ياريت الكل يتفضل بخصوص فيرنا 2011

[Screenplays]

تمام حضرتك بس انت شايف انها لازم تتعمل يعني علشان تزيد الامان ولو في حل تاني مثلا علشان يخلي الفرامل اقوى واحسن؟

الحل الوحيد لموضوع الثبات و الفرامل هو جنط اسبور و كاوتش محترم و الكلام ده انا عامله عندي و النتايج زي الفل

[ManUnited10]

Screenplays ماشي بس هي كلها هتكلف كام يعني جنوط وكاوتش محترم حتدخل في كام مثلا؟
ولو ما كنتش عايز اجنط عادي مش هيكون في مشاكل على الاقل الفترة دي علشان انا يادوب حوشت القرشين دول علشان اشتري العربية بقالي اكتر من سنه ومش عايز اخد حاجة اتندم عليها عايز حاجة ان شاء الله تكون معايا طول العمر

[Screenplays]

انا مش عارف الاسعار بصراحه لاني جنطت السنه اللي فاتت تقريبا عموما الميزانيه مش هتزيد عن 4000 جنيه مثلا و بعدين انا مشيت سنه علي الجنط و الكاوتش الفبريكه و الفرامل و الثبات زي الفل لحد 120 لما جنطت بقيت بوصل 160 و اي اسئله تانيه انا تحت امر حضرتك

[ManUnited10]

Screenplays انا مش عارف اشكرك ازاي ولله ده لو رحت معرض العربيات مش حيفيدني بـ الشكل ده
عندي كم سؤال ولو انا تقلت عليك بس معلش ولله اصل لسى اول عربيه ليا عايز اشتريها وفي 1000 سؤال في بالي وخايف شوية ومتردد في ناس تقولي هي عملية وكل حاجة بس عيوبها كتير وفي ناس تقولي اشتريها واتكل على الله وانا بين دا ودا حاير
ياريت بس توضحلي الفيرنا اوتوماتك تصليحها سهل لا سامح الله لو حصل حاجه في الفتيس؟ والفتيس بتاعها عملي وبيمشي كويس ولا في اعطال كتير اصل انا مش عايز اتعب نفسي في عربية مانيوال انت عارف الزحمه وكده ف قولت اخذلي عربية تريحني ان شاء الله
وبنسبة للثبات بتاعها وقدرة التحمل بتاعها من خلال تجربت حضرتك ايه رأيك فيها؟

[Screenplays]

لا شكر علي واجب يا فندم عموما مفيش مشاكل فنيه في الفتيس الاوتو بتاع الفيرنا و مسمعتش عن شكاوي معينه منه و الفتيس ده موجود في الماتريكس و الجيتز و ماشي زي الفل مفيش مشاكل بس تراعي صيانته الدوريه في مواعيدها و بعون الله كله هيبقي تمام و طبعا انا وضحت قبل كده مشاكل الفرامل و الثبات و قولت تتحل ازاي و هو في مشكله كده ملهاش علاقه بالعربيه اصلا الا و هي الكاسيت ال Road Star بصراحه نوعيته مش قد كده لا هو و لا السماعات و انا مشيت بيهم سنه و كانوا زي الفل بس بعد كده بدأوا يخرفوا يمكن لاني بستعمله كتير فاعمل حسابك علي CD Player محترم و طقم سماعات بايونيير مثلا بالنسبه لقدره التحميل فهي عربيه حماره شغل و كفايه كميه التاكسيات اللي شغاله و كله تمام و في حاجه اخيره اللي هي التقفيل طبعا حضرتك عارف انها بتتقفل هنا فممكن تلاقي صاموله مش متربطه كويسه او سلك محروق او فيوز ضارب او اي حاجه تافهه زي دي ممكن تقابلك فمتقلقش منها واي اسئله تانيه انا تحت امرك

[ManUnited10]

شكراً حضرتك من اكتر الناس الي عجبوني في المنتدى بـ اسلوبك الرائع وان شاء الله ربنا يجازيك بكل الخير يارب ولو عندي سؤال تاني انا حجيلك مباشرة ان شاء الله وانا جداً جداً متشكر ليك وتعبتك معايا
ورمضان كريم وكل سنه وحضرتك طيب

[Screenplays]

الله يخليك يا فندم و حضرتك طيب

[sharise]

بالنسبة لقطع غيار الفيرنا عارفين طبعا مشكلة طلمبات البنزين و ندرة و جودها بجودة عالية كورى طبعا بيقولو فى امريكى او صينى او كورى المهم انا حاولت اجد طلمبة بنزين كفائتها كويسة و جبت الكورى الى طلعت صينى تقريبا و 150ج بس لم تصمد طويلا و الاصلى طبعا بيغنو فيه ب 400 و 375 برة الوكيل و طبعا الضعف جوة التوكيل
بس انا وجدت بعد طول عناء طلمبة بنزين كورى اسمها الفا ب 210 من عند شركة الخطاب بس دى من عند واحد بيستوردها فى المنصورة بس جودتها عالية ممكن تبحثو عن الشركة فى الدليل عشان مش ينفع احط تليفون طبعا و شكرا

[ManUnited10]

sharise شكرا عزيزي على الرد والافادة وان شاء الله يجعلها الله في ميزان حسناتك

عندي سؤال اخر انا رحت لـ معرض عربيات قريب عليا اسمه اوتو ناصر بدوي هل حد سمع فيه قبل كدة؟
هل هو كويس والتعامل معاه كويس ؟ ولا يفضل اروح للتوكيل الاصلي وياريت حد يقولي فين التوكيل بتاع هونداى اي فرع قريب عليا انا ساكن في الهرم وشكرا

[fineart607]

فيرنا اوتوماتيك غاليه على الفاضى لو بتحب اللأتوماتيك عليك ب جين2 او سكالا او صنى او هيونداى ار بى اما الفيرنا راحت عليها خلاص

[ManUnited10]

fineart607 طب حضرتك ممكن تقولي لي راحت عليها؟ احنا هنا بنفيد ونستفيد ممكن تشرحلي ليه قولت كدة؟
انا بشتري على قد فلوسي واخري هيكون 78 الف يادوب يعني مش هقدر ادفع اكتر من كدة ومفيش عربية في السعر ده واوتوماتك محترم

[pido9]

انا مع سكرين بلاى فى كل كلامه

انا معايا فيرنا من مارس 2007 و دلوقتى عامله اكتر من 150 الف كيلو
و الحمد لله مافيش اى مشاكل كبيره

مميزاتها بالنسبة لى:
1- الاعتمادية: العربية وقفت منى مرة واحدة ( طرمبة بنزين ) بعد سنتين و غيرتها مرة واحدة
دى لوحدها اكبر ميزة انك تركب عربيتك فى اى وقت تدور و تمشى
2- الأداء: 1600 موتور قوى على البودى بتاع العربية بمعنى ان بعد اكتر من اربع سنين لسة بتجرى زى الوحش و تكييف قوى, صالون واسع, تابلوه و عددات شكلها كويس, أستهلاك بنزين معقول اوى
3- قطع الغيار: موجودة و رخيصة
4- عفشة ممتازة "انا مغيرتش ولا مسمار من الزيرو"

العيوب:
1- أكييد الفرامل مش تمام بس مش لدرجة انها مش هاتوقف يعنى بس ده بيعتمد على اسلوبك فى السواقة
2- الثبات فعلا على 120 وحش بس لو وصلت لل 140 تأكد انها هاتبقى أثبت بكتيير :))) انا بتكلم جد
3- الكراسى مش مريحه اطلاقا "اتصرف انت بقة" ممكن فرش ممكن مخدة انت حر
4- الموتور صوته عالى شوية

المهم زى اى عربية انك تعمل الصيانه الدوريه فى ميعادها علشان تحافظ على أدائها
انا جبتها و ما كنتش عاجبانى بصراحة بس فعلا حبيتها مع الوقت, عمرها ما قلت بأصلها معايا

[ashouhdy]

http://www.nilemotors.net/Nile/238153-15-195-50-2000-a.html

[Screenplays]

العضو الفاضل ManUnited10 انا بفضل تروح تجيبها من التوكيل مباشره عشان علي الاقل تجيب اللون اللي انت عايزه بالنسبه لطلمبه البنزين هي حتي الان شغاله زي الفل معايا و طول ما انت بتدور العربيه بطريقه صحيحه و طول ما التانك ميقلش عن النص الطلمبه هتفضل زي الفل بالنسبه لكلام العضو fineart607 هو بيقول كده عشان الفيرنا بقالها كتير في السوق و اخرها في الانتاج 2014 فعشان كده نقدر نقول راحت عليها و لكن عمر ما قيمتها ما هتقل ابدا بالعكس الحالات النضيفه هتتباع بالغالي بعد كده و شكرا العضو pido9

[neemmohamed]

استخير ربنا
فيه توكيل لهيونداى فى فيصل ... الطلبية ........... فى شارع التلاتين .... تدخل من على فيصل من شارع كفر طهرمس الى ميدان الساعة