السيراتو عملت حاجه غريبه معايا

[moroattar]

السلام عليكم رحمه الله
يا جماعه حابب احكى معاكو موقف حصل معايا

النهارده كنت راجع انا وابنى مروان (moro) من البلد راجع لمدينه المنيا محل سكنى – كان الكلام دا بعد المغرب والليل كان ليل – طبعا احنا ماشيين فى الطريق الزراعى والطريق منور ومفيش مشاكل –وصلنا لمنطقه معينه وكان النور فيها مقطوع فرحت منور نور العربيه وفجأه بعد ما لقيت قدامى مطب صناعى – انتم طبعا عرفين ان دلوقت على الطريق الزراعى مطبات صناعيه كتيرعند كل قريه وحتى كل عزبه –المهم انا فوجئت بالمطب وكنت ماشى على سرعه 80 كم – رحت دايس على الفرامل المشكله بقى ان انا لما ضغط على الفرامل ان العربيه سرعتها زادت مش نزلت -اى والله - ودا كان شئ مفاجئ ليه – الكلام دا حصل فى اللحظه اللى انا بأعدى فيها من على المطب وطبعا طرت من على المطب وربنا ستر ومكنش فيه حد معدى قدامى والا كنت لبست فيه –عقبال ما وصلت للمطب التانى (لانه بيبقى فيه مطبين عند مدخل القريه وعند مخرجها) كانت العربيه نزلت السرعه بتاعتها وسيطرت عليها وعدينا المطب التانى عادى بدون مشاكل . ابنى مروان(11سنه) لاحظ ان انا لما ضغط على الفرامل العربيه سرعتها زادت وقالى باستغراب: "العربيه سرعتها زادت لما دوست على الفرامل" فقلتله انت لاحظت كده قالى ايوه ,قلتله طيب اربط حزامك وتعالى نجرب الفرامل تانى ونشوف الحكايه ايه, وفعلا جربت الفرامل تانى وضغط عليها بشده سمعنا صوت الـ ABS والكركبه بتعته والعربيه وقفت مكانها بدون اى مشاكل لان العربيه اصلا حتى من غير الـABS فراملها كويسه.
فهل يا اخوانى حد عنده تفسير لزياده السرعه المفاجأه لحظه مرورى من على المطب . افيدونى افادكم الله .

ملحوظه : العربيه الحمد لله زى الفل من ساعه ما جبتها ومعملتش معايا اى حاجه غريبه –علشان بس محدش يطلع يقول اهى السيراتو لما تدوس على الفرامل بتاعتها سرعتها بتزيد –الموقف دا حصل ساعه تعديه المطب فقط.

[mohamed_e36]

حاجه غريبه
طيب هو ممكن يكون حضرتك مع مفاجأه المطب رجلك لطشت في دواسه البنزين مع الفرامل

[kono]

ممكن حضرتك تكون السرعة مش زادت ولا حاجة بس حضرتك اللى مقدرتش تسيطر عالعربية قبل المطب فملحقتش تفرمل فحسيت ان سرعة العربية زادت

[ahmadyusuf]

بتحصل معايا ساعات انى و انا بدوس على الفرامل طرف رجلى ببيجى على دواسه البنزين و بالتالى بزود بنزين غصب عنى , اعتقد ان ده اللى حصل بس حضرتك مخدتش بالك من اللخمه

[moroattar]

انا يا smaalos ويا kono ويا ahmadyusuf السرعه كانت بتزيد وانا دايس على الفرامل لدرجه انى سألت نفسى لحظتها " ايه اللى ممكن اعمله علشان اوقف العربيه غير انى ادوس على الفرامل " (طبعا فى الموقف المخ بيدربك والخواطر كلها بتتجمع فى اللحظه دى ) -واللى انا متأكد منه انى حشت رجلى من على البنزين وطبعا رزعتها على الفرامل كرد فعلى طبيعى وسريع لوجود المطب -ودا اللى خلانى اكتب الموضوع دا قلت يمكن الاقى تفسير عند حد و افهم ايه اللى حصل . وشكرا على مشاركتكم

[Atrees]

بدون التشكيك في ان رجلك جت علي البنزين او لا - تعالو نحللها
الفرامل ملهاش اي علاقة بمنظومة التسارع بتاع العربية - يعني دواسة الفرامل منظومه منفصلة عن منظومة التسارع اللي بيحكمها دواسة البنزين - في بعض العربيات السيرفو بتاعها ممكن ياخد جزء صغير جدا من الهوا بتاع الموتور وده برضو بيساعد علي تقليل التسارع مش زيادتة (ده ان حصل اصلا )

طيب يبقي اية السبب !!!!!!!

لو كانت العربية مشيت بسرعتها كنا قولنا ان الفرمله لم تكون مؤثرة - لكن هنا انت بتقول حصل تسارع !!!!!!!

لو دوسه الفرملة لم تكن مؤثرة التاثير المطلوب لمسافة الفرملة كنا قولنا ال abs اشتغل ومسافة الفرملة زادت - لكن بتقول حصل تسارع !!!!!!

وبعد كده قولت ان السيارة معملتش كدة تاني ولا قبل كدة !!!!

ده معناة ان اللي حصل دة ليه علاقة بالموقف دة بس ودة يرجعنا لنقطة الدربكة واللخبطة اللي ممكن تحصل للسواق لحظة المفاجئة

يعني برضو رجعنا لاحتمالية انك دوست بنزين مع الفرامل ودي بتحصل عادي :)


حد فهم حاجة !!!!!!!!!

ههههههههه الحمد لله ياباشا علي سلامتك وسلامة مروان ومتشغلش بالك اكيد لخبطة موقف مش اكتر

عموما بما اني اتكلمت كدكتور نفساني الحتية اللي فاتت -
كدة انت بقيت سيراتاوي تمام والهسس جالك خلاص :))))))))))

حاول تجرب القصة دي تاني في حتة فاضية وعلي اسفلت ورمل ومياة واختبر ال abs تاني عشان تطمن :)


وسلامي لمارو :)) وليك طبعا

[د.محمود صلاح]

اكيد ضغطت على الإثنين .. الفرامل مع البنزين ..

[mr_sameh]

اعرض الموضوع علي التوكيل ضروري

[NoRmAl]

والله أعلم أكيد كان أحساس بس
الغريب أن مروان حس بيه بردو :)
مش عارف بس نظريا دا لا يمكن يحصل
حضرتك دا يا كان مجرد شعور يا أنت دوست على البنزين بدون متحس ملهاش تالت الصراحه :)

[M.almaghraby]

حاجة من اتنين : دست بنزين غلط - ادي الي تسارع العربية

2- الارض كانت رملة و انت اتزحلقت لما فرملت جامد " ال abs مشتغلش حلو مثلا " حسيت ان العربية ماوقفتش "

مفيش احتمال تالت

[moroattar]

يا أ/ atrees انت بتقول :"ده معناة ان اللي حصل دة ليه علاقة بالموقف دة بس ودة يرجعنا لنقطة الدربكة واللخبطة اللي ممكن تحصل للسواق لحظة المفاجئة
يعني برضو رجعنا لاحتمالية انك دوست بنزين مع الفرامل ودي بتحصل عادي :)

والدكتور/محمود بيقول :"اكيد ضغطت على الإثنين .. الفرامل مع البنزين ..


والله يا جماعه انا عن نفسى اتمنى ان اللى بتقولوه دا يكون هو اللى حصل على الأقل هأضمن ان العيب فيه انا مش فى العربيه وانا يا أ/atrees مجليش الهسس من العربيه ولا حاجه لان انا بأركبها عادى وجربت الفرامل فى ساعتها بس انا حبيت اخد رأيكم فى القصه دى .
وبا mr-sameh انا العربيه خليجى وحتى لو كانت وكيل مش فى دماغى خالص ادخل فى متاهات لان زى ماقال أ/عتريس ان اللى حصل دا حصل فى الموقف دا بس والعربيه انا سافرت بيها تانى ومفيش اى مشاكل منها- واذا حصل حاجه زى دى تانى هأبقى افتكر التحليل النفسى اللطيف بتاع الاستاذ atrees واكمل مشوارى وانا مطمئن. وشكرا لاهتمامكم جميعا.

[ahmedsamir5edr]

ربما الطيران من المطب اداك الأحساس ده

[ahmed_mido1889]

سؤال لولبي العربيه مانيوال ولا اتوماتيك
لو مانيوال ممكن تكون دوست دبرياج قبل لما تكبس فرامل فالعربيه بتشد سنه
والحوار ده بيحصل كتير معايا

[moroattar]

والله أعلم أكيد كان أحساس بس
الغريب أن مروان حس بيه بردو :)
مش عارف بس نظريا دا لا يمكن يحصل
حضرتك دا يا كان مجرد شعور يا أنت دوست على البنزين بدون متحس ملهاش تالت الصراحه :)

عارف يا ا/normal لو مكنش مروان حس بالحكايه دى انا كنت هأقول لنفسى ان انا بيتهيألى - بس ازاى ادوس على البنزين من غير ما احس وانا فى الوقت نفسه بأقول لنفسى اعمل ايه غير الضغط على الفرامل علشان العربيه تقف . على كل زى ما ذكرت قبل كده ان شاء الله يكون العيب عندى انا مش عند الهانم سيراتو . وشكرا لاهتمامك.

[moroattar]

ربما الطيران من المطب اداك الأحساس ده

ربما يا ا/ahmed بس بصراحه انا اخدت نفسى لما وقفت عند المطب التانى .
واعتقد دا بينفى حته الاحساس