إستفسار فني

[wael_dosoky]

السلام عليكم، أتشرف بتقديم التحية لك أعضاء هذا المنتدي الرائع الذي وجدت فيه تعاون واضح بين جميع الأعضاء ، موش هأطول عليكم انا عندي عربية أكسيل 98 وناويت ( والنية لله ) أني اغيرها ودلوقتي امامي إختيارين ارجو ان تساعدوني بالرأي في ايهم:
الأول : عربية شيفورليه لانوس زيرو موديل السنادي (قسط عند منصور وتأمين عند شركة الوثاق)
الثاني : عربية نيسان صني موديل 2007 وعاملة 30000 كيلو بتاعة واحد صاحبي وحالتها كويسة
العربيتان بسعر واحد وهو 70000 جنيه
اي الحلين افضل من وجهة النظر الفنية وهل سعر النيسان صني 2007 وبهذا الوصف كويس ولا غالي
في إنتظار خبراتكم وردودكم وشكرا

[hosamdaewoo]

بص يا استاذ وهم
النيسان افضل بكتييير طبعا حتى لو 2005
بس انت منين ؟
هل جنبك مراكز خدمة للنيسان؟
مع العلم ان اى ميكانيكى لا مؤاخذة (cow) يقدر يشتغل فى اللانوس

[samirayad]

الجديد جديد

[batviser]

شخصيا افضل الصنى .... انا ركبت الاتنين و سوقت الاتنين ....
مفيش مقارنه الصراحه ... الصنى تدى اللانوس بالقديمه ...

بالمناسبه انا معايا لانوس ... و هى عربيه كويسه و مريحه و محترمه و اعطالها قليله و معروفه ... و قطع غيارها مرميه عند البقال ... و كل الميكانيكيه بيفهمو فيها ...


بس اما سوقت الصنى حسيت بفرق رهيب الصراحه ... سحب اعلى بكتير ... سلاسه اعلى بكتير ... قوه اعلى بكتير ... و ثبات احسن ... و برستيج اعلى بكتييييييير ... بس فى المقابل ... اعادة بيعها تقيله ... قطع غيار اقل انتشار ... ميكانيكيه معينين ...


شوف ايه الى يناسبك انت و انت عاوز ايه من العربيه ...

[MMamdouh]

الصنى ركوبة افخم و احسن طبعا

MMamdouh

[Shiref_mohamed]

اللانوس اقتصاديه اكتر من الصني من ناحية قطع الغيار ومصاريف الصيانة واستهلاك البنزين
اما الصني فهي عربيه فخمة ومحترمة جداً بس يعيبها مصاريف صيانتها وقطع غيارها (بالمقارنة باللانوس) وكمان تجربتي الشخصية لما ركبتها حسيت انها ضيقة من ورا قوي بالرغم من حجمها الكبير وكمان اعرف نس معاهم العربية واشتكو من استهلاكها للبنزين انما ثباتها كويس وموتورها قوي وناعم وخاماتها من جوه كويسه

[kareembelal]

انا شخصيا لو مكانك هاختار اللانوس لأسباب

اولا - اللانوس اللي قدامك جديده زيرو يعني مصاريفها أقل بكتير وتكاد تكون منعدمة الان الا من الصيانة العادية

ثانيا - النيسان موديل 2007 يعني هناك أشياء عديدة تحتاج تغيير ولا أعلم ان كان مالكها او مالكيها الأولين كانوا محافظين أم مهملين

ثالثا - قطع غيار النيسان أغلي بكتير وليس كل الميكانيكية او غيرهم من ذوي الصنعة يفهمون فيها

رابعا - انا لن أدفع كل هذا المبلغ وربما هو كل ما أملكه لكي أقف بالسيارة عند ميكانيكي بعد ما أشتريها بيومين

خامسا - انا أحب أشتري لكي ابيع وبيع اللانوس سهل اما النيسان صعب شوية

سادسا - الزيرو كل حاجه بداخلها زيرو والنظافه تظهر فيها بعكس الاستعمال ممكن تكون حاجه مكسورة في داخل السيارة تعطيك شيئا من عدم الارتياح

سابعا - اللانوس شكلها مقبول بالمقارنه بمميزاتها الاخري
ثامنا - صلي صلاة الاستخارة واطلب من ربنا الخيره - والخيرة فيما اختاره الله

[wael_dosoky]

أشكركم بشدة علي ردودكم المفيدة بس في الأول نسيت اهنئكم بعيد الأضحي المبارك اعاده الله علينا جميعاً بالخير واليمن والبركات، بالنسبة للإختيار فأنا والله ساعات اميل لكل جهة شوية ، انا فعلاً يهمني في المقام الأول مصاريف التشغيل والصيانة لأني اصلاً ان شاء الله هجيبها بالقسط سواء اللانوس او الصني ، المشكلة تكمن عندي في اني قلقان من موضوع ان اللانوس في مشروع التاكسي ياعني بقة mass production وده اكيد انا متوقع انه يؤثر علي الكوالتي شركتنا كانت عندها لانوس موديل 1999 وكانت تحفة واستحملتنا جامد وبعدين لكا غيرتها لي لانوس 2006 بصراحة مستواها في كل شئ نزل فانا بصراحة خايف لما اجيب 2010 تبقي اسوء ولا رأيكم ايه

[wael_dosoky]

بص يا استاذ وهم
النيسان افضل بكتييير طبعا حتى لو 2005
بس انت منين ؟
هل جنبك مراكز خدمة للنيسان؟
مع العلم ان اى ميكانيكى لا مؤاخذة (cow) يقدر يشتغل فى اللانوس

انا من حلوان وبالمناسبة wahm دي الأحرف الأولي من مجموعتي انا واصدقائي المقربين فطلعت كده وبأشتغل مهندس في احدي الشركات الخاصة في مدينة نصر وتوكيل النيسان علي ما اعتقد في مدينة العبور بس ما قولتليش نيسان صني موديل 2007 وعامله 30000 وحالاتها كويسة تستاهل 70000 جنيه

[wael_dosoky]

شخصيا افضل الصنى .... انا ركبت الاتنين و سوقت الاتنين ....
مفيش مقارنه الصراحه ... الصنى تدى اللانوس بالقديمه ...

بالمناسبه انا معايا لانوس ... و هى عربيه كويسه و مريحه و محترمه و اعطالها قليله و معروفه ... و قطع غيارها مرميه عند البقال ... و كل الميكانيكيه بيفهمو فيها ...


بس اما سوقت الصنى حسيت بفرق رهيب الصراحه ... سحب اعلى بكتير ... سلاسه اعلى بكتير ... قوه اعلى بكتير ... و ثبات احسن ... و برستيج اعلى بكتييييييير ... بس فى المقابل ... اعادة بيعها تقيله ... قطع غيار اقل انتشار ... ميكانيكيه معينين ...


شوف ايه الى يناسبك انت و انت عاوز ايه من العربيه ...

بس ما قولتليش نيسان صني موديل 2007 وعامله 30000 وحالاتها كويسة تستاهل 70000 جنيه ويعدين تفتكر ممكن تطلب مصاريف تشغيل كتيرة

[hosamdaewoo]

معلش من كلمة استاذ
بص يا باشمهندس وهم
ما انا معرفش اسم تانى
هى تستاهل طبعا ---بس فاصل معاة تانى حتى 67000

[medo_8]

مصاريف العربيه يا جميل تعتمد على حالتها الى حصرتك الى تشوفها مش احنا وبعدين تشوف حالتها تجيب سعرها ولا لا وبعدين فى عربيات موديل سنوات فاتوا واغلى من الزيرو السنه دى بس طبعا لما اجى اجيب هجيب القديم علشان بيبقى محتفظ بقيمته وبعدين الخلاصه حضرتك بتقولى انك جايبها قسط يعنى الفلوس مش اوى فلو بتعتمد على الفخامه ومش همك الفلوس هات الصنى على طول لو حالتها كويسه ولو بدور على الأقتصاد فى الفلوس طبعا هات الانوس بس انا طبعا مش بقول عيوب بس فى اعضاء اشتكوا من بعض العيوب فى لانوس 2010 وبيقولوا انها عيوب نازله كدا من الشركه المجمعه يعنى عيوب ثابته فأنت بقى توكل على الله وشوف انهى اريحلك وطبعا كله يرجعلك انت وربنا ويوفقك ويكفيك شرها

[medo_8]

معلش لو على اسعار انا بصراحه مش بعرف فى اسعار الصنى

[wael_dosoky]

معلش من كلمة استاذ
بص يا باشمهندس وهم
ما انا معرفش اسم تانى
هى تستاهل طبعا ---بس فاصل معاة تانى حتى 67000

يا باشا ربنا يكرمك علي سرعة الرد واسمي وائل من غير استاذ او باشمهندس انا لا بحب الالقاب ولا اصلاً باعترف بيها ، الأجانب في تعاملتهم بيتكلموا بالأسم الأول او بأسم العائلة لكن احنا إلي غاويين منظرة بلا اي موضوعية المهم رأيك في السعر عاجبني وهأحاول معاه علي كده بعد الآجازة وربنا الموفق والمستعان وشكراً

[wael_dosoky]

مصاريف العربيه يا جميل تعتمد على حالتها الى حصرتك الى تشوفها مش احنا وبعدين تشوف حالتها تجيب سعرها ولا لا وبعدين فى عربيات موديل سنوات فاتوا واغلى من الزيرو السنه دى بس طبعا لما اجى اجيب هجيب القديم علشان بيبقى محتفظ بقيمته وبعدين الخلاصه حضرتك بتقولى انك جايبها قسط يعنى الفلوس مش اوى فلو بتعتمد على الفخامه ومش همك الفلوس هات الصنى على طول لو حالتها كويسه ولو بدور على الأقتصاد فى الفلوس طبعا هات الانوس بس انا طبعا مش بقول عيوب بس فى اعضاء اشتكوا من بعض العيوب فى لانوس 2010 وبيقولوا انها عيوب نازله كدا من الشركه المجمعه يعنى عيوب ثابته فأنت بقى توكل على الله وشوف انهى اريحلك وطبعا كله يرجعلك انت وربنا ويوفقك ويكفيك شرها

ربنا يكرمك علي الرد بس انا فعلاً حالياً يهمني الفلوس ومصاريف التشغيل في المقام الأول