الكارينز ............ سؤال ما يتسألش

[Khaled_Nowaihy]

السلام عليكم ورحمة الله وبركاته
السبع كان عامل أسبوع صيانة مجانية .. رحت يوم الأربعاء الماضى 12/9 بعد ما حجزت قبلها بيوم
كان ميعادى الساعة 9 وقابلت المهندس وكانت الشكوى من عضة فى الفيتيس فى الأولانى والتانى
والشكوى التانية من ان الدركسيون فيه زنة ساعات بتظهر على السرعة البطيئة وكان بيرعش عند سرعة 110 بالضبط وتختفى تحت أو فوق ال 110
العربية دخلت الساعة 9 وخلصت الساعة 12 تقريباً
كشف شامل ... تربيط عفشة ... فك الأربع عجلات ومراجعة ترصيص العجل على الجهاز
وفى الآخر تنظيف شامل وتلميع العربية من الداخل بملمع تابلوه وحاجة 100%
وفى الآخر قابلت المهندس وقال لى على اللى فيها
الفيتيس ما فيش فيه مشكلة
و
علبة الدركسيون محتاجة تتغير !!!!!!!
أنا صعقت .............. معقول ؟؟
قال ممكن عشان العربية تقيلة
المهم المهندس مشكوراً اتصل بفرع القطامية ورتب معاهم انى أروح أغيرها هناك تبع الضمان لإنها مش متوفرة عندهم
وانا مروح جربت تانى .... يمكن الرعشة تروح بعد الترصيص ...... مافيش فايدة
أنا كنت غيرت الكاوتش الأمامى قبل رمضان وقلت أغير الخلفى بالمرة ......... رحت جبت زوج جديد ركبته فى الأمام ورصصت كمان مرة
النهارده الصبح قلت أجرب تانى 110-120-130 الرعشة راحت والحمد لله

يعنى ممكن نقول ببساطة كانت مشكلة كاوتش ؟ الله أعلم
فاضل حكابة الزنة فى الدركسيون اللى كل شوية بتظهر وأحس بيها فى الدركسيون
المهم أنا مفروض أروح فرع القطامية عشان الموضوع ده
أيه رأيكم أروح وللا بلاش ؟؟؟؟
السؤال اللى ما يتسألش هو : تفتكروا مركز كيا السبع تشخيصهم صح وللا غلط ؟

أفيدونى أفادكم الله علشان أقرر أروح مركز القطامية يوم الأحد وللا لأ

[temo85]

بص مادام هيغيروا العلبة فى الضمان ماشى غيرها و موضوع الكاوتش ده حصل معايا فى العربية القديمة وكانت المشكله فى السلك الداخلى للكاوتش ولما غيرته راحت الرجه

[Ahmed_Mega]

الزنة طرمبة الباور

[Khaled_Nowaihy]

يعنى الزنة دى عادى وللا فيه مشكلة فى طرمبة الباور ؟

[moha4tec]

يا بشمهندس حاتم هو شكله بيسمع صوت الصفاره بتاعة خرطوم البور
و الله اعلم
ابقى قوله انت حلتها عندك ازاى

[temo85]

بص هو من ضمن الاختبارات ان علبه الدركسيون سليمة انك تكسر يمين و شمال على الاخر ولو سمعت ونه او زنه زى ما بتقول تبقى الطرمبة مش كويسة و شوية و هتلاقى الزيت بينقص فى الخزنة

[Ahmed_Adham]

بص هو من ضمن الاختبارات ان علبه الدركسيون سليمة انك تكسر يمين و شمال على الاخر ولو سمعت ونه او زنه زى ما بتقول تبقى الطرمبة مش كويسة و شوية و هتلاقى الزيت بينقص فى الخزنة

كتالوج كارينز 2012 بيقول ان الصوت العالى اللي بيتسمع فى أخر لفه الدريكسيون عادى جدا ومفيش منه قلق وأنا فسرته ان سببه انك بتجيب اقصى قدره للباور فطبيعى يكون فيه صوت زياده.

[ابو ليلى]

انا رائى يا ا/ خالد انك تروح طبعا لانك مش هتخسر بقدر ما هتكسب
اولا التغير هيكون فى الضمان واعتقد ان السبع عمل التقرير عنده ومطلوب من القطامية تنفيذه
يعنى مش هيقول رائيه هينفذ على طول

[MMMERO]

خالد باشا انا من رائي انك تروح مش هتخسر حاجة

[IsmailIbrahim]

استاذ خالد انا كان عندي صوت في الردكسيون بسيط زي تزيق كده بس لما روحت التوكيل عاملوها عن طريق تشحيم حاجة كده مش فاكر اسمها,

انا شايف انك تروح ومش هاتخسر حاجة وربنا يستر انشاء الله

[Khaled_Nowaihy]

السلام عليكم ورحمة الله وبركاته

رحت فرع القطامية يوم الأحد الماضى وسبتها لهم يكشفوا عليها ورحت الشغل
وبعدين اتصلوا بى وقالوا لى العربية مافيهاش حاجة وكويسة واحنا عملنا شوية تربيط واتفضل استلمها

أخذت معايا سائق من اللى عندنا كان بيشتغل فى توكيل سوزوكى وعنده خبرة كويسة
رحنا التوكيل وطلعنا عشان يجرب العربية على الطبيىعة فى الشارع اللى بيودى على كوبرى الشهيد الجديد
الراجل مسك العربية يجرب كل حاجة : نزول هبد فى المطبات /يعمل غرز و انحراف مفاجئ على سرعة عالية / فرامل مفاجئة على السرعة العالية
وفى الآخر قال لى العربية زى الفل ... أنا حاولت اظهر العيب فى العربية وما ظهرش حاجة .............. ما تسمعش كلام اللى قال لك انها عاوزة علبة دركسيون
حمدت ربنا والحمد لله على كل حال

تانى يوم اتصل بى المهندس يسألنى ايه الأخبار فيه شكوى من أى حاجة فى العربية ؟
قلت له لأ ....... بس ازاى بتوع السبع بيقولوا عندى مشكلة فى علبة الدركسيون ؟؟؟

قال لى مش مشكلة ,,,,, حضرتك تشرفنا فى صيانة 45000 ونكشف لك عليها

هانت ,,,, فاضل 3000 كم وأروح لهم تانى

آدينى بأراقب العربية وأشوف ايه اللى حا يحصل فى ال 3000 دول

هو ما فيش أجهزة تتعرف على المشكلة دى بدل الشك ووجع القلب ده ؟؟؟

[temo85]

السلام عليكم ورحمة الله وبركاته
باشا علبه الدركسيون اعراضها يا طقطقه فى الملفات يا الزيت بينقص من الخزنة غير كده سيبك منهم

[Khaled_Nowaihy]

السلام عليكم ورحمة الله وبركاته

الرعشة فى الدركسيون رجعت تانى عند سرعة 110 وحاجة تجنن !!!!
الغريب انها بتظهر لما أكون على الخامس ... انما على الرابع ما بتبانش

تطلع ايه بقى دى ؟؟

النجدة يا كياوية

[ابو ليلى]

هو مش ميعاد الصيانة قرب خلاص ابقى روح بيها السبع واحكى ليهم على اللى حصل

[temo85]

السلام عليكم ورحمة الله وبركاته

الرعشة فى الدركسيون رجعت تانى عند سرعة 110 وحاجة تجنن !!!!
الغريب انها بتظهر لما أكون على الخامس ... انما على الرابع ما بتبانش

تطلع ايه بقى دى ؟؟

النجدة يا كياوية

غريبه اوى اشمعنى على غيار معين يعنى اشمعنى على الخامس بس !! ياريت تكشف و تقولنا ياباشا عشان نستفاد