نصيحه ضرورى جدا قبل ما اتسرع لانوس زيرو ولا نوبيرا استعمال

[islamawe]

السلام عليكم ورحمه الله وبركاته

ياريت يا شباب اخد رأيكو

قدامى نوبيرا 2006 عامله 69000 كيلو فابريقه بالكامل محتاجه 4 فرد كاوتش وفيها جنوط سبور عريض مخليين الباور تقيل شويه يعنى لو اخدتها هجيب جنوط حديد جديده وفيها جوان غطاء تاكيهات بيسرب زيت و ( قاعده موتور او جيربوكس مش متأكد )مش كويسه , الصالون بحاله ممتازه و العربيه كلها فيما عدا اللى قلت عليه ممتازه , صاحبها اخره فيها 54500 جنيه
وبفكر اجيب شيفروليه لانوس جديده و فى عرض حاليا ب 68750 جنيه كامله مانيوال و العرض ينتهى فى 31/3/2012

و عاوز اخلص ان شاء الله بكره نفسى اجيب الزيرو لكنى بحب النوبيرا و سع و ثبات و ساوند سيستم

مش عارف اعمل ايه

ياريت تشاركونى الرأى

[ahmad--ezzat]

زيرووووووووووووو

[محمد الشامي]

انا هاكلمك في المطلق بعيداً عن المشاكل اللي قولت عنها في النوبيرا

اللانوس عربيه حلوه لكن مش لدرجه انك تجيبها زيرو , خاصه بعد لما بقت شيفروليه , لانها حاليا خاماتها الداخليه مش زي الدايو وكمان فيها بعض حاجات صيني , لكن اولا واخيراً هي اسمها عربيه زيرو

النوبيرا عربيه محترمه اوي اوي اوي وفخمه وشيك وصاجها حلو (احسن من اللانوس) وعزم موتورها حلو وعربيه واسعه وثابته ويمكن ملهاش مشاكل كبيره او عيوب شائعه , بخلاف جلب المقصات ودي حلها انك تركب مقصات اسباني , وانسى امرها تماماً بعد كده

انا لو مكانك اشتري نوبيرا مش لانوس , لانها عربيه حلوه بجد

ده مجرد رأي شخصي :) وربنا يوفقك

[ahmad--ezzat]

ليه ميجبهش لانوس زيرو يا محمد باشا!!! اومال يجبها مستعمل??
وبصراحه النوبيرا صاجها مش حلو نهائي معرفش بتقول انه حلو ليه :)))

[tarek_2005]

رايي الخاص والخاص جداً خليك في الزيرو
اول رجل تركبها وتعودها علي طباعك وتعرف كل حاجة فيها وميبقاش في حاجة مستخبية كدا ولا كدا وعلشان متسمحش لانكل شوشو يلعب بدماغك من المستعمل

[محمد الشامي]

ليه ميجبهش لانوس زيرو يا محمد باشا!!! اومال يجبها مستعمل??
وبصراحه النوبيرا صاجها مش حلو نهائي معرفش بتقول انه حلو ليه :)))

ياباشمهندس خلاص يشتري زيرو :) بس ماتزعلش مني

بص يا باشا :) هي الحكايه كلها وجهات نظر مش اكتر

انا وجهه نظري ان قيمه الفلوس في النوبيرا هاتكون افضل من قيمتها في اللانوس
اللانوس عربيه زيرو لكن شكلها زي اللانوس اللي اتعملت من 11 سنه , يعني معنوياً مش هايحس بأي جديد , وده بالاضافه الى ان جودة الخامات قلت جداا بعد ما العربيه اصبحت شيفروليه , وعشان كده الناس بقت بتقول , تغوووووووور من وش منصووووووور :)
و في ناس كتير اشتكت من العربيه بدري اوي , يعني اللي يمشي بيها سنه وتلاقيه يقولك حساس الحراره باظ ! واللي يقولك طلمبة البنزين قطعت ! واللي يقولك العربيه بتحدف يمين وفيها عيب مقص ! وهكذا ,,,,,, يعني مش زي العربيات الزيرو اللي بتنساها 5 سنين من غير وجع دماغ

اما بالنسبه للنوبيرا , فـ هي فعلا صاجها احسن من اللانوس بشكل ملحوظ , وعشان كده انا حددت المقارنه في الصاج مع اللانوس :)
وهي كعربيه اكبر واوسع واشيك من اللانوس , مع مراعاه فرق الاداء والموتور والثبات على الطريق

عشان كده لو جاب النوبيرا هيبقا كسب عربيه جديره بالاحترام وبتمن اقل من تمن عربيه زيرو جديره بالاحترام بردو لكن على نطاق اضيق واقل من النوبيرا

[blazer]

رأى نوبيرا
لو هتجيب زيرو جيب اى حاجه فى نفس الرينج غير الانوس

[mahmoudysf]

رايي لو تقدر تخلي المبلغ 70
تقدر تجيب اوبترا حالتها ممتازة
وهي دايو برضة لاكن تحت اسم شيفورلية

[Car's Sniper]

كنت داخل اقول لحضرتك ...زيييرو ولو حتى عربية صينى بس عالاقل هتبقى عارف كل حاجة فيها
وبعدين كلام الاستاذ محمد الشامى اقنعنى وفعلا لو حضرتك دورت فى القسم هتلاقى ناس كتير بتشتكى من عيوب قى عربيات جديدة ماعداش عليها سنتين تلاتة
التصليحات اللى فى النوبيرا اللى حضرتك بتقول عليها دى كلها هتبقى فى حدود الف او الف ونص ..ممكن تقل لكن عمرها ماهتزيد وبما ان حضرتك ممكن تجيب لانوس جديدة بسعر اعلى فوفر فلوس اللانوس وخد منها الفين او 3000 شد النوبيرا دى وخليها زيرو ...يعنى من غير ما العربية تشتكى حضرتك اعمل صيانة لكل حاجة وغير كل سيورها وزيوتها وان شاء الله ترجع معاك زيرو لان وسع وثبات النوبيرا مش هتلاقيه فى اللانوس مهما حصل
وللامانة صاج النوبيرا معفن او الدايو عموما صاجه ورق
والدايو نوبيرا او لانوس جوا البلد حيتان بنزين
النوبيرا بقى تختلف عن اللانوس فى مشكلتين
جلب المقصات وغطا التاكيهات دول موجودين فى النوبيرا ومش موجودين فى اللانوس

[memofree]

انا من رأى محمد الشامى بصراحة الشيفورلية لانوس موش داخلة دماغى خالص . حتى اسأل سواقين التاكسى خد رأيهم عنها
ده حتى فى اخ محترمة فى المنتدى بتاع الانوس عنده علبة الشكمان الاولى اللى بعد الموتور باظت انا اعرف ان لو الموتور كويس يبوظ العلبة الاخيره موش الاولى و موديل حديث كمان
النوبيرا شوية تظبيط و هتكون عال العال و ربيا يوفئك فى الاختيار ان شاء الله

[islamawe]

الف شكر لكل الاخوه اللى اهتمت بالرد
معظمكم مرشح انى اجيب نوبيرا
طيب بعد اذنكم فى بخصوص النوبيرا
1- هل سعرها كده غالى على الحاله
2- لما تيجى تفتح الكابوت المفروض تلاقى استيكر موبيل على شمال الشنب ده اللى انا متعود عليه
فى العربيه دى مش موجود الاستيكر ده فأنا قلقان انها تكون مغيره تلت امامى اوروبى ولا انا كده موسوس
اوى ؟؟؟ علما بان العربيه كلها فعلا فابريقه خوارج بالكامل
3- العربيه مغيره البربيز الامامى و الخلفى هل يعيبها ؟؟؟؟

و شكرا اوى اوى ليكو

[محمد الشامي]

1- هل سعرها كده غالى على الحاله

انا مش عارف حاجه عن الأسعار من فتره , لكن مقارنة بعربيات مشابهه سعرها مش وحش , ولكن لو تقل الف او اتنين يبقا انت الكسبان

2- لما تيجى تفتح الكابوت المفروض تلاقى استيكر موبيل على شمال الشنب ده اللى انا متعود عليه
فى العربيه دى مش موجود الاستيكر ده فأنا قلقان انها تكون مغيره تلت امامى اوروبى ولا انا كده موسوس
اوى ؟؟؟ علما بان العربيه كلها فعلا فابريقه خوارج بالكامل

عشان تطمئن اكشف علي العربيه في بنزينه متخصصه او اكتر من بنزينه , واستخير ربنا وتوكل على الله

3- العربيه مغيره البربيز الامامى و الخلفى هل يعيبها ؟؟؟؟

لا يعيبها في شئ

[asom_6]

1- هل سعرها كده غالى على الحاله
2- لما تيجى تفتح الكابوت المفروض تلاقى استيكر موبيل على شمال الشنب ده اللى انا متعود عليه
فى العربيه دى مش موجود الاستيكر ده فأنا قلقان انها تكون مغيره تلت امامى اوروبى ولا انا كده موسوس
اوى ؟؟؟ علما بان العربيه كلها فعلا فابريقه خوارج بالكامل
3- العربيه مغيره البربيز الامامى و الخلفى هل يعيبها ؟؟؟؟

و شكرا اوى اوى ليكو

ماهو هو ده بالظبط الفرق بين انك تجيب زيرو أو مستعمل ... نفس الثلاثة اسئلة دول تحديداً .... هل ياترى السعر مناسب ولا زيادة عليها ... هل ياترى مغيره حاجه انا موش واخد بالى منها وهتبان بعدين ... هل ياترى حالة العربية كده كويسة ولا معيوبة وانا واخدانى الحماسة للشراء ... وفى سؤال مهم اخر هو هل لو انتظرت شوية مش يمكن اصادف حاجة احسن ؟؟.

أنا مريت بنفس حيرتك دى لما جيت اشترى عربية لاول مرة وبسبب هذه الوساوس اللى عانيت منها والمقالب اللى كنت هشربها وربك بيستر والحمد لله ... وصلت لقناعة ان المستعمل لو مش من حد معرفة قووووووى ومعروف وسوسته فى الحفاظ على سيارته يبقى بلاش منه منعاً للعيوب الخفية اللى مش بيعرفها غير صاحبها وللأسف فى 99% مبيكونش أمين ويقول عليها وتقعد انت تلف وتدور وتدور عالسبب وتصرف مصاريف على حاجات تانية وبرضه ماتوصلش للعيب الا بشق الانفس.

بالنسبة للانوس والنوبيرا ... النوبيرا طبعاً برقبة اللانوس بس لوكانت زيرو او من حد معرفة قوووووى زى ماقولنا ... لكن نوبيرا مستعملة ومش من حد معرفة ((مرة تالتة )) - - - قوووووى --- يبقى الصراحة اللانوس الزيرو تكسب.
طيب تكسب ليه ؟؟؟ لأنها زيرو وعليها ضمان ثلاث سنين وقطع غيار وميكانيكا واضحة ومهم جدا جدا أنها ماسكة سعر اعادة بيع وده أعتقد من اكبر مزايا اللانوس يعنى لو مليت منها لأى سبب هتبيع وانت واقف على اساس انها اول ايد من الزيرو وموديل جديد يعنى الخسارة لا تذكر تقريباً ((الفرق انت ركبت بيه عربية زيرو بدون تنغيص المستعمل)).

وبما ان المقارنة المطلوبة محصورة بين العربييتين دول تحديداً فبلاش ندخل فى متاهة عربية زيرو او مستعملة ماركة تانية هل هتكون افضل او لأ ....

أتمنى لك التوفيق فى اختيارك .. وربنا ييسرلك الأصلح فى جميع الأحوال.

[prince2005]

رأى نوبيرا
لو هتجيب زيرو جيب اى حاجه فى نفس الرينج غير الانوس

Stay away from Chevy Lanos .Try a used Nubira but with a good condition.Larger,more comfortable and more powerful

[besso33]

انا كان معايا اللانوس ومعايا دلوقتي النوبيرا وبصراحة النوبيرا اجمل بكتير من اللانوس وانا رائي انك تنزل من سعر العربية المعروضة عليك الفين جنيه تظبط بيهم العربية ولو صاحبها مرضيش هتلاقي بالسعر ده حاجات كتير كويسة جدا ولو خدتها منو يمكن نبدل مع بعض الجنوط ،انا عندي جنط 14 ولو عندك جنط 15 نشوف وقتها تقبل البدل ام لا وفي كل حال ربنا يوفقك