محرك هيونداي أكسنت من افضل 10 محركات بالعالم (مناقشات)

[Samir Elshahawy]

الأخوة الكرام

نظرا للمناقشات المتعددة و المتنوعة التي أثرت في محتوي الموضوع و أخرجته عن مساره فقد رأينا نقل بعض هذه المشاركات أو بمعني أدق المناقشات الساخنة و التي قد تكون مفيدة و ذلك حتي يظل الموضوع الأصلي محتفظا بمساره و محتواه

المناقشات تم نقلها الي هذا الموضوع مع أغلاقه حرصا منا علي الحفاظ علي مساهمات الاعضاء

أليكم رابط الموضوع الأصلي الذي دار حوله النقاش و الذي دخل في مسار خاطئ :

http://www.nilemotors.net/Nile/300447-10.html

[Mohamed.Ramah]

دة الاكيد بيحصل فى الاقسام التانية : )
---
ازاى يطلع البتاعة دة البيسموة موتور فى هيونداى المركز الثامن !!

ازاى يحصل ترتيب ويجو فى البداية بعد الالمانى ازاى حد يفهمنى وازاى بعديهم مازدا وانفنتى



من امتى هما بيفهمو اصلا غير فى الاوبشن والشكل وبس مواتير اية الطلعولى بيها من وقت الالنترا الجديدة ووكلين دماغنا مواضيع ومقارنات وبقو يتجرؤ ويقارنوها بالالمانى كمان

منسق قسم هيونداى ومساعد المنسق يخرج و منسقين اقسام اليابانى والالمانى يفضلو

[Samir Elshahawy]

مش مهم ...
أحنا اللي يهمنا قسمنا و العربيات اللي فيه
استراتيجيتنا أننا نقدم موضوعات لشرح امكانيات و مزايا سيارات هيونداي و تعريف الاعضاء بهيونداي و حل مشكلاتهم مع السيارات و الوكيل و مراكز الخدمة

ليس من الوارد أن ننشغل بالرد علي هجوم البعض او المعاملة بالمثل و الانشغال عن قسمنا بالتفرغ للنيل من الموضوعات بالاقسام الاخري

من الاخر خلي اللي يقول يقول .... فهيونداي تتقدم و بخطي سريعة يشهد بها الجميع حتي المنافسين و لابد أن يكون قسم هيونداي بنايل موتورزعلي قدر هذا التقدم و الارتقاء لشركة هيونداي

[BUNSH]

هيضرب علينا نـــــــــــــــــــــــــــــــــــــار دلوقتى !!
وشكراااا على موضوع :)

[devil_storm]

هيونداى من نجاح الى نجاح رغم انف الحـــــــاقددددددـــــــن
احنا و هما يا حرام

[ahmad--ezzat]

مش مهم ...
أحنا اللي يهمنا قسمنا و العربيات اللي فيه
استراتيجيتنا أننا نقدم موضوعات لشرح امكانيات و مزايا سيارات هيونداي و تعريف الاعضاء بهيونداي و حل مشكلاتهم مع السيارات و الوكيل و مراكز الخدمة

ليس من الوارد أن ننشغل بالرد علي هجوم البعض او المعاملة بالمثل و الانشغال عن قسمنا بالتفرغ للنيل من الموضوعات بالاقسام الاخري

من الاخر خلي اللي يقول يقول .... فهيونداي تتقدم و بخطي سريعة يشهد بها الجميع حتي المنافسين و لابد أن يكون قسم هيونداي بنايل موتورزعلي قدر هذا التقدم و الارتقاء لشركة هيونداي

[lanos2004]

الخبر دة كان عاوز يتنشر فى السر
استر يارب
حد يقلى فين محرك السيفيك الاسطورى

[mody3on]

الخبر دة كان عاوز يتنشر فى السر
استر يارب
حد يقلى فين محرك السيفيك الاسطورى

اكيد مخدوش بالهم من ال sir اللي بتعدي البورشة والفيراري
حبيبي يا سمسم :))

[TFSI]

الجوايز للسيارات فى السوق الأمريكى ومن مجلة سيارات زى أخبار السيارات ولا يوجد لها أى صفة رسمية ومالهاش دعوة بأى جوايز عالمية

Ward's 10 Best Engines is an annual list of the ten "best" automobile engines available in the U.S. market, that are selected by Ward's AutoWorld magazine. The list was started in 1994, and has been drawn every year since then.

عايزين تعرفو المواتير والجوايز العالمية لكل سعة من المحركات إتفضلوا

International Engine of the Year Awards 2012

والغريبة إنى مش لاقى اى شركة كورى الا فى محركات 3 سلندر اقل من 1000CC

يا دوبك نيسان ومازدا عن إستحياء

أرجوا من السيد منسق قسم هيونداى تحرى الدقة فى نقل الأخبار من مواقع ليست لها صفة العالمية وانما مجرد مجلة سيارات

[i_Am_Legend]

ماحدش يحاول يقنعنا....الهيونداي مهما كانت...عربية خغيييييييغة وغير امنة بالمرة...

[SAMEH_FOUAD]

اكيد مخدوش بالهم من ال sir اللي بتعدي البورشة والفيراري
حبيبي يا سمسم :))

انا عايز اعرف حاجة الفيديو اللى انتوا جايبينة اثبت كلامى , العربية خفيفة جدا فرامها وحشة ودة تجربة حية وعملية

والله العظيم اللى يجيب العربية دية اوعى يعدى بيها 130 والله فى التراوة وخفيفة مووووووووووووت ,دية عايزة استعمال حريمى وواحدة قلبها ضعيف كماااااااان

السيارة دية لما قعدتوا تقولوا جامدة ولما اتجربت طلعت تعبانة , نفس الكلام اتعمل مع الالنترا وبردة طلعت كدة بس على افضل شوية

وشكرا على الفيديو ماشاء الله عربية بالوزن دة وماتورها 138 حصان وبتجيب من صفر الى 100 فى 10.3 ثانية دة اسمة استهبال

[Samir Elshahawy]

انا عايز اعرف حاجة الفيديو اللى انتوا جايبينة اثبت كلامى , العربية خفيفة جدا فرامها وحشة ودة تجربة حية وعملية

والله العظيم اللى يجيب العربية دية اوعى يعدى بيها 130 والله فى التراوة وخفيفة مووووووووووووت ,دية عايزة استعمال حريمى وواحدة قلبها ضعيف كماااااااان

السيارة دية لما قعدتوا تقولوا جامدة ولما اتجربت طلعت تعبانة , نفس الكلام اتعمل مع الالنترا وبردة طلعت كدة بس على افضل شوية

وشكرا على الفيديو ماشاء الله عربية بالوزن دة وماتورها 138 حصان وبتجيب من صفر الى 100 فى 10.3 ثانية دة اسمة استهبال

أحنا مش بنتكلم علي الفيديو
الفيديو ده مجرد أختبار قيادة عادي بيستعرض العربية

لكن الموضوع الاساسي بيتكلم عن المحرك نفسه و التكنولوجيا المستخدمة فيه
و علي فكرة فيه موضوع تاني بيتكلم عن ان هوندا (رائدة المحركات بالعالم) لم تنتج محركا مماثلا و عن تفوق هيونداي الواضح علي هوندا هذه المرة و مش بس كده , لأ ده أحتمال هوندا تأخد محركات هيونداي في سياراتها بعد كده

فعلا فيه جاب كبيييييير بين الكوريين و الأوروبيين و اليابانيين
جاب سرعة مذهلة بيتقدم بيها الكوريون للصدارة بينما بيتباطأ الاخرون
ههههههههههههه

[SAMEH_FOUAD]

ياجماعة ماتفرحوش اوى كدة اكيد دخلوا المحرك دة عشان استهلاكة للبنزين ليس اكثر يعنى

[Samir Elshahawy]

ياجماعة ماتفرحوش اوى كدة اكيد دخلوا المحرك دة عشان استهلاكة للبنزين ليس اكثر يعنى

ههههههههههههههههههه
و مالوا كله دلوقتي بيسعي لتوفير استهلاك البنزين , تنكر ؟

[SAMEH_FOUAD]

و علي فكرة فيه موضوع تاني بيتكلم عن ان هوندا (رائدة المحركات بالعالم) لم تنتج محركا مماثلا و عن تفوق هيونداي الواضح علي هوندا هذه المرة و مش بس كده , لأ ده أحتمال هوندا تأخد محركات هيونداي في سياراتها بعد كده

هوندا معملتش محركات مماثلة ( دية نكتة الموسم ) ياباشا انت اكتر محركات فى العالم بتتدار من محركات هوندا ( طائرات - سيارات - بواخر - يخوت - دراجات نارية - سيارات رياضية - رالى ) فين هيونداى ياباشا من كل دول

هوندا اللى صنعت اقوى محركات العالم فئة ال b16 محركات بقوة 175- 185 حصان من محرك 1600 سى سى يحتفظ بقوتة حتى الان كاملة , وكل دة بدون تيربو او حقن مباشر للوقود ولكن بنظام ال vtec اللى لو هيونداى قعدت عمرها كلة مش هتعرف تعمل صوت الماتور دة مش قوتة

معلش محرك السيتى ال1500 سى سى بيخرج قوة 118 حصان اقوى محرك 1500 سى سى بدون شواحن

محرك ال1600 سى سى بيخرج قوة 123 حصان من سنة 2007 فى حين ان ساعتها كانت هيونداى النترا بتخرج قوة 121 حصان والسيراتو 124 حصان والاتنين بيتبهدلوا رايح جاى

دلوقتى السيفيك لسة بنفس المحرك , والالنترا طورت المحرك وزودتة 9 حصان بس حد يقولى ال9 حصان دول راحوا فين انا مش حاسس بأى تغير الصراحة ( نفس التسارع - يمكن كمان التوب سبيد للجيل القديم اعلى منة )

هية دية محركات هيونداى اللى هوندا هتاخد منها , ياباشا دية هوندا نازلة بمحرك هيمسح بكرامة الهيونداى الارض , ومش معنى ان الظروف خلت الكوريين يفوقوا شوية معناة كدة انهم خلاص انتصروا , معلش ياباشا الهوندا راجعة بقوة والدليل على كدة ان محدش كان يقدر يجيب سيرة السيفيك موديل 2010 لكن لما نزلت السيفيك بنفس الاوبشن مع التطور اللى حصل بدأ الكورى يظهر معنى كدة ان الهوندا عقبة قدام الكورى

انتظرو السيفيك بالتعديل الجديد ماتستعجلوش كلة يفرح بالسنة دية شوية بعربيتة لحد مالسيفيك تنزل بالتعديلات الجديدة وساعتها كل واحد هيعرف مقامة وهترجع تانى السيفيك بعبع الهيونداى بس المرة دية مش لوحدها لأ السوبارو راجعة بقوة واللانسر الجديدة راجعة بقوة وساعتها هيونداى هيبقى لاحول لها ولا قوة , ولما عملت كل ماعندها هتفقد كثرة المبيعات لان محدش هيشتريها وتمنها يجيب سيفيك او سوبارو او لانسر او جيتا