قبل الشراء الالنترا سياره متواضعه جدا

[tutankhamoun]

أولا أنا شايف أن فيه مبالغة في وصف العيوب الخاصة بالالنتر
ثانيا أي عربية في الدنيا مش كاملة و هاتلاقي فيها حاجة تعجب واحد و ما تعجبش التاني .
أزاي العيوب اللي موجودة في عربية أو ( اللي أحنا ممكن نشوفها عيوب ) تنزل من ثمن العربية 30 ألف جنيه ؟؟؟؟ و خصوصا أن الإلنترا من العربيات الكويسة في السوق و في فئة السيارات زي ( الصني - الكورولا - اللانسر - الجيتا ............ ) أنامليش دعوة بالسعر أنا بتكلم عن فئة السيارات . السعر له عوامل كتيرة بتحدده غير الجودة .

ثالثا بروتون و جين 2 و بيرسونا مش صناعة انجليزي
بروتون بتملك لوتس الأنجليزية ....... و لوتس طورت معاهم عربياتهم الحديثة كلها ( جين 2 و ساتريا وساجا ووواجا و بيرسونا )
رابعا عيوب الجين 2 ....... مش بالضخامة اللي الناس بتوصفها بها
و فعلا فيه ناس ممكن تظهر عنده مشكلة ......... و ممكن تكون كبيرة جدا ....... و ممكن هو اللي بيكبرها ....
المهم رأي الأغلبية مش رأي واحد أو أثنين أشتروا و العربية معجبتهمش .
بالنسبة لفرامل الجين 2 .................................... ممتازة و بتوقف و ال abs ebd عاملين شغل ممتاز بالاضافة أن نظام الفرامل هو بوش ألماني و مكتوب على قطع الفرامل الواضحة تحت العجلة .....
و في النهاية البيرسونا عربية كويسة ............. و بتتميز عن الإلنترا بالثبات و قوة الصاج و أختلاف الشكل .
و الإلنترا بتمميز بنعومة في الموتور و السحب و خلى بالك أن موتور الإلنترا أقوى من موتور البيرسونا الحالي .

بالمناسبة الجين 2 من ساعة ما نزلت مصر و هي فيها موتور كامبرو ......... و البيرسونا كذلك .

و أنا لسة شايف أن عنوان الموضوع فيه تحامل كبير على عربية محترمة .

[m_marmoush]

حضرتك انا قولت على العبوب اللى فى الجين 2 اللى لسه موجودة فيها لحد انهردة (2009) فبالتالى معنى كدا ان شركة proton مش عارفة تصلح العيوب دى بدليل انها بتنزل فى جين2 2009 , فاكيد المشكلة متحلتش اذا مش ممكن يكونوا صلحوها فى الpersona و هى هى الجين 2 فى كل حاجة تقريبا.

فقولت غالبا العيوب دى فى الpersona كمان دا بجانب سوء التوكيل الفظيع .

بعدين عربية حضرتك موديل 2009 يعنى لسه جديدة فلسه العيوب متلحقش تبان بالسرعة دى عند كل الناس , بس فى بيستلموا العربية بعيوب (جين2) فاكيد ممكن يبقى فى ناس بتستلم persona بعيوب لانها تقريبا نفس العربية.

الجين تو و البرسونا واحد

بالنسبه للعفشه فهى ماكفرسون فعلا و ده بيديها ثبات غير عادى (من الأخر بتخليك تكسل تهدى فى الملفات)

نيجى بقه للعيوب ........... للأسف الناس متصوره ان عربيات بروتون كلها فيها عيوب و مشاكل ............ يا جماعه العيوب الموجوده عادة بتكون عيوب بسيطه فى عربيات قليله و كلها مشاكل بتتحل فى صيانة الألف أو ال 5,000 بالكتير

بالنسبه للسحب ممتاز و التكييف تلاجه ............ نيجى بقى للفرامل ......... الفرامل ممتازه و ماسكه العربيه عن تجربه مش عن سمع بس هى مشكلتها اللى بتخللى الناس تقول عليها ضعيفه أن البدال واطى شويه. بالمناسبه منظومة الفرام فى الجين تو و البيرسونا من أول الكونترول يونيت لحد التيل ماركة BOSCH المانى

لو حد دور فى المنتدى بتاع بروتون حيلاقى فى ناس كتير مبسوطه من عربياتها (و أنا منهم) و بتكتب فيها شعر كمان

المشاكل الكبيره دى مشاكل فرديه و محدش عارف طبيعه سواقتهم أو أستعمالهم للعربيه بيكون أزاى (ممكن أوى ما بيغيرش الزيت و بعدين يرجع يقول الموتور فيه و فيه)

تسعير العربيه بانسبه لأمكانياتها مناسب و معقول (بصراحه أنا شايف أن الالنترا سعرها مبالغ فيه .. بمعنى أم ماينفعش أشترى عربيه تمنها 100,000 و مايكونش فيها عوامل أمان بدايه من لمبه الأستوب نهايه بالأير باجز) ...

طبعا دى اراء و الأختلاف فى الراى لايفسد للود قضيه

[osamaos20022]

ثانيا: الدركسيون ده باور ( متطور جدا) يعني بيتقل تدريجيا مع زيادة السرعة وبيكون امن جدا لدرجة ناني بسيب الدركيسيون على السرعات العالية. بس يبدو ان حضرتك اول مرة تسوق عربية باور.


اخلف معاك تماما فعلا الباور سئ جدا مقارنه حتي مع عربيات اخري بها باور كهرباء العربيه بعد120 بتيقي عاوز تركب الدريكسون مش بس تمسكه

[ADELHASANALSHAAIRYN6]

الاخ العزيز memo : ارى انك متحامل جدا على الالنترا حبيبة الاف المصريين - انت مش مستريح لها نفسيا او لهيونداى عموما ممكن تقول كدة بصراحة وكلنا زيك - ناس بنسنريح لماركة دون الاخرى لكن دون ظلم او تجنى لان وصفك للالنترا كانه وصف لاردأ عربية صينى - ارجو تسمع نصيحة اخ لو الفلوس عندك مهمة وليها حساب اشترى زى المصريين العربية الاكثر مبيعا واللى عليها اقبال وسيبك من الانجليزى والاسبانى والهولندى - اذا كنت فى روما فافعل كما يفعل الرومان

[memo_p910]

في ملاحظه كمان على الالنترا او الهيونداي عموما في عربيات الايجار ان الجير بيحصل فيه مشاكل بسرعه يعني الالنترا المانيول الي اجرتها عصاية الفتيس كانت بتتخلع في ايدي رغم انها موديل 2008 كمان نفس الحركه حصلت مع ماتريكس كنا ماجرينها في اسكندريه وكانت موديل 2008 الفتيس طلع في ايد صاحبي والعربيه وقفت وماتصلحتش الى في ورشه.

[Nader007]

بور الكهربة المفروض يفصل عند 110 كم ساعة و لو حصل غير كده يبقى فى خلل فى نظام التحكم

[FrozenFire]

إيه يا رجالة؟ إحنا مش كنا خلصنا حكاية البيرسونا والإلنترا دي قبل كده؟ وكنا حنخسر بعض عشانها :)
الموضوع موجود في قسم المقارانات تحت موضوع إسمه (أشتري إلنترا ولا بيرسونا)

يا ريت اللي ما قرأشي الموضوع يروح يقرأه الأول عشان كلامي اللي جاي مبني على مشاركتي في الموضوع ده

مبدئيا بالنسبة لحكاية إن الإلنترا خفيفة، هي فعلا خفيفة بس مش الخفية ( حلوة خفية دي) اللي تخوفك منها بمعنى بمعنى مش حتلافيها بتعوم منك لو عربية كبيرة عدت من جنبك. أنا ياما مشيت بيها على الدائري وكان بيعدي من جنبي حوت أزرق ضخم على شكل عربية نقل بمقطورة بسرعة عالية وعمر ما العربية إتحرفت عن إتجاها.

واضح فعلا إن حضرتك أجرت عربية حالتها مش كويسة، لأني بأجر عربيات كتير جدااااااااااا، بدليل إن العربية الإلنترا الزيرو جبت بيها 180 على مصر إسماعيلية الصحراوي وأنا مرتاح جدا، بعد ما العربية عملت 15000 كيلوا مش عارف أجيب بنفس العربية 150، كانت بتعوم بشكل غبي.
يا جماعة العربيات الإيجار بتهاااااااان، مهما كانت درجة المحافظة عليها.

بالنسبة لدرجة نعومة الدريكسيون
فأنا أتوقع إن حضرتك معاك عربية قديمة أو لانوس بأقصى تقدير، لأني أول مرة ركبت فيها الإلنترا كنت لسه نازل من نوبيرا وقلبي كان حيقف من درجة نعومة الدريكسيون.
بس على فكرة، درجة النعومة دي ميزة مش عيب، لأني ما أتوقعشي إن عربية بالحلاوة دي يبقى دريكسيونها أقل نعومة من كده. وكون حضرتك مش عارف تتحكم في العربية يبقى عشان حضرتك لسه ما خدتش عليها أو إن العربية زي ما قلت فيها حاجة. لأن نعومة الدريكسيون من أهم مميزات العربية دي.

ثالثا بالنسبة لأنها ما بتحسسكشي بالطريق، فده برضه من مميزاتها مش من عيوبها. يا جماعة إحنا ليه مش قادرين نفهم إن كل عربية بتتصنع بمواصفات خاصة بهدف إستهداف فئة معينة.
يعني
الإلنترا بكل شياكتها ووقرها وجمالها ونعومتها مصممة لأستاذ جامعي أو طبيب أو مهندس نفسه يروح بيته بعد يوم طويل متعب، أو واحد عنده سفر كل فترة. بالتالي دول كلهم عايزين عربية مرييييييييحة ما يحسوش بأي حاجة في الطريق أو في العربية.

البيرسونا بكل رياضتها وشكل عداداتها وقعدة الكراسي بتاعتها وصوت الموتور بتاعها ، عربية رياضية بحتة يعني تمتعك بكل دقيقة في الطريق وتحسسك بمتعة القيادة الشبابية. فهي مصممة للشباب اللي غاوي عربية شكلها روش ورياضي وأداء لا يقل عن الشكل بتاعها.

رابعا بالنسبة لإن حضرتك مستغلي ثمنها فأنا مش شايف كده خالص، أنا شايف إن هي أحسن من اللانسر بمراحل وبسرع منافس للانسر(أقصد اللانسر البومة مش الشارك طبعا).

أما بالنسبة لحكاية إحتكاكها بالمطبات فدي زي ما أنا قلت في الموضوع الي فات، من عيوبها الغبية اللي تكرهك في العربية.

أنا على فكرة من عشاق بروتون وإن شاء الله قريب حشتري جين2 بس كان لازم أدافع عن عربية فعلا غيرت نظرتي تماما لهيونداي، الإلنترا فعلا خلتني أحترم الشركة دي بغض النظر عن توكيلها التعبان (لا مؤاخذة يا عم طارق أبو درة) :)

وطبعا مهما كانت العربية اللي حتشتريها
فأسأل الله أن يكفيك شرها وأن يعطيك خيرها

والسلام ختام

[Samah AbdAllah]

تسمحولى بمداخلة بسيطة

لو الهدف من الموضوع ده تقديم نصيحة لراغبى شراء الالنترا عن تجربة صحيحة ومحايدة فشكرا طبعا لصاحب الموضوع وفى النهاية القرار لكل شخص يشتريها ولا يقتنع برأيه ويفكر فى حاجة تانية

اما اذا كان الهدف هو مقارنة الالنترا ب البيرسونا

فاسمحولى المقارنة دى يبقا مكانها فى قسم المقارنات

[bob12345]

بجد أنا مش عارف حضرتك بتكلم على أنهي عربية....يعني لو هيا كنت وحشة أوي كدة مكنش حد اشترها ......و الالنترا وخدة أفضل عربية في فأتها أكيد لو الباور بتعها كارثة ذي ما حضرتك بتؤل مكنتش اتبعت في أي حتة في العالم و محدش يؤل بتاعت مصر حاجة و بره حاجة تانية

[bob12345]

في حين إن إلنترا محققه مبيعات جامدة في أمريكا و وخدة الجيزة الأنا قلتها الجن2 و البيرسونا مش بتتباع هناك أصلاً

[memo_p910]

ليه الهجوم ده انا اتكلمت على عيوب موجوده فعلا اي حد ممكن يحس بيها غير انها بتتهالك بسرعه مع الوقت مش بتبقى متماسكه زي الياباني مثلا

[ZOOMA]

انا معايا النترا 2008 وعمرى ما حسيت بالكلام اللى انت بتقوله
العربية ولله الحمد فى منتهى الروعة وعلى فكرة اا عامل بيها 23و000 كم والثباث والباور والعفشة فى منتهى الجمال وربنا يحفظها نعمة

[memo_p910]

الجين والبيرسونا بتقول مش بتتباع هناك اصلا تقصد امريكا لانهم هناك بيحاربوا الصناعه الماليزيه ومش عايزينها تنتشر لانهم عنصريين وبيدعموا الصناعه الكوريه لاقصى حد ضد الماليزيه

[bob12345]

أنا عمل ٤٥٠٠٠ كيلو في سنة و ذي الفل كأنها زيرو بسم الله مشاء الله بس هي خليجي مش مصري

[tarekabosdera]

أعتقد ان الاخ صاحب الموضوع هدفه تشويه صورة الالنترا بين الناس وعمل ايحاء بان الالنترا سيارة فاشلة. مع ان الكل عارف مدى
العربية ده في العالم كله.

لذلك انصح بتجاهل هذا الموضوع وترك النقاش لان الاخ كل يوم بيجيب عيب جديد من عنده !!! مش عارف بكرة هيقول ايه كمان.