تحذير من شارع فوزي معاذ بالاسكندريه و محاولة سرقه الكارينز

[hesham_one]

السلام عليكم أعضاء المنتدي الكرام

كنت في اسكندريه من يوم السبت 28-9-2013 الي الخميس 3-10-2013 في مهمة تدريب تبع شغلي
و كل يوم اطلع من الفندق في سابا باشا الي سموحه في برج كبير هناك اسمه السرايا تقريبا فوق بنك الاتش اس بس سي .

المهم كل يوم انا و زمايلي بنعاني في الباركنج نحاول نركن في الشوارع الجانبيه جنب البرج لو لقينا مكان او في شارع فوزي معاذ في الاتجاه من ميدان سموحه الي الكوبري كنت بغطي العربيه كل يوم بس يوم الخميس لقيت الجنب ده من الشارع غرقان ميه فلفيت و ركنت في الجنب التاني ( الاتجاه اللي رايح لميدان سموحه قبل مدرسة محمد كريم علي طول ) و مغطتش العربيه

عربيتي كلها متفيمه و كنت حاطط شماسه علي الزجاج الامامي.

الكلام ده كان الساعه 9 و نص الصبح و الشارع مليان عربيات و ناس و بنوك و نزلنا و رحنا التدريب و رجعت للعربيه الساعه 12 و نص ظهرا.

بفتح العربيه بالريموت ما بتفتحش

جربت افتح الباب اللي ورا ما بيفتحش جربت افتح باب السواق لقيته فتح و العربيه شغلت الانذار.
ببص جوا العربيه لقيت الزجاج اللي جنب السواق مكسور

و الكونتكت مكسور و مدلدل بسلوكه لتحت و القفل بتاع الدريكسيون و الفرامل مكسور و مرمي و العربيه مليانه زجاج بصيت علي الكاسيت لقيته سليم في مكانه و العربيه كان فيها شنط سفر موجوده زي ما هي .

كان معايا و احد صاحبي و كان فيه بوكسين شرطة الناحيه التانيه من الطريق راحلهم يقولهم قالولوا ملناش الدعوة بالناحيه التانيه من الطريق .

اتصلت بالنجده خدوا بيناتي و وقفت بعدها ساعه و نص و محدش جه.

سألت واحد كان بيركن و رايا و جه معايا و قالي هادورهالك و حاول يدوره ببنسه العربيه بتشغل المارش و ما بتدورش و قالي العربيه دي ما تدورش غير بمفتاحها.

جبنا عربيه انقاذ و طلعت علي التوكيل قريب من المكان جنب مصنع لورد.

في الاول حاولوا يدوروها ما دراتش و بعدين كتبوا قطع الغيار اللازمه و كانت طقم كوالين و دراع نور و دراع مساحات و فبره سفلي لعلبه الدريكسون و سألت علي الحاجات دي طلعت مش موجوده و امامها من تلات اسابيع لشهر علي ماتوصل و يا اسيب العربيه يا اجيب كساحه و اشيله و اسافر بيها .

لحد ما ربنا اكرمني مبهندس ابن حلال الله يكرمة و يجازيه عني كل خير قالي المشكلة في الجزء اللي بيتعرف علي مفتاح العربيه و ده الحرامي كان كسره شرخ بسيط فبوظه قالي هاشوفهوللك بره و نحاول نشغللك العربيه علشان انت مش من اسكندريه .

و عمل اتصالاته و لقاه بمتين جنيه وافقت فورا طلع بعربيته الخاصه و جابهولي و جه ركبه و حطينا فيه المقتاح و ببنسه دورنا العربيه قالي الجزء ده ماتسيبوش في العربيه ة اسال علي الحاجات دي بره بس الغالب مش هتلاقي طقم الكوالين فممكن تمشي بيه كده مؤقتا لحد ما يجي . و دراع النور و المساحات سليم . أنا بشكره جدا و بشكر توكيل كيا في اسكندريه مع العلم ان عربيتي خليجي

و سافرت بالعريبه و ركبتلها زجاج امامي يمين و هبدأ ادور علي الحاجه .

خدوا بالكوا من عربياتكوا أهو انا كنت في شارع زحمه و مليان عربيات و بنوك !!!!!!

بفضل الله اولا ثم الايموبلايزر ( مانع السرقه ) العربيه مادراتش من غير مفتاحها.




و السوأل الان هو ما ينفعش الكونتكت ده يصلح عند كهربائي شاطر و بعدي اشوف الفبره و هل ممكن تدلوني علي كهربائي شاطر بيشتغل في الحاجات دي لان طقم الكوالين ده بالفين و نص غير و قت انتظارة و طبعا انا اقلق اسافر او امش كتير بالعربيه بالمنظر اللي هي فيه ده .

شكرا طولت عليكوا بس انا عاوز احذركو و افيديكوا

الحمد لله رب العالمين اللي نجي العربيه

الحمد لله


سلام عليكم

[amr011111]

لحد ما ربنا اكرمني مبهندس ابن حلال الله يكرمة و يجازيه عني كل خير قالي المشكلة في الجزء اللي بيتعرف علي مفتاح العربيه و ده الحرامي كان كسره شرخ بسيط فبوظه قالي هاشوفهوللك بره و نحاول نشغللك العربيه علشان انت مش من اسكندريه .

الحمدلله ان ربنا سترها

بس سؤال هى فيها ايموبلايزر بس المهندس بيقول انه لولا ان الجزء اللى بيتعرف على مفتاح العربيه فيه شرخ بسيط
كانت دارت هل معنى كده ان حتى فى وجود الايموبلايزر فيه طريقه للسرقه
وبصراحه حرامى ابن كلب يعنى شايف قفل دركسيون وبرضه مش هامه
الواحد يعمل ايه

حاول بعد كده تشوف جراج فى اى حته تروحها

[angel83]

قدر الله وما شاء فعل والحمدلله بس اظن كده ان المكان اللي ركنت فيه ده مهجور شويه ومفيش عربيات ركنه فيه يامه (عشان كده عرفت تركن بسهوله ) وطبعا كله بتاع ربنا والحمد لله وربنا يسترها معانا ومعاك

[hesham_one]

الحمدلله ان ربنا سترها

بس سؤال هى فيها ايموبلايزر بس المهندس بيقول انه لولا ان الجزء اللى بيتعرف على مفتاح العربيه فيه شرخ بسيط
كانت دارت هل معنى كده ان حتى فى وجود الايموبلايزر فيه طريقه للسرقه
وبصراحه حرامى ابن كلب يعنى شايف قفل دركسيون وبرضه مش هامه
الواحد يعمل ايه

حاول بعد كده تشوف جراج فى اى حته تروحها

لا لا هو الحرامي و هو بيكسر الكونتكت عمل فيه شرخ بسيط فاحنا معرفناش ندورها من غير منا نجيب القطعه دي اللي انا شفته حتي و القطعه دي سليمه و راكبه العربيه ماتدورش من غير المفتاح ما يكون جواها
و السؤال دلوقتي
هل ممكن الحرامي يعدي الايموبلايز انا معرفش بصراحه بس الحمد لله الف مره و ربنا يعافيكوا و شكرا لاهتمام حضرتك.

[M I D O]

الحمد لله ان ربنا وقفلك ناس جدعة و الحمد لله ان الحرامي ماعرفش ياخد العربية بس غريبة انة سايب الكاسيت و الشنط امال كسر العربية ودخل يعمل اية ؟؟

[hesham_one]

قدر الله وما شاء فعل والحمدلله بس اظن كده ان المكان اللي ركنت فيه ده مهجور شويه ومفيش عربيات ركنه فيه يامه (عشان كده عرفت تركن بسهوله ) وطبعا كله بتاع ربنا والحمد لله وربنا يسترها معانا ومعاك

لا هو بالفعل كان فيه عربيات كتير و بعدي بس المكان ده كان فاضي و شكرا علي اهتمام حضرتك

[hesham_one]

الحمد لله ان ربنا وقفلك ناس جدعة و الحمد لله ان الحرامي ماعرفش ياخد العربية بس غريبة انة سايب الكاسيت و الشنط امال كسر العربية ودخل يعمل اية ؟؟

واضح انه حرامي نزهي كان عاوز ياخد العربيه كلها يا بلاش يا اما حد عدي و او قلق حصل فخلع وفي كل الاحوال الحمد لله حمدا كثيرا و ربنا يعافينا جميعا شكرا لحضرتك

[Ahmed_Adham]

الحمدلله ان ربنا سترها

بس سؤال هى فيها ايموبلايزر بس المهندس بيقول انه لولا ان الجزء اللى بيتعرف على مفتاح العربيه فيه شرخ بسيط
كانت دارت هل معنى كده ان حتى فى وجود الايموبلايزر فيه طريقه للسرقه
وبصراحه حرامى ابن كلب يعنى شايف قفل دركسيون وبرضه مش هامه
الواحد يعمل ايه

حاول بعد كده تشوف جراج فى اى حته تروحها

لا لا هو الحرامي و هو بيكسر الكونتكت عمل فيه شرخ بسيط فاحنا معرفناش ندورها من غير منا نجيب القطعه دي اللي انا شفته حتي و القطعه دي سليمه و راكبه العربيه ماتدورش من غير المفتاح ما يكون جواها
و السؤال دلوقتي
هل ممكن الحرامي يعدي الايموبلايز انا معرفش بصراحه بس الحمد لله الف مره و ربنا يعافيكوا و شكرا لاهتمام حضرتك.

لاء هيه العربيه مش هتدور فعلا بدون مفتاحها وده اللي حصل مع الحرامي الغشيم ده اللي ميعرفش العربيات اللي فيها ايموبلايزر من اللي مفيهاش عشان لو كان يعرف مكنش حاول معاها أصلا وكان وفر عليك البهدله والمصاريف دي.

المهندس كان يقصد ان الحرامي بوظ الوحده اللي بتتعرف على المفتاح فأصبح صاحب العربيه مش عارف يشغلها بمفتاحها الاصلي أصلا وبالتالي لما اتغيرت الوحده البايظه المفتاح الاصلي اشتغل.

[ahmedsamy90]

الحمد لله ان ربنا وقفلك ناس جدعة و الحمد لله ان الحرامي ماعرفش ياخد العربية بس غريبة انة سايب الكاسيت و الشنط امال كسر العربية ودخل يعمل اية ؟؟

+1111111111
واضح انو كان داخل على طمع وعايز العربية كلها ......... الحمد لله ربنا سترها

[Dr.M_baz]

الحمد لله انك بخير الباقي سهل ان شاء الله.

[hesham_one]

الحمد لله انك بخير الباقي سهل ان شاء الله.

شكرا لحضرتك

[hesham_one]

لاء هيه العربيه مش هتدور فعلا بدون مفتاحها وده اللي حصل مع الحرامي الغشيم ده اللي ميعرفش العربيات اللي فيها ايموبلايزر من اللي مفيهاش عشان لو كان يعرف مكنش حاول معاها أصلا وكان وفر عليك البهدله والمصاريف دي.

المهندس كان يقصد ان الحرامي بوظ الوحده اللي بتتعرف على المفتاح فأصبح صاحب العربيه مش عارف يشغلها بمفتاحها الاصلي أصلا وبالتالي لما اتغيرت الوحده البايظه المفتاح الاصلي اشتغل.

الله ينور علي حضرتك هو ده اللي كنت عاوز اقوله

[kareem_eg]

الحمد لله علي كل حال .. و كويس انك لقيت العربية :)

[hesham_one]

الحمد لله علي كل حال .. و كويس انك لقيت العربية :)

طبعا الحمد لله كتير اوي ده انا بتخيل لو لا قدر الله ملقيتهاش

ربنا يعافينا جميعا و شكرا لمشاركة حضرتك

[john55]

الحمد لله ربنا سترها معاك وحضرتك بخير اهم حاجه الواحد من كثره السرقات انا ركبت القطار ورحت بيه اسكندريه علشان اصيف علشان عربيتي مفهاش ايموبليزر دي نقطه مهمه الواحد المفروض كنت عرفتها قبل ما اشتري عربيتي 2012الحمد لله