نصيحة بخصوص موتور شاريد اتوماتيك 1990

[medo5th]

بسم الله
دى اول المشاركات و ارجو انى الاقى رد
اشتريت عربية شاريد و اخدت واحد الله يسامحه كان فتاى علشان يكشف ع العربية و قالى اتوكل على الله العربية زى الفل
اخدتها موديل 90 اتوماتيك 1000 سى سى
اخدتها على 24000
بعد الشراء وجدت التالى
الموتور محتاج تغيير و ذلك بعد ماغيرت جوان وش سلندر بحوالى 300 ج شامل الادوات و المصنعية و صلحت كر اربرتير 170 ج
فردة شاسيه مشروخة بسبب مساعد ناشف
الفردة التانية مشروخة و ملحمة
و اخيرا و ليس اخرا على الاطلاق
عايزة جوز مساعدين امامى
و لسه اللحمات

المهم دلوقتى
اقدر اغير الموتور ل 1300 سى سى اتوماتيك و لا لأ
اقدر ابيع الموتور القديم ؟
الفتيس سليم اقدر ابيعه

و اسعار الموتور كام سواء ال 1300 او 1000 سى سى
و اى معلومات اضافيه ياريت محدش يبخل

[medo5th]

طب اسال فين اذا هنا مفيش اجابه :(

[medo5th]

طب اسال فين اذا هنا مفيش رد

[upaupa]

بسم الله

المهم دلوقتى
اقدر اغير الموتور ل 1300 سى سى اتوماتيك و لا لأ
اقدر ابيع الموتور القديم ؟
الفتيس سليم اقدر ابيعه

و اسعار الموتور كام سواء ال 1300 او 1000 سى سى
و اى معلومات اضافيه ياريت محدش يبخل

بص يا سيدى:
موتور شاريد 1000 استيراد اخر معلومه موجوده على النت هو انك ممكن تلاقيه بس فى بورسعيد واخر حاجه قريتها كانت بتاريخ 2012 شهر سته واحد كتب يقول/:

"
لموتور بتشتريه من بورسعيد من مستورد كبير يعني يكون عنده مش اقل من 10 مواتير شاريد

انا شخصيا اشتريت من العربي سلام

بكل مشتملاتهم يعني فتيس وتكييف وفرن شكمان وخراطيمه كمان

بتستنضف واحد وتبص المسامير ولو غير جوانات بيبقي باين قوي

وتفتح غطاء الزيت تبص علي الشواكيش حالتها عاملة ايه

والخراطيم متبهدله ولا جديدة والموتور كربراتير تفك العمة وتبص علي الكربراتير

تدور الموتور وتخلي معاك قطعة قماش كبيرة تسد بيها فرن الشكمان لان الصوت حبيقي مزعج ومش حتعرف تمييز اذا كان الموتور فيه حاجه ولا لاء

ودنك مع صوت الموتور يكون تقريبا ملوش صوت وطبعا مفيش ترزيع ولا تخبيط

طبعا تكون متأكد ان الموتور فيه زيت علشان ممكن يكون شايلين منه الزيت ولما تزود بنزين ميطلعش بخر من فايز العمة

وتاخد الموتور وتاخد الافراج النهائي والفاتورة كله ابيض

ماعدا فاتورة صورة ده بياخدوها وانت خارج من الجمرك وصورة الافراج

تركب الموتور ولو تمام ترجع بورسعيد تعمل تصدير من المرور مجانا

ولا داعي للتعامل مع اي مخلص تاخد رقم صادر والشغل ده

انصحك بالمهندس سيد الفراش تركب عنده الموتور زي ما انا عملت

وان شاء الله تجيب حاجه حلوه"


لاحظ ان ده عام 2012 ومش عارف 2015 لسه فيه فى بورسعيد والا لسه اخطف رجلك لهناك واسأل او انتظر يمكن حد كان هناك قريب يحن عليك ويجاوب



موضوع تغيير الموتور بواحد 1300 شاريد او اى ماركه دورت غليه قبلك فى النت شهور طويلة ولم اعثر على حد عمل كده ...بس ده لا يمنع من الامكانية ,,,, تابع السؤال والبحث ولو لقيت طريقه قول لى ولكننى عثرت على احدهم يفول أن:

الشاريد 1000 سي سي غير ال 1300 من حيث قواعد الموتور مبدئيا وان تعديل ال 1000 حيتطلب موتور بفتيس وعفشة امامية وكبالن ده ان نفع وكان الرجل صادقا مش بيفتى وخلاص

أقدر ابيع الموتور القديم ....تقدر
أقدر ابيع الفتيس الاوتو السليم ... تقدر ...ولو حبيت تبيعه قول لى قبل ما تبيعه
سعر الموتور ان وجدته : ذكر البعض ان سعر الموتور 1000 بفتيس عادى مش اوتوماتيك كان ب 3000 جنيه فى بورسعيد من سنتين (عام 2012)



هذا ما اعرفه عن طريق الانترنت ، اما اللى متأكد منه انى سألت فى ورشه المهندس المحترم سيد الفراش بالحرفيين عن مونور للشاريد للبيع فرد على العامل هناك بانه لا يوحد
انا عند العربيه وزى الفل الحمد لله بس كنت باسأل على سبيل الاحتياط وعملت موضوع فى هذا المنتدى عن قطع الغيار البدليلة للديهاتسو وتجاوب معى بعض الاخوة جزاهم الله خيرا وهذا رابط الموضوع:

http://www.nilemotors.net/Nile/443263-a.html

يا ريت تدخل وتضيف افكارك والخبرات التى اكتسبتها من التعامل مع الميكانيكية لتوفير قطع الغيار البديلة وتبقى مشكور وتقدر تفيد الاخرين وتاخد حسنات بسهولة

على العموم لو انا عرفت حاجه جديدة ها اقول لك ...خلبك متفاءل

[matrix_it]

انا كنت ناوي اجيب العربية دي بس كدة بصراحة خوفي زاد
عندي سؤال زيادة تأكيد عايز اعرف التكيف والفرامل و الثبات في العربية دي عاملين ايه مع موضوع ال3 سلندر
و اخيرا تنصحوني بيها ولا لا ؟

Sent from my Nexus 5 using Forum Runner

[upaupa]

بسم الله

صلحت كر اربرتير 170 ج

عايزة جوز مساعدين امامى

صلحت الكربرتير فين ؟؟؟ اذا كنت اقتنعت بمن صلح الكربرتير وشايف انه راجل كويس وامين ارجو ذكر الاسم والعنوان والتليفون بتاعه ان امكن لنستفيد كلنا

جوز المساعدين الامامى لشاريد 90 ب 300-400 جنيه تقريبا الصينى وموجود فى التوفيقية والاصلى ب 900جنيه ان وجدته

[medo5th]

شكرا جزيلا

اولا شكرا جزيلا على الرد upaupa
ثانيا عن الموتور الميكانيكى قالى انه علشان يتعمر هايصرف كتييير اوى و انا بقولك كدا طبعا للامانة
اما الفتيس فهو حالته ممتازة
عموما هاقولك لما انزل المكنة الجديدة
انا بفكر ارجع لسيد الفراش او ابدا البحث فى الوكالة
عموما ربنا يسترها و اول ماعرف حاجة ان شاء الله هابلغك و شكرا مرة تانية

[medo5th]

بالنسبة للكربراتير
انا صلحته عند شيخ الكربراتير فى مصر
ابراهيم كربراتير
دا موجود فى شبرا مصر
شارع الترعة البولاقية اول شمال بعد خير زمان
راااجل ممتاز بجد
المهم انك لو هاتروحله سواء كنت فاكك الكربراتير و جايبه معاك او رايح بالعربية تكون هناك 10.30 صباحا علشان تستلم ف نفس اليوم غالبا على 6 او 8 بالكتير
الكربراتير كان عايز اكس و باب و هو ظبطه بس لسه استهلاك البنزين مش عاجبنى تقريبا 10 ك/ لتر
محتاج اروحله يظبطة بس مكسل
بالنسبه للمساعدين
روحت عند فاروق اللى وسط البلد و قالى ان اليابانى الجوز ب 800 جنيه بس مش موجودين وقت ما سالت
عندى سؤال بقى
فلتر الزيت اجيبه من اى حته و لا لازم بردو مشوار للتوفيقية ؟

[medo5th]

ماتريكس
انا مشاكلى مع العربية انى اتخميت فى حالتها فقط لاغير
انما هيا اجمالا فظيعة العربية بتجرى و مريحة و موفرة للبنزين و بتحب البنزين ال 80 اوى
حاجة كدا اوفر من المواصلات انما اللى ماعيا مش معيار
و هيا حاجتها غالية شوية علشان بتعيش و كويسة و بتركب قطعة الغيار و بتنساها
التكييف عندى كويس رغم انه مفيهوش فريون و مش عارف ازاى بصراحة :)
اما الاستبلاتى ف عندى العربية عاليه من ع الارض و علشان كدا مش قوى اوى
و لكن اجمالا ... العربية كويسه اوى

[geo_yacoub]

شوف عند حسين نوح ف الوكاله الموتور الاستيراد ورقمه موجود ف المنتدي وتقدر تشوف بدون فتيس بكام
سألته من 6شهور كده عن الفتيس المانيوال 1000 سي سي 5 غيار ب 600 جنيه بس ناس زي الفل انا اشتريت منهم حاجات كتير ف العفشه وحاجتهم زي الفل
وعن الموتور انا شايف تجيب نفس اللي راكب يعني لو راكب 1000 ركب ال 1000 تسارعه ممتاز وموتور فايق مش زي الماروتي

بالنسبه لفلتر الزيت موجود هو هو فلتر التويوتا :d مش مستاهله تروح التوفيقيه

[sohbamody]

بسم الله
دى اول المشاركات و ارجو انى الاقى رد
اشتريت عربية شاريد و اخدت واحد الله يسامحه كان فتاى علشان يكشف ع العربية و قالى اتوكل على الله العربية زى الفل
اخدتها موديل 90 اتوماتيك 1000 سى سى
اخدتها على 24000
بعد الشراء وجدت التالى
الموتور محتاج تغيير و ذلك بعد ماغيرت جوان وش سلندر بحوالى 300 ج شامل الادوات و المصنعية و صلحت كر اربرتير 170 ج
فردة شاسيه مشروخة بسبب مساعد ناشف
الفردة التانية مشروخة و ملحمة
و اخيرا و ليس اخرا على الاطلاق
عايزة جوز مساعدين امامى
و لسه اللحمات

المهم دلوقتى
اقدر اغير الموتور ل 1300 سى سى اتوماتيك و لا لأ
اقدر ابيع الموتور القديم ؟
الفتيس سليم اقدر ابيعه

و اسعار الموتور كام سواء ال 1300 او 1000 سى سى
و اى معلومات اضافيه ياريت محدش يبخل

العربية دى لونها احمر وكانت بتتباع فى شبرا صح ؟ وكانت مرور الدقى كمان
انا رحت شوفت عربيه بنفس الموصافات دى بس من اول نظره بعدت عنها وكان طالب السعر ده , كان باين عليه مبهدلها من شكل الفتيس وباب السواق , عموما ربنا يعوضك خير
بس ياريت لو تقلنا لو تعرف ميكانيكى كويس اخده وانا بكشف على العربيه دى انا نفسى اشترى واحده اوتماتك بحاله نضيفه والفلوس مقصره معايا بصراحه

[sohbamody]

ياشباب ربنا يجازيكم خير حد يقولى قطع غيارها موجوده ولالا عشان انا ناوى اجيب واحده ان شاء الله وحاله الفتيس الاوتوماتك معاكم ولا اخلينى فى المانوال ؟؟

[upaupa]

[size="3"]

بالنسبه لفلتر الزيت موجود هو هو فلتر التويوتا :d مش مستاهله تروح التوفيقيه

فلتر تويوتا اى موديل والا ايه ؟؟؟ يعنى اقول للبائع ادينى فلتر زيت تويوتا فقط ؟؟؟ارجو التوضيح لىهمية وشكرا على المعلومة ربنا يبارك فيك

[medo5th]

شوف عند حسين نوح ف الوكاله الموتور الاستيراد ورقمه موجود ف المنتدي وتقدر تشوف بدون فتيس بكام
سألته من 6شهور كده عن الفتيس المانيوال 1000 سي سي 5 غيار ب 600 جنيه بس ناس زي الفل انا اشتريت منهم حاجات كتير ف العفشه وحاجتهم زي الفل
وعن الموتور انا شايف تجيب نفس اللي راكب يعني لو راكب 1000 ركب ال 1000 تسارعه ممتاز وموتور فايق مش زي الماروتي

بالنسبه لفلتر الزيت موجود هو هو فلتر التويوتا :d مش مستاهله تروح التوفيقيه

كويس اوى انك قولتلى و انا فعلا هابص على الحاجات عنده و خصوصا انى هابدأ بالمساعدين الاول سألت عليهم عند على زيدان / الدقى ( اليابانى )750 و عند فاروق الى جنب ميدان الفلكى عنده ب 800 لو عندك نصيحة اكون شاكر ليك

[medo5th]

العربية دى لونها احمر وكانت بتتباع فى شبرا صح ؟ وكانت مرور الدقى كمان
انا رحت شوفت عربيه بنفس الموصافات دى بس من اول نظره بعدت عنها وكان طالب السعر ده , كان باين عليه مبهدلها من شكل الفتيس وباب السواق , عموما ربنا يعوضك خير
بس ياريت لو تقلنا لو تعرف ميكانيكى كويس اخده وانا بكشف على العربيه دى انا نفسى اشترى واحده اوتماتك بحاله نضيفه والفلوس مقصره معايا بصراحه

لا لا مش هيا
عربيتى لونها ابيض و حوض و شنطة الماظ انما فردة الشاسيه هيا اللى مايعلم بيها الاربنا و الفردة التانية اكتشفناها انها مشروخة لما كنت بغير سير الكاتينة و حصل لان المساعد كان ناشف