ليه كل مااقول لواحد عايز فيرنا يقولي اوعي؟

[elmkaneeki]

الكلام اللي حضرتك سمعته الفتي المعتاد من الشعب المصري و العربيه معايا ثبات جيد لغايه 120 بعد كده بتبقي مرجيحه و الافضل تركيب جنط اسبور 15 و كاوتش عريض و هيخلي ثباتها جيد حتي 140 و بعد كده برضه هتبقي مرجيحه و فراملها غير جيده علي السرعات العاليه

ما انت بتقول نفس الكلام بردو:]:]....ولا قصدك على حوار الموتور

[Screenplays]

ما انت بتقول نفس الكلام بردو:]:]....ولا قصدك على حوار الموتور

الكلام عن الموتور فتي لان الموتور حمار شغل و اهي شغاله تاكسي زي الفل و العربيه فعلا متنفعش الشباب عشان خفيفه و الموتور كبير علي وزنها فده اللي مضيع الفرامل

[shaddadfalcon1]

هو حضرتك عايز تجرى بالعربية ليه على السرعات العالية دى؟؟؟هو الجرى بالعربية مهارة وشطارة زى ما ناس كتير فاكرة؟؟
فكر فى نفسك واسرتك وراعى ربنا فحياتك وفالنعمة اللى ادهالك وهى العربية
وربنا يوفقك للصح

الحمد لله براعي ربنا في كل شيء بعمله في حياتي
مش معني اني عايز اجيب عربيه سريعه اني دايما همشي مقفل عدادها والا كان اللي بيتشري ام 5 ولا فيراري يمشي بيها طاير طول النهار
انا بطبعي هادي ومش بحب اجري ولو جريت لازم ابقي لوحدي وعلي طريق نظيف ومستقيم ومش زحمه

انا عايز عربيه للأستخدام اليومي بس لما احب اجري بيها متقولش لا- يعني موقف زي اللي في الموضوع بتاع الأخ اللي اتثبت علي الصحراوي بعربيته ومعرفش يجري عشان عربيته علي قدها ياتري هو ساعتها مكنش يتمني ان عربيته تبقي طلقه ويدوس بنزين ويوفر علي نفسه الخساره والبهدله؟

اتمني تكون فهمت وجهة نظري واسف للخروج بره سياق الموضوع لان الموضوع اساسا سؤال علي الموتور والعربيه نفسها مش انا بحب اجري ولا لآ

[elmkaneeki]

الحمد لله براعي ربنا في كل شيء بعمله في حياتي
مش معني اني عايز اجيب عربيه سريعه اني دايما همشي مقفل عدادها والا كان اللي بيتشري ام 5 ولا فيراري يمشي بيها طاير طول النهار
انا بطبعي هادي ومش بحب اجري ولو جريت لازم ابقي لوحدي وعلي طريق نظيف ومستقيم ومش زحمه

انا عايز عربيه للأستخدام اليومي بس لما احب اجري بيها متقولش لا- يعني موقف زي اللي في الموضوع بتاع الأخ اللي اتثبت علي الصحراوي بعربيته ومعرفش يجري عشان عربيته علي قدها ياتري هو ساعتها مكنش يتمني ان عربيته تبقي طلقه ويدوس بنزين ويوفر علي نفسه الخساره والبهدله؟

اتمني تكون فهمت وجهة نظري واسف للخروج بره سياق الموضوع لان الموضوع اساسا سؤال علي الموتور والعربيه نفسها مش انا بحب اجري ولا لآ

مع الانتشار الرهيب للفيرنا فأكيد حوار الموتور ده هجص
وطبعا استنى اراء الناس اكتر واكتر

[easy2002]

العربية عاملة معايا 80 ألف كيلو من سنة 2006 ومشاءالله أكتر من زيت وفلاتر معملتش
غير مرة غيرت طنابير بسبب التيل مكنش أصلي المكنة محترمة فوق ما تتصور وزي ما الناس قالت ثباتها فعلا وحش وفراملها كذلك بس أنا مركبلها جنط 15وكويسة معايا لحد 160 وعلى حسب سواقتك

[maka]

هتدفع فلوس في فرق ميستهلش انا لو مكانك اما اغير و اجيب نوبيرا اما اعدل فرامل و اسقط مكنة لانوس ١٦٠٠

[Ashraf_Ibrahim]

انا جيت يا شباب
انا معايا فيرنا 2010 تحديدا من 5/2010 والنهاردة اهون 26/6/2011 يعني سنة وشهر تقريبا
في خلال الفترة دي انا عملت بالعربية تقريبا 26000 كم
بالنسبة للموتور كل الكلام اللي سمعته انه ضعيف وبيضرب بسرعة ومبيستحملش الشغل والكلام دا كل دا فتي السنين وملهوش اي اساس من الصحة اطلاقا
الموتور رائع وقوي جدا ومحدش يقدر يقول اي كلمة في حق مواتير هيونداي لأنها بصورة عامة كويسة جدا وموتور الفيرنا على الخصوص لا غبار عليه اطلاقا
آلات الجر في الفيرنا مش زي بتاعة جينيرال موتورز طبعا
يعني آلات جر دايو او شيفروليه أفضل من آلات جر هيونداي ودا شيء معروف
بالنسبة للثبات اللي بتتكلم عليه حضرتك والاخوة الكرام
العربية ثابتة وجيدة جدا لحد 110 كم لو انت لحدك ولحد 120 كم لو انت معاك ناس في العربية والمناورة بيها على السرعة دي ثابتة جدا
الفترة ما بين 110 و 130 هي دي المسافة اللي ملهاش حل في ثبات الفيرنا وتحس انك راكب ريشة فعلا
تستعيد العربية الثبات بشكل نسبي لما توصل ل 140
في الحقيقة حاولت افسر الحكاية دي بس مش لاقي ليها اي تفسير اطلاقا في مشكلة الثبات من 110 ل 140 !
ايا كان كل دي بتتحل بالجنوط والثبات بيكون افضل
العربية انا جايب بيها 180 والثبات معقول مش وحش واستمريت على السرعة دي فترة مش قليلة -زمنية- ولو الموتور كان فيه حاجة مكنش استمر ومكانش رجعني البيت اصلا
لو نويت تشتريها توكل على الله
صيانات دورية وزيت وفلاتر وبوجيهات ومش هتلاقيها تطلب منك اكتر من كدة
وبالتوفيق يا صديقي !

[memo823000]

عربية الشغل فيرنا مانيوال فول اوبشن غيرت موتور عند 260 الف بسبب كان بيتحطلها بنزين 80 فى بعض الاوقات
والموتور انا حضرت تسقيطه فى الحرفيين من حوالى شهرين تلاته ب بحوالى 3300 جنيه
وجاءت اللحظه الحاسمة عشان نجرب العربية وكان اللى جربها واحد صاحبى تانى كان متعود على العربيات الاوربى البيجو والجيتا ورجله تقيلة جدا جدا وغشيم جدا وطبعا طوله 192 سم والوزن حوالى 94 كيلو يعنى بسم الله ماشاء الله هجمه
وكنا 4 بالسواق (قدام الميكانيكى وصاحبى وورا انا ووصحبى اللى اساسا بيسوق العربية)

طبعا صاحبى طلع على الدائرى عشان يجرب وكان اول مرة يركب فيرنا
طبعا انا بقوله يامحمد اهدى العربية ولا ثبات ولا فرامل ولا امان ولا اى حاجه انا بتكلم على سواقته (يعنى لو مشى طبيعى مفيش اى مشكلة)
وهو بيقرص جامد جدا جدا وانا بصوت اقسم بالله زى مبحكى
اول حاجه كنا هندخل تحت نقل لانو كان طاير وضرب فرامل مفيش فرامل هو ذات نفسه اتخض
المهم جرى شويه وانا بصوت وبعدين راح راكن على الدائرى وركب صحبى التانى اللى العربية بتعتو ونزل وهو بيلعن فى الكورى كله وخلص الموضوع

انا بحكى تجربة

وانا شايف ان الفيرنا افضل من الانوس بس بشرط
تركيب جنط خفيف محترم مع كوتش 15/55/185 وتعديل فرامل وامشى بعقل
وهستفاد من قوة التكييف مع سحب الموتور 1600 ونعومية العفشة

لاكن اجرى بيها فلا انصح بيها ابدا
لو عايز تجرى يبقى هات لانسر مستعمل وريح دماغك بس معرفش سعرها مناسب بالنسبة ليك ولا لا

والله المستعان

[shaddadfalcon1]

شكرا لكل الأراء
ربنا يجعله في ميزان حسناتكم ان شاء الله

[HOSSAM99]

و عليكم السلام و رحمة الله
بالنسبه لموضوع الموتور و إنه بيبوظ و بيتعب إنسي الكلام ده نهائي و لو حضرتك حسيت ناحية كلام كل الأعضاء بشويه ثقه يبقي أبدأ علم علي اللي قال إن الموتور بيعمل مشاكل و أعرف إنه مضلل أو بيتكلم بدون علم أو سابق تجربه
نرجع للموتور :الموتور جيد جدا بدليل إنه علي الماتريكس و دي عربيه mpv يعني أثقل من الفيرنا و بتشيل حموله أكبر من الفيرنا و شغاله و الحمد لله عمري ما أشتكيت من موتورها و لا حسيت إنها كبيره علي الموتور و كذلك الإلنترا ال2005 أصحابها يتكلموا و كمان الكوبيه

أما الثبات و الفرامل و غيره ده كله ممكن يتعدل و بتكاليف بسيطه
مع إن مصطلح (الفيرنا مش ثابته) لي ملحوظه عليه و هي إن جزء كبير من الإحساس بعدم الثبات هو صوت الموتور ... صوت الموتور عالي شويه و ده شئ حسيته إن لما أبقي حارق بالعربيه دي علي الثاني و صوت الموتور يطلع و يعلي بحس إن العربيه ريشه في هوا
لكن لما بريح العربيه و تاخد الغيار الأكبر بتثبت (ثبات العربيه دي فيه عامل نفسي) بالإضافه للكاوتش و الجنط قليل الجوده و اللي مقاسه غير مناسب بالمره

لو عايز تغير اللانوس و تجيب فيرنا هاتحس بفرق في السحب و الوسع النسبي عن اللانوس
أما لو عايز شوية ترفيه ممكن تفكر في حاجه أفضل شويه

[ramyhekal]

ومالها الفيرنا
اللى يقولك اوعى قوله امال اكتر نسبة تاكسيات فيرنا ليه
اكتر عربيات بتتأجر فيرنا ليه
ايه واحد صنايعى فى الدنيا يعمل اى حاجه فيها ليه
ده معناه انها عربيه فاشله بردو ولا ناجحه

[Eng.Geo]

لو ماشي علي 140 باللانوس وجه ميكروباص رعشلك عشان توسعله هتوسعله عادي
لو ماشي علي 140 بفيرنا وجه ميكروباص ورعشلك هتزود سرعة بس مش هتعرف توسعله

الفيرنا عربية زي الفل لحد 120
فلو مشاكلك مع اللانوس فوق ال 140 يبقي ماتبصش للفيرنا كبديل

[shaddadfalcon1]

لو ماشي علي 140 باللانوس وجه ميكروباص رعشلك عشان توسعله هتوسعله عادي
لو ماشي علي 140 بفيرنا وجه ميكروباص ورعشلك هتزود سرعة بس مش هتعرف توسعله

الفيرنا عربية زي الفل لحد 120
فلو مشاكلك مع اللانوس فوق ال 140 يبقي ماتبصش للفيرنا كبديل

موضوع الثبات مش في دماغي قوي لاني واثق ان في حلول كتييره تظبطه
انا كل مشاكلي ان يكون في مشاكل في اعتمادية الميكانيكا او العفشه او الكهرباء

[Eng.Geo]

موضوع الثبات مش في دماغي قوي لاني واثق ان في حلول كتييره تظبطه
انا كل مشاكلي ان يكون في مشاكل في اعتمادية الميكانيكا او العفشه او الكهرباء

حلول الثبات مش سهلة
جنط 15/50/195 ... هيخليها كويسة لغاية 140 بس برضه مش اللي انت عايزه
بما انك مش محتاج ثبات وبتدور علي أعتماديتها
ميكانيكا .. انا معايا هيونداي برضه وأعرف ناس كتير معاها فيرنا .. زي الفل بس لو سخنت ودخلت في المنطقة الحمرا هتجيب وش سلندر علي طول .. مش عارف ليه مش زي العربيات التانية والجوان يبوظ وتجيب غيره !
تجربة في 3 عربيات
عفشة وكهربا كويسين جدا

[virus2007]

احب اضيف لراى الزملاء بما انى من راكبى الفيرنا وكانت معايا لمدة سنتين وشوية

مميزات:
1- عربية اعتمادية جدا واسعار قطع غيارها فى كل مكان
2- اى حد حيفهم فيها وحيقدر يصلحهالك
3- متور قوى
4- تكيف ممتاز
5- عفشة كويسة

عيوب:
1- العربية واطية شوية فبتحك فى المطبات
2- العربية خفيفة فلو انتا على سرعات عالية فوق ال 130 حتبقى مش مطمن شوية
3- العربية كويسة جدا لحد 120 وانصحك متعديش ال120 فى مصر اصلا لان الطرق سيئة جدا وعندنا اعلى نسبة حوادث سيارات فى العالم !! بس انا كنت ماشي بيها على 150 160 على طريق العين السخنة وكنت مطمن جدا لان الطريق دا تقريبا من احسن الطرق فى مصر
4- مفهاش وسائل امان


الخلاصة: مفيش حاجة اسمها متور بيبوز... دا اسموا اى كلام ... العربية ممتازة وتعتبر الافضل فى فئتها ... كعربية لاسرة صغيرة او لشاب ممتازة جدا ... ممتازة جوة البلد وعلى الطرق السريعة بس بحد سرعة معقول

لو حتنقل من لانوس لفيرنا يبقى مش حتحس بفرق كبير ... الافضل تنقل للفئة الى بعد كدة عشان تحس انك غيرت فعلا

انصحك جدا بالنترا او نيسان صنى او اوبترا


تحياتى ليك وقلنا عملت اية فى الاخر