شفاط الكربراتير

[amrelsaqqa]

معلش علي اللخطبة..
بص يا باشا..
العربية كانت بتقطع,,لما رحت للميكانيكي قاللي ان السبب ان الشفاط مقفول (قبل وبعد التسخين )علي طول وده بيكتم العربية وبيخليها تقطعو..اللي انا عارفه ان في العادي لما بتدوس بنزين الشفاط بيفتح(صح ؟؟؟)
انا بقي الشفاط مكانش بيفتح خالص بابه مقفول يعني ,,,الميكانيكي بقي ثبته علي انه يبقي مفتوح علي طول..
لما بدور الصبح العربية بتدور عادي وصوتها بيعلي كاني دايس بنزين والصوت بيرجع يقل لما تسخن
وكمان بقت بتسحب كويس والكتمة والتقطيعة اللي كانو فيها راحو وبقت تمام..
بس حاسس انها بتاكل بنزين سنة زيادة او سنتين...يا تري ده بسبب ان الشفاط مفتوح علي طول ؟؟؟

هو الاحسن تحاول تظبطه انه يقفل ويفتح لوحده وممكن تروح لواحد بتاع كربراتيرات يعمللك الموضوع ده مخصوص بس ما تخليهوش يفك لك الكربراتير ويلعب فيه مهما قاللك


بالنسبة لوضع الشفاط الحالى لازم يكون في فرق ولو بسيط في استهلاك البنزين عشان انت لغيت عمله
يعنى خليت السلانسيه يعلى وياخد نفس نسبة الهوا اللى المفروض ياخدها في الظروف العادية

( الجزء اللى جاى ده انا هحاول ابسطه على قد ما اقدر :d )


فكرة الشفاط اصلا انه بيخليك تعلى السلانسيه بس يخنق الهوا ، يعنى العربية تفتح الثروتل فتحة اكبر ( السخان كأنه دايس على دواسة البنزين سنة صغيرة ) وفي نفس الوقت الهوا اللى داخل مخنوق ، فالعربية تعلى و بنفس كمية البنزين ولكن النسبة بينه وبين الهوا هى اللى اختلفت

انما دلوقتى السلانسيه برضه بيعلى (السخان كأنه دايس على الدواسة) و لكن بنفس نسبة الهوا بدون خنق---> يبقى لازم الكربراتير هيشد بنزين زيادة عشان العربية تعلى وما تبطلش


اتمنى تكون الجزئية دى واضحة وطبعا التأثير ده اثناء التسخين بس لان في الظروف العادية الوضع الطبيعى ان الشفاط يبقى مفتوح

[Eldaw]

بجد متشكر جدا وشرحك وافي وبسيط ,,وفعلا حصل افادة كبيرة والله..