المعاه فيرنا 1600 موديل 2009 و 2010 يتفضل يقول رايه فيها بصراحه

[ADELHASANALSHAAIRYN6]

موتور جبار تكييف تلاجه قطع غيار متوفره فرامل تسعفك داخل المدينه على السرعات العاديه عربيه عائليه عفشه ناعمه وشكلها محترم

واضيف ان السيارة دى ستبقى متربعة على القمة لسنوات

[zakiali]

عيبها الوحيد انها بقت شعبية

[HOSSAM99]

عربيه تستحق ثمنها

[engbesho]

العربية زى الفل فى الجرى و السحب بس تقفيل ردىء جداً

[ahmedsamir5edr]

توكل علي الله و ما تسمعش لكلام الناس كتيـــر ..
مفيش عربيه مفيهاش عيوب .. بس المشكله الشعب المصري عشان يخدمك و يعمل معاك واجب مبيقولكش غير علي العيوب

[ahmedmoneim]

عربية رائعه في سحبها و تكييفها فعلا بارد بشكل مرعب يا دوب بجيب سرعه 2 لأن اكتر من كدة هاخد برد
عفشتها ناعمة جدا و موتورها متميز عيبها الاساسي الفرامل ضعيفة جدا لو سائق مش متمرس او لسة جديدة بالنسبة له الفيرنا ممكن جدا يخبط في اي حد
انا اول ما جبتها بعد الاكسنت موديل 2000 لبست في مطب في 6 اكتوبر بسبب الفرامل مع السرعه
بس الحمد لله جت سليمة
لكن مع الوقت الفرامل مشكلتش ليا مشكلة كبيرة
عيب تاني مش مهم اوي هوة الكاسيت الغريب المرفق بيها Road star ال سي دي
لو بطلت العربية و هوة لسة شغال زي ما يكون بيهنج و لاازم اعملة ريسيت و يضيع كل قنوات الراديو المخزنة فية
و سألت في التوكيل قالولي روح رودستار و اسأل
و كذا زميل ليا عندة نفس المشكلة
لو ليها حل بدون تغيير الراديو يبقي يا ريت لو مكانش هاجيب سوني اكسبلود
بس خايف يكون دة من وصلة الراديو في العربية و بعد ما اجيب الراديو الجديد يحصل نفس المشكلة
هاتشل ساعتها

[hugan]

الفيرنا سياره مناسبه جدا
وعمليه للاستخدام الشخصي وصيانتها بسيطه وقطع غيار متوفره
لكن الاخوه اللي بيقولوا انها سياره عائليه
ازاي يعني

[Ramozz]

Ya gam3a 3rbaya saroooooooo5 mafesh 7ad by3raf ytl3 manak ana m3aya el 2010 t2loha 3an el 2odam bt2fel 3adadha fe wa2t kyasy ana gabt byha 200 fe tary2 el 3an el so5na el 3rbaya 3adaya gadan w sabta 3ashan el tary2 ndyf....3abha el wa7ed sagha 5afef zayy ay 3rbaya gadeda dlw2ty w el 3rbaya blnsba ls3rha momtaza

[Ashraf_Ibrahim]

الفيرنا
حبيبتي المدللة
معايا فيرنا موديل 2010 من شهر 5 اللي فات يعني تقريبا 7 شهور بالتمام والكمال
انا هقول رأيي فيها من خلال تجربتي بيها في خلال 7 شهور

الشكل:
شكل جيد يوحي بالشراسة وعدم التقليدية رغم ثبات شكلها وتصميمها على مر السنوات الاخيرة الا انه مقبول جدا بالنسبة لي

الموتور:
موتور قوي 1600 سي سي يجعلك على ثقة ويقين بأن تحت قدميك مارد يمكن أن تظهره في أي لحظة بضغطة دواسة البنزين فهو يمكنه الانطلاق من الثبات لسرعة 120 في زمن قياسي - انا محسبتهوش قبل كدة ولكنه زمن قليل جدا- ويمكنك من منازلة اي سيارة في نفس الفئة بجدارة الا ان عزم السيارة يتراجع مع السرعات العالية اي ما بعد 140 نجد ان العزم يضعف ويستهلك الموتور زمنا اكبر لزيادة السرعة ودا اعتقد انه شيء طبيعي نظرا لزيادة مقاومة الهوء بصورة كبيرة ولكن اداء الموتور على سيارة كورية ومصرية التقفيل شيء جيد جدا تحسد عليه

التكييف:
تكييف قوي وجيد جدا ولا يؤثر على سحب السيارة نظرا لقوة موتورها

الثبات:
ثبات السيارة جيد جدا لحد سرعة 110 كم بعد كدة بيسوء الثبات ولكن مش بيسوء بالدرجة اللي الناس بتحكي فيها لأني جايب عليها 170 كم والعربية كانت معقولة مش سيئة بالنسبة لجنوط 13 وكاوتش نسر مصري فالثبات بتاعها يعتبر كويس جدا على المواصفات دي

العفشة:
عفشة ناعمة وتعتبر ميزة وعيب في نفس الوقت هي ميزة في السرعات المنخفضة ولكنها تعتبر عيب في السرعات العالية

ارتفاع العربية:
ارتفاعها مناسب ومش واطية زي ما بيقولوا
وهي فاضية تاخد بيها اي مطب عادي جدا
لما تركب فيها حد -وليكن زي اسرتنا مثلا والدي ووالدتي وانا و3 اخواتي منهم 2 كبار كمان - باخد المطبات عادي باستقامة كمان ولكن بالراحة وعلى الاولاني واشهد ان العربية مبتخبطش في المطبات مش بقول انها مبتحكش لا مبتلمسش المطب اساسا فدا ان دل يدل على ان العربية مش زحافة زي الناس ما بتوصفها

الفرامل:
الفرامل لا انكر انها ضعيفة ولكنها فقط تحتاج تعود على الاستعمال ليس الا ويمكن التغلب على ضعف الفرامل بطريقة بسيطة جدا
لما تيجي تفرمل ما تدوسش دبرياج وبالتالي الفرملة الاوتوماتيكية للموتور هتعمل وممكن لو اضطررت في المواقف الصعبة انك تسقط غيار كمان
نيجي لأهم نقطة كيف تستعمل الفرامل الخاصة بالفيرنا بصورة سليمة لتعطيك اقصى اداء لها؟!
فرمل بشدة لكن متخليش الكاوتش يمسك في الارض لأن دا هيتسبب في تآكل الكاوتش بصورة غير منتظمة دا اولا ناهيك عن انه هيتسبب في ان العربية هتزحف معاك
ولكن اضغط فرامل بشدة وبأقصى ما يمكنك دون ان تجعل الكاوتش يمسك في الارض وبكدة تكون عملت عمل ال abs اللي مش موجود في الفيرنا المصري اساسا وزي ما اتفقنا متمورش ومتضغطش دبرياج غير لما سرعتك تنخفض لتصل 40 مثلا ساعتها ممكن تمور وتضغط دبرياج عادي جدا

اتمنى مكونش نسيت حاجة
لو فيه حاجة معينة حابين تعرفوها عنها قولولي
كل كلمة اتقالت هنا هي تجربة شخصية دون التأثر برأي اي فرد اطلاقا
هي سيارة جيدة واعتمادية ومناسبة للجميع من وجهة نظري بغض النظر عن فقر امكانياتها

[chpsy]

انا معايا فيرنا 2010

عيوبها : الفرامل تعتبر ضعيفة نسبيا ، بس على سرعة اقل من 140 يبقى تمام اوي معاك و هتشيلك ، انا شايف ان تكييفها ضعيف ( بس دي حالة خاصة لان كل الناس اللي معاهم فيرنا بيقولوا انه تكييف تلاجة) ، اخر حاجة التابلوة مش شيك نهائي للاسف

مميزاتها: سعرها كويس بالنسبة لامكانياتها ، عفشة ناعمة حرير ، موتور جبار ، العربية خفيفة ، تعتبر واسعة من جوه ، شنطة مساحتها حلوة ، منتشرة و صيانتها سهلة ، و كفاية ان الوكيل بتاعها محترم جدا جدا و عنده فنيين كويسين ..

اجمالا: السيارة بالنسبة للسوق المصري و للطريق المصري تعتبر ممتازة و تستاهل لقب سيارة رقم 1 في مصر

[elkomy82]

يا جماعة العربية عفشتها عملية جدا ولكن موش ناعمة خالص دية ناشفة شوية

[nonetta]

زوجي معاه فيرنا 2009
عربية عائلية ممتازة
مثالية في السفر
احنا بنجيب عربية يا جماعة علشان نقضي بيها مصالحنا مش علشان نجري ونسابق ونحارب بيها
انا شخصيا لما باكون راكبة معاه مش باخليه يزود عن 100 باكره السرعة جدا
بس لو زادت مش بنحس باي مشاكل
عفشتها رائعة فراملها ممتازة
تكييفها ممتاز غير طبعا وقت الحر الشديد والعربية واقفة في الشمس و كاملة العدد
الكاسيت مش بطال بس ساعات بيتجنن ويسكت لوحده بس بيرجع يشتغل تاني بردو لوحده
بنعمل لها صياناتها الدورية في التوكيل و مش مكلفة ولله الحمد
عيبها الوحيد ان صاجها خفيف مع ابسط خبطة بتعلم فيها
غير كدة باسم الله ماشاء الله لا قوة الا بالله العربية ممتازة
هيا مش فخامة ورفاهية زي عربيات كتير بس للي مش بتهمه المظاهر اوي
فوق الممتازة وانا بحبها جدا جدا ربنا يحميها ويخليها