الحاج خيش بالكورولا و التوكيل بيتكلم في رقم خوزعبلي

[Screenplays]

المختصر المفيد

من اسبوع تقريبا الحاج طلع بالعربيه فوق الرصيف و دخل في عمود نور

و ادي الحاجات اللي اتدمرت :

اكصدام \ فانوس يمين \ سربنتينه التكييف \ ريدياتير \ كرتيره زيت \ ايرباجين \ تابلوه

التقدير المبدئي من التوكيل اكتر من 50 الف جنيه ( جايبين واسطه )

ليه يا عم ؟ اصل العربيه خليجي ... اللهم اني صائم

ما نشتري بالمبلغ ده عربيه تانيه احسن ... بلا قله ادب

[dr.hazem]

حمد لله على سلامة الحج اولا وربنا يعوض عليكم..

الايرباجات لوحدهم تمنهم اكتر من 25 ألف جنيه ومشفتش ولا واحد اعرفه صلحهم بعد اما فتحو لان الارقام بتاعة تصليحهم خوزاعبليه على قولتك...


تحياتي

[hugan]

اشتري عربيه جديده احسن

[khalid_adel]

تصدق انت كده عاملين معاك واجب :) 50 بس
ده انا في فيات برافو فتحت ايرباج بسبب مطب ولان القنطره اتعوجت تقريبا
المهم قنطره وايرباجين وحزامين كانو 50 الف
طبعا غيرت القنطره عنده ب 7 الاف جنيه وجوبت جوز احزمه ب 150 جنيه وروحت لبتاع فيبر لزق التابلوه والطاره ب 150 جنيه كمان بس كل ماادور تيييت تييييت ايرباج فيلور وده عيبه
والحل انك تجيب تابلوه استيراد بالطاره (عشان الايرباجين) يرجعو راكبين تاني تمام وميعملش الايرور ده بس برضه حل مكلف شويه ده لو لقيت طابلو وطاره سلام ايرباجهم مفتحش

[saadelden]

هاتلك نص استيراد ارخص s:

[Ahmod]

المشكلة لما الايرباج بيفتح الموضوع بيكلف جامد !!!

الاحسن انك تتنازل عن تصليح الايرباج لانه في الغالب حسب ماسمعت مش بيرجع زي الاول

وتحاول تظبط التبلوه وربنا يعوض عليك

[waelfarid]

سلامة الحاج اولا
ثانيا لم الدور من ناحية air bag
وهتلاقي كله بييس
السربنتينة تكييف ورادياتير لو فيه استعمال ومضمونة انك تجربها او لو فرق السعر بين الجديد والجيد مش كبير اديها جديد
وطبعا كرتيرة الزيت استعمال ولو التابلوة اتشلفط او مش حتقدرو تتعايشو معاه وهو متصلح شوفو استعمال ولو ربنا مقدركو تجيبو كله جديد ربنا يعوض عليكم او وضبوها وشوفولها عريس -مشتري- وهاتو سيارة تانية لو قفلتو من دي وسلامات كمان مرة للحاج والسيارة

[Screenplays]

المشكله ان الحاج عايزها ترجع زي الجديده و مش هيتعامل الا مع التوكيل و المفروض انه مسافر بالعربيه بعد اقل من شهر و مش عارفين نتصرف ازاي

[S O P H O S]

هو زي ما قال الاخوة لو التصليح بالايرباج هتبقي مكلفة جدا
وطالما توكيل هتبقي ملهاش مفر من المبلغ المطلوب
ان شاء الله خير وتتحل ..

[Unendlich]

و الله غبور و أمثاله دول عباقرة فعلا
ده لو حد فيهم شاف ال thread ده مش هيصدق عينه
مجرد لما طلعت العربية محترمة و فيها airbags مش optional و حمت الناس ... هوووووب عايزين يلغوها بعد أول حادثة
و بعدين يزعلوا انه منزل العربيات من غيرها
تفكير عجيييييييييييييب

[khalid_adel]

و الله غبور و أمثاله دول عباقرة فعلا
ده لو حد فيهم شاف ال thread ده مش هيصدق عينه
مجرد لما طلعت العربية محترمة و فيها airbags مش optional و حمت الناس ... هوووووب عايزين يلغوها بعد أول حادثة
و بعدين يزعلوا انه منزل العربيات من غيرها
تفكير عجيييييييييييييب

على فكره اول ما الايرباج طلع كان بره بيشتكو منه لانه كان بيتفتح عمال على بطال ومن اتفه الاسباب وكانو مش عايزينه لانه ابتدي يأذي الناس على الفاضي طبعا بعد كده اتطور وعملو ال srs airbag وده معناه انه متعدد الفتح وحسب شدة الخبطه وكده
المهم في الاخر الايرباج لو في حادثه جامده لاقدر الله فعلا قد ينقذ حياة راكب لكن لو فتح في حاجه بسيطه ممكن ينوبك منه كسر في الانفر او اليد او كدمه قويه في الوجه والصدر فهمت قصدي
وعامه الايرباج بيفتح مره واحده بس مش مرتين عشان كده بنفكر للراجل يلم الموضوع ازاي عشان طبعا حرام يدفع 50 الف بره الايرباج ب 800 يورو او 1000 دولار لكن هنا ب 50 الف نعمل ايه نقول حسبي الله ونعم الوكيل طبعا

[eng.m7md.ali]

الاستيراد هو الحل
واقسم المبلغ على 3 هيطلع تمن التصليح
وان شاء الله خير

[Ahmod]

و الله غبور و أمثاله دول عباقرة فعلا
ده لو حد فيهم شاف ال thread ده مش هيصدق عينه
مجرد لما طلعت العربية محترمة و فيها airbags مش optional و حمت الناس ... هوووووب عايزين يلغوها بعد أول حادثة
و بعدين يزعلوا انه منزل العربيات من غيرها
تفكير عجيييييييييييييب

مش فكرة عايزين نلغيها !! بس حرام لما الراجل يدفع 50 الاف جنيه عشان يصلح ال Airbags !!

انت لو قدامك عربيتين واحدة ب Airbags وسعرها زايد عن اختها اللى من غير ِAirbags

50 الاف جنيه !! اكيد هتختار اللى من غير

وعموما هو معروف ان تصليحها مكلف جدا !! وغالي وكتير بيقول انها مش بترجع زي الاول !!!

عشان كدة اغلبية الناس اللى بتعمل حوادث لا قدر الله بتصلح العربيات من غير ماتصلح ال ِAirbags

[Unendlich]

مفيش حاجة اسمها مش بتشتغل تاني, لو جاب ال parts و ركبها و كمبيوتر العربية اتعرف على وجودهم و مش مدي error يبقى خلاص تم المطلوب.
هو المفروض بيصلح ال airbags لسلامته و سلامة اولاده/مراته/أي حد راكب معاه, انما لو احنا مستخسرين الفلوس في مقابل سلامة الناس دي على أساس إن ساعات كتير بتبقى العربية دي تحويشة العمر انما إيه يعني لو البني آدم اتكسر اكييييد هيبقى الجبس أرخص من ال airbag يبقى منزعلش من التوكيلات لما تستخسر فينا وسائل الأمان.

و اللي جي يقولك بره زعلوا من ال airbags في الأول أنا مش عارف يعني إيه دخل حاجة فات عليها 20 سنة و أكتر بزمننا الحالي ؟ ولا احنا عشان متخلفين عنهم يبقى دلوقتي نبدأ بقى نخش في مرحلة القفش من وسائل الأمان لغاية أما هما يركبوا طيارات نكون احنا بدأنا نتقبل ال airbags !!!

[Dr.Mostafa Anwar]

نصيحة أخوية لأني عملت حادثة بكورولا مشابهة لحادثة والدك وعملت فتك وصرفت 30 الف عليها بس بره التوكيل عند ناس كانوا شغالين في التوكيل ....

بيع العربية حوادث وكمل على الفلوس اللي تجيلك واشتري حاجة فابريكة ... اوعى تصلح عربية حصل فيها حادثة في الربع الامامي ووصلت للشاسيه والكابينة الداخلية أبدا أبدا أبدا خاصة في مصر عشان هتصرف عليها في السنين اللي بعد كده قد اللي كنت هتحطه عشان تشتري حاجة فابريقة ...

وحمدلله على سلامة الوالد وربنا يعوض عليكم