ما هو تقييمك لوكيل تويوتا و مراكز الخدمه

[Sharky]

ممكن تروح التوكيل او مراكز الخدمة المعتمدة من الوكيل

[mohamed_abobakr]

انا بصراحه شايف انهم ناس محترمين اوى انا بتعامل مع الفرع الجديد اللى قريب من التجمع

[Horsepower]

توكيل ممتاز ممتاز ممتاز. أنا بعمل صيانة سيارة والدي في فرع العباسية دايما و بصراحة مجربتش غيره و معنديش إستعداد أجرب بدون سبب .

[john_samy]

انا جربت صيانة الالف فى ابو رواش. ناس محترمة ومواعيدهم محترمة جدااااااااااا وكمان مكان الانتظار كويس اوى ومكيف وفيه انترنت.

[Berlioz]

ما يقال هنا غريب وفيه تفاوت كبير بعضها يبجل في التوكيل والآخر يحط من قدره بصورة مبالغ فيها.

من واقع خبرتي التوكيل جيد من حيث الأسعار وتوافر قطع الغيار ونظافة المكان "وبس"
أما من حيث الموظفين -حثالة- والمواعيد غير منضبطة والصنايعية جهلة ومهملين وكله كوم وموظفين الاستقبال القذرين كوم آخر (وعلى فكرة مسألة القذارة ليست في سلوكياتهم لا سمح الله لأن ده مسلم بيه) ولكن أقصد قذارة الموظفين شخصياً وعدم احترام المواعيد وتكرار الكذب.


عموماً أنا ما زلت مصر إن العربية ممتازة ولكن التوكيل وسخ سمعتها
على فكرة أنا تعاملت مع توكيل القاهرة الجديدة

[Samir Elshahawy]

انا جربت صيانة الالف فى ابو رواش. ناس محترمة ومواعيدهم محترمة جدااااااااااا وكمان مكان الانتظار كويس اوى ومكيف وفيه انترنت.

و أنا بأتفق مع حضرتك من خلال تجربتي النهاردة

- كان فيه حجز مسبق لصيانة ال 30000 كم و كان ميعادي الساعة 10 و فعلا وصلت في الموعد تماما
- تم استلام العربية و شرحت لمهندس الاستقبال كل ملاحظاتي في الفترة الاخيرة
- تم تحديد موعد التسليم الساعة 12 و لكن .... حتي الساعة 11:30 كانت العربية لسه بالخارج و لما توجهت لمهندس الاستقبال قالي أن عندهم مشكلة ببعض أوناش الرفع و لكنهم سيدخلون العربية بعد فترة الراحة
- فعلا العربية دخلت الورشة حوالي الساعة الواحدة و كان فيه 3 فنيين شغالين فيها و خلصت في أقل من ساعة
- الاعمال التي تمت :
(1).. تغيير الزيت و فلتر الزيت
(2).. تغيير فلتر الهواء
(3).. تغيير البوجيهات
(4).. مراجعة شد السيور و الكاتينة
(5).. الكشف علي الفرامل و ضبط فرامل اليد
(6).. الكشف علي الاطارات و الترصيص و عمل rotation
(7).. مراجعة زيوت (الفرامل - الاوتوماتيك - مياه التبريد - البطارية)
(8).. مراجعة الانوار الامامية و الخلفية و الفرامل و الاشارات
(9).. غسيل الموتور بالفوم و التشحيم

التكلفة الاجمالية = 950 جنيه
في أعتقادي الخدمة جيدة و لكن يعيبها طول مدة الانتظار

[Sharky]

رحت النهاردة اعمل صيانة الـ 30 الف للياريس فى فرع تويوتا التجمع الخامس و كنت حاجز قبلها بأسبوع

دخلت على الساعة 1:15 و بعد السؤال كل 15 دفيفة عن ميعاد إستلام السيارة منى كان الجوب بعد 5 دقائق

على الساعة 2:30 لما قلت ليهم حاخد السيارة و امشى و مش حعمل الصيانة
قاموا فورا بإستلام السيارة منى و قالولى حنعمل صيانة الـ 30 الف اللى عبارة عن تربيط للعفشة و عمل تشيك على السيارة فقط و تكلفتها 350 جم (مافيهاش تغيير الزيت لإنى غيرته بره مع الفلتر ) و حتخلص على الساعة 3:45
فقلت ماشى

طلعت قعدت فوق لحد الساعة 4:00 بالظبط
نزلت لقيت المفأجاة

السيارة زى ما هى فى مكانها و مدخلتش !!!

اتعصبت عليهم و قررت انى امشى و انا طالع على البوابة لقيت مدير الصيانة جه بيقولى معلش اصل عندنا ضغط النهاردة و للعلم الصالة فوق و تحت ماكنش فيها اكتر من 10 افراد قلتله الكلام دا !!

فقالى حندخلها حالا و حنخلصهالك قى 10 دقائق فقط !!

قلت له أضمن منين ان الشغل اللى فى ساعة حتعمله بنفس الدقة فى 10 دقائق

فقالى خلاص براحتك !!

فأصريت على قرارى و هو

أنى أخد السيارة و امشى و ماعملش صيانة الـ 30 الف

[cabtenmaged]

كنت عاوز اقول راي لكن بعد الافاظ اللي كتبت اكتشفت ان العيب مش في التوكيل لكن في العميل اللي متحامل ومتكبر مما أساء لنا كراكبي تويوتا

[Sharky]

كنت عاوز اقول راي لكن بعد الافاظ اللي كتبت اكتشفت ان العيب مش في التوكيل لكن في العميل اللي متحامل ومتكبر مما أساء لنا كراكبي تويوتا

ممكن توضح ؟

[محمد محمد]

كنت عاوز اقول راي لكن بعد الافاظ اللي كتبت اكتشفت ان العيب مش في التوكيل لكن في العميل اللي متحامل ومتكبر مما أساء لنا كراكبي تويوتا

هو حضرتك شغال في التوكيل.

[ahmedsadek82]

بعد الازمة الاخيرة و البلاوي اللي فل عربيات الكرولا,ظهر التوكيل على حقيقته و هي الكدب و الخداع و اخفاء الحقائق و المجادلة في الباطل للاسف دا حال مصر !!, تفرق في ايه جودة الصيانة لما يكونوا ملبسني عربية خربانة من اساسها و بيقنعوني اني انا اللي مبعرفش اسوق ! و انا مش راكب كرولا بس دا شعور كل اللي اعرفهم اركبنها ! صدمة

[cabtenmaged]

يعني لازم أطعن في الناس وأوصفهم بألفاظ زي اللي قال (أنا أسف في إني أردد اللفظ بتاعه) ( حثالة) وإلا أكون شغال في التوكيل ؟

[Berlioz]

التوكيل وسنينه

يعني لازم أطعن في الناس وأوصفهم بألفاظ زي اللي قال (أنا أسف في إني أردد اللفظ بتاعه) ( حثالة) وإلا أكون شغال في التوكيل ؟

الفاضل كابتن ماجد

الحقيقة أنا لا أفهم ما معنى أن العيب "ليس في التوكيل ولكن في العميل المتكبر" !!

وأنا لم أسمع من قبل أن العميل هو الذي يسيئ إلى سمعة السيارة... لأن الأصل هو أن السيارة وخدمة ما بعد البيع هي التي ترضي العميل وليس العميل هو الذي خلق من أجل عيون التوكيل!!

عموماً يا سيدي ما نقوله هو رأينا في التوكيل ولك ما شئت من آراء. والتوكيل وخدمة ما بعد البيع إما مرضية أو غير مرضية مع تفاوت الدرجات.

أما ما نستخدمه من الفاظ في المنتدى فليس فيه ما يعتبر الفاظاً نابية أو بذيئة أو "قبيحة" حتى تتحرج من ذكرها على النحو الذي أسلفت بيانه. وإن كنت تنأى عن الرد علينا نظراً لتدنى لغتنا فهذا شأنك وقد كان من الأجدر بك أن تطلعنا على وجهة نظرك -وهي بالمناسبة فرصة لك لعرض أسلوبك الراقي علينا- وللأعضاء الحرية في تشكيل قناعاتهم كل بحسب خبراته مع التوكيل.

بالمناسبة يا صديقي العزيز لم تجب على سؤال الأخوة هنا "هو حضرتك شغال في التوكيل ولا ايه؟" واكتفيت بطرح تساؤل لا ينبئ عن إجابة محددة، عموماً لو كنت حتى بتشتغل فيه فلك مني كل التقدير مع إصراري على ما سبق وأبديته من آراء بشأن التوكيل نظراً لأن الأمر مهني وليس شخصي. والاختلاف في الرأي لا يفسد للود قضية... وتذكر بأن سمعة المؤسسات لا يصنعها معسول الكلام وإنما هي نتاج مشقة وكد واستمرار المحافظة على السمعة.

لك محبتي

[abouzaid555]

يا جماعة انا والدى كان بيتعامل مع مركز رمسيس فى الاسكندرية و كل ما اقدر اقوله انه لا يصلح الا ان يكون مبيت لراكبى الكارو فقط (عربخانة ) و لمو اخذة

[hany1400h]

توكيل العباسية

عن تجربة قمت بتغيير ماكينة سنتر الباب الخلفي يسار( سنتر لوك ) لسيارة كرولا2001 في مركز العباسية وكانت الخدمة سيئة من حيث خبرة الأيدي العاملة ولما قلت لمشرف الإستقبال مطلوب كام قالي 780 جنيه بعد الخصم !!!!!!! طيب ليه هو ثمن ماكينة السنتركام قاللي 450 جنيه يعن المصنعية 330 جنيه قمت قلتله هى ليه وصلت للمبلغ ده قاللي خدت 3 ساعات لتغيير ماكينة السنتر مع العلم أنها لا تستغرق أكثر من نصف ساعة على الأكثر وبعد الكلام والمناهدة وصلت المبلغ إلى 560 جنيه شوفت الحلاوة بتاعة التوكيل الرئيسي للسيارة في مصر