الwd40 بصراحة عمل معايا اللي معملوش معايا جوز خالتي :)

[KamalShawqi]

ازيكوا يا شباب

انا قولت أجرب انضف العربية (النترا 2011) بعمنا الدبليو دي 40 ونشوف كده ايه موضوع الخدوش اللي بيشلها دي.

ودي كانت النتيجة، أسيبكم مع الصور:

دي خدوش في الجمب قبل وبعد عمك wd40:









دي بقي حاجة في الاكصدام الامامي ما تشالتش بأي غسيل مع اني بفتري في غسيلها:



وبعد الدبليو دي:



ودي حاجة كده في الاطصدام ورا:



وبعد مالدبليو دي عمل معايا الجلاشة:



ودي حاجة كانت معكنناني في الاكصادم اللي ورا:



وبعد:



ايه رأيكوا؟

[Samir Elshahawy]

[adelghanem]

ﻧﺘﻴﺠﻪﺟﻤﻴﻠﻪ
ﺑﺲ ﺍﻟﻂﺮﻳﻘﻪ ﺍﺯﺍﻯ
ﻳﻌﻨﻰ ﻏﺴﻠﺖ ﺍﻟﻌﺮﺑﻴﻪ ﺍﻟﺎﻭﻝ
ﻭﺑﻌﺪﻳﻦ ﺭﺷﻴﺖ
ﻭﺑﻌﺪﻳﻦ ﺩﻋﻜﺘﻪ ﻭﻟﺎ ﻟﺎ ﻭﺳﺒﺘﻪ ﺑﻌﺪ ﻛﺪﻩ ﺍﺩ ﺍﻳﻪ
ﺍﺭﺟﻮﺍ ﺍﻟﺘﻔﺎﺻﻴﻞ
ﻭﺷﻜﺮﺍ

[د.محمود صلاح]

مش ده مزيل الصدأ ؟

هو عمل كده ازاي ؟

[KamalShawqi]

أستاذ عادل ود/ محمود

انا رحت المغسلة اللي جمب البنزينة اللي قدام مسجد الحصري في ٦ أكتوبر وغسلتها الغسلة التمام (ب٤٠ جنيه وكانوا عاوزين ٢٠ جنيه بقشيش!! آه والله زمبؤلك كده))، ورغم الصابون والغسيل مافيش حاجة طلعت من الحاجات اللي في العربية

قولت ما بدهاش، ونزلت جبت الدبليو دي بعد ماتأكدت من النت انه ما بيأثرش على الدهان، وجبت الاسفنجة (اللي فيها سطح خشن) بتاعت غسيل الاطباق (بجنيه من أي سوبر ماركت) ونزلت دعك في الخدوش دي ودي كانت النتيجة وغيرها كتير بس ما صورتهاش لأن الدبليو دي زيت ايدي على الاخر وماعرفتش أمسك الموبايل (كان فيها عيل ابن حلال خدلي العربية بمسمار من أولها لآخرها والدبليو دي شال تلات تربع الخدش!!)

بس أنا لاحظت حاجة، طبعا مش منطق ان الاسبراي ده يشيل الخدوش عن طريق سدها بطبقة من لون العربية أيا كلنت ، انما لاحظت انه بيشيل الخدوش عن طريق تنضيف ماداخل الخدش، اللي داخل الخدش ده ممكن يكون لون من العربية اللي حكت فيك، او من الجدار اللي حكيت فيه، انما لو ايدك عليها شحم ومشيت على الخدوش بعد ما اتنضفت هاتلاقيها رجعت تاني، الفكرة كلها ان دواخل الخدش كانت نضيفة وانت وسختها تاني، بس ده ما يرجعش من مشيك العادي في الشارع لأن الدبليو دي عامل طبقة جميلة على العربية، محتاجه واحد بصابعه المتشحم يمشي بيه تاني على الخدش

بالنسبة لدكتور محمود وبتقول انه مزيل للصدا، هو فعلا اتعمل بغرض طرد الماء بعد ٤٠ محاولة:
WD40 means Water Displacement the 40th Attempts
وانت عارف ان الماية سبب الصدا الاساسي، بس اكتشفوا بعد كده ام تطبيقاته كتير جداااا (وده مش غريب. على حاجة معمولة أصلا من الطبيعة (زيت السمك)

المهم ان الواحد اطمن انه مالوش تأثير على الدهان، وبصراحه عملي لامعة وطبقة احسن ١٠٠ مرة من الواكس كته واكسه توكسه :)

[Hunting_Eagle]

معلش انا مش فاهم

هو ده بينظف ولا بيشيل الخدوش ؟ لاني عندي خدش بعرض الشنطة لونه ابيض و العربية سوداء

ينفع معاه ؟؟

[KamalShawqi]

معلش انا مش فاهم

هو ده بينظف ولا بيشيل الخدوش ؟ لاني عندي خدش بعرض الشنطة لونه ابيض و العربية سوداء

ينفع معاه ؟؟

هو ما ينفعش يشيل الخدوش (مزيل صدا هايشيل الخدوش ازاي، لو قولتلك كده المفروض تكدبني)، انا لاحظت انه بينضف بس ، ممكن تعتبره نص العمى ولا العمى كله، يعني اسيب عربيتي كده اللي رايح واللي جاي فاكرني ما بعرفش اسوق ومخبطها للصبح وانا شاريها اصلا كده، ولا اخليها زي ما باين في الصور؟ اكيد اخليها زي الصور

بخصوص مشكلتك، لو اللون الابيض ده جاي من ان عربية بيضا مثلا حكت فيك وده لونها او جدار وده لونه، يبقي هايشيله غالبا

انما المشكلة ان اللون الابيض ده يكون هو اللي تحت الدهان عندنك (معجون مثلا او حتى لو الصاح نفسه) يبقي الدبليو دي هايقولك آسف ما قدرش

عن تجربتي، امشي بضافرك على الخدش، شوف الخدش عبارة عن جرح كبير لجوا بحيث يكون وصل للصاح ولا لأة، لو وصل يبقي معتقدش ها ينفع

ودي تجربتي وياريت حد يقولنا حاجة جديدة ونستفيد كلنا

[KamalShawqi]

يعني ممكن نقول بالبلدي كده: الخدوش السطحية اللي ما اخترقتش طبقة الدهان او منظر الخدش اللي نتيجة ان حاجة من عربية تانية او جدار جاي على عربيتك، الدبليو دي هايشيله إن شاء الله

لو الخدش خدش طبقة الدهان كلها، يبقي الدبليو دي مش هايعمل حاجة لانه مش هايسحر دهان، هو يا ينضف بطانة الخدش السطحي او يشيلك الجزء اللي لزق في عربيتك من عربية تانية او جدار

لو ايدك متشحمة ومشيت على الخدش السطحي المتنضف هاتلاقيه ظهر تاني، انما لو كان دهان العربية التانية او الحيطة يبقي مش هايتأثر لانها خلاص اتشالت من على العربية ومكانها رجع فابريكة تاني

ودي تحربة شخصية :)

[Ashraf_Ibrahim]

هو فعلا بيشيل الحكات البسيطة اللي موصلتش للصاج نفسه
طب خد دي بقا :]
ايه رايك انه بينضف الزجاج كويس جدا وبيخليه بيلمع ورائع جدا :]

[adelghanem]

ﻛﻤﺎﻥ ﺑﻴﻠﻤﻊ ﺍﻟﺎﺯﺍﺯ
ﺩﺍ wd40 ﺍﺳﻤﻪ ﻛﺪﻩ
ﻋﻠﺸﺎﻥ ﺍﻟﻤﺼﺮﻳﻴﻦ ﻟﻘﻮﻟﻮﺍ 40 ﺍﺳﺘﺨﺪﺍﻡ,.....
ﺑﻜﺮﻩ ﺣﺠﺮﺑﻪ ﻋﻠﻰ ﺍﻟﻂﺎﺳﺎﺕ ﻳﻤﻜﻦ ﻳﻨﻔﻊ ﻫﻬﻬﻬﻪ

[Mohamedarazak]

يا باشا متكررش الموضوع دا تانى انا من سنتين كان عندى على كبوت العربية شخبطة بمفتاح. وسمعت الموضوع بتاع الاسبراى (wd 40) و رشيت على الكبوت و فرحت قوى من النتيجة دا غير اللمعة. بعد اسبوع لقيت لون الكبوت اتغير رشيت wd 40 تانى لمع و بعد كام يوم بعد لما نشف لقيت لونة اتغير خالص وبقى عامل زى الدهان اللى عدا علية ١٠٠ سنة (من كتر البهتان ) وعشان العربية كانت فابريكة ما قدرتش ارشها .

[KamalShawqi]

هو فعلا بيشيل الحكات البسيطة اللي موصلتش للصاج نفسه
طب خد دي بقا :]
ايه رايك انه بينضف الزجاج كويس جدا وبيخليه بيلمع ورائع جدا :]

استنى بقي عندككك
بيبمع الازازا ازاي، اوعى تقولي بيعمل زي طبقة الواكس عليها ويخلي التراب يتزحلق من على الازاز؟؟؟


انا جربت الواكس على البوودي، وما شاء الله التراب بيطير من السرعة رغم ان المعادي منوراني بكتير التراب اللي بييجي على العربية من الجراشات او لو ركنتها في الشارع

مشكلتي بقي في الازاز، التراب بيلزززق فيه وكل يوم الصبح لازم امسح الازاز من التراب وبعدين بسائل هايبر وان بتاع الازاز بعدين امسحه بالمساحة زي بتاعت البنزينة دي، وبصراحة بقيت بنزل بدري ٥ او ١٠ دقايق عشان الموضوع ده

انا قريت لعضو هنا قال انه جربه على الازاز وندم وخدله يومين يشيل اثره من على الازاز، احترمت تجربته وقولت بلاش اجرب في الازاز، انما تسلم يا باشا هاتبقي دي تجربة الوييك اند ده إن شاء الله :)

[KamalShawqi]

يا باشا متكررش الموضوع دا تانى انا من سنتين كان عندى على كبوت العربية شخبطة بمفتاح. وسمعت الموضوع بتاع الاسبراى (wd 40) و رشيت على الكبوت و فرحت قوى من النتيجة دا غير اللمعة. بعد اسبوع لقيت لون الكبوت اتغير رشيت wd 40 تانى لمع و بعد كام يوم بعد لما نشف لقيت لونة اتغير خالص وبقى عامل زى الدهان اللى عدا علية ١٠٠ سنة (من كتر البهتان ) وعشان العربية كانت فابريكة ما قدرتش ارشها .

تجربتك تحترم، انا لما عملت الخدش الطويل اللي في الباب اللي جمب السواق وقعد ادعك فيه وفرحت بنضافته، تاني يوم لاقيت فيه فرق في اللون بين المنطقة اللي دعكتها والمنطقة اللي حواليه

قولت يا وجعاااا مرابرااابة، انما لاقيت ان انا لما مسحت الباب كله بفوطة مزفرة (زفرتها بالدبليو دي) لاقيت الدنيا رجعت لوز تاني

فتجربتي البسيطة بتقول ان تمسح الحاجة كلها بالدبليو دي، الكبوت كله، الباب كله، انا بس عشان كنت بجرب وخايف برضه على الدهان


ووالنبي يا جماعة الموضوع ده الناس لو هاتعمله تعمله على مسؤلينها الشخصية عشان محدش بس يشيلني ذنبه لو حصل لدهانها حاجة، اعمل بايلوت تيست على الاكصدام مثلا قبل ما تعمم التجربة :)

[KamalShawqi]

ﻛﻤﺎﻥ ﺑﻴﻠﻤﻊ ﺍﻟﺎﺯﺍﺯ
ﺩﺍ wd40 ﺍﺳﻤﻪ ﻛﺪﻩ
ﻋﻠﺸﺎﻥ ﺍﻟﻤﺼﺮﻳﻴﻦ ﻟﻘﻮﻟﻮﺍ 40 ﺍﺳﺘﺨﺪﺍﻡ,.....
ﺑﻜﺮﻩ ﺣﺠﺮﺑﻪ ﻋﻠﻰ ﺍﻟﻂﺎﺳﺎﺕ ﻳﻤﻜﻦ ﻳﻨﻔﻊ ﻫﻬﻬﻬﻪ

ما تلحقني بالطريقة يا باشا ينوبك ثواب

يعني امسح الازاز بعدين احميه بسائل ازاز وبالمساحة بتاعت الازاز وبعدين انزل بالدبليو دي

ولا ايه الخطوات، عشان موضوع التراب على الازاز معكنني شوية :)

[A.Saad]

انت من اكتوبر ؟