية علشان اتخطي العربجية بتوع الميكروباصات الاتوماتيك هاتنفعني ولا لازم مانيوال ؟
مش لازم مانوال الكيك داون معمول علشان العربجية دول تحديدا
طيب لو هشد بيها مع حد علي الطريق هل الاتوماتيك معقوله برضوا في الشد ولا ابطأ بكتير من المانيوال ؟؟
معقول بس متبدأش من الثبات يعنى العربية تكون معدية ال 3 rpm وشد براحتك
اصل سوقت عربيات اتوماتيك زي الانسر وكده بتبقي طلعتها بطييييييييييييئة اوي لدرجة ان كل العربيات بتطلع منك
وانتا عارف الناس مابترحمش حد
مانوال او اوتو اى عربية اخف لو حتى بيكانتو حتطلع منك بس خلية يطلع وعدى 100 ومش حتشوفة فى مرايتك عادى جدا
وال top speed بتاعة الاتوماتيك كام ؟؟
انا شخصيا جايب 180 ونزلت السرعة على طول لانى اتخضيت لانى كنت سارح ومش حاسس انى على السرعة دى اساسا ومش حجيبها تانى ان شاء الرحمن علشان العمر مش بعزقة انا جايب عربية اتمتع بيها بس الكلام دة عليا انا لكن لو عايز تجرى حتقول معاك وشبة متاكد انها حتوصل ل 200 لانها جابت 180 وكانت مستريحة اوى اوى اوى (بقولك كنت سرحان وعينى راحت للعداد بس بالصدفة )
ومن 0-100 في كام ثانية
تقريبا فى 12.3 مش متاكد لان الكتيب فى العربية والمانوال تفرق عنها ثانيتين (تقريبا 10.3)
وهل الاتوماتيك بتاعها فيه مشاكل
اوتو يابانى ميتسوبيشى مفيهوش الهوا ومريح جدا جدا واستجابتة هايلة
اصلي بسمع ان اي عربية اتوماتيك تحت ال 100 الف بيبقي الاتوماتيك بتاعها مش حلو وليه اعطال gear box وكلام من ده
معلش ياجماعة طولت عليكم
الكلام دة لو اى عربية تانية (كورى مثلا اقولك جايز لكن بروتون مستحيل)
اصل بصراحة خرجت في الزحمة النهاردة وقرفت من سواقة المانيوال
بالرغم من اني بحب المانيوال علشان بتقدر تقرص علي الموتور
( انا لسة ماجبتش جين 2 بس لسة بفكر ومحتار ياريت تفيدوني )

استخير ربنا بس الاوتو نصيحة منى نعمة فى البلد دى واسال نفسك كدة حتسابق كام مرة او حتشد كام مرة فى اوتوكروس وحتنزل وسط البلد كام مرة :))))))

[أبومعاذ]

أوتو عشان متتعذبش وانت كدا كدا مش جايب عربية هتخش بيها التراك بس وقت ما يكون الطريق فاضي وواسع الاتنين هيجرو زي الفل

[M.almaghraby]

ياجماعة اثناء قرائتي علي المواقع سمعت ان في حاجة اسمها over drive
يعني ايه ياجماعة وهل دي اوبشن ولا طريقة من طرق قيادة السيارة
ولو اوبشن هل هيا موجودة في الجين 2 الاتوماتيك

لأ مش موجود علي حد علمي

[م.محمد مختار]

انا معايا الاوتو و الحمد لله لما بدوس بنزين -بتعمل اللي عاوزه منها- !!!
انا مسقتش اوتو من ماركة تانية ولا سقت المانيوال بتاع الجين -وان كنت بحلم اجربها- علشان كده مقدرش أقارن..
بس لو سواقتك "طبيعية" إن شاء الله الاوتو حترضيك...

خاصة مقارنة بالبيتلز

[khpopo]

لأ مش موجود علي حد علمي

النقله 3 مفتوحه بديل الزرار اوفر درايف وبتقوم بالواجب جدى
ربنا يوفق