رشيت علبة موتور الساجا انهارده قولولي رأيكم ايه

[spiderloking]

انهارده صحيت من النوم قولت اعمل حاجه جديده في الساجا عندي كنت شوفتها اخوانا الماليزين عاملين زيها طبعا الفكره مش بتاعتي بس انا اخدتها منهم و نفذتها و الحمد لله طلعت معايا بالظبط و مظبوطه تمام التمام و هي اني رشيت علبة الموتور بتاع العربيه انا عربيتي سوده و كنت عامل فرش احمر في اسود فيها حبيت ارش العلبه ملقتش اشيك من اللون ده بردوا احمر في اسود اصلي بحب اللونين دول جدا
يلا نشوف الصور

هنا طبعا شكل العلبه قبل اي حاجه






و هنا بعد ما رشيتها








و بكدا نكون انتهينا استنونا في حاجه جديده يا ساجاويه

[mmaaly]

جميله واضح انك دماغ

[spiderloking]

تسلم يا جميل

[Nistelrooy]

بس هو انتاغسلت حوض الموتور فين .. علشان عايز اغسلة ..

[spiderloking]

بص هو اول صوره مش عربيتي انا جايبها من علي النت لأني نسيت اصور عربيتي قبل ما ارش العلبه لكن لو عاوز تغسل الحوض و يطلع زي اول صوره كأنها لسه جايه من المصنع روح اي بنزينه نضيفه او مغسله نضيفه و قولوا عاوز اغسل الموتور بالجاز بيغسلوه بس انا افضل كل فتره كبيره اوي تغسله علشان علي قد ما هو بينضف العربيه انا سمعت انو غلط لما تغسلوا كل شويه

[Nistelrooy]

شكرا يا ريس ..

[ahrambc]

هل استعملت دوكو عادى للرش

اذا كان ذلك ما حدث فلن يدوم طويل و سيبدأ بالتقشير

لابد من استخدام دهانات حراريه لتحمل درجات الحراره داخل حوض المحرك .

كما لابد من تجهيز و اعداد الغطاء تجهيزا خاصا لتقبل الدهان الحرارى

و مشكلة الدهانات الحراريه هى أنها غالية السعر جدا و غير متوافره للمستخدم العادى

كما لا تتوافر بالوان متعدده .

[sayed911]

انا كنت جايب شوية سبراي عندي باللون الإسود والأحمر لمشروع في الكلية عندي وبصراحة فكرة جميلة جدا ولكن هل ينفع تورينا الخطوات اللي حضرتك مشيت عليها لأنو الفكرة تحفةةةةةة ولكن انا في دماغي الوان تانية خالص :-d

[afr80]

الله ينور يا معلم و فى انتظار التفاصيل، يعني التكلفة، تعملت بأي نوع دهان، و طبعا فين، كل التفاصيل لو سمحت

[spiderloking]

التكلفه بسيطه جدا جدا فوق ما تتخيلوا و الخطوات مفيش اسهل منها

اولا الدوات المطلوبه

1 - علبة سبراي احمر انا جبتها من عند الموان افتكرتها هتبقي غاليه يعني 20 مثلا الراجل قالي 5 جنيه قولت اجيب و اجرب لو مش حلوه اشتري واحده تانيه اغلي بس والله طلعت زي الفل و بالنتيجه اللي قصادكوا ديه و العلبه كفت و ممكن تعمل علبتين موتور يعني علبة الاسبراي ديه تكفي مرتين

2 - نص متر استيكر اسود ماط اللي هوه اسود مطفي و ده هنجيبوا من اي حد من بتوع الاكسسوارات و الكماليات بتاعت السيارات يكون مقاسو مناسب و ده بحوالي 3 جنيه المتر

3 - كاتر او مقص علشان نقص بيه الاستيكر

4 - فوطه زفره و قلم اسود دوكو هتلاقوه اسموا ميتاليك عند اي واحد بتاع دوكو او في اي مكتبه قولوا عاوز قلم دوكوا اسود بحوالي 5 جنيه او 7 جنيه بالكتير

الخطوات

اول حاجه هنفك الغطاء بتاع الماتور او العلبه اللي هنرشها هنلاقي اربع مسامير بورمه نفكهم بس اوعي يضيعوا
تاني حاجه هنجيب الفوطه الزفره و نمسح علبة الموتور كويس جدا من التراب و الاوساخ
تالت حاجه نجيب جرنال و نفرشوا علي الارض و نحط فوقيه العلبه وبعدين نبدأ نرش بالاسبراي بعد ما نرجه كويس اوي ترش في نفس الاتجاه و تكون ايدك بعيده عن العلبه حوالي 10 سم و نرش يا جماعه في اتجاه واحد بالعرض نروح و نيجي بالعرض و بعدين نسيب العلبة لحد ما تنشف خااااالص يعني 10 دقائق كدا
رابع حاجه نقص الاستيكر بالكاتر او المقص و نلزقوا علي العلبه زي مهو واضح في الصوره كدا و بعد كدا نجيب القلم بتاع الدوكو و نبدأ نمشي علي الكلمه اللي مكتوبه و علامة بروتون براحه علشان منغلطش و متدوسش علي سن القلم علشان ميسيلش و ينزل كتير و تنزل علي العلبه نفسها و بعد كدا نركب العلبه تاني علي الماتور و هتطلع معاكم زي ما طلعت معايا ان شاء الله اللي عاوز يستخدم الوان تانيه مفيش مشكله كل واحد يفتكس بقي علي حسب مزاجوا و ابقوا وروني الصور

[spiderloking]

هل استعملت دوكو عادى للرش

اذا كان ذلك ما حدث فلن يدوم طويل و سيبدأ بالتقشير

لابد من استخدام دهانات حراريه لتحمل درجات الحراره داخل حوض المحرك .

كما لابد من تجهيز و اعداد الغطاء تجهيزا خاصا لتقبل الدهان الحرارى

و مشكلة الدهانات الحراريه هى أنها غالية السعر جدا و غير متوافره للمستخدم العادى

كما لا تتوافر بالوان متعدده .

لأ مستعملتش دوكو لأن الدوكو فعلا هيتأثر بالحراره و هيقشر انا ريشتها بأسبراي احمر عادي ممكن تجيبوا من اي موان و ده استحاله يطلع انا مجربوا قبل كدا و رخيص جداااااااااااا

[Osama.shihata]

فكرة جميلة وسهلة - الله ينور عليك

[mrwho1982]

ده انت دمااااااااااااااااااااغك عالية

[mixd99999]

شغل اخر جمال و تمام التمام ...بس ماتنساش لما تخلص كل العربية تورينا ابداعاتك فيها وتعمله في موضوع اكسسوارات الساجا علشان يتثيت معا الموضوع

[spiderloking]

ان شاء الله اكيييييييييد اول ما اخلصها هبعتلكم الصور كلها حاجه حاجه علشان اللي عاوز يظبط العربيه بتاعتوا انا عامل افكار كويسه جدا بس ادعولي اخلصها اصل عندي حاجات كتير اوي في دماغي و كلوا شغل خفيف و مش مكلف ان شاء الله انا عارف ظروف الناس اليومين دول علي العموم قريب ان شاء الله هرفعلكم اول ساجا متظبطه في مصر كلها