اتحطيت فى موقف بايخ جداا ومعرفتش اعمل ايه .....

[koshary]

امبارح كان فرح اخت واحد صاحبى المهم انا اتفقت مع واحد زميلى هيعدى عليا فى البيت على الساعه 10 وننزل نروح نقعد ساعه ونرجع المهم انا ساكن فى حدايق الاهرام والعمارة اللى قدامى فيها كوافير والعروسة كانت فيه والعريس من قطر المهم العريس معاه عربيه لاند كروزر جى بيها من قطر وكانو هيتزفو فيها اخو العروسة اللى هو صاحبى معاه عربية والدو شاهين وكان فيه عربيتين واحده اكسنت 98 والتانية 132 كانو جايين من الشرقية جم على الكوافير علطول انا طبعا واقف فى البلكونة وشايف صاحبى بالعربية الشاهين عمال يعمل دريفتات بيها ويلف ويروح وييجى والعربيتين التانيين واقفين قدام الكوافير ومستنيين العروسة .... والعريس قرايبو كلهم راحو على قاعة الفرح ومكانش عددهم كبير والفرح كان فى قاعة سوزر فى شارع الهرم .. المهم العريس يتصل بأبو العروسة يقولو العربيه مش راضية تمشى ومش عارف يعمل ايه المهم ابو العروسة قفل معاه وقالو هكلمك لقيت صاحبى بيبصلى ويقولى العربيتين اللى واقفين دول فيهم ناس من البلد ومش هينفع ننزلهم والعروسة عايزة عربية مكيفة علشان المكياج ميبوظش قالى تعالى نزفهم بعربيتك وليلة وهتعدى ومش هنلحق نجيب عربيه من حتة تانية قولتلو يابنى عربيتى موديل قديم والتكيف عاوز يتشحن قالى على ما العريس ييجى نشحنو عند واحد فى الرماية ونيجى بسرعه المهم انا معرفتش اتصرف ازاى ولا اتكلم وكأنى اخدت رصاصة ولبست ونزلت كانت 9.15 روحنا عند بتاع التكيفات 9.30 تقريبا كان بيشحن التكيف وصاحبى قاعد جوة العربيه بيزود بنزين وانا عمال بفك فى الشبكة من بره وبلمع فى العربيه بالفوطة الزفرة والمهم حاسبت بتاع التكيفات واخد 140 جنية كانت 9.45 بالظبط وانا عمال اخد الشوارع طيااااارة علشان نلحق وصلنا مكانش العريس وصل عند الكوافير روحت عند بتاع الورد وظبطلى العربيه ب 70 جنية وطلعنا وقفنا عند الكوافير طبعا صاحبى اخد العربيه وقالى هسوق انا قولتلو ماشى وقالى سوق انت الشاهين بوالدى ووالدتى قولتلو ماشى طبعا اخد العربيه قدام الكوافير والشارع واسع وقعد يخمس ويعمل حاجات مش لطيفة كدا ووالدى واقف فى البلكونة وبيتفرج على العربيه وهاين عليه ينزل يولع فيه وفى العربيه وساكت علشانى وعاوز الليلة تعدى والعريس جيه واخدناهم وطلعنا على القاعه وصلنا 11 الا تلت والفرح خلص ووصلناهم بيتهم فى المريوطية ومشينا تانى .... وكان يوم كابوس عليا مكنتش اتخيل انى ازف حد بعربيتى الاكسيل ونزلت الصبح رايح مشوار فى اكتوبر بشغل التكيف لقيت الفريون اتسرب ومبقاش بيسقع يادوب اشتغل فى الليلة واتسرب ... بس كان تلاجة ماشاء الله ...
المهم طبعا لحقت القط صورة للعربيه وهيا متزوقة وعليها استيكر نايل موتورز بس مش طالع فى الصورة وكان يوم كابوس بالنسبالى بس احلى حاجه انها كانت مفاجأه والمهم كانت فى ناس بتصور العربيه وهى بتخمس هبقا اخد منهم الفيديوهات بس مكنتش اتخيل ان عربيتى تطلع كل ده بس الواد صاحبى فنان بصراحه ..



معلش طولت عليكم بس قولت لازم احكى لاخواتى اللى حصل بس هى بركات كريم فوزى كنت بكلمو على الفيس وقالى ادخل اقرالك حاجه مكانش يعرف ان الليله هتحصل فيها كدا ههههههههه

[mahmoud_afifi]

عقبالك يا عم لما نفرح فيك :d

بس الي ضايقني مش انك زفتهم بالعربيه ولا شحنت التكييف ولا اي حاجه من دول بالعكس ده يثبت انك جدع انما الي ضايقني ان صاحبك بعد ما عملت فيه معروف يقوم يخمس بالعربيه بتاعتك ولا كأنها عربيته.

وبعدين ما تصلح التسريب الي في التكييف ده انت هتصلحه امتى !!!!!!!

[mshmshm3]

معلش هقول لحضرتك نصيحة انا دايما ماشي بيها و يمكن كلامي مايعجبش حضرتك في حاجات ما ينفعش تتسلف زي البيت و العربية ولا صاحبي ولا اخويا حتي بعد كدة لو مش عايز تسلف العربية ممكن بحجة بسيطة جدا ان العربية فيها اي جزء بايظ و مش هاتمشي

[S O P H O S]

ربنا يكرمك
ويجزيك خير ....

[M.Ayman]

بص هو الحمد لله ان الليله عديت على خير , بس بصراحه يعنى انا مبحبش حد يركب عربيتى ولما بتضطر ببقى قاعد بزبط عامل زى الست الوالده كده :) حاسب العربيه دى براحه على المطب وسع شويه يمينك يخرب بيتك :)))))) ,,,, المهم يعنى المفروض انه يستأذنك قبل ما يعمل كده و كمان افضل انه مكنش يلعب بيها خصوصا عشان اهلك يعنى ,,,, بس خير اهو عرفت ان العربيه حتى بتلعب حلو :) و عقبالك كده بقى ان شاء الله

[MARTINDALE]

حكايه انك سلفتهاله فانت راجل جدع وحكايه انه خمس بيها فهو راجل ندل الا لو كان استأذنك الاول .. عموما المواقف اللي زي دي بتخلي الواحد يعرف صاحبه سواء الجدع او الندل .

وبعيد عن كل ده ....... العين المصريه ضربت اللاند كروزر :)

[misoalex]

عقبالك يا عم لما نفرح فيك :d

بس الي ضايقني مش انك زفتهم بالعربيه ولا شحنت التكييف ولا اي حاجه من دول بالعكس ده يثبت انك جدع انما الي ضايقني ان صاحبك بعد ما عملت فيه معروف يقوم يخمس بالعربيه بتاعتك ولا كأنها عربيته.

+111111

[koshary]

هو مقليش حاجه فجأه لقيتو بيلعب بيها وبعدين قولتلو انت عملت كدا ليه قالى انا عارف انى جيت عليك بس دى ليلة اختى وانا كنت فرحان قولتلو ياعم ربنا يباركلها وانا اتكسفت ومعرفتش اقول ايه بعد كدا بصراحة يمكن علشان خبرتى قليلة فى المواقف اللى زى دى هو خلانى كدا اغير العجل قريب لان ال 4 فرد تعبانين عالاخر من ساعة ماجيبت العربيه وهما فيها ربنا يسامحو بس انا كانت نيتى خير

[mahmoud_afifi]

هو مقليش حاجه فجأه لقيتو بيلعب بيها وبعدين قولتلو انت عملت كدا ليه قالى انا عارف انى جيت عليك بس دى ليلة اختى وانا كنت فرحان قولتلو ياعم ربنا يباركلها وانا اتكسفت ومعرفتش اقول ايه بعد كدا بصراحة يمكن علشان خبرتى قليلة فى المواقف اللى زى دى هو خلانى كدا اغير العجل قريب لان ال 4 فرد تعبانين عالاخر من ساعة ماجيبت العربيه وهما فيها ربنا يسامحو بس انا كانت نيتى خير

رب ضرة نافعه. يلا روح غير الكاوتشات وجنط العربيه بقى :d

[waelfarid]

ماتزعلش علي اي خير تعمله
طبعا العربية تعمل اللي مايتعملش طالما مش بتاعة الواحد وفيه حجج ومبررات للي هيتعمل فيها
وحصلت معايا قبل كدة وانا حديث العهد بالسواقة قردة 1962 غرزت في حفر لمواسير وبرضه واحد جاري اتعافي عليها علشان يطلعهالي قلبي كان بيتقطع عليها

[shaddadfalcon1]

فكرتني بفرح بنت خالتي كنت رايح والعريس كان رخم مووت ومش بطيقه ولا هو ولا اهله وخالتي وجوزها كانو مظبطينه علي الأخر وجايبن الشقه وكل حاجه يعني جوازه علي الجاهز حتي العربيه قامت خالتي مسحوبه من لسانها وقالتلهم ابن خالتها عنده عربيه وهيزفها وانا رايح انا ومراتي لقيت شويه عيال اخرهم اعداد وثانوي عمالين يوقولي ياسطي انت اللي هتزف قلتلهم لا
وحاولت اتهرب كتيير وفي الأخر لبست الليله وانا عمري لازفيت ولا نيلت قمت واخد خالي معايا وكل شويه الاقي عيل جاي يقولي يازميلي اعملي كدا ومش عارف ايه وكنت مخنوق مووت من الكلمه دي

فجاه بعد ماجبت العريس والعروسه لقيتهم عايزين قال ايه ؟ يقعدو علي الشنطه والكبوت وانا اجري بقي وامرجحهم قمت مفرمل ومزعق ومرضتش امشي الا لما الكل نزل وساعتها محدش قرب من العربيه لحد ماوضلت وكنت ضارب الوش الخشب ختي للعربيس والعروسه والليل اخرتها كنت مروح وحكيت العربيه في شارع ضيق

[mshmshm3]

فكرتني بفرح بنت خالتي كنت رايح والعريس كان رخم مووت ومش بطيقه ولا هو ولا اهله وخالتي وجوزها كانو مظبطينه علي الأخر وجايبن الشقه وكل حاجه يعني جوازه علي الجاهز حتي العربيه قامت خالتي مسحوبه من لسانها وقالتلهم ابن خالتها عنده عربيه وهيزفها وانا رايح انا ومراتي لقيت شويه عيال اخرهم اعداد وثانوي عمالين يوقولي ياسطي انت اللي هتزف قلتلهم لا
وحاولت اتهرب كتيير وفي الأخر لبست الليله وانا عمري لازفيت ولا نيلت قمت واخد خالي معايا وكل شويه الاقي عيل جاي يقولي يازميلي اعملي كدا ومش عارف ايه وكنت مخنوق مووت من الكلمه دي

فجاه بعد ماجبت العريس والعروسه لقيتهم عايزين قال ايه ؟ يقعدو علي الشنطه والكبوت وانا اجري بقي وامرجحهم قمت مفرمل ومزعق ومرضتش امشي الا لما الكل نزل وساعتها محدش قرب من العربيه لحد ماوضلت وكنت ضارب الوش الخشب ختي للعربيس والعروسه والليل اخرتها كنت مروح وحكيت العربيه في شارع ضيق

لا كنت جريت و وقعتهم من علي العربية

[hossam_elwani]

متزعلش منى صاحبك ده معنهوش ريحة الدم ولا الذوق

بس مش انت لوحدك الى بتتحط فى المواقف دى ....

[me_medoo]

هههههههههههههههههه

حبيب قلبي يا كوشري ... ياجماعة أنتو سيبتو كل حاجة ومسيكتوا ان الواد خمس بالعربية ، أنا عاوز أعرف ال 140 جنية تمن شحن الفريون وال 70 جنية بتاع زينة الورد والبانزين الي اتحرق دول كمان حسابهم عند مين ...

وبعدين يا كوشري ... كل حاجة أقدر أصدقها بس أن تويوتا لاند كروزر تعطل ... دي أكيد هنجت من البانزين المصري الي عندنا بس لا يمكن تعطل دي ياباشا ههههههههههه ( أكيد الواد كان بيتلكك علشان ياخود عربيتك ) ... حبيب قلبي يا كوشري الحمدالله أني مسيف نمرتك عندي علشان لو أتزنقت في زفة ولا حاجة ... المهم عاوزك ترجع للراجل بتاع التكيف وتقلوا ايه ده ياعم الفريون السكة الي ملتهولي ... الفريون طار ... وخليه يكشفلك على دورة التبريد وأنشاء الله ممكن تلاقي البلف أو حتت مسورة صغيرة محتاجة تغير ... وطول عمرك جدع ياكشري . وصاحب صاحبك ... يا غالي .

@@@@@@@

[SAMEH_FOUAD]

انا لو منك ياكشرى والله ماكنت اديلة العربية , عايز يزف اختة انا اقوم بالواجب وازفهملة احسن زفة وكل دة من غير ماابوظ العربية ولا اهرى الكاوتش وكمان مش هيزعل

وبعدين والله والدك دة فعلا محترم جدا زيك ياكشرى انة مانزلش ظبط صاحبك دة

وبعدين زى مابيقول me-medo مين اللى دفع حق الزينة والفريون ( مصيبة لا تكون انت كمان ) تبقى كملت

كاوتش - وفريون - وزينة - وتيل فرامل