قياس الزيت دة مظبوط ولا هيبوظ الدنيا ؟؟

[Youssef.Awad]

السلام عليكم ورحمة الله وبركاته


امبارح غيرت الزيت يارجالة ( كيا سيراتو 2011 ) كاسترول ماجنتك

والانطباع الأول عن الزيت انو كويس

- صوت المكينة اهدى نسبيا بنسبة 10% .
-الملحوظة الاهم ان التسارع او معدل الحرق على الغيارات قل ، يعنى كان الاول الار بي ام بيوصل ل 4 او 4 ونص عشان ينقل مثلا من الرابع للخامس او الخامس للسادس .. حاليا اخره تلاتة وبقى في سلاسة في التغيير

وطبعا مش هقدر احكم عليه بدقه الا بعد الف ولا الفين كيلو


السؤال بقى

في الكتالوج مكتوب الماكينة بتاخد 3.3 لتر وده بالظبط اللي انا حطيته

ولما قستها النهاردة الصبح طلع ازيد من حرف الـ F بمقدار عقلة صباع



هل ده هيضر بالمكينة او يأثر على حاجة وخصوصا اني قريت فتي كتير على النت واللي يقولك يبوظ الصوف واللي يقولك تهريب واللي يقولك يبوظ الطرمبة وانا خبرتي على ادي جدااااا

تنصحوني بأيه يارجالة ولو فعلا يضر اتصرف ازااااااي

اولا: 1000 مبروك على التغيير .

ثانيا: شكر خاص على ثقتك فى كلامى وعملك بنصيحتى لأنها فعلا مسؤولية اتحملها ولو لا قدر الله حصل لعربيتك اى حاجة او ضرر فلن اتحمل تأنيب ضميرى لى ما بقى من حياتى

ثالثا: ملاحظتك لصوت الماكينة بأنه اهدأ بنسبة 10% .. احب اقولك انه البداية وبعد فترة سوف تلاحظ هدوءا اكتر من ذلك

رابعا: بالنسبة للزيادة فى منسوب الزيت بعد التغيير .. بارجح السبب يكون اما:
- فى عدم تصفية الزيت القديم بصورة كاملة والاستعجال فى ربط المسمار وتركيب الفلتر
- عدم القياس بطريقة صحيحة والمفروض ان تكون كالتالى .. تدور العربية لمدة 5 دقائق ع الاقل من البرود التام حتى يسخن الموتور (او بعد ركن السيارة من مشوار) وتبطل وتنتظر 10 دقائق وتمسح المقياس وتقيس بشرط تكون العربية مركونة على سطح ارض مستوى وكررها اكتر من مرة لأنه اوقات وانت بتسحب المقياس بيفرد الزيت عليه لاحتكاكه بفوهة فتحة المقياس او الانبوبة
- ان يكون هناك خطأ فعلا فى الكميات المذكورة فى الكتالوج

والمفروض فعلا ان الزيت ما يتعداش علامة F بأى حال من الاحوال ومن الممكن ان تتخلص من الزيادة .. لكن لو سيبته وراقبته كل اسبوع مثلا مش هايحصل حاجة لأن الزيادة مش كبيرة اوى بالنسبة لى .. وعندنا فى مصر كل الصنى ال1600 بيتحطلها 3 لترات اساسى فى اى توكيل معتمد مع ان الكتالوج والناس اللى اخترعوا العربية بيقولوا حطوا 2.5 لتر بدون فلتر و2.7 لتر بالفلتر !!!

خامسا: بالنسبة للسحب والبرجلة وغيارات الفتيس اللى بقت تنقل بدرى عن ميعادها ..
والله غصب عنى نسيت اقولك ان ده حصل معايا اول ما حطيت الزيت ده فى عربيتى والعربية كانت متكتفة لكن فيه ملابسات لازم اقولهالك بالتفصيل كمايلى:
- انا غيرت الزيت عند 17500 كم وكان قبل سفرى لمكة - جدة بيوم واحد وفعلا خلال مشاويرى العادية داخل الرياض فى اليوم ده كانت العربية مخنوقة وحسيت بعدم ارتياح فى نقلات الفتيس الاتوماتيك وكان لازم اضغط رجلى اكتر ع البنزين عشان تأخر النقل !!! بصراحة مالقتش تفسير غير ان الزيت لسه جديد ولزوجته مع الحبيبات اللى فى الماجنتيك دى مكتفة البساتم غير القديم كان فاقد اللزوجة ونصف تخليقى
- رحلتى لجدة رايح جاى كانت حوالى 2300 كم وكلها كانت على سرعات من 120-160 كم/س و90% من وقت السواقة كنت حاطط الفتيس استيبترونيك ع السادس عشان كل شوية ما يقعدش يتكتكلى ويقرفنى باستثناء داخل مكة وداخل جدة 10% كنت حاطط الD .. وده السبب انى اغير الزيت قبل ميعاده لظروف السفر حفاظا على الموتور
- لما رجعت فضلت يومين بنفس الاداء ده داخل الرياض وسط الزحمة مع ملاحظة ان صوت العربية فى اول دوارة ووسط النهار بين المشاوير بقى اهدأ كتييييييييييير عن اول ما غيرت الزيت .. وكمان نقل الفتيس بسرعة قبل ميعاده قل كتير عن الاول
- الفارق انى لما وصلت ل20.000 كم دخلت التوكيل وعملت الصيانة الدورية وفيها المفروض كنت اغير البوجيهات (حسب كلام الجبر وكيل كيا) لكن لأنى كنت قارى فى الكتالوج عن انها بتتغير كل 40.000 كم .. شكيت فى الموضوع وقولت اكيد قاصدين يغيروهم قبل ميعادهم زى موضوع الزيت الGTX كده عشان المصنعيات وفلوس الصيانة تبقى اكبر زى تغيير فلتر المكيف كل 20 الف كم !!!
ولما دخلت للمهندس قولتله مش هاغيرها ومكتوب كده فى الكتالوج .. قالى لو بلاتينيوم فعلا مش بتتغير غير كل 40 ولو طلعت عادية لازم تتغير كل 20
طيب نشوف .. المهم بعد الفك لقيتها عادية وقولتله غيرها لكن حطلى بلاتينيوم .. وللعلم كان سعرها ضعف سعر العادية يعنى نفس التكلفة تقريبا اذا حسبنا فترات التغيير وفارق الاداء طبعا وده اللى حصل فعلا
ومن يومها الى الان وصلت 21500 كم .. اداء العربية مختلف تماما والحرق افضل بكتييييييييير وسحب العربية اتغير للاحسن وبقت تطير لما اكبسلها بنزين غير الاول كانت مخنوقة وبتنقل بدرى واحس بنتشة بسيطة بين النقلات

الخلاصة ..
انتظر شوية على الاداء ولو داخل على صيانة كبيرة او بقالك كتير ما غيرتش بوجيهات غيرها ببلاتينيوم افضل كتيييييييير
انما الزيت ممتاز جداااااااا ولا غبار عليه .. لكن تأكد من المنسوب الصحيح

تحياتى ليك

مع احترامي للي عملتة انت حاطط نوع زيت غلط وشكلك كمان واخد قياس الزيت غلط
اولا زيت كاسترول ماجنتيك ده للعربيات اللي فوق 100 الف كم او انخفضت كفائتها اقل من 80%
وفي حالة عربيتك 2011 لازم تحط زيت تخليقي بالكامل يعني كاسترول ايدج وليس ماجنتيك او فالفولين 5-40
او شل 5-40 الترا او ليكوي موللي 5-40
فلالزيت اللي انت حطيتة ده هايوسع خلوصات البساتم عندك ويقلل كفائة الموتور مش اقل من 15%
وكة حرام عليك ما تستخسرش فلوس ونزلة ارميه بقي ولا ادية لحد عربيتة قديمة شوية
لان ماجنتيك ده في حبيبات لترميم المواتير المتوسطة الى قديمة
ثانيا انت تحط الكمية المكتوبة في الكتالوج 3.3 ومع الفلتر تحط من 200 الى 300 مللي
فانت هاتحط 3.6 وتدور العربية 3 قايق الى 5 لغاية ما تسخن وبعد كدة تبطل تسيبها 5 دقايق وتطلع المقاس تمسحة كويس بمنديل وبعد كدة تدخله وتشوف العلامة فين ولازم مايكونش ابدا فوق ال full
عشان ده بيسبب تكون رغاوي وبيعمل ضغط كبير على الموتور وممكن تجيب منك جوان

كلام مظبوط يا استاذ كريم فى حالة كان الماجنتيك نصف تخليقى وليس تخليقى بالكامل زى اللى بينزل السعودية ومواصفاته اعلى درجة طبقا للمواصفات الامريكية والاوروبية
اما الايدج 10W60 عشان تستفاد وتستمتع بيه عاوز يتحط فى ماكينة تربو او عزمها شديد وطريقة سواقة رياضية وفيها حرق ع الغيارات وليس سواقة يومية داخل المدينة لانه تقيل فى الدوارة والعربية باردة زى ما ذكر العضو FORMULATOR

فعلا الكاسترول أرابيا نزلتوا فـ السعودية (والـGulf) الأول
اللى هو Magnetic 5w-30 Fully-Synthetic

تمام يا مصطفى باشا .. كاسترول ارابيا ومقرها فى الامارات دشنته فى السوق الخليجى فى الربع الرابع من 2012
ونزل فى السعودية بعدها بشهر تقريبا وكاسترول كان احد رعاة معرض الرياض للسيارات فى نوفمبر 2012 ومعرض جدة الدولى للسيارات فى ديسمبر 2012
وطول الشهرين اللى فاتوا فيه حملة اعلانات ضخمة مرئية ومسموعة عن الماجنتيك A5 التخليقى للحفاظ عن تآكل المحركات خاصة فى بداية الدوران وكمان ظروف التشغيل فى زحمة السير والوقوف المتكرر فى الاشارات مثل مدينة الرياض مثلا
وانا عشان اخد قرار انى اغير من كاسترول GTX الفاشل اللى بيحطه توكيل كيا 10W30 وبيتغير كل 5 الاف كم فى عربيتى السبورتاج 2400 سى سى 2012 محرك THETA II واجيب الماجنتيك 5W30 اللى بيتغير كل 10 الاف كم وممكن يقعد ل12 الف كم
عملت دكتوراه فى السوق وكيا والكتالوج ومحلات بيع الزيوت وفروقات الاسعار لحد اما استقريت عليه ولقيت انه افضل اختيار من المتوفر فى السوق واكيد افضل من اللى بيحطه التوكيل وغيرته بره التوكيل بعد ما اشتريت كرتونة بالجملة بسعر اقل 50% من سعره لدى محطات الزيوت
وخليت اخويا يحطه فى عربيته الجديدة الانترا 2012 موتور 1600 سى سى GAMMA بعد التليين ل1600 كم وما اشتكاش منه لحد دلوقت .. مع الفارق انه غيره فى التوكيل (الناغى) عكس الجبر (كيا) اللى رفض فى حالتى وحالة الاخ هشام صاحب الموضوع مع عربيته السيراتو
لكنه بلغنى بعد التغيير ان مقياس الزيت اعلى بنفس المقدار اللى ظهر عند استاذ هشام فى السيراتو وهو مقدار عقلة صباع او واحد سم تقريبا !!!
لأنى كنت منبه عليه يعرف مقياس الزيت للعربية بالظبط لأنها مواصفات تركى اوروبية ومش معاها كتالوج فيه النسب والكميات .. ولذلك خاف يغيره بره وراح التوكيل عمل صيانة ال5000 كم على 1600 كم وغيره جوه بعد ما حطوله 3 عبوات 1 لتر وباقى العبوة اللى كانت باقية منى وفيها حوالى 400 مللى
لأن السبورتاج عندى بتاخد 4.6 لتر .. ولما رجعلهم تانى اكدوله فى التوكيل انه زيادة طفيفة ممكن تتبخر مع الوقت

معلومة ع الماشى .. كل العربيات فى السعودية بتغير زيوت الزيرو على اول صيانة اللى بتتم بعد 5000 كم !!!!

[Formulator]

@ msco

كلنا كنا بنتكلم على أساس الكاسترول magnetic اللى موجود فـ مصر 10w-40
والـA5 الـsynthetic أو الـprofessional لسه مانزلش عندنا؟!!

وكمان فيه كمية زيوت مضروبة فـ مصر -- بشعة؟!!!

وإحنا بنفضل الـEdge عشان الـStructure الأساسى (الـbase) بتاع الزيت،
مش الـAdditive-package

يعنى
- الإيدج بيبقى mainly PAO-stocks اللى هى group-IV، وفيه Esters مثلا فـ الإيدج-سبورت (اللى هى group-V)
- لكن الماجنيتك بيبقى mainly Hydrocracked mineral- oil اللى هو group-III (و synthetic بردو) بس التخليقى ده grades؟؟!!!

دا الفرق الأساسى بين الـ2 tradenames
الفروق التانية بقى بتكون الإضافات (ونسبها).. دى اللى بتحدد الدرجات لإستعمالات معينة
زى الـroller-molecules فـ الماجنيتك، وزى الـanti-wear فـ الإيدج... وكده

المهم: انت حاول تخلص من الزيت الزيادة بأى طريقة (خليها عـ الـmax أو F)، بالكتير أعلى بـ1-2 مللى عـ المقياس؟!!
لأن الزيادة اللى بتوصل 400-500 مللى دى غلط على الجوانات والـoil-seals


@ Youssef.Awad

أفضل طبعا انك غيرت الـGTX الـsemi لحاجة تخليقى زى الـmagnetic
عربيتك جديدة وحرام يحطولها زيت نصف-تخليقى وكمان 10w؟؟!!!

بس أنا still عند رأيى: ان الـ5w-30 قد يكون كويس فـ الشتاء والبرد.. ورائع فـ الـcold-start
لكن فـ الصيف وفـ السعودية؟؟ ماعتقدش يكمل 7000 كم بكفاءة؟!!!

بالنسبة للإيدج Sport الـ10w-60
أنا بعتبره أفضل زيت موجود دلوقتى -من تجارب أصحابى فـ العربيات المتونة،
مش ممكن؟؟ أنا ماشوفتش زيت يخلى المواتير دى (مايفك وبيمرز وجولف-تربو) صوتها أحلى وهى بتحرق على rpm عالية أوى؟!!
- نفسى أجربه فـ الـT-JET (بس أكيد مش فـ البرد والشتاء ده)؟!!! ولا بأقل من 160 حصان :)

Rgds،

[Karim_Monir]

استاذ كريم مع احترامي الشديد لحضرتك اانا يمكن كنت الاول بسأل الناس بدون ما ابحث بحث مظبوط بس بعد كلامك كان لازم ابحث مظبوط لان واضح ان كل الاراء اللي بتتقال على النت فتي وبس

اولا : زيت الماجنتيك زيت تخليقي بالكامل وده بعد اتصال حالا لمهندس الوكالة الرسمية لزيوت كاسترول في السعودية وحولني على ما يسمى بمهندس مختبر وهو فلبيني الجنسية وأكدلي نفس المعلومة وان الزيت طبقا لتصنيف معهد البترول الامريكي مناسب جدا لسيارتي ، كذلك زيت ايدج تخليقي بالكامل ولكنه مناسب اكثر لسيارات السباق .

ثانيا : حضرتك بتقول ان في الكتالوج كمية الزيت 3.3 لتر ومع الفلتر هتزيد 200 او 300 لكن الكتالوج بيقول عكس كده والدليل اهو في صورة من الكتالوج بتاعي بيقول ان الكمية 3.3 مع الفلتر

ثالثا : حضرتك بتقول ان الزيت الماجنتك ده للعربيات اللي فوق 100 الف كيلو وللأسف كلام حضرتك خطا بردة والدليل ان في نفس الصورة اللي فوق على الشمال بيقولك استخدم api sm او أعلي

وطبقا بقى للصورة التالية واللي هي عبارة عن تصنيف المعهد الامريكي للبترول بيقول ان الـ api sn اعلى وافضل من الـ sm وخصوصا للسيارات اللي تاريخ صنعها من 2011 وانت طالع وده بالفعل هو نفس تصنيف الكاسترول مجانتك اللي انا حاطة



ودة لينك المصدر هــنــا تقدر حضرتك تقرا الكلام اللي مكتوب هيشرحلك الفرق بين كل صنف وهيأكدلك ان اختياري صح والحمد لله مع اني في البداية مكنتش قريت الكلام ده واستعنت بخبرة الاستاذ youssef.awad مشرف قسم النيسان جزاه الله خيرا

وده لينك تاني بيتكلم عن نفس الموضوع بتوسع اكتر هــــنـــــا
ودي صورة لضهر علبة الزيت بتأكد صحة التصنيف



رابعا : حضرتك بتقولي ان اللزوجة غلط وللأسف بردة كلام حضرتك خطأ لان من واقع الكتالوج والكلام هنا مش مبني على اراء او تجارب شخصية دة مبني على اختبارات تمت الاف المرات على السيارة وما يناسبها من زيوت ولزوجة وفي الاخر حطولنا الانسب

وهتلاحظ ان اول لزوجة موصي بيها في الصورة هي اللي انا حطيتها 5-30



نرجع تاني لكلام مهندس المختبر اللي انا كلمتة واللي شرحلى ان الحبيبات المغناطسيية اللي موجودة في الكاسترول مجنتك بتحافظ على اداء المحرك لأطول فترة ممكن وبتقلل الاحتكاك ما بين اجزاءة في الفترة البسيطة اللي بتدور فيها سيارتك الصبح او فترة توقف طويلة وده لان الجزيئات المغناطيسية دي بتفضل لازقة في اجزاء المحرك وبالتالي بردة على المدى الطويل هتوفر في نسبة الوقود المستهلك وده لانها بتصنف تحت تصنيف زيوت موفرة للطاقة

وده نفس الكلام اللي موجود في الصورة الاولى اسفل الصفحة على انها بتقلل مقدار الوقود الضروري للتغلب على احتكاك اجزاء المحرك

أخيرا

دة لينك صفحة كاسترول ماجنتيك على اليوتيوب هتلاقيه فيه فيديوهات كتيره بيتكلم فيها ناس خبراء بجد عن مواصفات الزيت ولزوجتة وبيعالج مشكلات ايه واية السيارات المناسب ليها

انصح كل الناس انها تشوفه

مـــن هـــنـــا

في النهاية بشكر حضرتك وبشكر كل الناس اللي ردت
وبشكر الاستاذ يوسف مشرف قسم النيسان اللي شجعني على اختياري الحالي
والله ولي التوفيق

اشكرك كثيرا لذوقك وان كل كلامنا فتي
بس انت عضو قديم وعارف ان منتدي نايل موتورز مصري وان الزيوت كمنتج بترتبط بمنطقة البيع
وانت ماوضحتش انك في السعودية فبالتالي رديت عليك طبقا لانك بتستعمل ماجنتيك اللي في مصر النصف تخليقي واللي تمنه يقل عن التخليقي الكامل ب ثلث الثمن تقريبا
وبرضه لما وضحتلك الكلام عن قياس الزيت كلامي عن العام لان في غيار بفلتر وفي غيار بدون فلتر
فالكتالوج بيكتب مقدار الزيت بالفلتر قد ايه ومن غير الفلتر قد ايه
وانا معرفتش انك حاطط رقم الغيار بالفلتر وكان لازم التوضيح من طرفك
او اعتبار كوني اقول من 200 الى 300 مللي للفلتر انك هاتشيلهم من حسابك لو انت اخذت الكمية المناسبة للغيار بالفلتر حسب توصية الصانع

شكرا جزيلا مرة اخري لذوقك واعتبر كلامي ومروري بموضوعك لمساعدتك كان لم يكن

[MohammedAladel]

خلاص يا أستاذ كريم الراجل إعتذر .... والله المنتدى دا مفيش زيه وزى الناس المحترمة اللى فيه .... جل من لا يسهو .... وربنا يكرمك بجد يا أستاذ كريم .... اللى بيدخل المنتدى هنا بيتعلم ... وكلنا بنغلط ..... ونتعلم من أخطائنا ... لكن أنا شايف إن نايل موتورز الأٌكثر مصداقية ... خصوصا إنى شايف فيه كوادر كتير ... بتدخل تصحح المعلومات

يعنى بنكمل بعض .... أنا مثلا دخلت المنتدى مبعرفش أسوق ومعنديش عربية ... تقريبا كل المعلومات اللى عرفتها عن عربيتى أو العربيات بشكل عام ما خرجتش برا المنتدى .... يعنى بصراحة هنا فيه علم وفيه أخلاق عالية وناس محترمة بجد

[Youssef.Awad]

@ Youssef.Awad

أفضل طبعا انك غيرت الـGTX الـsemi لحاجة تخليقى زى الـmagnetic
عربيتك جديدة وحرام يحطولها زيت نصف-تخليقى وكمان 10w؟؟!!!

بس أنا still عند رأيى: ان الـ5w-30 قد يكون كويس فـ الشتاء والبرد.. ورائع فـ الـcold-start
لكن فـ الصيف وفـ السعودية؟؟ ماعتقدش يكمل 7000 كم بكفاءة؟!!!

عارف طبعا يا باشا .. واكيد هانزله فى الصيف على 5000 كم او كل شهرين ومش هاستنى لحد اما اجيب اخره
موضوع 10W30 مكتوب فى الكتالوج كاختيار ثانى لكن مش SEMI كانوا يستنضفوا ويحطوا FULL .. وانا اللى كنت فاكر فى الاول بيحطوا FULL وينزلوه على 5000 كم حماية للموتور
طلعوا لا مؤاخذة !!!!!!!!!!!!!!!
ياراجل ده طلع عندهم بوجيهات بلاتينيوم وبيغيروها بعادية عشان العربية طالع منها عادية !!! قمة الذكاء

الخلاصة اللى يركب عربيات فى الخليج ومالوش فيها يتعمل عليه احلى شغل من الكل توكيلات من جيلى للبى ام وورش وحتى بتاع الكاوتش ههههههههههه

ياراجل يا طيب ده اللحام الخبور هنا ب35 ريال ومايعرفوش يعنى ايه مكواة هههههههههه
ومرة وانا ماشى كده فى شارع كله اكسسوارات عربيات بالرياض لمحت يافطة عليها اعلان رينو تاير (تسليح الكاوتشات)
طبعا دخلت ع المحل والراجل اشتغلنى احلى شغل .. شوية وعرفته مقامه مفكرنى اول مرة اسمع عنه وانا مركبه فى مصر الصيف اللى فات وموجود من زمان فى السوق
بيعمل الفردة ب250 ريال ومش مخدومة زى اللى ركبتها فى مصر وكمان جهاز الرش عنده قديم وشكله كان مستعمل 10 سنين فاتوا مع انه محل جديد هههههههههههه
بجد حاجة فضيحة !!!!!!!!

[MohammedAladel]

بعد إذن صاحب الموضوع

هو يحصل إيه لو سبت الزيت بعد ما خلص المسافة اللى مفروض يتغير عندها تقريبا يعنى زى ما بيقولوا

يعنى لو زيت يمشى فى ظروف بلدنا 10 آلاف كيلو ويتغير لو مشيت بيه 15 مثلا هل كدا يبهدل الموتور ويخف لدرجة إنه يبقى زى الميه والموتور ممكن يخف ؟؟ ولا دا يحصل على المدى البعيد

هل هلاحظ أرتفاع فى صوت المحرك ؟؟

[Youssef.Awad]

بعد إذن صاحب الموضوع

هو يحصل إيه لو سبت الزيت بعد ما خلص المسافة اللى مفروض يتغير عندها تقريبا يعنى زى ما بيقولوا

يعنى لو زيت يمشى فى ظروف بلدنا 10 آلاف كيلو ويتغير لو مشيت بيه 15 مثلا هل كدا يبهدل الموتور ويخف لدرجة إنه يبقى زى الميه والموتور ممكن يخف ؟؟ ولا دا يحصل على المدى البعيد

هل هلاحظ أرتفاع فى صوت المحرك ؟؟

مبدئيا كده المفروض يكون الحد الاقصى للعمر الافتراضى للزيت لا يزيد عن 20%
يعنى زيت معدنى بيتغير كل 1000 كم ... يبقى اقصى حد يتغير بعده 1200 كم
او زيت نصف تخليقى بيتغير كل 5000 كم ... يبقى اقصى حد يتغير بعده 6000 كم
زيت تخليقى بيتغير كل 10000 كم ... يبقى اقصى حد يتغير بعده 12000 كم
وفيه حد آخر للفترة نفسها وليس المسافة كما يلى:
زيت معدنى ... شهر الى شهر ونصف فى الصيف و3 شهور فى الشتاء
نصف تخليقى ... 6 شهور
تخليقى ... سنة او 12 شهر

ظروف التشغيل والعوامل الخارجية بتتاخد فى الاعتبار طبعا والاهم هو اسلوب السواقة وحرق الغيارات بداعى او بدون داعى ..

طبيعى برضه يكون فيه ضرر ع الموتور اذا تجاوزنا الحد الاقصى لاستخدام الزيوت فى كذا صورة حسب نوعية الموتور والعربية وعمرها وطريقة السواقة نفسها وظروف التشغيل من حرارة ورطوبة وكماليات العربية

لو حسبت كويس تكلفة كل اللى ممكن يحصل للعربية من اضرار مجهولة ومتعددة .. هتلاقيها ما تسواش ثمن اللى ممكن توفره فى غيار زيت فى مواعيده الدورية او اذا اقتضى الامر والضرورة لذلك ..

[MohammedAladel]

لأ طبعا ... أنا مش قصدى إنى أوفر ... كله إلا الزيت ..... بس أنا مثلا أمبارح كان الزيت خلاص مشى ال 10 آلاف كيلو التوتال كوارتز 9000 ... ورحت مشوار 100 كيلو ... رجعت أجيب زيت الراجل قال لى بكرة تعالا خده معنديش دلوقتى هجيب شل ألترا نفس اللزوجة برضه ............ لأن كله بيقول لى توتال مش قد كدا

فأنا حسيت إن صوت الموتور على شوية خصوصا إن بابا اللى كان سايق وهو مبيعرفش يسوق أساسا وبيدوس جامد فى العربية ومش فارق معاه صوت الموتور من الأساس

وكمان الزيت التخليقى دا ال 5w40 عامل زى زيت الطعام مبعرفش أٌقيم لزوجته