تظبيط لانوس 2

[Ayman Hussam]

السلام عليكم
انا معايا لانوس 2 ولونها زيتي
لو حد يفيدني ازاي اخلي شكلها اجمل بما يتناسب مع اللون
لاني حاسس ان اللون ده مش هيليق معاه حاجه

[Ayman Hussam]

محدش عنده افكار ولا ايه؟

[hon]

اللون دا لو نظيف والبوية سليمة مش فيها خدوش تبقى تعمله كار كير وشمع وبولش حيبقى فخم جدا لكن لو البوية مش سليمة او محتاجة سمكرة ورش حيبقى فعلا غبى جدا زى الاسود راجع موضوعى

http://www.nilemotors.net/Nile/77522-a.html

تحياتى

[Ayman Hussam]

يااااااااااااااااااااااااااااااااااااه اخيرا حد رد عليا
انا كنت قربت افقد الامل في ان حد يرد على الموضوع ده
شكرا يا باشا وهقرى موضوعك دلوقتي

[hon]

ياباشا احنا اخوات وانا تحت امرك لو عايز ماركات ملمعات وطرق الاستخدام ولو عايزنى اعملهالك بأيدى تحت امرك عشان تكون عارف ان معاك أفخم ألوان اللانوس على الاطلاق
تحياتى

[Ayman Hussam]

ربنا يكرمك يا باشا ويجزيك خير
بس لو ممكن فعلا افضل ماركات الملمعات وطرق الاستخدام
وتسلم ايدك يا باشا

[hon]

تحت امرك ياباشا نبدأ بسم الله
اولا الموضوع حسب الميزانية يعنى حضرتك راصد كام فلوس لأستعادة لون وبريق السيارة ؟
عموما المبلغ يتراوح من 40 جنية الى 200 جنية على حسب الخامات وافضلها الامريكى الصنع
أرشادات عامة للحصول على أفضل نتائج
1- يجب غسل السيارة كاملة فى محطة بنزين أولا للتخلص من التراب ومخلفات الطريق التى يصعب ازالتها بالغسيل اليدوى العادى لازم رشاش مياة مع غسل صاج السيارة بفوطة قطن او (فوطة مخصوصة للغسيل ) والقليل من الصابون يعنى مثلا نص كيس بيريل الكيس كلة كتير والافضل الصابون الخاص للسيارات
2- حتاخد العربية بالسلامة على الجراج وهنا وقفة لابد من التلميع فى جراج او مكان محجب عن الشارع وتراب الشارع لية؟ لان شوارعنا الحلوة معبئة بالاتربة والغبار الخفيف الى بيكسى على الصاج ولو لمعتها والتراب عليها البوية حتدهور أكتر والخرابيش حتزيد لا بد من مكان مغلق فى مصر
3- حتحتاج كيس قطن متوسط 5 جنية + بوليش ناعم ميدو برطمان كان لونة برتقالى مش كمباوند وفى فرق وهو الكمباوند حتحتاجة لو فى بقايا بوية على العربية نتيجة حكات قديمة البوليش تلميع وطبقة قبل الشمع ويفضل للاوان الغامقة زى عربيتك



4- نيجى للشمع وهنا وقفة حتحاج علبة تلميع شمع نوع (carnauba wax) اى توع بقا مش مشكلة وعلى فكرة احسن كرنوبا بتيجى من البرازيل حتبقى علبة زى دى

5- حتحتاج علبة بولوش لون أخضر سائل ودا بيبقى فى لون بجمنت + بولش للتلميع ودا لتجديد لون عربيتك وتشوف الحصوة الميتالك بتاعت اللون الزيتى الجميل وساعات بيجى معاة قلم للنقرات فى الصاج ويكون اخضر برضو لو غمق سنة يبقى تمام وفى نوع أسمو (sonax) موجود فى التوفيقية


نبتدى الشغل
1- بعد ماالعربية واقفة فى الجراج ونظيفة نجيب فوطة قطن مببلولة مياة ونمسح العربية كلها وننشفها لزيادة التاكد من ازالة اى غبار ولو قليل من على الصاج
2- نقوم باستتخدام اسفتجة وناخد من البوليش الناعم ونفرد على الصاج من الامام الى الخلف فى حركات دائرية الى ان يتم تغطية السيارة بالكامل وتترك 15 دقيقة ويتم ازالة البوليش بنفس الطريقة بقماشة قطن نظيقة او قطن طبى
3- يتم استخدام قلم الخدوش المرفق مع البوليش لطمس اى نقر او فجوات فى الصاج (على قد النقرة فقط )ثم يتم استخدام اسفنجة نظيفة لفرد البوليش السائل بالون الاخضر من الامام الى الخلف بحركان دائرة باليد ويغطى كل الصاج بة والاكصدام ايضا أذا كان نفس اللون ويترك 15 دقيقة ليجف تم تتم الازالة باستخدام القطن الطبى من الامام الى الخلف بنفس طريقة الفرد فى حركات دائرية
4- أشرب عصير مانجو عشان انت دلوقتى تعبت وعرقت انا مجرب نخش على الخطوة الاخيرة وهى فرد الشمع الصلب (العلبة) ودا طبقة حماية بنفس الاسلوب باستخدام الاسفنجة الجافة من الامام الى الخلف فى حركات دائرية الامريكان بيدو طبقتين شمع واحدة من الخلف للامام والتانية من الامام للخلف ويترك 15 دقيقة لتمام الجفاف وأزل الشمع باستخدام القطن الطبى فى حركات دائرية وشطب الشغل كويس ومتسبش اثار للشمع دا الفنش لازم يكون نظيف وبكدا الحمد لله الصاج اتخدم واللون بقا زاهى وعلى فكرة فى مكن للتلميع زى الى عند البوهياجية بيستخدموا بوليش ميدو فقط ويقولك 120 جنية يا بية
طبعا متبخلش بتلميع التابلوة بالمرة وتنظيف الفرش بالمنظفات التقليدية والف مبروك عليك

احتجت اى استفسار انا موجود وتحياتى ليك

[Ayman Hussam]

الف شكر يا باشا

[islamnasser10]

لسه شايف الزيتي مبيلقش عليه تظبيط ؟