مساعدة علي وجه السرعة

[ahmed_magdy_shaaban]

يا جماعة أنا ناوي إن شاء الله أشتري سوناتا 2008 أوتوماتك 2400 سي سي.
عاوز أعرف كل حاجة عنها.الكماليات/القوة/الجودة.مقارنة بينها وبين الأوكتافيا والفيكترا.هي أفضل ولا إيه؟؟؟؟ أرجو الرد سريعاااااا

[theking2690]

اكتر واحد يفيدك فى الموضوع ده استاذ som3aa استنى رده لأنه معاه واحده اخت اللى حضرتك بتتكلم عليها

[Ahmed Anwer]

ده موضوع عنها ،،

http://www.nilemotors.net/Nile/showthread.php?t=18005

[ahmed_magdy_shaaban]

يا جماعة أنا شوفت التوبيك اللي عن العربية.توبيك حلو لكن مفيهوش طلبي.أنا عاوز أعرف الكماليات والقوة و كده.يعني مواصفتها كلها.أرجوكم عشان المفروض أخد القرار بكرة بإذن الله

[som3aa]

اولا الف مبروك عليك
العربية 2400cc و 161 او 162 حصان مش متاكد بالظبط لان غبور بيقول 161 و بره مكتوب 162 , العربية بتنزل فئة واحدة بس تمنها 185000 و اعتقد لو جبتها من موزع هتاخدها ارخص كتير دا لو لقيتها عند موزعين.
الoptions
multifunction steering wheel
ABS + EBD
فرش جلد
تابلوه ابانوس
كرسى السواق كهرباء
mp3+usb
جنط 16
تكييف automatic قوى جدا فوق الوصف
parking sensors
2 airbags بس
Trip computer

من مميزات العربية انها قوية جدا جدا و دا بتحسه بوضوح جدا لما تدوس بنزين غير العربيات ال1600cc طبعا , العربية واسعة جدا من جوه بشكل مش طبيعى .
عليها ضمان 3 سنين او 100000 كيلو.
قطع غيارها غالية جدا , انا عامل بيها 31500 كيلو (واحد و تلاتين الف و نص مش 3500) و كل اللى غيرته تيل الفرامل الامامى و الخلفى , التيل الامامى ب 1000 جنيه بالضريبة و التركيب و الخلفى ب 650 برده بالضريبة و التركيب.
العربية بتستهلك بنزين جامد (مكتوب حوالى 560كم كل لما املى العربية على الاخر) بس اعتقد بتعمل اقل من كدا , الرقم دا بيبقى تقريبى.
التيل الامامى و الخلفى كانوا متوفرين فى التوكيل مش بعت جابهم و دا يطمن من ناحية توافر قطع الغيار , برده ممكن تكلمهم على 35390760 و تسال على اى قطعة غيار انت عايزها و تعرف تمنها.

من ناحية المقارنة بالفكترا و الاوكتافيا.
القوة:فرق رهيب جدا جدا فى القوة و سحب العربية و دا طبيعى لان الفرق حوالى 57 حصان فاكييد من ناحية القوة مفيش كلام السوناتا تكتسح.
الكماليات: بالنسبة للسعر كماليات السوناتا اعلى بكتير من الاتنين لان فيها حاجات مش بتنزل الا فى الفئات العالية منهم و الفرق بيبقى اكتر بكتير (الكلام دا بالمقارنة للكماليات بالنسبة للسعر) يعنى مثلا لو اشتريت الفكترا او الاوكتافيا فى حدود 220 الف هتبقى الكماليات اكتر بكتير اوى فيهم.
الجودة : ال3 كويسين اوى اوى بس بالنسبة للتقفيل الداخلى بس فهو افضل فى الفكترا و الاوكتافيا , يعنى مثلا ممكن تلاقى حاجات مش متثبته كويس فى السوناتا من جوه بس بيركبهالك فى الصيانة او بتعمل صوت مثلا من جوه بيثبتوها فى التوكيل , صحيح بتبقى حاجات بسيطة اوى بس برده تبقى عارف ان التقفيل الداخلى مش اوى يعنى علشان انت عارف طبعا ضمير العامل المصرى بس دى طبعا تختلف من عربية لعربية.
العربية بقالها معايا سنة و شوية و الصراحة معملتش و لا مشكلة و اى حاجة الحمد لله و ممتازة و انا مقتنع جدا بيها و لو كنت هشترى تانى كنت اشتريتها هى مش الاوكتافيا و لا الجيتا و لا الفكترا.
بالنسبة لسعر اعادة البيع اعتقد هيكون ضعيف بسبب الضريبة الجديدة , فاعتقد هيكون كويس اوى اوى فى ال2000cc علشان معلهاش 2% و العربية انتشرت فى الشوارع بسرعة رهيبة اما ال2400cc سعر اعادة البيع هيبقى وحش علشان الضريبة بتاعت الترخيص.

من ناحية الميكانيكا و كدا العربية ممتازة و واخدة جوايز و كلام كدا فاطمن جدا جدا.
فى رايى تابلوه الاوكتافيا و الفكترا احلى من تابلوهها سنة و حتى الفرش الجلد اشيك عنها بس كoverall هى احسن بكتير اوى اوى.
الكلام اللى قلته دا كله عن تجربة و هى عربيتى , انصحك برده تسال شخص او 2 من ملاك العربية علشان تتاكد فعلا انها ممتازة و تطمن ان مفيش مشاكل من ناحية التقفيل المصرى لان تجربة واحدة بس مش كفاية علشان تفيدك فى الموضوع دا.
برده فى رايى شكلا هى احلى بكتير من الوكتافيا و الفكترا و دا طبعا اذواق
فى رايى اعمل استخارة و توكل على الله و انزل اشتريها بعد السؤال طبعا.
و طبعا لو فى اى استفسار تانى انا موجود علطول

[ahmed_magdy_shaaban]

متشكر جدا يا أستاذنا.أنا حجزت سوناتا 2400 خليجي وإن شاء الله هستلمها بعد 10 أيام.

[Ahmed Anwer]

متشكر جدا يا أستاذنا.أنا حجزت سوناتا 2400 خليجي وإن شاء الله هستلمها بعد 10 أيام.

خليجي !!!!

دي حاجة ممتازة انها تكون موجودة خليجي ،،

يا تري هتكون بتابلوه السوناتا الجديد ولا بالتابلوه القديم بتاع مصر

و سعرها كام ؟؟ اعتقد سعرها هيكون معدي لأنها مستوردة بالكامل و موتور اكتر من 1600

ربنا يباركلك فيها يا رب

[ahmed_magdy_shaaban]

العربية سعرها 230000 بس طبعا أنا جيبتها قسط.الشكل الخارجي مفيش فرق.الداخلي فارق كتير وده علي كلام المعرض اللي حاجز عنده لأني مشوفتهاش طبعا.بس وراني صورة ليها

[theking2690]

الف مبروك يا باشا

[som3aa]

اولا الف الف مبروك
ثانيا الجديدة احلى بكتير اوى اوى اوى , من جوه عربية تانية خالص!!!!
فعلا الشكل الخارجى مفيش اى فرق بالمرة اما الداخلى فرق السما من الارض
و امكانيتها هتبقى اعلى بكتير اوى لان غبور بيشيل حاجات كتير من العربية لما يجمعها.
اساسا الجديدة اقوى موتورها 2400cc و 175 حصان و مفروض بره مصر بينزل فيها ESP كstandard و فيها امكانيات تانية كتير بس الفكرة ان السعر دا قليل اوى عليها , انا مش مصدق انها ب 230000 بس
ليه؟ لان اقل فئة فيها فى امريكا ب 18300$ و دا بالمصرى 98820 و بعد الضرايب و الجمارك 285000 جنيه و دى اقل فئة خالص , اما الفئة الشبيهة للى بتنزل مصر اللى فيها الكماليات اللى انا قلتها (التكييف التاتش و الجلد و الابانوس و الكرسى الكهرباء و الحاجات دى ) تمنها فى امريكا 24150$ و بعد الضرايب و الجمارك 376232 جنيه مصرى.
حضرتك يا ريت تتاكد من السعر و كل حاجة و يا ريت تبعتلى رقم المعرض اللى بيستوردها و انا اساله و استفسرلك على كل حاجة و ارد عليك.
عموما لو عايز كل امكانيات الفئة اللى بتنزل بره مصر ممكن اوضحهالك كلها بس اعرف اى فئة بالظبط

[som3aa]

معلش انا لسه سائل فى توكيل هيونداى فى الامارات لقيت التالى:
سوناتا 2009 ,
هى دى اللى الراجل هيستوردهالك
Sonata – Face Lift (Type 12) 2009 model is available in 2.4L engine capacity 4-cylinder with 171 hp, automatic transmission, power steering, power windows, central locking, power mirrors, single airbag, CD player with mp3, audio controls on steering wheels and fog lights for AED 59,900

59900=87454 جنيه مصرى
بعد اضافة الجمارك حوالى من 240-252 الف جنيه مصرى
دا سعر اقل فئة عندهم
دا سعر العربية فى الامارات
اما الفئة العالية
Face Lift FOP (Type 14) 2009 model is available in 2.4L engine capacity 4-cylinder with 171 hp, automatic transmission, power steering, power windows, central locking, power mirrors, dual airbags, ABS, keyless entry, rear parking sensors, 17” alloy wheels, leather seats, sunroof, cruise control, CD player with mp3, audio controls on steering wheels and fog lights for AED 75,900
, الفئة اللى بتنزل مصر بنفس الكماليات ماعدا فتحة القف تمنها عندهم 320000 جنيه مصرى
على فكرة الاسعار فى الخليج ارخص بكتير من الاسعار فى امريكا علشان كماليات العربية اقل بكتير اوى من امريكا
يعنى فى امريكا بتنزل ب 6 airbags و ESP (نظام الثبات الالكترونى) و sensors بالهبل يعنى لو حطيت ايدك قدام الشباك و هو بيقفل يوقف و لو محدش راكب جنب السواق الairbag اللى جنب السواق بتطفى اوتماتيكى و امكانيات تانية كتير و بيكتبوا فى امريكا انها 175 حصان مش 171 .
الامكانيات الخليجى فى اعلى فئة هى اللى غبور بيجمعها فى مصر.

[som3aa]

معلش هو حضرتك قصدك 2009 صح؟
لان الجديدة مبتنزلش 2008