صوت صاج بيزن من تحت العربية ... رجاء المساعدة

[abo_lamar]

السلام عليكم و رحمه الله

من فترة قريبة ظهر صوت في عربيتي جاي من تحت كأنه بالضبط صاجة بتزن , وصوت الزن ده بيحصل لما بهدي بالعربية من غير ما ادوس فرامل بس على سرعات قليلة من 40 كم ونازل , الصوت ده بجد قارفني اوي بالذات انه عالي وبيروح اول ما ادوس فرامل , قولت يمكن الشكمان وديتها لبتاع شكمانات وكشف عليها قالي الشكمان ثابت و زي الفل , وديتها لميكانيكي قالي كلام عايز اتأكد من حضراتكو منه ... قالي الصاجة اللي بتحمي صالون العربية من حرارة الشكمان و الفرن مهزوزة ودي اللي بتسبب الصوت ده ... ونزل تحت العربية وهات يا دقدقة وبعدين جربت العربية الصوت زي ماهو ....
الله يكرمكوا يا شباب ايه الحل ؟

[mailo]

دي غالبا بتبقى صاجة فرن الشكمان ممكن تربطها شوية بس الصوت مش هيختفي يعني, هيتأخر بس
وعلى فكرة الصوت ده في عربيات كتير مش lanos بس
أنا لسة سمعه في صني النهاردة الصبح
وبيبان مع ال rpm العالي شوية

[roofa]

بص يا باشا حصل معايا موقف زي دة في النوبيرا بتاعتي بس مع الاختلاف اني كل ما اخد مطب اسمع صوت صاج بيخبط في بعضة المهم بعد عذاب اكتشفت انها صاجة جوة تنك البنزين بتكون ملحومة بس ساعات لحماتها بتفك المهم فكيت الطلمبة و طلعتها و الحمد لله الصوت راح فنصيحتي ليك بص علي تنك البنزين يمكن يكون نفس اللي حصل معايا

[abo_lamar]

الصوت طلع من علبه الشكمان اللي في الوصلة الاخيرة , وغيرتها في الحرفيين و الصوت راح تماماً .

[abo_lamar]

يا جماعة انا خلاص غلوبت من الصوت ده الصوت شغال برضه حتى بعد ما غيرت علبه الشكمان , وديتها لميكانيكي و عفشجي وكله قالي بصراحة احنا جبنا اخرنا و مش عارفين ايه السبب .
باختصار ... لما امشي بالعربية واسيب رجلي من على دواسة البنزين اسمع صوت زنة او كأن حديد بيخبط في بعضه جاي من تحت العربية بس مش عارف احدد هل من الجانب الشمال ولا اليمين ( بس في الغالب شمال ) .
ولاحظت اني لو مورت الفتيس وشيلت رجلي من على دواسة البنزين الصوت مش بيحصل .

الصوت ده حصل من بعد ماروحت لواحد بتاع شكمانات غيرلي الماسورة اللي فيها السوستة اللي نازلة من فرن الشكمان وشالي علبه البيئه وركبلي مكانها علبه شكمان صغيرة ....

[abo_lamar]

والصوت الرخم ده مابيحصلش على سرعات عالية .. بيحصل لما بشيل رجلي بس من على دواسة البنزين وسرعة العربية اقل من 40 كم /س ...
الله يكرمكوا حد يشور عليا اعمل ايه ؟

[mero100]

بص يا باشا ..... روح مركز أبو اليزيد للشكمانات ..... خليهم يراجعوا علي الشكمان من أوله لأخره ......اكيد حاجه عاوزة تتظبط بعد التغيير اللي انت عملته.....

شركه ابو اليزيد همه اللي عاملين الشكمان بتاع اللانوس ..... بيفهموا بصراحة .

[tarek_2005]

غالباً وصلة من وصلات الشكمان مش مربوطة كويس ابو اليزيد افضل حد يبصلك علي الشكمان

[abo_lamar]

طب فين مكانه بالضبط ؟

[mailo]

تاني
الصوت ده هتلاقيه على كل الغيارات
احرق شوية على التالت كده 80 مثلا وارفع رجلك مرة واحدة من على البنزين وشوف

[ses19800]

بس ياباشا الصوت كان عندى وطلع من اتنين العفشه عايزه تربيط وبلى العجل الامامى عايز يتغير
اكشف على الحاجتين دول وقولى علشان انا كان عندى نفس المشكله ولما ربطت العفشه وغيرت البلى الصوت راح

[knightmido]

نفس المشكة كانت عندى الاسبوع اللى فات والسبب بعد الكشف كان علبة البيئة "الجزء الامامى من الشكمان" المادة اللى جواه اتكسرت وهو ده الل ىبيسبب الصوت والحل كان فى تغييرها بعلبة بيئة فاضية ب 250 جنيه والصوت راح الحمد لله

[المنسي]

بص يا باشا ..... روح مركز أبو اليزيد للشكمانات ..... خليهم يراجعوا علي الشكمان من أوله لأخره ......اكيد حاجه عاوزة تتظبط بعد التغيير اللي انت عملته.....

شركه ابو اليزيد همه اللي عاملين الشكمان بتاع اللانوس ..... بيفهموا بصراحة .

بعد اذنك مكانهم فين وهل الاقى عندهم شكمان فليشيا

[midokohein]

باشا ممكن تجربه اخيره
جرب وانت ماشي على السرعه الي بتظهر فيها الزنه ارفع رجلك من على البنزين والعربيه معشقه زي ما هي واول ما تسمع الصوت اركز بايدك على عصايه الفيتيس في اتجاه الغيار الي العربيه واخداه

لو الصوت اختفى يبقى بامر الله حخفيهولك خالص

[zomzom11]

متابع لان نفس المشكله عندى وبصراحه انا غيرت جزء من الشكمان من الفرن لغاية السوسته ووقفت قبل علبة البيئه بس الصوت ماظهرش غير بعدها بفتره ياريت نلغيه