والله مشكلة مجنناني (التسقيف)

[profshady]

يا جماعة انا بعاني من مشكلة التسقيف ده بقالي سنة بالضبط واللي يقولي بوجيهات واللي يقولي فلتر بنزين وفلتر الهواء ... المهم اني من ساعة ما اخدت العربية طبعا مغير سيور الكاتينة والتكيف والدينمو وفلتر البنزين والبوجيهات ... المهم روحت لواحد ابن حلال بعد حوالي 5 شهور من معاناة التسقيف هوة كان بيغيرلي طرمبة البور فأنا قولت اقوله علي موضوع التسقيف في سكتي راح قاللي ده كده تقسيمة سير الكاتينة راح مأخرهالي سنة وطلع بيها راحت سقفت بردو راح فك واخرهالي تاني راحت التسقيفة راحت خااااااااااااالص وبقيت مبسوط جدا اني خلصت من صادع كان في دماغي والله ...
المهم من حوالي اسبوعين بقي روحت اغير اولسيه الكرنك واولسيه الكامة روحت نبهت علي الميكانيكي اللي هوة غير ابن الحلال الاولاني بس ده ابن حلال اووووي لأني اعرفه روحت قولتله خلي بالك من تقسيمة السير بتاع الكاتينة لأن واحد ظبطهالي كويس ومخلهاش تسقف ... راح قاللي انا كده كده لازم ابص علي التقسيمة علشان اشوف شغل اللي قبلي المهم راح اول ما بص علي التقسيمة قاللي ايه ده حرام عليك ده مأخرة اوووووي بتاع 3 سنات كده وده كده تاكل بنزين معاك وتسخن وانا بيني وبينكم فعلا العربية كانت بتاكل بنزين وانا قال كنت فرحان ان العربية ما بتسقفش وطلع ابن الحلال الاولاني مش ابن حلال ... وبعد ما ركب الاولسيهات راح ظبط سير الكاتينة الظبطة الصح وطلعت من هنا والتسقيفة رجعت من هنا فأنا والله العظيم تعبت يعني هوة يا اما التسقيفة تروح والعربية تاكل بنزين يااما التسقيفة ترجع وماتكلش بنزين فياريت يا اهل المنتدي اللي طول عمري باخد منه احلي وافيد المعلومات في عربيتي يفيدني في حل المشكلة ده ....

[hany essa]

ايه نوع عربيه حضرتك ومعاك بقالها قد ايه ؟

[mhopa2440]

اكتب مواصفات العربية وعمرها وكام كيلو ولو اتعمل عمرة للموتور قبل كدا او لأ

وفي حاجة تانية نوع البنزين اللي بتحطه 80 ولا 90 وحاول تحط من بنزينة تكون مضمونة مش ف شارع مستخبي

خليك ف بنزينات شل او الامارات او وطنية او تعاون بس تكون ف قلب المدينة

لان مشكلة التسقيف ليها علاقة كبيرة جدا بالنزين

[pelo]

الموضوع ده كنت بعانى منه و اكتشفت ان صاحب العربية اللى قبلى كان حاطط زيت الجروبكس تقيل و بعد ما غيرتة ب90 راحت التسقيفة بس انا التسقيفة كانت مع السرعة

[body7733]

الف مبروك على حل المشكله

[profshady]

يا جماعة انا بحط بنزين 92 ومن الوطنية ... وعلي العموم هية دايو لانوس 2006

[truss]

اولاً ظبطة الكاتينة مش عايزة فتى..

ثانياً المشكلة ممكن تكون من دورة التبريد بحيث ان حرارة الموتور تعلى و تخلى العربية تسقف, هل بتغير مياه التبريد بانتظام؟ ممكن اى سدد فى الخراطيم او الردياتير يأثر على كفاءة التبريد.

انا مستبعد انها تكون قصة بنزين لأن الموضوع بقاله سنة معاك.

[hany essa]

طيب بما انى كنت بمر بنفس المشكله وكنت بعانى من التسقيف زى حضرتك شيل فيشه الاوكتين اللى تحت الكرسى اللى جنبك وخلى الفيشه من غير جمبر وان شاء الله تتحل المشكله زى عندى

[ضى القمر]

مبروك حل المشكلة

[profshady]

انا شايل فيشة الاوكتان علي فكرة خالص ... وثانيا بالنسبة لدورة التبريد اغيرها ازاي علشان كل اللي اعرفه اني بذود ميه في القربة لما احس انها فاضية والمفروض الموضوع ده يبقي كل اد ايه بالضبط

[tarek_2005]

حرارة المكنه بتبقي ايه لما بحصل التسقيف وبطارية عربيتك اخبارها ايه

[profshady]

الحرارة بتبقي اقل من النص بشوية يعني الطبيعي بتاعها .... والبطارية لسه يدوبك ماكملتش سنة ... بس انا فيه حاجة لاحظتها دلوقتي لما طلعت بالعربية وهية باردة وبقرص عليها القرص اللي بيخليها تسقف ما بتسقفش لكن لما بتوصل لدرجة الحرارة العادية اللي هية تحت النص بشوية يعني لما تسخن العربية من المشاوير تبتدي تسقف بقي ... مش عارف بصراحة

[profshady]

فيه معلومة تاني عايز اعرفها ... انا عند واحد صاحبي بكشف بالكمبيوتر علي طول فأنا كنت عايز اعرف ال inject time يعني هوة ايه المعدل الطبيعي بتاع الانجكشن علشان اعرف عندي الرشاشات كويسة ولا بتسيل ... اهو انا قولت يمكن سبب من الاسباب والله اعلي واعلم .... وياريت حد يرد عليا يا جماعة ...
نداء الي رؤساء القسم والاستاذ ممدوح والناس التقيلة ده

[amrelsaqqa]

العربية دى جابت جوان قبل كدة او خرطت وش السلندر او غيرت الوش ؟

[zendo]

مشكله التسقيف ممكن تكون من زيت الموتور وغيرة لنوع تانى او الكهربا عاليه محتاجة تتظبط