أشتريت Accent RB و الاستلام بعد شهر .. عندي شويه استفسارات

[mhkorayem]

ماتعرفش فيها ايموبلايزر ولا لا ؟؟؟؟؟؟

أخيراً غبور أستوعب وفهم ان الايموبلايزر مش رفاهيه وانه بقى ضروره وخاصة في ظل الاوضاع الامنيه الحاليه في مصر وتكرم وتعطف وحن علينا ونزل الاكسنت بالايموبلايزر واعتقد دي اول أو تاني دفعه بالكتير يبقى فيها ايموبلايزر
بصراحه انا مكنتش مصدق انه اخيرا عمل كده غير لما شوفت علامه الايموبلايز منوره في التابلوه بنفسي (ورغم كده مش قادر اصدق وعمال اقول يمكن يكون عم غبور لاعب في العربيه وبيخلي لمبه الايموبلايزر تنور بس من غير ميكون فيها ايموبلايزر مش عارف ليه حاسس ان في خدعه في الموضوع ومش قادر اصدق ان غبور هيتخلى عن مبادءه)
طبعاً مفيش حاجه لوجه الله

عاوزين ايموبلايز ....
عنيه ........
مفيش ايرباجز (غبور استايل )

[Mohamed.Yousri]

السلام عليكم جميعا

كلمتهم النهارده علشان اسأل علي الفئه العاليه اللي بـ127000 قاللي انها مش موجوده دلوقتي و مش متوافره في الدفعه اللي بتتخلص اجراءتها دلوقتي لو عايزها هستناها و مفيهاش ايرباج , فتحه سقف و تارة مالتي و الفوجات .

اللون البرونزي موجود انا اللي نسيت اكتبه ضمن باقي الالوان , انا اخترت اللون الفضي وقت الحجز

ايموبلايزر بصراحه مش عارف موجود ولا لأ ,, ما سألتش عنه

علي كلامهم ان مفيش اي حاجه فيها مصري كله كوري بس الله اعلي و اعلم برضه ,, مفيش شفافية خالص في التعامل حاجه مستفزة برضه

عاجبني شغل جينز كار جدا جدا بصراحه من الصور لكن كل ما اسأل حد يقوللي الاسعار دي غاليه اوي .. معنديش خبره اوي في الفرش و الكلام ده بصراحه ف مش قادر احكم الناس صح ولا علشان ما يعرفوش شغل جينز كار ف مستغليين الاسعار و خلاص .

[mhkorayem]

السلام عليكم جميعا
وعليكم السلام ورحمة الله وبركاته

كلمتهم النهارده علشان اسأل علي الفئه العاليه اللي بـ127000 قاللي انها مش موجوده دلوقتي و مش متوافره في الدفعه اللي بتتخلص اجراءتها دلوقتي لو عايزها هستناها و مفيهاش ايرباج , فتحه سقف و تارة مالتي و الفوجات .
انا مش عاوز اشتتك بس لو عاوزها ممكن تسأل عليها في المعارض ممكن تلاقيها بس حتى لو جبت اول فئه فهي حلوه برضوا وربنا يباركلك فيها

اللون البرونزي موجود انا اللي نسيت اكتبه ضمن باقي الالوان , انا اخترت اللون الفضي وقت الحجز
انا برضوا استغربت انك مش كاتبه لانه من الالوان الحلوه فعلا فكان هيبقى غريب منهم انهم مينزلهوش

ايموبلايزر بصراحه مش عارف موجود ولا لأ ,, ما سألتش عنه
ولو سالت مش هتلاقيهم هما نفسهم عارفين حاجه دول ضايعين اخر ضياع
انا سالت على الايموبلايزر في العربيه دي في معرضين مختلفين لغبور والاتنين قالوا انه مفيش وانا اكتشفت انه موجود بالصدفه البحته لما طلبت في تاني معرض انه يشغلي العربيه عشان عاوز اشوف اضاءة العدادات واول ما حطينا المفتاح في الكونتاكت لقيت لمبة الايموبلايزر منوره في التابلوه ولما شفتها قلت له طيب ما لمبه الايموبلايزر منوره اهه قالي ابه ده فعلا دي منوره لا كده يبقى فيها ايموبلايزر (دول في الضياع)
ولما رحت معرض فورمولا اوتوماك قلت اسالهم برضوا من قبيل التاكد قالولي برضوا مفهاش فلما قلتلهم على وجود اللمبه دي قالولي طيب احنا هنسال في الموضوع ده ثانيه واحده وراح سايبني بتاع 5 دقايق مش عارف بقى راح عمل تليفون ولا كلم مين وبعدين رجع قالي لا فعلاً فيها ايموبلايزر
بصراحه انا مش عارف دول مبيعات ازاي ده في ناس كتير ممكن تصرف نظر عن العربيه بسبب معلومه غلط زي دي

علي كلامهم ان مفيش اي حاجه فيها مصري كله كوري بس الله اعلي و اعلم برضه ,, مفيش شفافية خالص في التعامل حاجه مستفزة برضه
متعرفش بقى مفيش شفافيه ولا هما مش عارفين هما بيبيعوا ايه ولا هو استهتار وبيتعامل على ان السنتر والانذار والكاسيت دي حاجات مش مهمه من وجهة نظره ومش اساسيات العربيه فبيريح دماغة ويقولك كله مستورد. بس الخلاصه ان معظم مسؤولي المبيعات في مصر ومش في غبور بس محتاجين اعادة تاهيل وشغل كتير عشان يكونوا ماهلين للعمل ده

عاجبني شغل جينز كار جدا جدا بصراحه من الصور لكن كل ما اسأل حد يقوللي الاسعار دي غاليه اوي .. معنديش خبره اوي في الفرش و الكلام ده بصراحه ف مش قادر احكم الناس صح ولا علشان ما يعرفوش شغل جينز كار ف مستغليين الاسعار و خلاص
هو مش غالي بالنسبه لمستوى الشغل والكوالتي اللي بتاخدها وده من وجهة نظري

[Mohamed.Yousri]

mhkorayem

شكرا جزيلا علي ردك و علي اهتمامك

انا ما حبتش اجيبها من معرض و قلت اخليني في غبور و خلاص ,, شخصيا ماكانش في دماغي بصراحه الفئه الاعلي لكن قلت ما يضرش 3500 جنيه مش كتير اهو بالمره ,, بس مع الاسف مش موجودة عندهم و اخدت بالي كمان انهم لما بيردوا علي اي استفسار علي صفحه الفيسبوك بأسعار العربيه الاول كان بيرد بأسعار كل الفئات دلوقتي بيرد باسعار الـ123500 و الـ127000 بس ف واضح ان الفئات العالية مش موجوده و مش في كل الفروع

مش غبور بس اللي البياعين اللي عنده محتاجين اعاده تأهيل ,, مع الاسف كل مجالات البيع في البلد بالمنظر ده ,, ادخل اشتري مثلا لابتوب من كل 10 محلات هتلاقي محل واحد بس اللي فيه ناس بتفهم , انزل اشتري موبايل من التوكيل من كل 100 موظف هتلاقي كام واحد هو اللي يعرف يفيدك و هكذا ,, المأساة دي في كل حاجه مع ان المفترض اللي واقف بيبيع ده لازم يكون عارف المسمار مكانه فين و بيعمل ايه و امكانيات الحاجه اللي بيبيعها ايه علشان حتي يعرف يقنعني اني اشتري الحاجه بتاعته لكن مع الاسف مفيش الكلام ده

بالنسبة لجينز كار انا زي ما قلت شخصيا معجب جدا بالشغل اللي شفته في الصور و شايفه اكتر من ممتاز لكن علشان انا مش عارف الاسعار كويس بشكل عام عامله ازاي ف علشان كده بقول ان اي حد بقولله الاسعار دي بيقولي دي كده غاليه .

[Mohamed.Yousri]

محدش عنده نصيحه او معلومه مفيده بخصوص التأمين ؟!

[shiko85]

محدش عنده نصيحه او معلومه مفيده بخصوص التأمين ؟!

أمن مع غبور

[drcobra]

رأى التأمين مع غبور على كلامهم عروض كويسة

[mhkorayem]

mhkorayem

شكرا جزيلا علي ردك و علي اهتمامك

العفو يا باشا احنا هنا لخدمت بعض باللي نقدر عليه

انا ما حبتش اجيبها من معرض و قلت اخليني في غبور و خلاص ,, شخصيا ماكانش في دماغي بصراحه الفئه الاعلي لكن قلت ما يضرش 3500 جنيه مش كتير اهو بالمره ,, بس مع الاسف مش موجودة عندهم و اخدت بالي كمان انهم لما بيردوا علي اي استفسار علي صفحه الفيسبوك بأسعار العربيه الاول كان بيرد بأسعار كل الفئات دلوقتي بيرد باسعار الـ123500 و الـ127000 بس ف واضح ان الفئات العالية مش موجوده و مش في كل الفروع

هو فعلاً دلوقتي مفيش غير الفئتين دول بس في الاكسنت

مش غبور بس اللي البياعين اللي عنده محتاجين اعاده تأهيل ,, مع الاسف كل مجالات البيع في البلد بالمنظر ده ,, ادخل اشتري مثلا لابتوب من كل 10 محلات هتلاقي محل واحد بس اللي فيه ناس بتفهم , انزل اشتري موبايل من التوكيل من كل 100 موظف هتلاقي كام واحد هو اللي يعرف يفيدك و هكذا ,, المأساة دي في كل حاجه مع ان المفترض اللي واقف بيبيع ده لازم يكون عارف المسمار مكانه فين و بيعمل ايه و امكانيات الحاجه اللي بيبيعها ايه علشان حتي يعرف يقنعني اني اشتري الحاجه بتاعته لكن مع الاسف مفيش الكلام ده

للاسف اللي أنت بتقوله ده هو الحقيقه عشان كده أنا لما بشتري اي حاجه بلف كتير اوي وبسأل كتيير جداً عشان محدش يضللني بمعلومان غلط ويورطني في حاجه انا مش عاوزها

بالنسبة لجينز كار انا زي ما قلت شخصيا معجب جدا بالشغل اللي شفته في الصور و شايفه اكتر من ممتاز لكن علشان انا مش عارف الاسعار كويس بشكل عام عامله ازاي ف علشان كده بقول ان اي حد بقولله الاسعار دي بيقولي دي كده غاليه .

هو فعلاً جينز كار مش رخيص وفي اماكن كتير ارخص من كده كتير بس مش عارف بقى هل ممكن تلاقي حد يقدم نفس الكواليتي دي ولا لأ عشان كده لما عملت فرش عربيتي رحتلهم حتى لو كانوا اغلى فعلى الاقل انا مطمن للكوالتي ومستوى الشغل اللي هستلمه منهم وأنا مش هغير فرش كل يوم دي حاجه هتقعد مده طويله عشان كده قلت اخليني في المضمون عشان اكون مبسوط بالشغل

[Mohamed.Yousri]

mhkorayem

شكرا علي ردك مره تانيه ...

بالنسبه للتأمين يا تري انت مأمن علي عربيتك ؟؟!! لو ممكن اعرف انت مأمن مع شركة ايه و التفاصيل اكون شاكر ليك

[mhkorayem]

mhkorayem

شكرا علي ردك مره تانيه ...

بالنسبه للتأمين يا تري انت مأمن علي عربيتك ؟؟!! لو ممكن اعرف انت مأمن مع شركة ايه و التفاصيل اكون شاكر ليك

لا يا باشا انا مش مؤمن على العربيه وغير مقتنع بالتامين في مصر وشايف فيه نسبة نصب كبيره طبعاً في ناس التامين بينفعها لكن الغالبيه العظمى من المؤمنين بيبقوا خسرانين من التامين ده.
بصراحه انا سايبها على الله والستر من عند ربنا وهو الحافظ