حد جرب يلغى الثرموستات

[Shiref_mohamed]

السلام عليكم ورحمة الله
حد يا جماعة جرب فعلياً انه يشيل الثرموستات بتاع المياه الى بيقفل المياه عن الموتور وهوه بارد وياريت الى جرب يقولنا الفرق الى حصل في العربية معاه بالظبط ؟

سؤالى ده ليه بقى اصل انا عندى العربية بتسخن وانا الوحيد الى حاسس انها بتسخن ولما بتسخن بتفصل والميكانيكيون قالولى ان الموبينة الى انتا مركبها هيا الى لما بتسخن بتفصل وانا بصراحة مقتنعتش بالكلام ده لآن موبينات العربيات القديمة هيا الي بتفصل لما بتسخن انما معتقدش الكلام ده في اللانوس وكمان عشان اقطع الشك باليقين كنت شايل معايا موبينه تانية اول ماقطعت رحت نازل بسرعة وفاكك الى راكبة ومركب التانية واجي ادور برضه متدورش لازم اسيبها نص ساعة وادور تدور عادى
والى بيحصل معايا اني بكون ماشي في امان الله بس لازم يكون لجو نار انما لو الجو حلو مبتفصلش خالص بس بكون ماشي والاقيها قطعت شويه وبعدين تموت خالص فقررت انى اشيل الثرموستات بتاع المية عشان العربية تبرد اكتر واخونا محمد ممدوح كان قال ان إلغاء الثرموستات بيلخبط العربية في السلانسية وبيزود استهلاك البنزين ياريت تفيدوني عشان اقدر اخد قرار لآني فاكك العربية والثرموستات معايا اشيله ولا اخليه وشكراً

[Shiref_mohamed]

ايه يا ناس محدش جرب موضوع الثرموستات ده ولا ايه ده بتاع قطع الغيار نفسه قالى الغيه وقالى كمان ان كل العربيات الدايو الى ماشية ديه لاغيه الثرموستات ده

[MMamdouh]

واخونا محمد ممدوح كان قال ان إلغاء الثرموستات بيلخبط العربية في السلانسية وبيزود استهلاك البنزين

انا قلت اللى عندى قبل كدة زى ما انت شايف...

انت مش مقتنع بكلامى... دى حريتك الشخصية
بتدى ودنك لناس مبتفهمش و بتقولك على حاجات غلط... برضة حريتك الشخصية

اللى مش فاهمة هو ليه عايز حد من المنتدى يقولك "اعمل الغلط"؟؟

MMamdouh

[Shiref_mohamed]

اولا انا مقتنع بكلامك ومتاكد انه صح بس ده من الناحيه النظرية وانا كنت بسال على حد جرب الموضوع عملياً مش اكتر
ثانياَ : محمد عبده كان بص قبل كده على مكان الثرموستات ولاقى عليه سليكون احمر وقالى انه ملغي عندك ومقاليش انه غلط وانا لما فكيت لاقيته راكب مش ملغي زي ماقلى

ثالثاً : انا مش عاوز حد يقولى على غلط بس انا عاوز اعرف حد جرب ولا لآ يقولنا على تجربته والى حس بيه في عربيته بغض النظر ان كان صح ولا غلط لآن الى قالي اشيل الثرموستات واحد بتاع قطع غيار والثرموستات كان موجود عنده ووراهولى بس قالى احسن تلغيه
رابعاً : انا عارف انك استاذ دايو يا محمد بس الغرض من فتح موضوعى اني استفاد وباقى اخواتنا في المنتدي يستفادو

[MMamdouh]

الترموستات مبيتشالش عشان يتلغى... هما بيخلعوا الاكس بتاعة من مكانة فا بيفضل مفتوح على طول

البياع اللى قالك كدة مبيفهمش.. لو كان فاهم كان عرف وظيفة الترموستات ايه و بالتالى مكنش قالك شيله

العربية اللى الترموستات بتاعها مفتوح بتاخد وقت كبير عشان تسخن و على الطوالى فى الشتاء حتبرد زيادة عن اللزوم

الموضوع مش محتاج افادة للناس.... الكل عارف ان لغى الترموستات غلط

MMamdouh

[khaledazizeg]

كلام الاستاذ MMamdouh صح وانتا لو فصلت سلك الترموستات هتفضل على طول المراوح شغالة واقلك حل وطبعا داة مؤقت شيل شبكة السيارة الامامية الى فى الكبوت وجرب وامشى بيها وشوف اية الى هيحصل لو لسة بتفصل يبقى البوبينة اصل انا حصل معاية الموقف دوا بس فى لادا كالينا 2006

[MMamdouh]

احنا قصدنا الترموستات الميكانيكى اللى فى الكوعة بتاعت الوش مش حساس الحرارة اللى تحت البوبينة

MMamdouh

[moby]

الترموستات ضرورى لتثبيت حرارة السيارة
لأن أنخفاض أو زيادة الحرارة عن المعدل المثالى يسبب تأكل فى الشنبر
ومع الوقت يقصر عمر الموتور ....
وشكرا

[ENG\AHMED]

الثرموستات عبارة عن صمام بيقفل علشان يدور مية الموتور داخل الموتور ويمنعها عن الرادياتير ويفتح علشان توصل للرادياتير ودة بيتم عن طريق الضغط لما المية تسخن الضغط يزيد ويفتح الثرموستات

اللى بيحصل لما تشيل الثرموستات
-العربية هتاخد وقت طويل جدا علشان تسخن
-هتلاقى العربية مبرجلة ومش مظبوطة لأن كل عربية مصممة علشان تشتغل عند درجة حرارة معينة بحيث تعطى افضل اداء
-نتيجة البرودة الزيادة وطول فترة التسخين هيزود تكسف حمض الكبريتيك على جدران الاسطوانات الداخلية وهيؤدى الى تاكل الاسطوانات وهيقصف عمر الموتور
ميتهيألى كفاية كدة :)

احسنلك تدور على سبب المشكلة وتحلها بلاش مسكنات هتضر اكتر لما تفيد
اى صنايعى ايا كان قالك شيل ثرموستات سيبة وامشى وسيبك من اللى يقولك دى معمولة علشان المناطق الباردة والكلام دة

[Shiref_mohamed]

تمام يا جماعة كلام منطقي جداً بس الغريب بقى ان الثرموستات ده موجود في جميع العربيات تقريبا مش اللانوس بس وامبارح وانا بتكلم مع جارى معاه شاهين 2007 Injectinوقالى انه شايله لأن العربية برضه كانت بتولع معاه وكمان موجود في اللادا والـ128 واللانسر ده حتى عمى معاه عربية شيفروليه دبابه بيك اب قالى انه موجود فيها وهو شايله يعني تقريبا موجود في كل العربيات وكل الناس فعلا شايلاه مش عارف بقى اسمع كلام العقل والمنطق ولا اسمع كلام الناس الى مجربه

[MMamdouh]

تمام يا جماعة كلام منطقي جداً بس الغريب بقى ان الثرموستات ده موجود في جميع العربيات تقريبا مش اللانوس بس وامبارح وانا بتكلم مع جارى معاه شاهين 2007 Injectinوقالى انه شايله لأن العربية برضه كانت بتولع معاه وكمان موجود في اللادا والـ128 واللانسر ده حتى عمى معاه عربية شيفروليه دبابه بيك اب قالى انه موجود فيها وهو شايله يعني تقريبا موجود في كل العربيات وكل الناس فعلا شايلاه مش عارف بقى اسمع كلام العقل والمنطق ولا اسمع كلام الناس الى مجربه

سمعت قصة"ابو ودنين اهة" قبل كدة؟؟؟

MMamdouh

[iBiZa]

كان بص قبل كده على مكان الثرموستات ولاقى عليه سليكون احمر وقالى انه ملغي عندك

مش معنى سيليكون انة ملغى {الى يقول كدة مبيفهمش}.
سيليكون معناة انة الكوعة اتفكت قبل كدة سواء للتغير او للالغاء.
95% من ميكانيكية مصر مقتنعين انة صح يتشال فا محدش هيقولك انة غلط يتشال.

وكمان موجود في اللادا والـ128 واللانسر

انا كان معايا 128 موديل 1987 و مكانش فيها اصلا و واحد صاحبى معاة موديل 1990 و مافيهاش اصلا.

[Shiref_mohamed]

حضرتك كل الـ 128 الى في مصر ملغي فيها الثرموستات وانا متأكد من كلامي عشان انا كان معايا 128 وفكيت موتورها عملتله عمره بأيدي وعارف المكان الى بيركب فيه

[Shiref_mohamed]

[quote=MMamdouh;308662]سمعت قصة"ابو ودنين اهة" قبل كدة؟؟؟

لا مسمعتهاش

[MMamdouh]

بص يا سيدى...

بيقولك زمان كان فيه بلد فيها ملك

الملك دة خلف ابن بس كان عندة عيب خلقى

الولد كان بودن واحدة

الملك زعل على ابنة و خاف الاولاد يعايروة بانة بودن واحدة

الملك طلع قرار ان كل الاولاد اللى يتولدوا يتقطع ودنهم عشان يبقوا زى ابن الملك

و فعلا اتنفذ القرار لسنوات و العيال بقت كلها بودن واحدة

فى يوم من الايام الملك دة مات

و بعد ما مات مبقاش حد يقطع ودن العيال

واحد من العيال اللى من الجيل اللى متقطعش ودنة دخل المدرسة

كل العيال اللى بودن واحدة شافوة و استغربوا

العيال اتلمت حوالين الواد و بقوا يعايروة و يقولوله: ابو ودنين اهو... اهو

وصلت الفكرة؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

MMamdouh