أشتريت Accent RB و الاستلام بعد شهر .. عندي شويه استفسارات

[Mohamed.Yousri]

السلام عليكم جميعا

النهارده رحت غبور فرع قليوب دفعت تمن Accent RB أول فئه أتوماتيك بـ123500 بدل من 126000 علشان خصم الـ2500 جنيه و الخصم ساري لحد آخر الشهر

طبعا العربيه مش موجوده و حاليا الدفعه الجديدة في المنطقة الحرة و هتخرج في خلال اسبوعين بس انا مهيأ نفسي ان مش هستلم قبل شهر مثلا ...

عندي شويه استفسارات اتمني اني الاقي اجابه عليها

1 - شركة التأمين ؟؟!! أأمن علي العربيه مع انهي شركة تأمين , غبور نفسهم عندهم تأمين بـ4% سنويا شامل كل حاجه و جوه القاهره اي حادثة لا قدر الله بيبعت الونش ياخدها و لحد 10000 جنيه بدون محضر و طبعا بما انه التوكيل ف مش مطالب اني ادفع اي مبالغ ,, طبعا ده كلام البائع في الفرع الله اعلي و اعلم مدي صحته ايه .

2 - الجنوط : هل تنصحوني بتجنيط العربيه اول ما استلمها و ارخصها ؟؟! و ايه هي الحاجات اللي المفروض اراعيها في الجنوط عند شراؤها و فين احسن مكان اجيب منه الجنوط تكون كويسه سعرا و شكلا و كل حاجه ,,, لو حد يقدر يفيدني تقريبا هدفع قد ايه اكون شاكر جدا

3 - فوانيس الشبورة : سألته علي فوانيس الشبوره و قاللي انهم هيعملوا في حدود 1500 جنيه بيركبوهم في قسم الهياكل بتاعهم و لو ركبتها جوه التوكيل ف طبعا مفيش مشكله في الضمان لأن محدش لعب في كهرباء العربية

4 - العربيه بييجي معاها استبن , شنطه العدة , مفتاحين ... يا تري في حاجه تاني ابص عليها ؟!

5 - عايز اعمل فرش للعربيه علشان ما ابهدلش الفرش بتاعها ,, هل في مكان معين تنصحوا بيه ؟ هل في خامه معينه بتستحمل و اعتماديه تنصحوني بيها ؟؟ التكلفه تكون في حدود كام تقريبا ؟!

6 - العربيه كوري بالكامل و مفيش اي حاجه فيها نهائي خالص مصري

7 - الالوان المتوافرة منها في الدفعه الجديدة اللي جاية : فضي ابيض اسود فيراني احمر/نبيتي + لون عجيب جديد كده ما اعتقدش انهم هيبيعوا منه عربيه واحده حتي زي اللي في الصوره كده ,, مفيش اللون السماوي/اللبني الفاتح



شكرا جزيلا و في انتظار مساعدتكم و جزاكم الله كل خير ....

[mshmshm3]

2 - الجنوط هاتخرج العفشة من الضمان المقاس يفضل المقاس الموصي به في كتالوج العربية
لو مصمم تجنط حاول يكون رقم ال et في الجنط الجديد يكون مقارب او نفس رقم et جنط الفابريقة انا لو مكانك خلي الجنوط شوية كدة مش لازم دلوقتي لو مصمم بردو احسن انواع الجنوط طبعا الأيطالي و ده صعب شوية تلاقيه ولو لاقيته بيبقي غالي
بعديه الأندونيسي و التايلاندي ابعد تماما عن الصيني
3 - فوانيس الشبورة لو ركبتها في التوكيل الكهربا هاتخرج برة الضمان علي الرغم من انك مركبها عندهم و دافع اضعاف سعرها (لو عايز فوانيس شبورة اطلبها تيجي بفوانيس شبورة من بلدها )
4 - اريال الراديو
وبص علي كل حاجة في العربية و جرب الكلاكس و الانوار و المساحات و فتح الشنطة و بص علي الدهان كويس لو في حتة حاسسها مش تمام بص حواليها و ركز عشان في عربيات كتير اوي بتبقي زيرو و مخبوطة و مرشوشة زي واقعة الكيا سبورتاج و الالنترا
فرش العربية في جينز كار محل محترم جدا انا ما اتعاملتش معاه بس في اعضاء كتير هنا اتعاملو معاه و صاحبه اسمه الحاج احمد مشعل
اهم حاجة قوله انك من نايل موتورز
في حاجة كمان هاتريحك اوي اعمل ارضية العربية جلد هاتسهل عليك التنضيف
بالنسبة للألوان لو هشتري هاختار اللون البرونزي
و مبروك عليك العربية و ربنا يديلك خيرها و يكفيك شرها
بس ليا عندك طلب ماتعرفش فيها ايموبلايزر ولا لا ؟؟؟؟؟؟

[mshmshm3]

الفئة الاعلي بكام

[mazeen]

1500 جنيه لفوانيس الشبوره غلطان
فى فئه شفتها امبارح فى غبور فتحة سقف - فوجات -طاره مالتى 127000 جنيه وابقى جنط بعد كده براحتك
انا شايف ان الفئه دى افضل من اللى حضرتك حجزتها

[Mohamed.Yousri]

انا حجزت اللون الفضي ,, شفت البرونزي قدامي كانت عندهم داخله تعمل صيانة ما عجبتنيش اوي علي الرغم من ان اللون كان عاجبني في الصور ,, الفيراني لقيته غامق اوي و مطفي مع ان ده اللون اللي كنت رايح احجزة اصلا بس برضه شفته قدامي ما عجبنيش ,, توكلت علي الله و حجزت الفضي

بصراحه ماجاش في مخي اني اشوف الفئه الاعلي و معنديش اهتمام اوي بالتارة المالتي و فتحة السقف ,, فوانيس الشبوره انا عايز اركبها تكميلا للشكل الجمالي مش اكتر ... و الجنوط علشان زي كل الناس ما بتقول بتحسن من ثبات العربية ..

غريبه لما سألته علي فوانيس الشبوره قاللي مش هتخرج حاجه من الضمان انت مركبها عندنا في التوكيل , سألته علي الجنوط ماجابش سيره ضمان العفشة برضه خالص !!

[shiko85]

السلام عليكم جميعا

وعليكم السلام ورحمة الله وبركاته

النهارده رحت غبور فرع قليوب دفعت تمن accent rb أول فئه أتوماتيك بـ123500 بدل من 126000 علشان خصم الـ2500 جنيه و الخصم ساري لحد آخر الشهر
مبروك مقدما و ربنا يعطيك خيرها و يكفيك شرها

عندي شويه استفسارات اتمني اني الاقي اجابه عليها

1 - شركة التأمين ؟؟!! أأمن علي العربيه مع انهي شركة تأمين , غبور نفسهم عندهم تأمين بـ4% سنويا شامل كل حاجه و جوه القاهره اي حادثة لا قدر الله بيبعت الونش ياخدها و لحد 10000 جنيه بدون محضر و طبعا بما انه التوكيل ف مش مطالب اني ادفع اي مبالغ ,, طبعا ده كلام البائع في الفرع الله اعلي و اعلم مدي صحته ايه .
خليك فغبور تقريبا كلهم زى بعضهم بس امن ضد السرقه كمان

2 - الجنوط : هل تنصحوني بتجنيط العربيه اول ما استلمها و ارخصها ؟؟! و ايه هي الحاجات اللي المفروض اراعيها في الجنوط عند شراؤها و فين احسن مكان اجيب منه الجنوط تكون كويسه سعرا و شكلا و كل حاجه ,,, لو حد يقدر يفيدني تقريبا هدفع قد ايه اكون شاكر جدا
ممكن تشوف الجنوط الأصلى فالحرفيين او تسأل فالتوكيل و طبعا هتعمل مبلغ محترم و بلاش الجنوط الصينى او الجنوط الرخيصه
الجنوط مش شكل بس المفروض ليها حسابات كتير للــ aerodynamics بس طبعا مفيش حد بيعمل ده
3 - فوانيس الشبورة : سألته علي فوانيس الشبوره و قاللي انهم هيعملوا في حدود 1500 جنيه بيركبوهم في قسم الهياكل بتاعهم و لو ركبتها جوه التوكيل ف طبعا مفيش مشكله في الضمان لأن محدش لعب في كهرباء العربية
فالألنترا كانت بــ 1500 و التركيب بــ 1500 تخيل !!!!

5 - عايز اعمل فرش للعربيه علشان ما ابهدلش الفرش بتاعها ,, هل في مكان معين تنصحوا بيه ؟ هل في خامه معينه بتستحمل و اعتماديه تنصحوني بيها ؟؟ التكلفه تكون في حدود كام تقريبا ؟!
جينز كار لو هتعمل فرش تفصيل او ممكن تشترى فرش جاهز
الأفضل كاخامات الجلد طبعا (جلد كامل مش جلد فقماش)
التكلفه على حسب نوع الفرش اللى هتجيبه بس من 350 لــ 650 جنيه تقريبا للفرش الجلد الجاهز و التفصيل اغلى من كده بس على حسب نوع الجلد و نوع الخياطه
اهم حاجه تعمل فرش جلد للأرضيه و الشنطه

[Mohamed.Yousri]

shiko85 شكرا جزيلا علي ردك علي كل النقاط

التأمين : شخصيا برضه مايل اني اخليه من عند غبور ,, اهي عربيته و هو ادري بيها و علي الاقل الواحد مرتاح نفسيا ان الحاجه التوكيل نفسه اللي بيركبها او يغيرها او يصلحها و في حاله ان كلهم وحشين يبقي علي الاقل وكيلها أولي بيها :D :D

الجنوط : قاللي الواحد تقريبا ممكن يدخله في 1500 جنيه و ممكن اكتر و طبعا ده مبلغ كبير جدا علشان ادفعه في 4 و استبن !! ممكن أأجل الخطوه دي شويه خصوصا اني مش من هواه الجري ولا الكلام ده كلها انا عايز العربيه لأستعمالها الطبيعي و لو نويت اجيب جنوط اكيد ان شاء الله مش هسترخص هحاول اجيب المعقول و ده اللي مخليني اسأل اجيب ايه كويس

فوانيس الشبوره : اجيبها بـ1500 و اركبها بـ1500 !!!! مش عايز
الفرش : بس الفرش الجلد ده هيطلع عين الواحد من الحر في الصيف بيخلي العربيه زي الفرن بالظبط و احنا اصلا كل صيف بقه أحر من اللي قبله !!! طبعا شكله شيك و كل حاجه بس الحراره دي بصراحه هي اكتر حاجه مخلياني عايز ابعد عنه . الارضيه جلد مفيش مشكله , عنوانه ايه جينز كار ؟!

شكرا جزيلا للجميع

[shiko85]

shiko85 شكرا جزيلا علي ردك علي كل النقاط

الفرش : بس الفرش الجلد ده هيطلع عين الواحد من الحر في الصيف بيخلي العربيه زي الفرن بالظبط و احنا اصلا كل صيف بقه أحر من اللي قبله !!! طبعا شكله شيك و كل حاجه بس الحراره دي بصراحه هي اكتر حاجه مخلياني عايز ابعد عنه . الارضيه جلد مفيش مشكله , عنوانه ايه جينز كار ؟!

شكرا جزيلا للجميع

العفو يا باشا
الجلد كل ما يكون نوع جيد كل ما الأحساس بالسخونه بيقل
المشكله ان اى فرش تانى غير الجلد مش هيحمى الفرش الأصلى خالص
و الفرش الجلد فالقماش بيقشر و الخياطه بتفك علشان اختلاف خامه الجلد عن القماش

[drcobra]

انا عملت فرش جلدعند جنز كار اتكلف حوالى 1600 جنية شامل الكراسى والارضية والشنطة
من افضل الشركات فى التعامل

[Mohamed.Yousri]

انا عملت فرش جلدعند جنز كار اتكلف حوالى 1600 جنية شامل الكراسى والارضية والشنطة
من افضل الشركات فى التعامل

حضرتك بتتكلم عن Accent RB برضه ولا عربيه تانيه ؟؟!!

و زي ما انا ما فهمت من المواضيع كده انه في كذا مستوي و نوع من الفرش ف هل ده اعلي و افضل حاجه عندهم اللي حضرتك اختارتها ؟؟!!

[ah-elgendy]

طب اعلى فئه بكام واسعار الصيانات كام

[seri0us]

لو عندك امكانية انك تدفع الفرق و تاخد الفئة الاعلى فياريت تعمل كده .. لان كتير فاكرين ان الفئة الاعلى هي اعلى فقط في الاوبشانات و بس !!!!! لاء طبعا ..

الفرق بيتضمن جودة الطلاء وقوة تحمله .. و جودة العفشة و ثبات السيارة .. و كفاءة العزل للاصوات داخل السيارة عن خارجها و صوت المحرك و الكلاكس .. قوة التكييف و درجة برودته ..

طبعا الفروقات دي ملاحظة عمليا في سياراتي اللي تملكتها باختلاف انواعها :

1- كان معايا فليشيا موديل 97 Ls و صاحبي كان معاه فليشيا موديل 97 GLS .. مش عاوز اقول لحضرتك أد ايه الفروقات في التقفيل كانت باينة فضلا عن هبوط سيارتي في الوقفة مقارنة بسيارته اللي كانت واقفه كأنها على اطراف صوابعها :)) لون سيارتي اسود زي سيارته لكنه كان اكثر لمعانا و بريقا و عملت البدع بكل انواع التلميع علشان اوصل لمستوى سيارته و فشلت في الاخر :(((

2- كان معايا هيونداي اكسنت 2002 GLS و اخويا معاه هيونداي اكسنت 2002 LS ... يكفي اني اقولك ان تكييفي كان اقوى من عند اخويا بمرااااااااااااحل كبيرة جدا .. و اخويا رش الكابوت و السقف علشان البوية كشفت من الشمس .. التابلوه عندي لم يتشقق نهائيا بعكس بتاع اخويا اللي اضطر انه يحط فروة خروف عليه علشان منظره السيء و بهتانه من الشمس ... و انا بعتها الحمد لله فابريقة بره و جوه و حالة الزيرو ب 44250 ج من سنتين :))

3- معايا حاليا ماتريكس 2006 جميع الكماليات خليجي و والدتي معاها ماتريكس 2006 بتاعت الوكيل غبور .. فروقااااات رهيبة في الكماليات من مساحة خلفية لفتحة سقف لضفيرة كهربا مليانة اوبشانات بعكس غبور اللي مافهاش الا سنتر و انذار و ازاز كهربا لمخدع كرسي السائق و بكرتين هيدروليكي للكرسي زي الجولف لاسبويلر اصلي خلفي !!! عفشة الخليجي اجود من غبور و اكثر ثباتا و عن تجربة في قيادة الاتنين .. تحس ان طلاء الخليجي اكثر كثافة و لمعان من غبور .. فرق شاسع جدا جدا في العزل داخل كابينة القيادة و ابتعاد صوت المحرك و الكلاكس عن اذنك و كمية الهدوء في الداخل .. اسفنج الكراسي في غبور مجرد حشو و فقط ليوهم السائق انه راكب جيب عالية اما عندي في الخليجي فكأنك راكب سيارة صالون من روعة الكراسي و طبيعتها .. حاجات كتيييييييرة طبعا و كنت عملتلها انا موضوع منفصل في القسم ...

4- كمان عديلي معاه اكسنت RB بتاعت الوكيل و انا اللي بسوقها في كل سفرياته بمعدل على الاقل كل شهر سفرية واحدة من المنصورة للقاهرة .. مقارنة بتقفيل الماتريكس الخليجي فسيارتي امتع في السفر من سيارته و تكييفي اقوى من تكييفه بشهادته هو شخصيا .. و طبعا صوت الضوضاء و انا سايق على طريق سفر يستلزم تشغيل الكاسيت ... اعتقد الكاوتش اللي بينزل في الفئة اللي انت حجزتها غير اللي في الفئة الاعلى و طبعا هتحتاج تغيره فورا لانه سيء بشكل متدني جدا و صوته عالي اوي و عديلي غيره و جاب بريدجستون لما بدأ يسافر و يحس بالمعاناة من صوته :((

فماتخدش راي حد معاه اكسنت RB بتاعت الوكيل المصري و ماشافش بقية المواصفات للفئات الاعلى من الوكيل .. حتى لو قالك تكييفي روعة و تقفيل العربية ممتاز و ... و ... و .... مع احترامي ليه فهو ما ركبش و سافر بالفئة الاعلى من سيارته او المواصفات الخاصة بالسوق الخليجي اللي بيعتبر اكثر تنافسية و اهتمام بالرفايع اللي الوكيل بيستغفلنا فيها ..
اخيرا .. حبيت انصحك من وجهة نظر واحد احتك من كل موديل بالفئتين بتوعه .. اتمنى لك الاستمتاع و التوفيق في اختيارك :))

[mhkorayem]

السلام عليكم جميعا
وعليكم السلام ورحمه الله وبركلته

النهارده رحت غبور فرع قليوب دفعت تمن Accent RB أول فئه أتوماتيك بـ123500 بدل من 126000 علشان خصم الـ2500 جنيه و الخصم ساري لحد آخر الشهر
1000 مبروك مقدماً وتستلم على خير ان شاء الله

طبعا العربيه مش موجوده و حاليا الدفعه الجديدة في المنطقة الحرة و هتخرج في خلال اسبوعين بس انا مهيأ نفسي ان مش هستلم قبل شهر مثلا ...
غريبه انها مش موجوده ده انا من اسبوع كانوا بيقولولي انها موجوده ومتوفره استلام فوري في فرع التوكيل امام نادي هليوبوليس مصر الجديده (جايز بقى في معرض فورمولا كان في اقبال كبير واتسحبت)

عندي شويه استفسارات اتمني اني الاقي اجابه عليها
أأمر يا باشا واحنا تحت امرك باللي نقدر عليه

1 - شركة التأمين ؟؟!! أأمن علي العربيه مع انهي شركة تأمين , غبور نفسهم عندهم تأمين بـ4% سنويا شامل كل حاجه و جوه القاهره اي حادثة لا قدر الله بيبعت الونش ياخدها و لحد 10000 جنيه بدون محضر و طبعا بما انه التوكيل ف مش مطالب اني ادفع اي مبالغ ,, طبعا ده كلام البائع في الفرع الله اعلي و اعلم مدي صحته ايه .
موضوع التامين ده براحتك بس أنا شخصياً غير مقتنع بالتامين بشكل عام وربنا يغنينا عنه ويحفظنا يارب

2 - الجنوط : هل تنصحوني بتجنيط العربيه اول ما استلمها و ارخصها ؟؟! و ايه هي الحاجات اللي المفروض اراعيها في الجنوط عند شراؤها و فين احسن مكان اجيب منه الجنوط تكون كويسه سعرا و شكلا و كل حاجه ,,, لو حد يقدر يفيدني تقريبا هدفع قد ايه اكون شاكر جدا
أنا بفضل ان الواحد لو هيجنط يا اما يشتري الجنوط الاوريجينال بتاعة العربيه يا بلاش خالص بس دي بتبقى غاليه ممكن تعدي الـ 2000 جنيه للجنط الواحد بس بتبقى انضف من اي جنوط من اللي في السوق وأكيد بتبقى مناسبه للعربيه وملهاش تاثير على العفشه

3 - فوانيس الشبورة : سألته علي فوانيس الشبوره و قاللي انهم هيعملوا في حدود 1500 جنيه بيركبوهم في قسم الهياكل بتاعهم و لو ركبتها جوه التوكيل ف طبعا مفيش مشكله في الضمان لأن محدش لعب في كهرباء العربية
لو ركبت الفوانيس بره التوكيل أو حتى عندهم هتخرج من ضمان الكهربا وهو ده نظام غبور وطالما انت عاوز فوانيس الشبوره ما تشتري الفئه التانيه على طول هي دلوقتي بـ 127.000 يعني زياده 3.500 جنيه عن الفئه اللي حضرتك حاجزها لو شلت منهم 1.500 تمن الفوانيس و قول 500 جنيه تركيب يبقى في فرق 1.500 حضرتك أخدت بيهم فتحة سقف وتارة مالتي ومش هتقابل مشكله خروجك من الضمان لو حبيت تركب فوانيس شبوره (احسبها تاني كده وهتلاقي ان ده أفضل على ما أعتقد)

4 - العربيه بييجي معاها استبن , شنطه العدة , مفتاحين ... يا تري في حاجه تاني ابص عليها ؟!
طبعاً طاسات العجل ده لو ماكنتش راكبه وانت بتستلم والاريال ده لو ماكنش راكب بردوا وطبعاً هتتاكد من ان كل حاجه شغاله التكييف والكاسيت والزجاج الكهرباء والسنترلوك والمساحات والكلاكس وكل اللي تقدر تشيك عليه

5 - عايز اعمل فرش للعربيه علشان ما ابهدلش الفرش بتاعها ,, هل في مكان معين تنصحوا بيه ؟ هل في خامه معينه بتستحمل و اعتماديه تنصحوني بيها ؟؟ التكلفه تكون في حدود كام تقريبا ؟!
في عندك جينز كار ده ممتاز جداً انا عامل فرش عربيتي عنده من سنه تقريباً كان مكلف حوالي 1300 جنيه بس معملتش فرش جلد للارضيه عشان مبحبهوش
وفي كمان عاليا وده له فروع كتير اللي اعرفها منهم عند السراج مول مدينه نصر وفي شارع جسر السويس خلف حديقه الميريلاند وعموماً هي الاسعار بتختلف على حسب الخامه ونوع الخياطه وانت وشطارتك برضوا
أما الكسوه الجاهزه فمنصحكش بيها عشان بتبوظ تنجيد الفرش الاصلي
بس نصيحه استمتع بفرش الفبيركه في الاول لانك دافع تمنه من تمن العربيه اتبسط بيه واستمتع بيه (انت يعني هتحافظ عليه لمين للي هيشتري منك العربيه بعد كده هو اللي يستمتع بالفرش اللي انت دافع تمنه من تمن العربيه) طبعاً انا مش بقولك اهلكه بس برضوا متع نفسك بيه شويه
لو هتركب فرش جلد متقلقش من موضوع الحراره والصيف والكلام ده طالما هتستخدم نوع نضيف الموضوع مش زي ما انت متخيل أنا مركب فرش جلد وأسود كمان ومحستش باي مشكله في موضوع سخونه الفرش دي خالص
وعموماً ده تقرير كنت عامله عن الفرش اللي انا مركبه في العربيه لو تحب تبص عليه

http://www.nilemotors.net/Nile/360102-a.html

6 - العربيه كوري بالكامل و مفيش اي حاجه فيها نهائي خالص مصري
للاسف السنترلوك والانذار مصري وده انا متاكد منه وفي الغالب بعد فتره هتضطر تغيرهم بحاجه محترمه شويه
واعتقد كمان ان الكاسيت مصري وده بناءً على كلام صديق لينا في المنتدى هو اللي كان قال الكلام ده والله اعلم

7 - الالوان المتوافرة منها في الدفعه الجديدة اللي جاية : فضي ابيض اسود فيراني احمر/نبيتي + لون عجيب جديد كده ما اعتقدش انهم هيبيعوا منه عربيه واحده حتي زي اللي في الصوره كده ,, مفيش اللون السماوي/اللبني الفاتح



الالوان دي طبعاً اذواق وان كان انا اكتر لون بيعجبني فيها هو البرونزي بس انا ملاحظ ان حضرتك مش كاتبه في مجموعة الالوان الموجوده . هو مش نازل فعلا ولا حضرتك نسيت تكتبه؟؟؟؟؟
بس بالنسبه للالوان اللي حضرتك كاتبها من وجهة نظري أفضلهم النبيتي

شكرا جزيلا و في انتظار مساعدتكم و جزاكم الله كل خير ....

[mhkorayem]

الفئة الاعلي بكام

129.500 ونازل عليها خصم 2.500 جنيه حتى اخر الشهر يعني تبقى 127.000 جنيه
ودي بتزيد عن الفئه الاولي (فتحة سقف - فوج لايت - تاره مالتي)

[mhkorayem]

1500 جنيه لفوانيس الشبوره غلطان
فى فئه شفتها امبارح فى غبور فتحة سقف - فوجات -طاره مالتى 127000 جنيه وابقى جنط بعد كده براحتك
انا شايف ان الفئه دى افضل من اللى حضرتك حجزتها

متفق معاك تماماً