الحمد لله استلمت التريوس 2009 و رخصتها - معلومات و سؤال

[melhefnawy]

السلام عليكم يا شباب

ديه أول مشاركة , أنا كنت استفدت كتير قبل كده من المعلومات على المنتدى و على ذلك اشتريت التيريوس 2009 أوتوماتيك ( مافيهاش جنوط ولا حمالات السقف و لا مرايات كهرباء) ديه أول فئه في الأتوماتيك و طبعاً 2*4

تقسيط مباشر من دايهاتسو مصر نسبة 9% و ده لأني مقتنع أن التقسيط مع البنك حرام
مافيش نسخة مفتاح ولا توكيل بس فيه طبعاً حظر بيع و الترخيص بيبقى سنوي
محتاج مفردات مرتب و وصل كهرباء بأسمك و ضامن نفس الكلام لو هتدفع مقدم أقل من 50% ولو أكثر يبقى صورة بطاقة الضامن بس
خد بالك هتمضي على كمبيالات شهرية بالقسط الشهري وكمان هتمضي على وصل أمانة أو شيك مجمع بباقي المبلغ , الشيك المجمع ده بتاخدو في الأخر خالص , بس أنا طلبت أقسمه على 8 شيكات كل واحد باخده كل 6 شهور , أنا مقسط على 4 سنين

بالنسبة للترخيص و رغم أنه مرور السلام بس أنا ماخدتش ساعتين ومن غير أي حد معايا و مادفعتش حاجة زيادة ( رشوة يعني), بس علشان ماطولش أعمل الخطوات ديه وما تروحش على شباك الترخيص أول حاجة لأنك هاتقف في طابور ولما توصل هايطلبوا منك نفس الكلام:

1- روح بدري على 8:30 كده
2- يكون معام الطفاية
3- اشتري من هناك وثيقة تأمين زيرو سنة أو 3 على حسب أنت هترخص أيه
4- حضر معاك صورتين بطاقة
5- من كشك التصوير اشتري ورق استلام زيرو( بتاخد بيه النمر ) و ملف كارتون
6- روح الخزنة اشتري ورق فحص بيبقى ب 15 جنيه تقريبا" ده علشان تفحص السيارة
7- روح بعد كده مكان الفحص , اركن العربية و افتح الكبوت , هتلاقي واحد بياخد البصمة قولوا ييجي ياخدها من عربيتك
أتاكد أن بعد اخد البصمة و حطها على الورق أن الأرقام واضحه علشان ماحدش يرجعك تاني
8- خد الطفاية و روح كشك الختم علشان يختمهالاك برقم العربية
9- دور على المهندس حواليك وقولوا ييجي يفحص و يمضي و يختم
10- خد بقى كل الورق ده وروح الشباك بتاع الترخيص , هاتديك ورقة فيها مبلغ , وهاتديك ورقة لللأمين علشان النمر( ورقة نمر)
11- روح أدفع في الخزنة وهات نموذج هاتملا فيه بياناتك الشخصية, روح لمكان النمر أديله صورة البطاقة والورقة ديه ( ورقة نمر) هايكتبلك عليها نمرة عربيتك الجديدة , مبروك
12- رجع الوصل و النموذج وورقة النمر للشباك تاني .
13- روح أقف استنى الرخصة لما ينادوا على أسمك
14- استلم الرخصة وروح شباك النمر خد النمر بتاعتك أمامي وخلفي

%%%%% مبروك%%%%%

ألسؤال بقه لخبراء التريوس

1- العربية بحسها بتتهز كده حتى لو على طريق أسفلت و مش دايس فرامل ولا بنزين , هزه خفيفة قوي بس عايز أعرف هل ده طبيعي

2- لما بامشي على طوب أو حته مكسرة باحس بكل طوبة في الدريكسيون هل ده طبيعي ؟

3- العربيه صوتها عالي شوية , مش قوي بس مش هادية , هل ده طبيعي ؟
3- سمعت عن تخفيض في الصيانة لأعضاء المنتدى , ازاي احصل عليه ؟

وشكراً لكم جميعاً

[أبو عبدالله]

أولا الف مبروك وربنا يعطيك خيرها ويكفي عنك شرها ان شاء الله

ثانيا

1- العربية بحسها بتتهز كده حتى لو على طريق أسفلت و مش دايس فرامل ولا بنزين , هزه خفيفة قوي بس عايز أعرف هل ده طبيعي

2- لما بامشي على طوب أو حته مكسرة باحس بكل طوبة في الدريكسيون هل ده طبيعي ؟

3- العربيه صوتها عالي شوية , مش قوي بس مش هادية , هل ده طبيعي ؟
3- سمعت عن تخفيض في الصيانة لأعضاء المنتدى , ازاي احصل عليه ؟

1- الهزة دي ياريت تشرح بالتفصيل الموضوع ده
2- احساس بالطوب لازم تتذكر انك راكب عربيه عافشتها جامده ده غير ان العربيه لسه جديده يعني امامك لحد 10 الفا كم علشان تحس ان العربيه نعمت عن الأول
3- الصوت العالي ده بتاعها طبيعي وبرضه لسه العربيه جديده يعني بعد 5 الاف او 10 الاف بس ده شئ معروف لأن سير الكاتينه جنزير

4- التخفيض مقتصر على بعض الأعضاء لحين تعميه ان شاء الله

[boty50]

الف مبروك

1- افحص الترصيص
2- جرب تشوف ضغط الهواء
3- الصوت بيخف جدا بعد 3000 كيلو

[albasha37]

الف مبروك وأقول لك فعلا أنت الان تمتلك أفضل السيارات ؛ السيارة دفع خلفي وده بيخلي عزمها جامد ماشاء الله , يمكن احساسك ان فيه هزه وانت ماشي يرجع إلى قوة المساعدين وارتفاعها عن الأرض ومبروك عليك الفخامة ورؤية كل الشارع بوضوح شديد وانت راكبها . ربنا يكفيك شرها ويرزقك خيرها ان شاء الله

[melhefnawy]

السلام عليكم

ألف مبروك ليكم كلكم و شكراً على الردود

بالنسبة للهزة فهي بالظبط كأنك دايس بنزين بس رجلك مش ثابتة على الدواسة بتخف و تزيد حاجة بسيطة فالعربيه هتلاقيها مش ماشية بنعومة أهو نفس الكلام ده بس أنا ببقى شايل رجلي من على البنزين أساساً و أنا على 80 مثلاً

بالنسبة للترصيص هو ده طبيعي انها تبقى محتاجة بسرعة كده , ده أنا لسه شاريها , وهل المفروض أروح التوكيل أعمل الكلام ده

بالنسبة ببقى لأحساسي بالطوب في الدركسيون فأنا كان معايا لادا 2107 2007 قبل العربية ديه و ما كنتش بحس فيها بكدة

عموماً أنا هجرب النصائح ديه و أقولكم على اللي حصل

أه بالنسبة لضغط الهواء , المفروض يبقى كام , أنا اصلي كل ما أروح بنزينة يعملها حاجة مختلفة , مرة 28 و مرة 32 , هل فيه رقم معين

وشكراً تاني ليكم

[boty50]

عزيزي

أصبر عليها شويه ولو استمرت الهزه ابقي
خليهم يفحصوها في التوكيل لما تروح فحص
١٠٠٠ كيلو الأول

حصل معايا اول ماستلمتها رجه عند ١٢٠
بدلوا اماكن العجل الامامي وراحت

بالنسبه لضغط الهواء فده يرجع لنوع العجل
اللي راكب ومقاسه وده حاتلاقيه في الكتيب
او علي لوحه صغيره مثبته علي القايم بجانب
كرسي السائق

[ringoo84]

اللف مبروك وربنا يديلك خيرها ويكفيك شرها

[nav man]

Rbna yabrklak feha.haya de 3arbyet masr.ana ba7trm el 3arbya de wa rbna yakrmna beha.

[mohaaager]

مبارك لك عليها وربنا يملأها لك بركة ويكفيك شرها

ممكن تقولنا الفئات الخاصة ب 5 راكب وكم سعرها

يعني الفول ابشن بكم

وال 2 *4 اوتوماتيك بكم

وال 2*4 عادي

وايه مميزات كل واحدة والزيادات

[amramr]

الف مبروك ربنا يديك خيرها ويكفيك شرها. بالنسبه لنشفان العفشه ماتنساش ان العربيه لسه جديده ونفس الكلام حصل معايا في سيارتي التريوس2008 ولكنه اختفي بعد الالف كيلو الاولي.صوت الموتور كمان بيهدأ بعد 1000 كيلو وبيكون عالي فقط عند بدايه التشغيل.ياريت بس تقولنا سعر full option) 2*4 )كاش بكام

[محمد ابراهيم 1]

ألف مبروك العربيه إختيار هايل إن شاء الله

[ows212]

10000 مبروووووك العربية

[melhefnawy]

شكراً يا شباب و الله يبارك فيكم

سعر العربية 2*4 ِِa/t

122000

فيه بمرايات كهرباء و زجاج فاميه , جنوط و حمالات سقف , عتب و كاسيت أصلي ( أوديو بس)

136000

و ديه أسعار الوكيل

[melhefnawy]

1- 116000 عادة 4*2
2- 122000 أوتوماتيك 4 *2
3- 136000 أوتوماتيك 4*4 فيها زيادة ( بمرايات كهرباء و زجاج فاميه , جنوط و حمالات سقف , عتب و كاسيت أصلي ( أوديو بس))

4- 145000 أوتوماتيك 4*4 زي 3 وزيادة airbags , ABS

[moono]

ايه اخبار الثبات ؟