مطلوب مساعدة: شراء كورولا

[sh21s]

أرجو من خبراء تويوتا و من سبق لهم شراء الكورولا مساعدتي لأنها أول مرة أشتري عربية علي الزيرو.
إن شاء الله سنقوم بشراء سيارة كورولا لوالدي و السيارة التي وقع عليها الاختيار هي كورولا 2009 النسخة professional MMT لونها أسود و هنشتريها من التوكيل فرع الهرم، و الدفع نقدي.

لدي بعض الاستفسارات التي أرجو أن أجد الإجابة عليها:
1- ما هي الأوراق الخاصة بالسيارة؟!!
2- ما هي الأدوات التي سأستلمها مع السيارة؟
3- بالنسبة لخطوات التعاقد كما عرفت، هناك طريقتان إما استلم العربية بدون الأرواق وبعد يومين ورق الافراج الجمركي يخلص و نروح مع مندوب الشركة للترخيص،
أو أنتظر اليومين و استلم العربية مع الورق و المندوب ونرخص في نفس اليوم
طيب أنا هادفع كاش و ورق العربية لسه مخلصش!! النظام ده هو المتبع ؟؟ و لو الورق أتأخر التصرف يكون إزاي؟؟ و يا تري الأفضل استلم العربية ولا الاستلام يكون مع الورق؟؟؟

أرجو منكم النصيحة ولو هناك أي إضافات سأكون في غاية الامتنان،
و شكرا مسبقا

[محمد محمد]

الأوراق هتبقي الفاتورة بتاعة الشراء وفيه ورقة بتبقى طالعة من الجمرك فيها رقم شاسيه العربية
وجواب المرور هيطلع بعديها بيومين تلاتة وكمان بتستلم كتيب الضمان معاه وسواء استلمت العربية بالورق او من غيره مش هاتفرق استلمها احسن وقت الدفع بس هاتمشى بالفاتورة وايصال الأستلام وتبقى اتأكد من الكتالوج.
بالنسبة لعدة العربية بتبقى تقريبا عدة كاملة فيها مفك وزردية بس مش زى العادية بتاعتنا والكوريك هاتلاقيه مع الأستبن وفيه حديدتين لقطر العربية وفيه مفتاح مش فاكر 10 او 12 وتبقى جرب كل حاجة فى العربية افتح الشنطة والتانك وشغل المساحات .
بس كان فيه سؤال ليه اخترت الmmt.

[sh21s]

في البداية شكرا على ردك يا أستاذ أبو الوليد،
أنا كنت بسأل عشان المعرفة و عشان مدير المبيعات قال إننا ندفع المبلغ كله و بعد كده هيعمل تحويل جمركي من فرع الوايلي لجهة الترخيص، وبكده يكون هناك ورقة مهمة ناقصة و أكون دفعت كامل المبلغ وبصراحة لم يقنعني هذا الكلام فأردت التأكد ممن سبق لهم الشراء.

أما بالنسبة لل mmt فالسيارة سيركبها والدي والاختيار كان لعدة أسباب:
1- السيارة الحالية بيجو 504 و المطلوب ناقل أتوماتيك و بالنسبة للوالد ليس له خبرة بالأتوماتيك سابقة فأي نوع سيتعامل معه بسهولة.
2- طريقة القيادة نفسها من النوع الهادي ، و بذلك لا توجد مشكلة في الmmt
3- السعر طبعا عامل مهم لأن النوع الأتوماتيك الآخر يفرق 15 ألف وبذلك نكون تخطينا الميزانية.

و سأستغل الفرصة و أسألك رأيك في الmmt و شكرا مرة ثانية

[askassem]

إن شاء الله ربنا يبارك لك فيها و يكفيك شرها
أنا عن نفسى معايا ال mmt و مبسوط منها و بصراحة أنا جبتها و أنا مقتنع بيها لأن فعلا عزم العربية أشد من الأوتوماتيك

[د.محمود صلاح]

لما اشتريت عربيتى الزيرو صينى من سنتين عملت الآتى

استلمت العربية بفاتورة ودفعت كامل الفلوس - من التوكيل

اجرت نمر تجارية ب 50 ج اليوم عشان رخامة المرور

بعد 3 ايام استلمت جواب المرور موجه الى المرور التابع له وبه شهادة انها خالصة جمركيا

فكيت نمر التجارية وسلمتها لمعرض وروحت المرور ارخص

[som3aa]

بص حضرتك يا ريت تروح التوكيل تعمل test drive لل mmt الاول قبل ما تشترى و دى حاجة مهمة جدااااااا
لان فى ناس الفتيس دا دايقهم جداااا و فى ناس شكروا فيه
فهو ممكن يضايقكم جداااااا و تبقى مشكلة كبيرة بعد كدا
و خصوصا ان سعر اعادة البيع بتاع الmmt واقع خالص بسبب الموضوع دا

يعنى جربها فى السواقة كويس اوى و خد راحتك و بعدين احكم

[محمد محمد]

و سأستغل الفرصة و أسألك رأيك في الmmt و شكرا مرة ثانية

الفتيس جيد جدا ينقصه حاجتين سرعة سادسة وان يكون المانيوال بتاعه غير تقليدي بحيث الواحد يفقد الاحساس بالنقلات فى كل الغيارات .
تانى حاجة لازم نعرف ليه الفتيس نزل قواعده مانيوال مش اوتوماتيك زى الأستيب ترونيك السيارة فى الأصل موجهة للسوق الأوروبى وده واضح كمان ان الكتالوج مافيهوش كلمة عربي وده لأن فى اوروبا بيحبو سواقة المانيوال اكتر من الأوتوماتيك وفى مصر العكس بنحب الأوتوماتيك اكتر فعملوا الفتيس ده عشان يراضوا الأتنين بس واضح ان فيه تحيز جامد من تويوتا للسوق الأوروبي .
الفتيس ليه مزايا كتير سحب-توفير فى استهلاك البنزين بالذات على الوضعe-تسارع افضل من الأوتوماتيك العادى-تحكم افضل فى العربية-رفاهية ودلع.
المشاكل اللى كانت بسبب الفتيس ده ترجع ان الناس اللى اشترت العربية كانوا فى الأصل بيسوقوا اوتوماتيك ومش متعودين على المانيوال ده غير التوكيل اللى ماكنش بيفهم الناس طبيعة وطريقة عمل الفتيس
وممكن حضرتك تطالع الموضوع ده

http://www.nilemotors.net/Nile/86232-m-mt.html

[sh21s]

askassem
جزاك الله خيرا، وبارك لك فيما تملك.

د.محمود صلاح
شكرا لنقلك تجربتك ، كنت في احتياج للتأكد لأنه كانت لأحد أقاربي تجربة سيئة مع موزع معتمد لتويوتا ، فبعد أن دفع المقدم 20 ألف و كان المفروض يستلم ياريس والأوراق خالصة بعد يومين، فوجئ بأن العربية تم نقلها فرع مختلف وبيعها و لم يتم توفير بديل و كمان ماطلوا في رد المقدم، عشان كده كنت بسأل عن التوكيل و لو حد اشتري منه مباشرة فوري. شكرا ثانية.

som3aa
موضوع تجربة العربية ده مكانش في بالي خالص. هاحاول أروح في أسرع وقت هشان يكون فعلا القرار عن اقتناع كامل. شكرا للنصيحة

ابو الوليد المصرى
من المهم جدا أن يكون الواحد فاهم الأدوات التي بيتعامل معها، و حضرتك وضحتلي الكثير. شكرا جزيلا لاهتمامك وردودك.