لماذا سلوكيات سائقي الفيرنا تلك ؟؟؟

[Samir Elshahawy]

السادة الاعضاء الكرام...
أسعد الله مسائكم بكل خير....

بداية و قبل أن أبدأ أنا لا أقصد أطلاقا الاساءة لأحد أو التعرض لنوع محدد من السيارات , لكني سأذكر لكم ملاحظاتي من خلال تعاملاتي اليومية بالطرقات و لعلكم تكونوا قد لاحظتم الشئ نفسه

- لماذا اجد السيارات "الفيرنا" غالبا و ليست بشكل خاص منطلقة بأقصي سرعة في شوارع لاتحتمل السرعات العالية دون باقي السيارات ؟؟
- لماذا لايطيق سائقي الفيرنا صبرا في التقاطعات و الاشارات و عند الطلوع من وضع السكون و كانهم يمتطون صهوة جواد جامح لايستطيعون التحكم به و الامساك بزمامه ؟؟
- لماذا اجد الغرز علي السرعات العالية من السيارات الفيرنا اكثر من باقي السيارات ؟؟

كما قلت في بداية الموضوع , ليس المقصود هو العيب في "الفيرنا" أو قائديها و هذه التساؤلات تسري علي باقي السيارات و لكنها تتردد اكثر من الفيرنا

1- اليوم علي سبيل المثال لا الحصر و عادة مايتكرر نفس الموقف اجد خلفي سيارة "فيرنا" و نحن مقبلون علي تقاطع الكيلو 4 و نص و السيارات جميعها بدأت تخفض من سرعتها ماعدا الفيرنا التي كانت قادمة نحوي علي طريق منحدر بأقصي سرعة حتي أني خشيت من أنه سيصطدم بي لذا أفسحت له الطريق و فعلا أنطلق بسرعته و قطع التقاطع بعد ان قام بعمل عدد من الغرز بين السيارات المتوقفة أو التي أبطأت من سرعتها

2- دقائق معدودة و بدأت السير علي طريق السويس لأجد "فيرنا" اخري قادمة تتخطاني من جهة اليمين رغم أن يساري كان خاليا ليقوم بغرزة بيني و بين السيارة التي أمامي "نيسان - صني" و يتخطاها من جهة اليسار هذه المرة

3- بالامس سيارة فيرنا دخلت الشارع الضيق الذي كنت قد شارفت علي الخروج منه و رغم تحذيري له بالنور العالي كي ينتظر حتي أكمل طريقي و أخرج من الممر الضيق ألا أنه دخل بمنتهي السرعة ليقف أمامي و يصر علي أن اعود انا ادراجي و كل من خلفي كي يعبر هو أولا و لأذهب أنا و من خلفي من السيارات الي الجحيم

هذه بعض الامثلة البسيطة و الباقي كثير لا يتسع المجال هنا لحصرها من كثرتها و بشكل شبه يومي
و أني لأتسائل لماذا تكثر هذه التصرفات من سائقي "الفيرنا" بالذات ؟؟
السيارة سريعة نعم و لكن ألا يستطيع قائدها التحكم بها أو السيطرة عليها ؟؟
هل المشكلة بتلك السيارة ام بقائديها ؟

أسف علي الاطالة و أرجو ألا يزعل مني السادة الاعضاء مالكي الفيرنا ؟ و لكني أتسائل عن سبب ما أراه

مع خالص تحياتي و تمنياتي
م/سمير الشهاوي

تم النقل من المنتدي العام لهيونداي
مشرف القسم 3

[Nile_Storm]

بالنسبه لزعل مالكي الفيرنا فاعتقد انهم زعلو خلاص
لانك هناك تعميم
و عامه ماهي فائده الموضوع اساسا ؟؟؟؟؟
سائقين الفيرنا وحشين يعني
خلاص ياعم احنا وحشين

[Samir Elshahawy]

بالنسبه لزعل مالكي الفيرنا فاعتقد انهم زعلو خلاص
لانك هناك تعميم
و عامه ماهي فائده الموضوع اساسا ؟؟؟؟؟
سائقين الفيرنا وحشين يعني
خلاص ياعم احنا وحشين

سيدي الفاضل أنا لم أقصد هذا و أنا قلت أن أغلب و ليس الكل فأحيانا يحدث الشئ ذاته من سائقي سيارات أخري و لكن تكرار حدوث المشاكل من الفيرنا أصبح ملفت للنظر

و عموما سيدي الفاضل أنت من الناس التي أكن لها كل تقدير و أحترام بس مش كل صوابعك زي بعضها

[Nile_Storm]

ياباشا انا معاك بس مش كل الي راكبين الفيرنا
طب ما سائقي اللانسر مثلا مشهور عنهم الجري برضه
المسأله مش مساله عربيه
مساله الي راكبها و بما ان الفيرنا عربيه رخيصه نوعا ما فان معظم سائقيها من الشباب و الشباب حضرتك عارفه
يعني لو معاه 127 حتي هيجري بيها
و الاجابه بسيطه موتور قوي و عربيه جرايه مع شاب
انا اعتراضي بس علي الموضوع لانه مفيش رد يتقال عليه
تخيل مثلا موضوع معمول ادامك كده عن سياره حضرتك هترد تقول ايه ؟؟؟؟؟

[NFS]

هو كل الى اساله على الفيرنا يقولى عربيه بتجرى بغباء و الموتور مغرى انك تجرى بيه بس مبتوقفش و التحكم فيها صعب , الله اعلم انا مسوقتش العربيه ولا ركبتها حتى و هى بتجرى, و شفت كمان جروب على الفيس بوك بيقول نفس الكلام.

[Nile_Storm]

بص هي عربيه جرايه اه جدا
التحكم فيها سهل
ثباتها يضعف بعد ال 120
فراملها مش قويه اوي علي السرعات العاليه

بس اسال سؤال طريق ايه في مصر الي امشي فيه فوق ال 120
الفيرنا مصممه للمدن مش للجري اكتر من كده

[Samir Elshahawy]

..............................
اعتذر عن حدوث خطا اثناء القيام بواجب الاشراف ترتب عليه مسح مشاركه حضرتك
برجاء اعاده كتابه المشاركه لوضعها
مشرف هيونداي

[Nile_Storm]

مظبوط كلام حضرتك يبقي الافضل اننا نتحدث عن الرعونه في القياده الي سادت الشعب المصري او الشباب و لا نحصرها في ملاك سياره واحده حتي لا يخرج النقاش من هدفه و هو التهور الي مناقشه السياره

[ashouhdy]

لا تعليق
و شكرا لصاحب الموضوع

[A.Saad]

هوة المشكلة انها ابتدت تنتشر بين الشباب خاصة

[M.Mekawy]

هو الموضوع موضوع انتشار , يعنى احصاء بتاعة ثانوية عامة , فيه نسبة كبيرة و انت ماشى ان تلاقى ناس سايقة فيرنا , على فكرة كانت قبل انتشار الفيرنا اللنسر بوما هى اللى فيها نفس الملاحظة و مازالت لان الشعب كله سايق بومة

[drhanymehany]

عشان الفيرنا عربيه تعبانه وهندى
والناس بتبقى فاكره انها سايقه بورش
وربنا يستر علينا

[Nile_Storm]

الفيرنا هندي اممممممممممممم
فعلا حضرتك عارف عنها كتيييييييييير
شكرا للمشاركه

[BLACKVERNA]

لا تعليق

و شكرا لصاحب الموضوع اللى انا مش فاهم الهدف منه

هل هو الاساءة الى الفيرنا او الاساءة الى مالكى الفيرنا

[EslaM_NagY]

لا اجد منطق من الموضوع
عشان العربيات ابتداء بال127 وصولا الى ال740 كلهم بيعملوا كدة

مش مستغرب.

هى ممكن عشان العربية منتشرة فغالبا عين حضرتك بتقع عليها انما لو طلعتها من دماغك حتلاقى كله كدة.

يعنى ايه الى يمنع العربيات الجراية التانية انها تعمل كدة ؟؟؟
هو مفيش عربيات بتجرى غير الفيرنا ؟؟ لا


طب والراجل الى قفل السكة فى وشك دا ايه دخل العربية فيها ؟؟ يعنى مهو لو راكب لانوس مثلا كان برضو حيدخل.
ولا وهو داخل جيه يفرمل العربية قالتوا لا عيب لازم تقفل على الراجل ؟؟؟


انا لا اقصد إهانة على الاطلاق.