طريقة عمل فلتر هواء لتكييف لانوس ... بدون تفاصيل!!!!!!!

[مصطفى-حسن]

طبعا كلنا عارفين ان دايو لانوس 1 و 2 بينزلو من غير فلتر تكييف هواء
ودة يعتبر عيب
او نقدر نقول انها امتياز او امكانية غير موجود فى لانوس 1 و 2
فمن هنا جت فى دماغى فكرة انى اعمل لها فلتر تكييف هواء

انا عارف ان انا مش اول واحد يفكر فى الموضوع دة
وعارف ان فية اكتر من موضوع هنا فى قسم الانوس ناقش الفكرة دى
وكان فية اجتهادات كتيرة ومشكورة
لكن فى النهاية.....
موصلناش للفكرة الكاملة
ازاى نعمل فلتر تكييف هواء للانوس والاهم هيكون مكانة فين
وهيكون فلتر واحد ولا فلترين


بس الاول قبل ما اخش فى الموضوع لازم اشرح دورة الهوا فى تكييف لانوس
لان فية ناس معانا فى القسم كل اللى تعرفة عن تكييف عربيتة هو زرار A/C والبكر بتاع التوزيع اللى فوق الكاسيت وخلاص


وفى نفس الوقت عشان انا عايز الموضوع دة يكون تفاعلى

بمعنى

كل المواضيع اللى انا عملتها فى القسم دة كانت بالشرح والصور
ما عدا الموضوع دة
لازم يكون تفاعلى

لان بصراحة بصراحة انا اتسحلت على اما انتهيت منة

واخد معايا فترة طويلة (متقطعة) تفكير وتصميم والاهم المكان
واكتر من محاولة فاشلة
وكل محاولة كنت بصورها عشان لو نجحت ارفعها بالصور فى المنتدى
لكن للاسف فى الاخر كانت بتفشل
وايديا اتجرحت اكتر من مرة
دة غير ان انا كنت مجبور انى اتعامل مع الاعراض الجانبية السلبية اللى كانت بتحصل من كل محاولة فاشلة
لدرجة انى مرة فكيت العلبة اللى تحت التلاجة بالماتور (وكلنا عارفين مدى صعوبتها ورخامتها)
ومرة اضطريت انى افك الرفرف اليمن الامامى بتاع العربية (بعدين هقولكم لية)

وبصراحة من كتر ما انا تعبت فكرت انى اطرح الموضوع بشكل تجارى
بس كانت المشكلة انى طول موسم الصيف بكون مشغول فى شغلى وكمان فى تنظيم رحلات السنوركل والغطس الحر والتصوير تحت المية اللى فى الموضوع دة
http://www.nilemotors.net/Nile/354967-a.html

ففعلا مكانش هيبقى عندى وقت
عشان كدة قلت هعملة مجانى للاعضاء
بس عشان انا تعبت فية بجد بجد
فقلت ضرورى الناس تتعب معايا شوية وتجتهد

وعشان تبقى الفكرة واضحة وكلامى واضح
انا هشرح دورة الهواء فى التكييف بالصور
وبعدين هستنى اراء الاعضاء وافكارهم فى 3 حاجات اساسية
الفلتر هيتعمل من اية (ودة الجزء السهل) ؟؟؟؟
وهيكون فلتر واحد ولا فلترين (ودة الجزء المحير) ؟؟؟؟؟
وهيكون مكانة فين (ودة اصل الفكرة) ؟؟؟؟؟

ولما حد من الاعضاء يقولى مثلا هنعملة من كذا وكذا
وهيكون مكانة فى الحتة الفلانية

مش هقولة انت صح ولا انت غلط
لكن هرد علية بالصور من كل المحاولات اللى انا عملتها
وهطلب منة التاكد من فكرتة بالصور بردو
وهنبهة على العقبات اللى هتقابلة
وهفكر معاة بصوت عالى وكل دة هيكون بالصور من واقع التجارب الفاشلة والتجربة الوحيدة الناجحة

لحد ما يوصل هوة او غيرة من الاعضاء للفكرة الكاملة
ساعتها هطرح الفكرة بالكامل وبالصور وبالتفاصيل المملة

هبدا الاول شرح دورة الهواء المبسطة فى التكييف

الاول دة شكل التابلوة


وبعدين هنشيل التابلوة خالص عشان نعرف الدنيا تحت ماشية ازاى
والارقام اللى انا هحطها على الصورة ركز فيها عشان هنحتاجها كتير فى الشرح وفى التفكير



لما بيكون الزرار دة على الوضعية دى


يبقى معنى كدة ان بداية دخول الهواء لدورة التكييف من داخل صالون العربية تحديدا من حوالين درج التابلوة من عند رقم 1


ولما بيكون على الوضعية دى


يبقى معنى كدة ان بداية دخول الهواء لدورة التكييف من برة العربية من عند الهوايات اللى تحت المساحات



فى الحالتين الهوا بيدخل على موتور المروحة رقم 2
اللى بنتحكم فى سرعتة من البكرة دى


وبعدين الهوا بيعدى على التلاجة اللى فى المكان رقم 3
يطلع هوا ساقع

يدخل بعد كدة على الغرفة بتاعة سربنتينة السخن رقم 4 اللى بتعتمد على دورة المية بتاعة الموتور فى تسخين نفسها

ودى الهوا مبيعديش منها ويتخلط بالسخن الا لو استخدمت البكرة دى عشان تخلط سخن ببارد


وهنا فية معلومة عايز اقولها
ان دورة الفريون بتكون شغالة علطول حتى لو استخدمت السخن فى الشتا لانك لو استخدمت السخن بس بدون تخليط الهوا البارد او تشغيل التكييف حتى ولو بنسبة بسيطة نسبة الرطوبة فى الكابينة بتزيد وتحس نفسك اتخنقت والصالون اتكتم والازاز يشبر من جوة بسرعة

بعد كدة الهوا بيدخل غرفة التوزيع رقم 5 واللى بنتحكم فيها من البكرة دى


هى دى ببساطة دورة الهوا فى تكييف العربية الانوس

طيب

سؤال مهم وبيطرح نفسة
هو الفلتر دة لزمتة اية؟؟؟؟؟؟
يعنى هوة رفاهية مثلا وترف؟؟؟؟؟؟
الاجابة
لا
الفلتر دة اساسى

لان بدون الفلتر التراب اللى بيدخل بيتجمع على التلاجة لانها بتكون رطبة اثناء التشغيل وبيسد الشرايح بتاعتها فمع مرور الوقت تلاقى التكييف شغال بنص قوتة الحقيقية لان الشرايح بتاعة التلاجة اتسدت

دة غير انك اول ما بتشغل التكييف بتلاقى ريحة عفونة طالعة من الفتحات وبتروح بعد دقيقة او دقيقتين من التشغيل

عشان كدة تلاقى ناس تشتكى ان التكييف بالنهار يادوب ملطف الجو بالعافية جوة العربية
لكن مبتسقعش من التكييف بالنهار ابدا
وتلاقى الناس تروح لبتاع التكييف تشتكى من ضعف التكييف ويشحن فريون ومش عارف اية ويقولة الكباس والجوانات ...الخ
والمشكلة كلها ان التلاجة مسدودة عشان مفيش فلتر هوا
عشان كدة عملت الموضوع دة

نيجى بقة لموضوعونا الرئيسى

الفلتر هيتعمل من اية (ودة الجزء السهل) ؟؟؟؟
وهيكون فلتر واحد ولا فلترين (ودة الجزء المحير) ؟؟؟؟؟
وهيكون مكانة فين (ودة اصل الفكرة) ؟؟؟؟؟

[Mohamed ELOoL]

لا بقي :)

انت تفتح ورشة و نيجي نعمل الكلام دة عندك

لا بجد بسم الله ما شاء الله دماغك دي الماظاط :)

[مصطفى-حسن]

لا بقي :)

انت تفتح ورشة و نيجي نعمل الكلام دة عندك

لا بجد بسم الله ما شاء الله دماغك دي الماظاط :)

ياباشا ربنا يكرمك
انا عايز الناس بس تشغل دماغها شوية
لانى فعلا فعلا تعبت على ما عملتة

[aldesha989]

يا باشا احنا عايزين ورشه نتعلم فيها من ايدك انتا خليت عربيتك ما شاء الله حقل تجارب :d

[مصطفى-حسن]

يا باشا احنا عايزين ورشه نتعلم فيها من ايدك انتا خليت عربيتك ما شاء الله حقل تجارب :d

ربنا يكرمك اخى الفاضل
وفى انتظار افكار الاعضاء

[Mohamed ELOoL]

ياباشا ربنا يكرمك
انا عايز الناس بس تشغل دماغها شوية
لانى فعلا فعلا تعبت على ما عملتة

و الله و مش اي تعب ربنا يكرمك ( انت من عباقرة المنتدي هنا )

ماهو المشكلة بقي ان كل واحد مش هايقدر يعمل الكلام دة و انا اولهم عشان صعوبته دي عيزة صنيعي

او هيقول لنفسه عنها متعملت

بس واضح انك بتحب عربيتك اوي عشان كدة بتديها ربنا يحفظهالك

[مصطفى-حسن]

و الله و مش اي تعب ربنا يكرمك ( انت من عباقرة المنتدي هنا )

ماهو المشكلة بقي ان كل واحد مش هايقدر يعمل الكلام دة و انا اولهم عشان صعوبته دي عيزة صنيعي

او هيقول لنفسه عنها متعملت

بس واضح انك بتحب عربيتك اوي عشان كدة بتديها ربنا يحفظهالك

انا هقولك على حاجة بسيطة عشان تعرف فايدة الفكرة دى

المعروف عن الانوس ان التكييف بتاعها فى احسن حالاتة بيكيف الصالون لما يكون الوقت فى عز الحر (الساعة 12 او 1 ظهرا)

لكن عمرة ما يخليك تسقع
العربيات اليابانى هيا اللى ممكن التكييف بتاعها يخليك تسقع بالنهار فى عز الحر

انا بعد ما عزلت عريبتى بالارما فلكس ونضفت التلاجة وعملت الفلتر بقيت بسقع من التكييف فى عز الحر وعلى المستوى 3 كمان مش 4 رغم ان عربيتى لونها اسود

فحبيت انقل الفكرة لكل الاعضاء
عشان الناس تستفيد من امكانيات العربية كاملة

وربنا يسهل فى كام موضوع كدة عمال افحر وامخمخ فيهم - تركيب فرامل abs وعمل فتحة سقف بالكهرباء- بس للامانة المواضيع دى لسة بدرى عليها قوى عشان بعمل حساب كل حاجة وطبعا المجازفة المادية

بس دة بعدين مش دلوقتى
نخلص بس موضوع فلتر هواء للتكييف
وبعدين فية كام تعديل بسيط ولذيذ كدة على الماشى هبقى اعملهم فى مواضيع بردو
وربنا يسهل

[ahmedhilmy]

ما شاء الله ربنا يقويك متابع معاكم الموضوع

[Mohamed ELOoL]

انا هقولك على حاجة بسيطة عشان تعرف فايدة الفكرة دى

المعروف عن الانوس ان التكييف بتاعها فى احسن حالاتة بيكيف الصالون لما يكون الوقت فى عز الحر (الساعة 12 او 1 ظهرا)

لكن عمرة ما يخليك تسقع
العربيات اليابانى هيا اللى ممكن التكييف بتاعها يخليك تسقع بالنهار فى عز الحر

انا بعد ما عزلت عريبتى بالارما فلكس ونضفت التلاجة وعملت الفلتر بقيت بسقع من التكييف فى عز الحر وعلى المستوى 3 كمان مش 4 رغم ان عربيتى لونها اسود

فحبيت انقل الفكرة لكل الاعضاء
عشان الناس تستفيد من امكانيات العربية كاملة

وربنا يسهل فى كام موضوع كدة عمال افحر وامخمخ فيهم - تركيب فرامل abs وعمل فتحة سقف بالكهرباء- بس للامانة المواضيع دى لسة بدرى عليها قوى عشان بعمل حساب كل حاجة وطبعا المجازفة المادية

بس دة بعدين مش دلوقتى
نخلص بس موضوع فلتر هواء للتكييف
وبعدين فية كام تعديل بسيط ولذيذ كدة على الماشى هبقى اعملهم فى مواضيع بردو
وربنا يسهل

يا باشا ... موضيعك دي من احسن الوضيع الي شوفتها في حياتي ( انت بتغير الواقع ) :) ... و بتابعها كويس علي فكرة

بس انت مفهمتنيش بردو انا قصدي هيبقي صعب علي الناس انها تعمل الكلام د باديها زي حضرتك

كله هيخاف يعك في العربية عشان ماتخربش

و لو راح لصنيعي مش هيبقي فاهم الفقرة الي طابها منو غير قليل اوي دة خلاف التكلف طبعا

حضرتك فاهم انت بتعمل ايه كويس و دماغك نضيفة اوي ( ماشاء الله )

[JAM]

طيب أولاً هوا الفلتر هيركب تحت هوايات دخول الهواءاللى تحت المساحات.. وتحديداً الهواية الشمال لو إنتا واقف قدام العربية.. وهوا دا مكان دخول الهواء.. وطبعآ مادة الفلتر نفسها هتكور عبارة عن فلتر بتاع أى عربية ونأيفه بالشكل اللى هيركب فوق فتحت دخول الهواء.. وطبعاً هيكون فلتر واحد بس.. دا من وجهة نظرى

خالص تحياتى لحضرتك لإنك أحييت فكرة أنا نفسى أعملها من زمان بس الوقت هوا اللى دائماً بيكون عقبة فى تحقيق أى من أفكارى
رمضان كريم
م/ أحمد نبيل

[MITSUKERO]

رأيي انهم يبقوا عدد 2 فلتر

واحد زي الاخ اللي قبلي ما قال يبقي للهواء الخارجي و ده كان اجتهاد سابق من استاذ طارق و استاذ محمد ممدوح


التاني بقي و ده اللي جديد يبقي عند الفتحة رقم 1 و الفكرة تعتمد علي وضعة بين الفتحات و السربنتينة كل المشكلة هتبقي في صعوبة اخراجة لتنضيفه و الحل اننا نفتح فتحة علي مقاسة ( و ده شيء صعب و محتاج دقة) الفتحة دي تبان لما نشيل درج التابلوه زي الفلتر اللي موجود في اغلب العربيات

طبعا الفلتر لازم يبقي مقاسة مظبوط فالمفروض ندور علي فلتر تكييف بتاع عربية تانية يكون حجمة لايق علي الجزء اللي هيتركب فيه و اقترح فلتر الفيرنا لان التابلوه بتاع الاتنين قريب في حجمة من بعض

متابع معاك و يارب اكون معجنتش

[popahly]

المفروض قبل التفكير فى مكان الفلتر فين، نفكر فى الطريقة اللى بيها يبقى سهل نعرف نفك الفلتر يتنضف، زى العربيات اللانسر كدا يبقى فى الدرج موجود فلتر التكييف وسهل فكه وتغييره او تنظيفه...

[mohamed sharm]

ما شاء الله ربنا يقويك متابع معاكم الموضوع

[مصطفى-حسن]

يا باشا ... موضيعك دي من احسن الوضيع الي شوفتها في حياتي ( انت بتغير الواقع ) :) ... و بتابعها كويس علي فكرة

بس انت مفهمتنيش بردو انا قصدي هيبقي صعب علي الناس انها تعمل الكلام د باديها زي حضرتك

كله هيخاف يعك في العربية عشان ماتخربش

و لو راح لصنيعي مش هيبقي فاهم الفقرة الي طابها منو غير قليل اوي دة خلاف التكلف طبعا

حضرتك فاهم انت بتعمل ايه كويس و دماغك نضيفة اوي ( ماشاء الله )

ياباشا ربنا يكرمك على ردك الراقى
وانا شخص عادى بس بحب الاجتهاد
وربنا بيكرم ويوفق من عندة
واشكرك مرة تانية على ردك الراقى

طيب أولاً هوا الفلتر هيركب تحت هوايات دخول الهواءاللى تحت المساحات.. وتحديداً الهواية الشمال لو إنتا واقف قدام العربية.. وهوا دا مكان دخول الهواء.. وطبعآ مادة الفلتر نفسها هتكور عبارة عن فلتر بتاع أى عربية ونأيفه بالشكل اللى هيركب فوق فتحت دخول الهواء.. وطبعاً هيكون فلتر واحد بس.. دا من وجهة نظرى

خالص تحياتى لحضرتك لإنك أحييت فكرة أنا نفسى أعملها من زمان بس الوقت هوا اللى دائماً بيكون عقبة فى تحقيق أى من أفكارى
رمضان كريم
م/ أحمد نبيل

رأيي انهم يبقوا عدد 2 فلتر

واحد زي الاخ اللي قبلي ما قال يبقي للهواء الخارجي و ده كان اجتهاد سابق من استاذ طارق و استاذ محمد ممدوح


التاني بقي و ده اللي جديد يبقي عند الفتحة رقم 1 و الفكرة تعتمد علي وضعة بين الفتحات و السربنتينة كل المشكلة هتبقي في صعوبة اخراجة لتنضيفه و الحل اننا نفتح فتحة علي مقاسة ( و ده شيء صعب و محتاج دقة) الفتحة دي تبان لما نشيل درج التابلوه زي الفلتر اللي موجود في اغلب العربيات

طبعا الفلتر لازم يبقي مقاسة مظبوط فالمفروض ندور علي فلتر تكييف بتاع عربية تانية يكون حجمة لايق علي الجزء اللي هيتركب فيه و اقترح فلتر الفيرنا لان التابلوه بتاع الاتنين قريب في حجمة من بعض

متابع معاك و يارب اكون معجنتش

كويس جدا لحد دلوقتى
بس انا زى ما قلت فى بداية الموضوع
انا مش هقول لاى حد انت صح ولا غلط
انا هكمل معاك وهفكر معاك بصوت عالى وبالصور كمان
بس زى ما قلت
التفاعل هيبقى عملى
مش نظرى قدام الكيبورد
لان فية فرق بين النظرى والعملى زى الفرق بين السما والارض

وبناء علية
هستأذن حضراتكم انكم تختبروا الافكار اللى طرحتوها عن طريق الاتى
هترفع الكبوت بتاع العربية
وهتشيل الكاوتشة بايدك عادى وتفكال 3 مسامير البلاستيك دول وارفع الفبرة



وبعدين شيل مظراب توجية مية المطر والغسيل دة



هتبقى الدنيا فاضية قدامك
بص فى المكان دة كويس على مكان دخول الهواء لبداية دورة التكييف من برة العربية



وحاول تدخل دراعك للاخر
وتشوف مدى مجال ايدك ودراعك هيوصل لحد فين (عشان دى مهمة)



وتخيل نفسك لو ماسك الفلتر بايدك
هتقدر تتحكم فية وتوصلة لمكانة وتثبتة
وقولى على كل ملاحظاتك بالاجمال

بس فية تحذرين
الاول حاول ما تجرحش ايدك
التانى لو لقيت المكان دى كلة تراب وعفش وطينة متجمدة
متحاولش تنضفة
متحاولش تنضفة
ادينى حذرت مرتين اهوة
وهبقى اقول بعدين لية متحاولش تنضفة

مستنى ملاحظاتكم وتقريركم

المفروض قبل التفكير فى مكان الفلتر فين، نفكر فى الطريقة اللى بيها يبقى سهل نعرف نفك الفلتر يتنضف، زى العربيات اللانسر كدا يبقى فى الدرج موجود فلتر التكييف وسهل فكه وتغييره او تنظيفه...

كلام منطقى جدا ويحترم
يلا يا معلم
فكر معانا

[مصطفى-حسن]

ما شاء الله ربنا يقويك متابع معاكم الموضوع

متابع بس !!!!!!!!!!
يعنى مفيش اى افكار او اقتراحات