قدر الله وما شاء فعل

[Kareem Fawzy]

السلام عليكم ورحمة الله وبركاتة


طبعاً كعادة الشعب المصرى في منه ناس بتفكر برجلها
امبارح كنا قاعدين قاعدة ظريفة فى كافيتيريا المضيفة فى مساكن شيراتون انا واعضاء نايل موتورز الاعزاء
وانا مروح من عند وليد عادل بليل الساعة 2 تقريباً
ماشى فى صلاح سالم وكنت بجرى الصراحة
وانا عند الداخلة بتاعت نادى الحرس الجمهورى كدة الاقى خير اللهم اجعله خير عربية النترا نفس شكل بتاعتى
بيدينى اشارة يمين ومن غير ما يبص فى مرايته راح رامى عليه بغشومية فظيعه
انا طبعاً قعدت اهدى اهدى اهدى مكبستش فرامل علشان متزحفش
وفى الاخر دخلت معاه الدخلة وهو زى الغشيم بردو مش يهدى علشان اخرج منه لا مكمل زى ما هو
لاقيت نفسى خلاص هخيش فيه روحت رامى على الرصيف هديت سرعتى شوية ولطشت فيه فى الاخر كدة
الخساير عربيته ما فيهاش اى حاجة غير خربوش تقريباً

انا بقا عربيتى زى ما انتم شايفيين





الحمدلله نزلت وحمدت ربنا على اللى حصل وقولت الحمدلله انى كويس
وقدر الله وما شاء فعل

الخساير
رفرف مكبوس واكصدام متكسر وفوج ودانه اتكسرت والموديول بتاع الزينون وقع على الارض

مش عارف لية مزعقتش فى الراجل ولا اتخانقت
بيقولى انا مديك اشارة قولتله هو حضرتك تدى اشارة وتروح داخل فى اختراع اسمه مرايات الاول يا حج
قالى طيب عايز اية يعنى قولتله اتوكل على الله

نزلت النهاردة صلحتها رديتها على البارد الحمدلله
والفوج لصمته كدة والاكصدام بردو اتلصم بمسامير شك
طبعاً هى العمليه مش مستحملة اى غرامة اليومين دول بس الحمدلله اتلمت يعنى

ودى الصور بعد التصليح






الحمدلله انها اتلمت اى نعم شكل العربية عار بس الحمدلله انها جت على قد كدة
المهم فى الموضوع انى اتشائمت من العربية ونويت ابيعها اية رأيكم يا جماعة!!

[koshary]

قدر الله وماشاء فعل كويس انها بتيجى فى الصاج ياكريم وبعدين لو العربيه مش مريحاك بيعها اهم حاجة تكون مرتاح فى العربية اللى انت راكبها وبس وسيبك من كلام اى حد تانى وحمد الله على سلامتك

[bassem.naguib]

ألف حمد لله على سلامتك ودي أهم حاجة .. وأي حاجة تانية اللي يجي في الريش بقشيش .

[BassamHafez]

الحمد لله على سلامتك يا كريم

معلش في ناس كده الواحد لسانه ما بيلاقيش كلام ينفع يتقال لهم

ربنا يعوض عليك بالخير ان شاء الله

بس بطل جري شويه

[Magoda]

ألف سلامة عليييييك يا كيمو

لأ خلى العربيه معاك .. العربيه لما بتتخبط مرة مبتتخبطش تانى

أسأل مجرب .. ولا تسألش دكتور

[Mohab.Nabil]

الحمد لله يا باشا انها جت على قد كده

و فعلا الناس دلوقتى بقت تسوق بطريقة غبية جدا

و انا برضه فى الاوتوستراد عند المنصة تاكسى عمل كده برضه بس من غير اشارة بس الحمد لله الـ abs انقذنى

نفسى الناس فى مصر تحس ان سواقتها الغلط ديه ممكن تتسبب فى ضياع اسرة لأنك متضمنش اللى انت بتعمل معاه كده دا مستواه فى السواقة قد ايه و ممكن فعلا بسبب غلطة ملهاش لزمة تتسبب فى ضياع انسان تانى ملوش اى ذنب غير انه كان ماشى جنبك فى الطريق

و عندى حل مش عارف يبقى نظامه ايه ممكن تفكر تعمل الاكصدام كاربون اسود هيغطى على الخبطات ديه و لو اتعمل نضيف بيبقى شكله جميل

[a7medsh3rawi]

العيب مش في العربيه المشكله ان الناس ما بقتش تفرق بين الغلط والصح وبتسوق وخلاص من غير تفكير وميعرفوش ان اول حاجه بيشوفها في المرور ( القيادة فن وذوق واخلاق )
زى اللى حصل النهارده وانا ماشى في الشارع والاقى واحد بيضرب فرامل مفاجئ في عرض الطريق وناسى كل الناس اللى وراه كل دا علشان ملحقش الشارع اللى عايز يدخل فيه وكان وراه موتوسيكل راكب عليه اتنين بنى ادمين زينا وجنبه عربيه على اليمين برضو والله فيها بنى ادمين زينا والاتنين خبطوه من ورا بكل برود بص عليهم وما نزلش من العربيه وراح مكمل طريقه عادى جدا واكن الناس دى ملهاش قيمه عنده.

[A.Adel]

ربنا يعوض عليك :(

على فكرة دايما الناس دي عمرها متخبط :)
تلاقيه يعمل المصيبة و يطلع منها زي الشعرة من العجينة :)
و يمشي عادي خالص ولا في دماغه

[mahmoud_afifi]

الف سلاااااامه عليك يا كوكو والحمدلله انها جت على قد كده.
دي قرصة ودن عشان تبطل تجري خاصة بعد كلام ناس كتير ان سواقتك وحشه ومتهور :@:@:@

بالنسبه لبيع العربيه بقى بعد العشره دي كلها يا كريم تبيعها بالسهوله دي ؟ :@

[Samir Elshahawy]

حمدا لله علي سلامتك يا كيمو و فداك 100 اكصطدام و زينون و فوج لايت , نجيب لك زيهم في عيد ميلادك الجاي أن شاء الله

المهم ..
بعد كده لما تتحط في موقف زي ده تاني لاقدر الله ماتحدفش علي الرصيف لأنه ممكن لاقدر الله لو سرعتك عالية يسبب مشكلة أكبر , أنا عندي أدخل في البني أدم اللي بيرمي نفسه عليا ده و لا أني أدخل في الرصيف علشان ابهدل له عربيته و أحسره عليها زي ما بهدل لي عربيتي

للاسف هيا بقت حرب شوارع مش قيادة و فن و ذوق و أخلاق
ربنا يستر طريقنا كلنا و يرحمنا برحمته من الاغبياء دول

[khalid_adel]

حمدا لله علي سلامتك يا كيمو و فداك 100 اكصطدام و زينون و فوج لايت , نجيب لك زيهم في عيد ميلادك الجاي أن شاء الله

المهم ..
بعد كده لما تتحط في موقف زي ده تاني لاقدر الله ماتحدفش علي الرصيف لأنه ممكن لاقدر الله لو سرعتك عالية يسبب مشكلة أكبر , أنا عندي أدخل في البني أدم اللي بيرمي نفسه عليا ده و لا أني أدخل في الرصيف علشان ابهدل له عربيته و أحسره عليها زي ما بهدل لي عربيتي

للاسف هيا بقت حرب شوارع مش قيادة و فن و ذوق و أخلاق
ربنا يستر طريقنا كلنا و يرحمنا برحمته من الاغبياء دول

انا نفسي اعمل اللي بتقول عليه ده ومش عاااااااااارف
لسه كنت ماشي علي الدائري علي 120 تقريبا وفي الشمال فجاءه عربيه لقيتها جايه من اليمين وغرز وقال داخل عليا داخله
رد فعلي الطبيعي اني كسرت معاه شمال فجاءه وبعنف خلاني كنت حدخل في الاسمنت فلميت تاني بسرعه العربيه كانت حتعوم وروحي اتسحبت معاها
طب دلوقتي حته الحمار ده كان ممكن يقلبني وهو كده كده عداني وولا كان حيقف حتي يشوفني انه سببلي كارثه (لولا ستر ربنا)
وبعد الموقف ده ماخلص انا كان نفسي اثبت زي مانا وهو اللي كان حيتخبط في طرف عربيته في رفرفي من قدام يعني هو اللي كان حيتقلب لو لمسني الحمار لكن باللي انا عملته ده كان ممكن انا اللي اروح فيها
اعمل ايه في رد فعلي التلقائي ده مش عارف في تمارين تخليني اغير من نفسي كده ؟؟؟؟؟؟؟ ردو عليا بالله عليكو

[zangry]

الحمدلله انها جات على قد كده !! والف سلامة وفدااك

احنا نزلنا من فوق الدائري الشهر اللى فات بالتيدا بسبب حمار معاه ماتريكس حدف علينا ووالدى كسر شمال وهدى طبعا العربية عامت احلى عومان وكنا 120 تقريبا خبطت في الحاجز وردت تانى خبطت في عربية جامبو من ورا وقمنا داخلين في الحاجز بوشنا ونازلين تحت :d

[zangry]

الحمدلله انها جات على قد كده !! والف سلامة وفدااك

احنا نزلنا من فوق الدائري الشهر اللى فات بالتيدا بسبب حمار معاه ماتريكس حدف علينا ووالدى كسر شمال وهدى طبعا العربية عامت احلى عومان وكنا 120 تقريبا خبطت في الحاجز وردت تانى خبطت في عربية جامبو من ورا وقمنا داخلين في الحاجز بوشنا ونازلين تحت :d

طبعا العربية الله يرحمها

[M.Ayman]

ربنا يعوض عليك :(

على فكرة دايما الناس دي عمرها متخبط :)
تلاقيه يعمل المصيبة و يطلع منها زي الشعرة من العجينة :)
و يمشي عادي خالص ولا في دماغه

+11111111111
والله فعلا كل النوعيه الغبيه دى بتعمل مصيبه ترزع عربيتين تلاته فى بعض ,,, تطلعك على الرصيف تجيب العفشه مثلا ,,,, و هما ولا ال .... يطلعوا مفيهمش حاجه و يجروا و يسيبوا الباقى ياكل فى بعضه ,,,, نفس اشوف الناس دى عشان اردلها جمايلها

[A.Adel]

طب دلوقتي حته الحمار ده كان ممكن يقلبني وهو كده كده عداني وولا كان حيقف حتي يشوفني انه سببلي كارثه (لولا ستر ربنا)
وبعد الموقف ده ماخلص انا كان نفسي اثبت زي مانا وهو اللي كان حيتخبط في طرف عربيته في رفرفي من قدام يعني هو اللي كان حيتقلب لو لمسني الحمار لكن باللي انا عملته ده كان ممكن انا اللي اروح فيها
اعمل ايه في رد فعلي التلقائي ده مش عارف في تمارين تخليني اغير من نفسي كده ؟؟؟؟؟؟؟ ردو عليا بالله عليكم

ده اللي بقول عليه , عمره مايقف يشوف غلطه
و دايما سبحان الله تلاقيه بيطلع منها سليم

بس هيروح من ربنا فين؟؟
أكيد بتتردله بعد كده