..:: مناقشة واقتراحات حول سرقة اللوجو الخاص بسيارات تويوتا ::..

[abofandy]

بسم الله الرحمن الرحيم

تحيه طيبه لكل مرتادى منتدانا الجميل

((( نيل موتورز )))

وبصفه خاصة منتدى الوحوش اليابانيه

((( تويوتــــا )))

موضوعنا اليوم هو مناقشة عامه بتدور حول سرقة اللوجو الخاص بالسيارات عموما الخاص بكل شركه علشان نقدر نجمع الاراء والاقتراحات بخصوصه

طبعا اللوجو الخاص بالشركه المصنعه بيتم تصنيعة بتقنيه خالصه من النيكل كروم بجودة وطبقات معينه ضد المياه والحراره حتى لا يتلف او يتم تقشيره بعد فتره من الوقت ودة بيحصل بالطبع مع اللوجو التقليد او الصينى بعكس الاصلى الى بينزل مع السياره

طبعا الموضوع يبان للناس انه تاف او غير موجدى او بدون قيمه لكن لو حصل معاه فدى حاجة بتضايق جدا وتزعل خصوصا لما تشوف الى سارقها ممكن استفدته منها تبقى :

* يبيعها لاى محل اكسسوار بثمن رخيص جدا

* يعلقها على التك تك او الميكروباص وتبص فى التك تك تلاقى ماشاء الله يحمل لوجو لكل الماركات العالميه وكان التك تك هو الى بيورد للشركات دى اللوجو

* هوايه زى هواية جمع الطوابع كدة

* واحد مغلول بيعملها فى الناس زى ما اتعملت فيه قبل كدة

دة فيديو بيوضح ازاى اللوجو ممكن يطلع من مكانه بكل سهولة ودى مثال عل الكورولا 2014 النسخة الامريكيه بكل سهوله بتطلع فى الفيديو فى الثانيه 00.21

Surprisingly Corolla: A Badgeless Test Drive - YouTube

وفى النهاية

بقى للموضوع ان نبحث عن حل

لان انا كنت من الناس المحظوظة الى اتسرق منهم اللوجو الامامى للكورولا

واصبح الحل يتخلص فى 3 نقاط وهما محل النقاش فى الموضوع

وهما بالترتيب :

1 - انك تتسرق وتحمد ربنا وتجرى على التوكيل تجيب اللوجو الاصلى ودة سعره هيبقى غالى نسبينا

(( 170- 190 جنيه اللوجو الواحد دة للكورولا ))

2 - انك تتسرق وتحمد ربنا برضه وتجرى على اى حد بتاع اكسسوار وتشترى لوجو تقليد رخيص بس هيقشر مع المياه والغسيل والشمس

3 - ان احنا نلاقى حل لتثبيت اللوجو الاصلى بطريقة متبوظش المنظر العام ومتضرش الشبكه الى مثبت فيها اللوجو لان اللوجو ماسك فيها بكلبسات ضغط وسهله الفك زى ما شوفنه فى الفيديو السابق

[ACE]

لوجو التيوتا بيتسرق علشان يتحط على الميكروباصات الصينى
عموما انا شايف انك تركن فى مكان امان مالهاش حلى تانى ويفصل تغطى العربية

[abofandy]

والله الحرامى ما بقت تفرق معاه
وبعدين دى اتسرقت فى اقل من دقيقة
ركنت العربية قدام كنتاكى يدوب ادخل اجيب وجبة واطلع
بدوي دخلت دفعت واستلمت الوجبة لان كنت حاجزها وطلعت لقيتنى متعلم عليا فى العلامة
الدنيا بقى قفلت حتى الوجبة اترمت من الضيقة والفصلان

[Mustafa_Zain]

ربنا يصبرك بجد شعور قمة في الغلاسة...

كان في عضو اقترح إن احنا نلزقها بالايبوكس الشفاف...

[abofandy]

فعلا حاجة تخنق و تضايق جدا
بس انا معرفش ايه الايبوكس دة
بس ناس اقترحت لازق وش وضهر فى الفراغ الى فى الدائرة بتاعه اللوجو لانها من الخلف مجوفة ممكن يدخل فيها لازق وش وضهر ونقطة اميبر على طرف اللوجو بس الواحد خايف من الاميير دة بصراحه لانه عنيف اووى

[omar_saad]

هما فيه نوعين من السيارات دائما بتحط علامة تويوتا
1- الميكروباصات الصيني التقليد.
2- السيارة جريت وول فلوريد -- الصيني برده -- تقليد الياريس

[abofandy]

هما فيه نوعين من السيارات دائما بتحط علامة تويوتا
1- الميكروباصات الصيني التقليد.
2- السيارة جريت وول فلوريد -- الصيني برده -- تقليد الياريس

هى مش المشكلة بتتعلق على اية او بتتسرق علشان اية
المهم ان احنا نلاقى حل نوقف بين السرقة دى
او طريقة تكون مفيدة نثبت بيها العلامه دى علشان متتسرقش

[S O P H O S]

ملهاش غير حل هتتلزق بقوة
وهيخلي الشكل مش حلو اوي

[abofandy]

لو اتلزقت بطريقة شيك مش.هتبان او تبوظ المنظر جامد

[amr011111]

للأسف عندى برضه وانا فى التوكيل والمهندس بيشيك على الشروخ اللى فى العربيه قاللى العلامات اللى على التلات طاسات مش موجوده
مكتشفتهاش غير هناك
ربنا ينتقم من اللى سرقهم ويصرفها على صحته

[abofandy]

للاسف فعلا حاجة تخنق وتضايق بجد
حسبى الله ونعم الوكيل

[ahmad_82_03]

انا جالى اكتئاب اكتر من البلد بعد مقريت التوبيك ده :s
معلش على الطاقة السلبية

[abofandy]

فعلا والله بقت حاجة تخنق
بعيدا عن الخرابيش و قطع الطرق والتثبيت والتكاتك والتروسكلات والموتسكلات الصينى
دلوقتى سرقة العلامات واللوجو

[Hany Saad]

والله الحرامى ما بقت تفرق معاه
وبعدين دى اتسرقت فى اقل من دقيقة
ركنت العربية قدام كنتاكى يدوب ادخل اجيب وجبة واطلع
بدوي دخلت دفعت واستلمت الوجبة لان كنت حاجزها وطلعت لقيتنى متعلم عليا فى العلامة
الدنيا بقى قفلت حتى الوجبة اترمت من الضيقة والفصلان

دكتورنا المحترم أبو فندى
مش قادر أقول لحضرتك أنا اضايقت اد ايه لما سمعت بالموضوع ده لأنى زى حضرتك و بحب العربية تبقى دايماً نظيفة فلما حد يسرق اللوجو ده بيشوه شكل العربية جداً
الموضوع ده منتشر عندنا جداً جداً فى اسكندرية من مدة طويلة و لجميع العربيات....صحيح مسمعتش قبل كده انه بيتسرق بهذه السرعة المهولة خلال ما انتا بتشترى وجبة و لكن اى حد بيبيت عربيته فى الشارع معرض ان اللوجو يتسرق و ده اقل واجب و الرينو متبهدلة فى الموضوع ده من 2005 من ايام الميجان و بتبقى ورا و قدام بالمرة بقى..:)

فيه لزق كويس جداً عند radio shack عامل زى الأمير و لونه شفاف و محطوط فى علبة زى قطرة العيون و سعره حوالى ٢٥ جنيه
العلبة صناعة أمريكا و اللزق قوى بطريقة لا توصف و ممكن لو حابب و انت بتلزق تضيف على اللزق بعض ذرات صابون غسيل الملابس البودرة و ده بيتفاعل مع اللزق و بيخلى اللوجو زى الحديد فى تجويف الشبكة و استحالة يطلع من مكانه

مشكلته ان لو الحرامى اتغابى عليه ممكن يشوه الشبكة او يكسرها فى هذه المنطقة من قوة اللزق!!!! و لكن اتوسم انه لو لقاه ماسك جامد يسيبه و يدور على ضحية أخرى

بالمناسبة سعر اللوجو الأصلى فى تويوتا لو زى ما حضرتك بتقول يعتبر معقول جداً لانه فى الميجان من مدة كان بيوصل لحوالى ٤٠٠ جنيه و مش عارف بقى مع الفلوانس لما حجمه بقى مضاعف سعره ممكن يوصل كام و بصراحة مش عايز اعرف .....:):)

مرة اخرى بأسف على اللى حصل فى عربية حضرتك و ربنا يحفظ الجميع و يكفينا شر الطريق

تحياتى

[abofandy]

باش مهندس هانى
دائما ينورنى ويشرفنى مرورك الكريم
ودائما معلوماتك تزدنى علما
وفعلا بقت حاجة مستفزة جدا للسرقة
وان شاء الله اسئل ع اللزق دة واحطة بامر الله