السيراتو اتقلبت اربع مرات

[ma7oo]

حمدلله على سلامتك قدر الله وماشاء فعل

[M.Hassan47]

الحمدلله على كل شئ ياجماعة بجد وده فى الأول والأخر قدر

بس دا مايمنعش انى اقول رأيى النهارده بصراحة عن العربية دى

انا كل الحوادث اللى كنت بسمعها عن السيراتو كانت قلب دايما يقولك العربية اتقلبت العربية حدفت لوحدها وناس كتيرة اوى قالتلى كده وانا ماصدقتش بس محدش هايصدق ده الا لو عاش التجربة الغبية دى وربنا يبعدها عن كل الناس ‘‘‘‘انا قبل ماشترى العربية دى باسبوع واحد صاحبى العربية اتقلبت بيه على الدائرى وكانت ماشية زى الفل معاه قعد يخمس بيها شوية وياخد فى غرز ومره واحده وهو ماشى عادى على الدائرى تخيلوا الجنط يتكسر نصين والعربية تتقلب ست مرات دا واحد‘‘ التانى كان صديق ليا فى اكاديمية المدينة فى شبرامنت وهو خارج من المعهد وماشى عادى بردو العربية حدفت شمال عدلها يمين حدفت جابها شمال وهنا القصة بتخلص زى ماحصل معايا بالظبط بعد الحدفة الشمال مهما تعمل العربية مابتقبلش اى اوامر من الدريكسيون ولا الفرامل بتوقف وللأسف الواد اتقلب بيها فى الترعة اللى ادام الأكاديمية ومن كام يوم واحد صاحبى كان بيزورنى قالى لسه امبارح واحد صاحبه مقلوب فى اسماعلية واللى جنبه توفى وانا فعلا لو كان حد جمبى كان توفى لأن السقف نازل لحد الكرسى اللى جمبى ‘وفى موضوع عمغرق كل منتديات النت لمهندس اسمه محمد غازى كاتبه عن حادث حصله والعربية اتقلبت 10 مرات تقريبا ونفس اللى حصل معايا بردو بالظبط حدفت شمال يمين شمال خلصت.
مع احترامى لكل الناس اللى بدافع عن العربية بحده واللى انا كنت منهم العربية دى فعلا فعلا فيها مشكلة حقيقية فى العفشة او المقصات دا خلاص بجد بقى شئ مفروغ منه وغير قابل للتشكيك

وياريت اى حد معاه العربية مش هاقولك بيعها بس خد بالك جدا جدا من النقر والمطبات والغرز

وربنا يسترها على الجميع

[Youssef.Awad]

بالرغم من ان نزول السيراتو فى الجيل الجديد ده عمل ثورة فى عالم السيارات والتصميمات فى مصر والعالم وهوس الناس بيها والكل بيحلم بركوبها او امتلاكها
بس فعلا عربية مشكلة من يومها سواء حوادثها او سرقاتها من وقت الثورة وياريت فعلا اى حد يمتلكها يتكيف مع عيوبها بعد ما نعرفها طبعا لأن الجميع بينكر ده ويجيب العيب على اخطاء فردية او عيب سواقة واولهم التوكيل وحتى الشركة الام المصنعة

[alaalord]

الحمد للة

بس انا مش ها اقولك انا اتأثرت بجد قد اية انا حسيت انى انا اللى عملت الحادثة يمكن علشان عندى سيراتو ولا علشان عندى مشكلة بالكاوتش ولا علشان باخد الدائرى كل يوم بس المهم من دة كلة الف الف حمد للة على السلامة و فداك مليون عربية المهم انك بخير

[romioramy]

حمدلله على سلامتك ... رأيي ضحي في سبيل الله عن عمرك الجديد و إحمد ربك ليل نهار و ربنا يحميك و يبعد عنك الأذى .
ثانيا كلامك مظبوط فإن ماحدش يثق في الكوري زيادة عن اللزوم و لا كمان في الألماني تذكر إنك ماشي على هواء منفوخ ... فولا ألماني و لا كوري خذ حظرك و إمشي براحتك الطريق ملكك و لا تسعجل في العجلة الندامة و ربنا يوستر طريقنا جميعا.

[ahmadm]

اولا الف حمدلله على السلامة و تصدق بالله انت لو كان حصلك اى حاجة نتيجة الحادثة دية كنت هاتقول يا ريت كانت العربية ولعت و انا سليم اصل العربية ممكن تتعوض انما انت لا يمكن تتعوض و بجد احمد ربنة دا الاستاذ محمد غازي دة طلع من الحادثة مدغدغ و فضل شهور يتعالج و سبحان الله يا اخى اللى حصلة بالظبط بالظبط هو اللى حصلك انا كنت مستغرب و انا بقرا قصتك و حاسس انك بتعيد قصة محمد غازي سبحانك يا رب انا كنت داخل هنا بقرا شوية عن السيراتو عشان كنت يشاور عقلى اجيبها المشكلة ان من شهرين كدة زميل لية فى العمل اتقلب بيها فى طريق السخنة فى الرمل و طلع سليم هو و اللى معاة فا قلتلة حصل اية قاللى كان فية زيت فى الارض قلتلة و فرامل ال abs ؟ قاللى ولا الهوا فرملت و اتقلبت يمكن فعلا المشكلة كانت فى الزيت بس قلت احكة القصة للإفادة و انا والله سعيد ان ربنة اكرمك و نجاك امانة عليك تدبح حاجة لله على انك سليم معافى :)

الكوري لا دين له هاهاه انا فطست على روحى من الضحك لما شفتها :) كل عام و انتم بخير

بس على فكرة يا جماعة مش كل الكوري كدة يعنى هو اكيد فية مشكلة فى السيراتو بالذات عشان الكارينز و السول محدش سمع عنهم حوادث كدة لاكن السيراتو الحادثة بتاعتها بتحصل بنفس الطريقة حدفة شمال فقدان سيطرة قلب بعنى بلاش التعميم ولا انتو اية رايكم ؟؟

[AHMED1718]

القصد من ردى مش دفاع عن العربية ولا دخول فى مخاصمة مع الاعضاء اللى سلخو امها

القصد توضيح حاجة بس
* حوار الجنط اللى اتفلق نصين ده حصل قدامى ف ميجان ستيت (فرنساوى بالكامل ) بدون مطب او اى مشكلة ف طريق وبيحصل كتير ف كل الماركات انا جبت مثال لموقف امامى

* حوار عيوب السيراتو الباقية اذا كانت نشوفية او غيرو فميش عربية كاملة
اللى انا شايفه بس وكلنا شفناه وحسناه ان العربية دى مينفعش فيها الجنط ال 17 لمشاكله ونشوفيته وعدم ملائمته للطرق المصرية

بالنسبة لكتر حوادث السيراتو اللى انتو شايفنها
انا شايف معدل طبيعي بالنسبة لعددها وخصوصا ان معظم ملاكها من الشباب وما ادراك

مانا مشوفتش اى جيتا عاملة حادثة مش والعة واخرها كانت قبل العيد باسبوعين تقريبا على طريق السخنة ومشوفتش عربية ابيزا مش مدعوكة قبل كده مرتين وراشة كل حاجة وزىها زى الجولف والجولييت وكل اللى بيركبو

مشوفتش هوندا مغيرتش ماتور مرة او اتنين على الاقل وكذلك بي ام البانة والموديل اللى قابله (معنا كده ان مواتيرها وحشة )
مشوفتش واحد بيمشى على زيت ويجرب على اي بى اس
اساسا انت لو مدوستش فرامل مش هتعرف تتحكم فيها

الهوجة دى نفس الهوجة اللى حصلت للانسر بوما والانترا ايام منزلت الشكل اللى قبل ده من 2006 تقريبا (بتتقلب لوحدها ودريكسيون فيه مشكلة(علشان مش بيفصل على سرعات ) واى كلام من ده )

انا من كارهى اللانسر بوما معنى كده انها وحشة ؟؟
كارها لانها موتت ناس كتير اعرفهم وكانت قلبات غريبة الشكل و السبب

مش معنى كرهى لعربية معنى كده انها وحشة

هنقعد ف الدوامة دى علشان احنا غاويين كده مش اكتر
كل واحد يعمل حادثة بعربية بيتعقد منها
ربنا يستر طريق الجميع كلنا راكبين هوا

ساعة القدر بيعمى البصر
واخر نداءء يارجالة المنتدى الكرام
اللى بيجي ويحكى تجربة لحادثة ليه مش محتاج حد يقوله دى عربية زبالة ---------------- وكان فين مخك وانتا بتشتريها

محتاج حد يواسيه يساعده ويفيده بمعلومة لاصلاحها
مش يقعد يأتته ويكرهه ف نفسه
اكيد يعنى اللى عمل الحادث مش ناقص وكفايا الهم اللى فيه

يرجى اختيار الالفاظ المناسبة للتعبير عن وجه نظرك
مشرف 3ب
13/11/2011
12.27pm

[ahmadm]

القصد من ردى مش دفاع عن العربية ولا دخول فى مخاصمة مع الاعضاء اللى سلخو امها

القصد توضيح حاجة بس
* حوار الجنط اللى اتفلق نصين ده حصل قدامى ف ميجان ستيت (فرنساوى بالكامل ) بدون مطب او اى مشكلة ف طريق وبيحصل كتير ف كل الماركات انا جبت مثال لموقف امامى

* حوار عيوب السيراتو الباقية اذا كانت نشوفية او غيرو فميش عربية كاملة
اللى انا شايفه بس وكلنا شفناه وحسناه ان العربية دى مينفعش فيها الجنط ال 17 لمشاكله ونشوفيته وعدم ملائمته للطرق المصرية

بالنسبة لكتر حوادث السيراتو اللى انتو شايفنها
انا شايف معدل طبيعي بالنسبة لعددها وخصوصا ان معظم ملاكها من الشباب وما ادراك

مانا مشوفتش اى جيتا عاملة حادثة مش والعة واخرها كانت قبل العيد باسبوعين تقريبا على طريق السخنة ومشوفتش عربية ابيزا مش مدعوكة قبل كده مرتين وراشة كل حاجة وزىها زى الجولف والجولييت وكل اللى بيركبو

مشوفتش هوندا مغيرتش ماتور مرة او اتنين على الاقل وكذلك بي ام البانة والموديل اللى قابله (معنا كده ان مواتيرها وحشة )
مشوفتش واحد بيمشى على زيت ويجرب على اي بى اس
اساسا انت لو مدوستش فرامل مش هتعرف تتحكم فيها

الهوجة دى نفس الهوجة اللى حصلت للانسر بوما والانترا ايام منزلت الشكل اللى قبل ده من 2006 تقريبا (بتتقلب لوحدها ودريكسيون فيه مشكلة(علشان مش بيفصل على سرعات ) واى كلام من ده )

انا من كارهى اللانسر بوما معنى كده انها وحشة ؟؟
كارها لانها موتت ناس كتير اعرفهم وكانت قلبات غريبة الشكل و السبب

مش معنى كرهى لعربية معنى كده انها وحشة

هنقعد ف الدوامة دى علشان احنا غاويين كده مش اكتر
كل واحد يعمل حادثة بعربية بيتعقد منها
ربنا يستر طريق الجميع كلنا راكبين هوا

ساعة القدر بيعمى البصر
واخر نداءء يارجالة المنتدى الكرام
اللى بيجي ويحكى تجربة لحادثة ليه مش محتاج حد يقوله دى عربية زبالة ----------- وكان فين مخك وانتا بتشتريها

محتاج حد يواسيه يساعده ويفيده بمعلومة لاصلاحها
مش يقعد يأتته ويكرهه ف نفسه
اكيد يعنى اللى عمل الحادث مش ناقص وكفايا الهم اللى فيه

يعنى حضرتك كدة تنصح بشرائها من غير خوف لو انا مقدم على الشراء؟

[محمد فريد]

اولا حمدا لله على السلامة وربنا يعوضك خير

فعلا اى عربية ممكن تتقلب ده قضاء وقدر انا ليا ناس اعرفهم شابين اتقلبوا بالنترا 2010 كانت زيرو وفى اللى بكيا عصفورة عومت منه ودخل بيها تحت مقطورة وطلع سليم الحمد لله بس السقف طار
والله انا بشوف اكثر اللى راكبين سيراتو ماشيين براحة مش عارف ليه مع انى بشوف شباب كثير بيطير بيها ربنا يهدى كل الشباب بما فيهم انا - انا بجرى برضو بأى عربية بس محبش اركب مع حد بيجرى وبخاف جدا

ربنا يستر طريق الجميع

[bmw3m007]

الحمد لله انك سليم - قدر الله و ما شاء فعل
و الحمدلله

[wael ahmed]

حمد لله على سلامتك وربنا يعوض عليك

[alkingwr]

قدر الله وماشاء فعل .... الف سلامة عليك و الحمد لله انك طلعت منها سليم

[mohamedbook]

الحمد لله انك بخير وما اخطاءك لم بكن اليصيبك وما اصباك لم يكن ليخطئك
كلها اقدار

[AHMED1718]

يعنى حضرتك كدة تنصح بشرائها من غير خوف لو انا مقدم على الشراء؟

لو عجباك العربية اتكل على الله
فكك من الاشااعات اللطيفة

[SAMEH_FOUAD]

بس على فكرة يا جماعة مش كل الكوري كدة يعنى هو اكيد فية مشكلة فى السيراتو بالذات عشان الكارينز و السول محدش سمع عنهم حوادث كدة لاكن السيراتو الحادثة بتاعتها بتحصل بنفس الطريقة حدفة شمال فقدان سيطرة قلب بعنى بلاش التعميم ولا انتو اية رايكم ؟؟

هية المشكلة ان الناس عارفة ان الكارينز والسول ثباتهم وحش فمحدش بيجرى بيها

كمان السول مش كتير فى مصر زى السيراتو

والكارينز اللى بيجيبها بيبقى عايزها عائلة يعنى ولا شد ولا غيرة

ربنا يسترها علينا جميعا ويكفينا شر الحوادث