بيكانتوتى

[shamdark]

حكايتى مع بيكانتو هى ان العربيه دى اول عربيه لى فى حياتى واول مرة بتعلم سواقه عليها
يعنى العربيه دى غلبانه معايا قوى وكمان مش معايا كتاب الضمان بتاعها ولا تامين عليها ومش عارفه حاجة فى اى حاجة والعيال اللى فى الشارع جرحولى الباب لحد ماجابو لون الصاج
وعملت بيها 500 كيلوا بالعافيه
واديلها معايا من شهر سبتمبر اللى فات
بعد الماسا ه دى عاوزة اعرف
1- منين اجيب الضمان؟
اساسا ضمان العربيه كام؟
2- ايه الصيانات دى واعملها فين؟
3- انا عارفه ان الكنبه بتتقفل بس معرفتش ازاى ممكن بليز حد يفهمنى
4- الباب اللى اتجرح دة اسيبه ولا اعمل ايه؟
5- هو لازم احطلها بنزين من شيل؟
ازاى احمى الدبرياج بتاعى عشان مغيرش اسطوانه دبرياج؟

[shery103]

1- منين اجيب الضمان؟
اساسا ضمان العربيه كام؟
حضرتك شوفى المعرض اللى جبتيها منه و روحى قليله انا عايزة كتاب الضمان ، و كان المفروض حضرتك تروحى تجيبيه بعد ما استلمتى العربية و رخصتيها ، ضمان العربية 100 الف كيلو او 5 سنين ايهما اقرب


2- ايه الصيانات دى واعملها فين؟

عند حضرتك اول صيانة عند ال 1000 ، و بعدين 10 الاف ثم 20 الف و هكذا ، تعمليهم فى التوكيل او احد مراكز الصيانة المعتمدة اللى حضرتك تفضليه

3- انا عارفه ان الكنبه بتتقفل بس معرفتش ازاى ممكن بليز حد يفهمنى

بصى هتلاقى فى ضهر الكنبة من فوق ، من الجنب اليمين و الجنب الشمال بتاعتين لونهم اسود مدورين كده بارزين لفوق، هتشدى الاتنين لفوق الكنبة هتتنى معاكى ، و لما ترجعيها تانى بتثبت فى مكانها لوحدها

4- الباب اللى اتجرح دة اسيبه ولا اعمل ايه؟

اللى تشوفيه حضرتك لو منظرها مدايقك ممكن تتعمل ، او لو خدوش بسيطة حرام ترشى عشان خدوش بسيطة سيبها شوية ، زى مانتى عايزة

5- هو لازم احطلها بنزين من شيل؟

لا لا مش لازم طبعا ، الستيكر اللى عليها عشان ينصح بزيوت شل ، ملهاش علاقة بالبنزين

[A.Saad]

طريقة قفل الكنبة

فيه زراراين فوق ضهر الكنبة نرفعهم لفوق
تزقى الضهر قدام شوية
كدة انتى خدتى خطوة
الخطوة التانية تفتحى الباب بتاع الراكب
وتحطى ايدك تحت - اسمها ايه - الشلتة اه
من نصفها كدة لحد ما تلاقى حاجة تشديها
هترفع معاكى الشلتة وتسحبيها قدام
هتلاقى ان الشلتة نزلت معاكى بقت فى الدواسة
وفيه عندك خرطوم بس باعدى عنه
وانتى بترجعيها
اتاكدى انها اتثبتت مكانها كويس وان حزام الامان اللى فى النصف فى مكان كويس

تانى حاجة حطى بنزين من مكان كويس مش لازم شل زى ما شيرين قالت وبعدين حاولى تعودى نفسك عليها وتمشى بيها فى اماكن هادية شوية فى الاول
وفكرى فى التامين على الاقل اول سنة او اتنين

الدبرياج بقى
اقرى ده

http://www.nilemotors.net/Nile/126564-a.html

[mameen]

الاخوة قالوا ما فيه الافادة
فكرتيني بمراتي ومعاملتها للعربية

[badawy2]

لو عايزة تبيعيها قوليلي انا عايز بيكانتو

[shamdark]

ميرسى جدا وححاول ان شاء الله النهاردة اجرب موضوع الكنبه
لا مش حبيعها انا لازم اتعلم وبليز شجعونى

[A.Saad]

تعيش shamdark

تعيش shamdark


طبعا انا بهزر

على فكرة انا ركبت لمبة للشنطة كمان
ولو عايزة اى استفسار كلنا فى المنتدى علشان نساعد بعض

[shamdark]

:)
ميرسى ميرسى
لو فى اى معلومه جديدة بليز قولولى

[badawy2]

بيكانتو

انا زيك لسة جديد في السواقة وبفكر في البيكانتو ممكن تقوليلي مميزاتها وعيوبها بالنسبالك ؟
ثانيا انتي وانتي بتسوقي البيكانتو بتشوفي الكبوت ولا مختفي خالص ؟

[shamdark]

انا لسه مش متعودة عليها بس صغر حجمها لطيف بس مشكلتها انها مش فيها اى كماليات وعرفت ان الضمان بتاعها لحد 5 سنين بس لازم تدفع كل سنه مبلغ حتى لو مستخدمتوش عكس سبارك الجديدة فيها كماليات جميله وسعرها اقل وضمانها 3 سنين و60 الف لو عاوز تشترى اركب الاتنين وقارن بينهم انا على حد علمى ان منصور افضل بكتير وعندة اماكن خدمه تقريبا فى كل حته

[M.ABDEEN]

انا لسه مش متعودة عليها بس صغر حجمها لطيف بس مشكلتها انها مش فيها اى كماليات وعرفت ان الضمان بتاعها لحد 5 سنين بس لازم تدفع كل سنه مبلغ حتى لو مستخدمتوش عكس سبارك الجديدة فيها كماليات جميله وسعرها اقل وضمانها 3 سنين و60 الف لو عاوز تشترى اركب الاتنين وقارن بينهم انا على حد علمى ان منصور افضل بكتير وعندة اماكن خدمه تقريبا فى كل حته

بس السبارك 1000 سي سي بس وكمان حجمها اصغر ..........
وبعدين منصور بياخد فلوس كتيير من العملاء نظير الصيانة علاوة على قطع غياره الغالية ........الخلاصة توكيل كيا محترم وافضل من منصور

[shamdark]

بيكانتو كمان 1000 سى سى
ومن فئه السبارك شيفروليه وال 113 اسبيرانزا وسيلاريو سوزوكى
انا لما قارنت قارنت بالتوكيل ونسيت موضوع قطع الغيار انا معرفش اسعار قطع الغيار كام بصراحه لو حد عندة فكرة ياريت يقول

[M.ABDEEN]

بيكانتو كمان 1000 سى سى
ومن فئه السبارك شيفروليه وال 113 اسبيرانزا وسيلاريو سوزوكى
انا لما قارنت قارنت بالتوكيل ونسيت موضوع قطع الغيار انا معرفش اسعار قطع الغيار كام بصراحه لو حد عندة فكرة ياريت يقول

البيكانتو فئة 1100 سي سي وبياناتها في الورق والرخص 1086 سي سي
السبارك فئة 1000 سي سي وبيانتها 990 سي سي

[A.Saad]

انا لسه مش متعودة عليها بس صغر حجمها لطيف بس مشكلتها انها مش فيها اى كماليات وعرفت ان الضمان بتاعها لحد 5 سنين بس لازم تدفع كل سنه مبلغ حتى لو مستخدمتوش عكس سبارك الجديدة فيها كماليات جميله وسعرها اقل وضمانها 3 سنين و60 الف لو عاوز تشترى اركب الاتنين وقارن بينهم انا على حد علمى ان منصور افضل بكتير وعندة اماكن خدمه تقريبا فى كل حته

الضمان لو ما استعملتوش مش بدفع فلوس
الضمان اما بتروحى بتدفعى تمن الصيانة اللى انتى عملتيها
واعتقد ان قصدك على التامين الشامل بس ده مالوش علاقة بكيا

وكمان توكيل كيا ارحم من منصور
حسب اللى قريته فى المنتدى

[shamdark]

لا الضمان بتاع العربيه مش الصيانات
يعنى لما اشتريتها قالى ضمان خمس سنين واى عدد من الكيلومترات
طبعا ضد عيوب الصناعه
لكن التامين انا دفعت حوالى 3 الاف جنيه مع مصر للتامين ضد اخطاء الغير والحوادث بس لسه معملتش معاينه
غير كدة بيكانتو الف سى سى وفى الترخيص اتعمل 990 اعتقد مش فاكرة
انا لحد لسه متعاملتش مع التوكيل بس هو ليه فروع تانيه غير ابورواش؟
طريقه وحش جدا ومتكسر ومليان بالوعات ياريت لو فى اى مكان تانى اعمل فيه صيانه