أنا و السيريون 150000 كم من الحب والسعادة

[askoda]

التقييم المنتظر عن السيارة التي ابهرت أحمد طوال 5 سنوات و-150000 كم

أولاً : الشكل الخارجي

أنا ك أحمد بحس إن السريون دي من غير ضرب ولا تريقة .............. ميني كوبر الياباني

ثانياً : الانتيريور

التقييم هنا هيكون من شقين الشق الأول الخامات:
ودة واضح من أول ماتدخل الصالون بتاع العربية انها مش عربية luxury بس الخامات متوسطة إلى جيدة ودة عشان كمية البلاستيك إلي في التابلوه والببان بس يعوض دة شوية الحتة السيلفر إلي في النص بتاعت الكاسيت والفرش الرائع بتاعها من أول موديل 2008

التقييم 6/10

الشق الثاني الاستخدامات:
ودة بقى باردو واضح جداً لكل إلي ركب العربية دي معايا انها عملية جداً فيها 2 كب هولدر قدام الفتيس وفي الببان إلي قدام و في أماكن كتييير للتخزين ودة من وجهة نظري حاجة حلوة بس بالنسبة لمراتي بيخليني أملا العربية كراكيب كتير
الوسع الداخلي حدث ولا حرج بس بردو لازم نتكلم عن الراحة الكرسيين إلي قدام مريحين جداً
بس الكنبة مش قوي

موضوع إن الكنبة بتقفل كلها وبتبقى سترايت أسطوري بمعنى الكلمة وبيخلي مساحة التحميل الخلفية تحفة

التقييم 9/10

ثالثاً الموتور :

كل مابفتح الكبوت بنحني إحتراماً للماتور الاختراع دة حجمه صغير جداً بس قدرتو قويه جداً بحس اني راكب عربية 1600 cc مش 1300 cc
التأثير على الموتور من التكييف ضعيف بس ماقدرش أقول إنو منعدم

إستهلاك البنزين بتاع العربية دي موفر جداً لو معاك مانيول وموفر بس لو معاك مانيوال وبتسوق بتهور أوتوماتيك وبتسوق هادي لكن لو معاك الاوتوماتيك وبتسوق بتهور هتبقى زيها زي أي عربية 1600 CC

التقييم 9/10

رابعاً الفتيس :

الفتيس أوتوماتيك عادي جداً بس بحس إن اداؤه أحسن مع الرجل التقيلة يعني لم بمشي مستعجل بحس إن الفتيس كويس جداً طبعاً أنا باستخدم كل حاجة 1 و-2 وال-OverDrive
يعيبه بطء الاستجابة في بعض المواقف بس أنا بتغلب على الموضوع دة باستخدام ال-1 وال-2 وال-OverDrive

التقييم 7/10

خامساً الثبات :

مع إن شكل العربية لأول وهلة لا يدل على الثبات بس لو ركزت هتلاقي العربية بتتمتع بقاعدة عجلات عريضة والكاوتش مكانه على الاطراف ما يؤدي إلى ثبات جميل جداً في الغرز والمناورات الحادة بس يعيبها إن في الملفات لو فرملت جامد بتحس إن العربية مش UnderControl قوي

التقييم 8.5/10

سادساً الفرامل :

الفرامل بصراحة قويه وعمرها مخذلتني بذات مع وجود ال-ABS في العروسة الجديدة بس لو كنت الفرامل إلي ورا ذي إلي قدام سكاكين كانت بقت حكاية
مع وجود عامل الاعتمادية والعمر الطويل للتيل الاصلي اللي غيرته في المنوال على 45000 كم وفي الاوتوماتيك على 37000 كم

التقييم 8/10

سابعاً الباور :

ناعم جداً ومفيد في حالة لو توقف قدامك ميكروباص من اياهم بس مشكلتوه إنه مش بيتقل على السرعات بالدرجة المطلوبة

التقييم 8/10

ثامناً العزل :

العربية بتسمع صوت الموتور بقوة لو ال-RPM عدا ال-4000 ودة حاجة كويسة بالنسبالي عشان بحب أحس بالموتور بس ساعة بكون مضايق منه لو أنا مزاجي مش رايق

التقييم 6/10

تاسعاً التكييف :

حلو جداً وسريع ونادراً مبحتاج اني اشغله على الدرجة الرابعة بس للأسف مضيع قوة التكييف في المساحات الشاسعة من الزجاج اللي في العربية بس أنا شايف اني لو ركبت عزل حراري بتاع 3M هيبقى حلاوة وهيوصل لورا بقوة أكبر

وكمان المشكلة ان مافيش فلتر تكييف

التقييم 8/10

عاشراً العفشة :

العفشة لو من منظور الاعتمادية والرياضية تاخد 9/10
بس لو من منظور الراحة والدلع تاخد 6/10

أخيراً أحب أقول لحبيبتي السريون انها حبي الأول في عالم العربيات وانها واحدة من أحسن العربيات إلي نزلت مصر وهفضل طول عمري أقارن بينها وبين أي عربية تانية هركبها إن شاء الله

[bmya]

التقييم المنتظر عن السيارة التي ابهرت أحمد طوال 5 سنوات و-150000 كم

أولاً : الشكل الخارجي

أنا ك أحمد بحس إن السريون دي من غير ضرب ولا تريقة .............. ميني كوبر الياباني

متفق معاك جدا خصوصا لو مجنطها مع الاكصدامات الاسبور تحس انها عريضه وواطيه على الارض

ثانياً : الانتيريور

التقييم هنا هيكون من شقين الشق الأول الخامات:
ودة واضح من أول ماتدخل الصالون بتاع العربية انها مش عربية luxury بس الخامات متوسطة إلى جيدة ودة عشان كمية البلاستيك إلي في التابلوه والببان بس يعوض دة شوية الحتة السيلفر إلي في النص بتاعت الكاسيت والفرش الرائع بتاعها من أول موديل 2008

التقييم 6/10

معاك برده ان الخامات متوسطه لجيده وخامات الباب خصوصا الجزء الرمادي اللي في زرار الزجاج ضعيف اوي لكن خامات التابلوه كويسه اوي هي بلاستيك بس جيد جدا بالنسبه للحته السيلفر دي للاسف عندي في حته منها لونها راح بسبب ان وقع عليها معطر
الشق الثاني الاستخدامات:
ودة بقى باردو واضح جداً لكل إلي ركب العربية دي معايا انها عملية جداً فيها 2 كب هولدر قدام الفتيس وفي الببان إلي قدام و في أماكن كتييير للتخزين ودة من وجهة نظري حاجة حلوة بس بالنسبة لمراتي بيخليني أملا العربية كراكيب كتير
الوسع الداخلي حدث ولا حرج بس بردو لازم نتكلم عن الراحة الكرسيين إلي قدام مريحين جداً
بس الكنبة مش قوي

موضوع إن الكنبة بتقفل كلها وبتبقى سترايت أسطوري بمعنى الكلمة وبيخلي مساحة التحميل الخلفية تحفة

التقييم 9/10

معاك جدا بس الكنبه مريحه عادي لكن عشان هي مسطحه فتحس انك بتتزحلق شويه منها هههههه

ثالثاً الموتور :

كل مابفتح الكبوت بنحني إحتراماً للماتور الاختراع دة حجمه صغير جداً بس قدرتو قويه جداً بحس اني راكب عربية 1600 cc مش 1300 cc
التأثير على الموتور من التكييف ضعيف بس ماقدرش أقول إنو منعدم

إستهلاك البنزين بتاع العربية دي موفر جداً لو معاك مانيول وموفر بس لو معاك مانيوال وبتسوق بتهور أوتوماتيك وبتسوق هادي لكن لو معاك الاوتوماتيك وبتسوق بتهور هتبقى زيها زي أي عربية 1600 CC

التقييم 9/10

معاك جدا فعلا الموتور قوي ماشاء الله التكييف تأثيره بيبان قوي قبل ال 100 بعد ال 100 بيقل تأثره نوعا ما وطبعا عشان انا مكبر الجنط ومعرضه فبيبان عندي اكتر
واستهلاك البنزين فعلا لو ماشاء هادي ورايق ونقلاتك كلها على 3000 بالكتير حتى لو اتوماتيك هتلاقي الاستهلاك تحفه اما لو بتقرص وتجري كتير زي حالاتي هتلاقيها بتسف البنزين

رابعاً الفتيس :

الفتيس أوتوماتيك عادي جداً بس بحس إن اداؤه أحسن مع الرجل التقيلة يعني لم بمشي مستعجل بحس إن الفتيس كويس جداً طبعاً أنا باستخدم كل حاجة 1 و-2 وال-OverDrive
يعيبه بطء الاستجابة في بعض المواقف بس أنا بتغلب على الموضوع دة باستخدام ال-1 وال-2 وال-OverDrive

التقييم 7/10

هو ده اللي قصدي ان الفتيس تقيل تقريبا هو معمول على انه يبقى على النظام اتلاقتصادي بالغصب ههههههههه بس لما تقرص او كيك داون او استخمت النقلات بتاعت الفتيس تلاقي العربيه اتعفرتت بس صراحه رخم

خامساً الثبات :

مع إن شكل العربية لأول وهلة لا يدل على الثبات بس لو ركزت هتلاقي العربية بتتمتع بقاعدة عجلات عريضة والكاوتش مكانه على الاطراف ما يؤدي إلى ثبات جميل جداً في الغرز والمناورات الحادة بس يعيبها إن في الملفات لو فرملت جامد بتحس إن العربية مش UnderControl قوي

التقييم 8.5/10

الثبات فعلا ممتاز و لو عرضت الكاوتش هتلاقيه فرق جداااااا كمان

سادساً الفرامل :

الفرامل بصراحة قويه وعمرها مخذلتني بذات مع وجود ال-ABS في العروسة الجديدة بس لو كنت الفرامل إلي ورا ذي إلي قدام سكاكين كانت بقت حكاية
مع وجود عامل الاعتمادية والعمر الطويل للتيل الاصلي اللي غيرته في المنوال على 45000 كم وفي الاوتوماتيك على 37000 كم

التقييم 8/10

معاك برده لو انا معنديش abs ونفسي فعلا انها تكون سكاكين هتفرق جامد انا عمال ادور في الحوار ده مش عارف فرامل الكورولا ال 2007 تنفع تركب عندنا ولا لاءه هي سكاكين وره في ال 1600

absسابعاً الباور :

ناعم جداً ومفيد في حالة لو توقف قدامك ميكروباص من اياهم بس مشكلتوه إنه مش بيتقل على السرعات بالدرجة المطلوبة

التقييم 8/10

دي مش معاك فيها الباور بصراحه ممتاز جدا على السرعات كلها وبيتقل جدا انا بمشي 160 170 بكون يدوب ساند ايدي عليه وعمري مابيروح يمين او شمال ده غير انه بيعدل نفسه في ثانيه واحسن من الزيت بكتييييييير

ثامناً العزل :

العربية بتسمع صوت الموتور بقوة لو ال-RPM عدا ال-4000 ودة حاجة كويسة بالنسبالي عشان بحب أحس بالموتور بس ساعة بكون مضايق منه لو أنا مزاجي مش رايق

التقييم 6/10

معاك

تاسعاً التكييف :

حلو جداً وسريع ونادراً مبحتاج اني اشغله على الدرجة الرابعة بس للأسف مضيع قوة التكييف في المساحات الشاسعة من الزجاج اللي في العربية بس أنا شايف اني لو ركبت عزل حراري بتاع 3M هيبقى حلاوة وهيوصل لورا بقوة أكبر

وكمان المشكلة ان مافيش فلتر تكييف

التقييم 8/10

الرخامه فعلا انه مفهوش فلتر تكيف مش عارف ليه التكييف فعلا اداؤه كويس جدا ولو عملت العزل على المواسير هتلاقي الاداء اتسحن اكتر وهتلاقي التبريد اسرع

عاشراً العفشة :

العفشة لو من منظور الاعتمادية والرياضية تاخد 9/10
بس لو من منظور الراحة والدلع تاخد 6/10

منه لله الدونجل هو اللي منشف العفشه يعني العفشه قدام طريه الوره بقه الدونجل عامل شغل معاها يعني مثلا اخد فاصل كوبري تعدي بالعجل قدام عادي تيجي اللي وره تعدي تلاقي دبه بغباء

أخيراً أحب أقول لحبيبتي السريون انها حبي الأول في عالم العربيات وانها واحدة من أحسن العربيات إلي نزلت مصر وهفضل طول عمري أقارن بينها وبين أي عربية تانية هركبها إن شاء الله

انا كمان بحبها اوي بس كل ماشوف اسعار قطع غيارها بتجنن ربنا يبارك لك فيها ياباشا

[S O P H O S]

جزء خامس رائع ونهاية ممتازة للتقيم
ولكن ان شاء الله تظل الاسطورة الصغيرة تسطر التاريخ فشوارع مصر
ربنا يبارك
تحياتي ..

[mohamed_rhem]

ما شاء الله تقرير اكثر من رائع

يا خسارة خلصت الحلقات

[Hosaam]

أييه الحلاوة دى ، ربنا يباركلك يا أخى زى ما أمتعتنا بالحلقات الرائعة دى و بالأسلوب المتميز ده ، أديك شايف الناس كلها كانت مستنية بقية الحلقات أزاى ، أدد أييه التقييم ده حيفيد أى حد مقدم على شراء السيريون ، وأدد أييه تقييمك النهائى للسيارة كان محايد ، عارف يمكن لو كنت أديت جميع بنود التقييم 10/10 كنا قلنا الموضوع فيه تحيز واضح ، لكن حضرتك بسم الله ماشاء الله أديت كل حاجة حقها صح بناءا عن خبرة فعلية و ممارسة عملية طويلة ، و برغم أن فيه بنود خدت 6/10 و 7/10 الا أن ده لم يغير من رأيك النهائى فى العربية أو من أنها كانت سنين حب و سعادة أدامها الله عليك و بارك لك فيها .. تحياتى

[Imhotep]

ههههههههههههه خير ختام..... ما شاء الله بعد 5 سنين جواز عرفت خلاصة امكانيات العروسة...... نفسها فى الطبيخ عامل ازاى..... استغلالها لمساحات التخزين و الصندرة فى الشقة عاملة ازاى..... تدبيرها فى مصروف البيت عامل ازاى...... و هكذا ههههههههههههههه

[aliabutaleb]

انا مستمتع بكل كلمة مكتوبة كأنها مش عربيتي :)

[askoda]

انا مستمتع بكل كلمة مكتوبة كأنها مش عربيتي :)

و دي حاجة كويسة ولا وحشة ؟؟

[aliabutaleb]

و دي حاجة كويسة ولا وحشة ؟؟

حلوة طبعاً.
معجب بطريقتك في الحكي

[Imhotep]

انا مستمتع بكل كلمة مكتوبة كأنها مش عربيتي :)

جواز askoda كان عن حب. . . جواز aliabutaleb شكله كان جواز صالونات قصدى معارض ههههههههههه