البقاء لله .....وفاة قسم كيا ...والعزاء بالداخل

[ghazy12]

والله يا ابوليلى انا ليا رأي قد يكون مختلف شويه و الله اعلم...

المشكله الحقيقيه بتكمن في احساسك ان ( نفسك مسدوده ) عن المشاركه
و ده بسبب الشد و التوتر المستمر في القسم و المبالغ فيه جداا,
و لما بدأت اتكلم مع بعض الاعضاء لقيت عندهم نفس الاحساس بالظبط
و بردو نفسهم مسدوده عن المشاركه و ان القسم للاسف مابقاش مشجع
زي الاول على النقاش الهادف, و عمل الموضوعات الجديده و الاستفاده
المتبادله طول الوقت اللي كانت موجوده في القسم قبل كده و كنا بنتميز بيها...

انا اقسم بالله وصلت لمرحلة اني ببقى عايز ارد في موضوعات
كتيير, و بكتب رد بالفعل, و امسحه تاني والله و ببقى متضايق جداا
لاني عمري ما كنت بحس الاحساس ده قبل كده تجاه المشاركات اللي
بكتبها في قسم كيا تحديداً, و السبب هو الحاله العامه اللي بقينا عليها
انا و انت و كل الاعضاء في القسم, ده غير الاحزاب اللي بقت منتشره جداا
و ده تحديدا بقى الشئ الجديد قوي على قسم كيا... عمري ما شفت احزاب
في القسم ده من يوم ما بقيت عضو في المنتدى زي الفتره دي...!!!!

الناس بقت بتقلق تعمل موضوع في قسم كيا او تقول رأيها بسبب الهجوم
على اي رأي ضد اي عربيه كيا عموماً و السيراتو خصوصاً, و تلاقي
اي حد عايز يعمل موضوع عن السيراتو (( لااااازم )) و بدون مبالغه
يكتب في عنوان الموضوع بتاعه.....

عندي مشكله في السيراتو بس بموت فيها و بحبها و مقدرش اعيش من غيرها
و مقتنع بيها جدااااا.... و يقسم و يحلف للصبح..!!!!

و ده لانه عارف انه لو ماقالش كده هيبقى قصاد حاجه من اثنين...

- اما هيتهاجم بسبب عنوان موضوعه او بسبب موضوعه كله
- أو مافيش حد هيرد عليه اصلاً لان اعضاء كيا زهقوا من
المشاكل اللي كل شويه في موضوع عنها و ده بسبب الانتشار...

رأي الشخصي ان الحل في الاعضاء نفسهم, مش في اي شئ آخر...

لا تقسيم القسم, ولا تعثر المنتدى فتره, ولا اي حاجه من دي هي المشكله
الرئيسيه و الحقيقيه... و ده مش معناه ان الاسباب اللي ذكرها الاعضاء
مش عامل من العوامل اللي اثرت في القسم, لكن السبب الأول و الخير
و الرئيسي فعلا هو (( الأعضـــــاء )) مش اي شئ تاني...

الحل في رأي...

- نرجع الروح اللي كانت موجوده في قسم كيا و اللي كنا بنتميز بيها

- نستحمل بعض شويه (او نحاول حتى) و نستحمل الناس اللي بتنتقد
بس طبعاً يكون النقد موضوعي و بالدليل و عن تجربه (ده المنطقي طبعاً)

- نبذل شوية مجهود مع بعض و نحاول نعمل موضوعات جديده و مفيده
او حتى نبذل شوية مجهود بالتواجد في القسم بالردود على الموضوعات
علشان القسم يكون نشط و فعال بالاعضاء طول الوقت...

- نحاول نعمل افكار جديده في القسم و نقترحها على الاداره (بس بعد استقرار
الاوضاع في المنتدى لان الاداره عليها اعباء كتيير بعد الانتقال للسيرفر الجديد)

كل دي حلول في ايدينا احنا كاعضاء قسم كيا و منتدى نايل موتورز...

اتمنى يكون كلامي و رأي مازعلش حد, لكن دي الحقيقه اللي لازم
نواجه نفسنا بيها في رأي الشخصي و لازم نحلها مع بعض كلنا...

شكرااا على اهتمامك و حرصك على القسم يا ابوليلى, و صدقني انا
واحد من الناس اللي زعلانين جدااا على قسم كيا, لكن نقدر نرجعه تاني
زي الاول و احسن كمان... مافيش حاجه اسمها مستحيل مهما كانت الظروف

خــــالص تحيــــاتي للجميـــع...

[Donzi]

حمدالله على سلامتك يا بشمهندس غازي اولا
طمننا على صحتك دي اهم حاجة
و مادام رجعت للقسم بالسلامة يبقى اكيد اكيد القسم هاينتعش
دا كفاية دخلتك علينا والله

و قولي ايه اخبار المسامير احتفظت بيهم للذكرى زيي ولا دفنتهم بالحيا

و بعدين انا عاملة موضوعين مرة واحدة عن الريو الجديدة بتاعتي و بقيت كياوية رسمي مش تتصفح الموضوعات و تباركلي و تقولي رائيك ولا اييييييييييييييه

[ghazy12]

حمدالله على سلامتك يا بشمهندس غازي اولا
طمننا على صحتك دي اهم حاجة
و مادام رجعت للقسم بالسلامة يبقى اكيد اكيد القسم هاينتعش
دا كفاية دخلتك علينا والله

و قولي ايه اخبار المسامير احتفظت بيهم للذكرى زيي ولا دفنتهم بالحيا

و بعدين انا عاملة موضوعين مرة واحدة عن الريو الجديدة بتاعتي و بقيت كياوية رسمي مش تتصفح الموضوعات و تباركلي و تقولي رائيك ولا اييييييييييييييه

الله يسلمك يا دينا, و انا الحمد لله بخير, و شكراا جزيلاً على ذوقك...

للاسف الدكتور استغل نومي في البينج و استولى على المسمارين اللي فكهم

هركز معاه في المسمار النخاعي, و المسمارين التانيين في العمليه اللي جايه ان شاء الله

و حصل يا فندم و رديت على موضوعك, احنا نقدر مانباركش بردو بعد ما رجعتي كياويه رسمي :))

ألف مبروك و ربنا يباركلك فيها يا دينا و يعوضك بيها خير...

تقبــلي تحيــاتي...

[Donzi]

الله يسلمك يا دينا, و انا الحمد لله بخير, و شكراا جزيلاً على ذوقك...

للاسف الدكتور استغل نومي في البينج و استولى على المسمارين اللي فكهم :h_angry[1]:

هركز معاه في المسمار النخاعي, و المسمارين التانيين في العمليه اللي جايه ان شاء الله :ob_mak1[1]:

و تقبــلي تحيــاتي...

ههههههههه

لا يا بشمهندس انا طلعت انصح من حضرتك ووصيتهم يرجعولي المسا مير ( مسمار مسمار )

الظاهر كدة ان احنا عاملين نفس العملية بالظبط و مسمار نخاع برضو

الف حمدالله على سلامة حضرتك مرة تانية

[NoRmAl]

على فكره مع أحترامى لكلامك يا هندسه :)
بس الفتره الى أنت بتتكلم عليها هى كانت أكبر فتره لأنتعاش القسم بالتحديد
لما كان فى هجوم شرس بلا داعى ولا دليل على عربيه أصبحت الاكثر شعبيه الان
هى دى الفتره ال جمعتنا على فكره :)
إحنا مختلفناش كتير
لسه حتى الان بندافع عن العربيه قدام أى حد عنده نهج النقل والسمع أو التجنى
ولسه بنساعد أى مقتنى للعربيه فى مشكله ظهرتله بدون ميقول أنا بحبها وبعشقها
يعنى كلنا قلنا على مشاكل فى عربياتنا وحلنها لبعضنا
فأنا شايف أن أنسداد النفس ممكن يكون ليه سبب أخر غير السبب المعلن منك :)
بس أيه هو الله أعلم

[ghazy12]

على فكره مع أحترامى لكلامك يا هندسه :)
بس الفتره الى أنت بتتكلم عليها هى كانت أكبر فتره لأنتعاش القسم بالتحديد
لما كان فى هجوم شرس بلا داعى ولا دليل على عربيه أصبحت الاكثر شعبيه الان
هى دى الفتره ال جمعتنا على فكره :)
إحنا مختلفناش كتير
لسه حتى الان بندافع عن العربيه قدام أى حد عنده نهج النقل والسمع أو التجنى
ولسه بنساعد أى مقتنى للعربيه فى مشكله ظهرتله بدون ميقول أنا بحبها وبعشقها
يعنى كلنا قلنا على مشاكل فى عربياتنا وحلنها لبعضنا
فأنا شايف أن أنسداد النفس ممكن يكون ليه سبب أخر غير السبب المعلن منك :)
بس أيه هو الله أعلم

انا مش قاصد الفتره دي تحديداً اللي هي تعتبر لسه في بداية نزول السيراتو...

لكن انا بتكلم بشكل عام عن فتره كان فيها ناس من بره القسم اقسم بالله مابيدخلوش علشان
عارفين اللي هيحصل لو فكر يتناقش في حاجه ليها علاقه بالسيراتو, و دي حقيقه يا محمد,
و انا مش بقول انت تحديدا او شخص تاني بعينه, لكن القسم كان كده فعلاً, و بقى منفر لناس
كتيير للاسف, و عمر قسم كيا ما وصل للمرحله دي قبل كده...!!!

و كلنا بنساعد قد ما بنقدر اي عضو عنده استفسار او محتاج لمساعده, لكن راجع او افتكر الفتره
دي تاني كده, هتلاقي ان الموضوعات اللي عنوانها على وتيرة (مشكله في السيراتو لكن بحبها...)
كانت كتييير قوي, و كان في ناس عندها مشكله بالفعل في العربيه بس من الشد اللي في القسم
كانوا مابيقولوش اصلاً ان عندهم مشكله, و اسأل اي حد يا محمد هيقولك الكلام ده كله كان بيحصل...

انا معاك و ضد اي نقد غير موضوعي, او مجرد كلام مرسل, او فرقعه و خلاص سواء
ايجابي (في صالح العربيه) او سلبي (ضد العربيه), و ده اللي قلته بالظبط في مشاركتي اللي فاتت,
و انا واحد من الناس بدافع عن السيراتو بردو زي اي مالك او واحد بيحب السيراتو سواء جديده
او قديمه, لكن مش بدافع عنها في المطلق لاني عارف ان فيها عيوب زي اي عربيه تانيه,
و اكيد الكل متفهم و مقتنع بالفكره دي تماماً... و ده الطبيعي

سدة النفس عن المشاركه (بالمعنى الحرفي ليها) ماكانش احساسي لوحدي على فكره, و كان سببه
و بكل صراحه الشد و التوتر المستمر في القسم بسبب و بدون سبب, و الاحزاب اللي عمري ما شفتها
في قسم كيا من ساعة ما دخلت المنتدى و بقيت عضو فيه, و بصراحه اكتر مش لاقيلها اي لازمه...

مافيش اي اسباب تانيه (اطلاقـــاً), و لو في كنت قلتها لاني اكيد مش هتكسف اقولها مثلا
حتى لو كانت تمس شخص معين بالاسم, او اشخاص معينين...

و في الآخر انا هدفي اننا نواجه نفسنا بالمشكله الحقيقيه علشان نقدر نحلها, و انا قلت سبب المشكله
من وجهة نظري و في رأي, و اقترحت حلول للمشكله... و ده رأي يحتمل الصواب او الخطأ

و بكرر يا محمد ان مافيش اي اسباب تانيه عندي, و لو انت شايف ان في اسباب تانيه او متوقعه
حتى يا ريت تقوللي عليها و نناقشها مع بعض عادي جداااا...

تحيــاتي...

[NoRmAl]

لأ هو انا معرفش السبب طبعا :)
لكن كنت غير مقتنع بالسبب المذكور
وإن جيت للحق مازلت :)
أنا شايف إن سبب خمول القسم الان بعيد كل البعد عن مستوى الحوار أو المناقشه بين الاعضاء
أو عن تصدى الملاك بعنف لأى مهاجمه على العربيه
او خوف بعض الأعضاء من إبداء رأيهم تجاه العربيه فى قسمنا
أو خوف ملاك موجودين وصتنا من ذكر مشاكل فى عربيتهم
كل دا ربما يكون موجود حاليا
لكن خلينى أأكدلك إنه كان موجود فى الفتره الى كان فيها القسم فى الpeak بتاعته
ومع ذلك لم يأثر على نشاط القسم
وبعدين هل لوجود أعضاء بالقوه الى تخلى مفيش "أى حد" يتكلم على "أى عربيه" بصوره غير مبنيه على تجربه مقنعه أو بصوره لا يراد منها إلا التشهير...هل وجود أعضاء زى دول ينال من نشاط المنتدى أو القسم خصيصاً!
الخمول واضح أنه حتى من أبناء القسم نفسه وربما رواده
مش من أعضاء خارج القسم هايبين يدخلوا يتكلموا على السيراتو
ولا ملاك هايبين يشاركوا مشاكلهم غير بتقديم فروض الولاء والعشق للعربيه!
تقدر تقلى أخر مشاركه لدكتور أحمد سامى كانت بتقول أيه؟
ولا نادر نبيل؟؟
حتى مهندس أحمد إسماعيل مقل جدا فى مشاركاته!
دول بقى ملهمش علاقه لا بسيراتو ولا غيرها
دول نفسهم مسدوده :)
تعرفش ليه؟! :)))))

[د.محمود صلاح]

القسم زي الفل والناس زي العسل ..

ده الواحد بيفكر في اقتناء السيراتو دائما بسببكم ..

أسأل على الدكتور احمد سامي ؟ اخباره ايه ؟ ما بيظهرش من فترة ؟ لعل المانع خيراً

[NoRmAl]

القسم زي الفل والناس زي العسل ..

ده الواحد بيفكر في اقتناء السيراتو دائما بسببكم ..

أسأل على الدكتور احمد سامي ؟ اخباره ايه ؟ ما بيظهرش من فترة ؟ لعل المانع خيراً

والله يا دكتور بدون مجامله السيراتو يزيدها شرف والله :)
وأنت والله الى زى العسل

[ghazy12]

رداً على سؤالك الاخير... هو فعلاً انا عارف ليه, بس خليها في سري

انت بردو مصر على اختزال كلامي في اعضاء تهاجم, و اعضاء تتصدى..!!!!

و بتعد في مجموعه من المشاكل و كلهم في الآخر حاجه واحده..!!!!

وجود اعضاء بتتصدى (لأي حد) بتقول كلام مرسل على (أي عربيه)
مش هو ده اللي هيمنع (أي حد) انه بردو يتكلم عن (أي عربيه) في
(أي مكان) سواء بدليل او بدون دليل... و بردو الاعضاء اللي بتتصدى
مش هما اللي هينشطوا المنتدى او القسم بتصديهم ده... ولا ايه يا هندسه..؟؟

الموضوع في الآخر وجهات نظر, و المصلحه العامه للقسم و المنتدى هي الأهم...

[ابو ليلى]

حمد لله على سلامتك يابشمهندس غازى

كلامك محترم ويأخد فى الاعتبار طبعا وده اكيد من ضمن الاسباب

ولكن الحمد لله القسم ابتدى يرجع تانى باعضائه المحترمين وبلاش تغيب عننا كتير ....فاهمنى طبعا

يا نورمال ....يانورمال ....يا نورمال .......وحشتنى

[yasso0101]

با شمهندس غازي

كل الاحترام و التقدير لكلامك .

بس انا حاسس ان حضرتك بتقول سبب وبتخفي عنى السبب الحقيقي

حضرتك قولت ان سبب سدت النفس اللي موجوده لاعضاء مهمه زي اللي سالك عليهم نورمال رديت عليه وقلتله انته عارف ايه السبب بس حضرتك قولت ( بس خليها في سري )

الاعضاء الي سالك عليهم نورمال دول هما اللي كانوا بيشجعوا عضو جديد زي انه يخش على قسم كيا في نايل موتورز - والاعضاء دول برضوا بصفتهم وبدورهم هما اللي كانوا بيردوا علينا وبيعملوا مواضيع مهمه وكانت مطمناني ان في ناس فاهمه في القسم ده وفعلا هدفهم خدمة الناس باي طريقه

لكن لما دورهم اختفى بدءت تظهر المواضيع اللي خلت قسم كيا بقى فيه شبه من القسم الاجتماعي وبعد عن تخصصه بعربيات كيا مواضيع تتفتح محدش بيرد


وعايز برده يتسع صدرك ليا في كلمه

ان موضوع الاحزاب حصل بسبب ان الاعضاء القديمه بينهم مواضيع مش واضحه لينا - احنا بنشوف رد الفعل لحجات مبقتش فاهم هيه موديانا فين .

واخيرا لو حضرتك عارف السبب الحقيقي ياريت متخلهوش في سرك - لحضرتك كامل الحريه في قرارك - بس على الاقل وجهنا علشان نحل السبب اللي مخليه في سرك وبكرر لحضرتك الحريه المطلقه بس هدفنا كلنا نستعيد قسم كيا تاني

واخيرا شكرا لسعة صدرك وتقبل فائق احترامي و تقديري

[dak3]

هههههههههههههههههههههههههههههههههههههههههههههههههه هههههه

والله ليك وحشة

[ghazy12]

باشمهندس ياسر... انا صدري متسع تماماً لاي نقاش بدون اي مشكله, و رداً على استفسارك...

مش من حقي اتكلم عن لسان حد من الاعضاء المحترمين اللي تم ذكرهم و اللي هما
في الاساس اصدقائي, و ده طبيعي جدااا, لكن رداً على سؤال نورمال قلت اني فعلاً
عارف السبب لكن احب احتفظ بيه لنفسي سواء كان السبب بخصوص المنتدى و القسم, او لأ...

انا كلامي في مشاركتي الاولى كان صريح جدااا و واضح لدرجة اني طلبت من الجميع ان ماحدش
يزعل من كلامي لان هي دي الحقيقه فعلاً (من وجهة نظري), و الوضع كان بالشكل ده في القسم,
و للاسف القسم وصل لدرجة انه خرج تماماً عن كونه قسم خاص ببراند كبير زي كيا في منتدى سيارات
و تحول من قسم مفيد للجميع بموضوعاته و التجارب الخاصه بالاعضاء, و بالاعضاء نفسهم طبعاً,
الى ساحه للخلافات و الشد المستمر و التجمعات و مين معانا و مين علينا........!!!!!!

و هو ده تحديداً اللي انت متفق معايا عليه, ان القسم بقى شبه الاجتماعي في مواضيعه اللي مالهاش
ادنى علاقه بكيا او بالسيارات عموماً..!!! و ده الشئ اللي ناس كتيير مش عايزه تقر بيه, مع انها الحقيقه...

الاحزاب و التجمعات مش الاعضاء القدام هما اللي عملينها او السبب فيها لانهم ببساطه كانوا
موجودين من زمان و من قبل اعضاء كتييير و ماكانش في حاجه من دي خالص في القسم,
لكن الموضوع ده جديد شويه على قسم كيا تحديداً...!!!

احساسك ان في موضوعات بين الاعضاء القدامى مش واضحه ليكوا ده بسبب ان في احداث قديمه
الاعضاء دول هما بس اللي حضروها و قبل انتساب اعضاء كتير للمنتدى, و طبيعي ان هما بس
اللي فاهمين و عارفين سبب بعض الاحداث اللي بتحصل و اللي هي في نفس الوقت مش مفهومه
بالنسبه لناس كتييير في القسم او المنتدى, و ده عادي من وجهة نظري...

عايز اوضح نقطه تانيه مهمه جدااا, عمر ما كان في اي تفرقه بين عضو قديم و عضو جديد في القسم
كلنا اخوات و اصدقاء بنستفيد من بعض و بنفيد بعض بكل ود و محبه و بدون اي مصالح شخصيه...

انا عرضت سبب المشكله الحقيقي و اقترحت حلول و انا عن نفسي بدأت بتنفيذها بالفعل, و ربنا يسهل

لكن هقولك على حاجه اخيره... مش طبيعي ان اكتر من شخص يجتمعوا على سبب و شئ معين
و يكون السبب ده مش صح او غير حقيقي, لان مش معقول ان الاكتر من شخص دول كلهم نظرتهم
للامور غلط, و تحليلهم للامور مش دقيق, و رأيهم اللي اجتمعوا عليه في نفس الوقت غير صحيح..!!

تقبل خالص تحياتي يا باشمهندس, و انا صدري متسع تماماً لاي نقاش يكون هادي و واضح زي نقاشك...

[yasso0101]

اولا انا بشكرك على اهتمامك و مرورك الكريم

ثانيا : بشكرك مره تانيه على تفهمك وجهة نظري وردك العقلاني جدا

ثالثا : بالنسبة للجزء الاخير من ردك السابق احب اوضح لحضرتك انك وصلتلي الصوره بكل وضوح واتمنى ان ده يبقى منهج تفكير كل الاعضاء القدامى - واسمحلي ايضا اصر على مصطلح الاعضاء القدمى لفضلهم على المنتدى بلا ادنى شك - وان المنهج ده يلمس ارض الواقع لغاية ميبقى حقيقه.

رابعا : ارجوا ان تبقى صفحة كيا صفحة حوار هادف