خلاصة الكلام فى تغيير الزيت للسريون من مو 2007 الى 2009

[معاذ الشرباصى]

رجاء يا معاذ براحه في الكلام شويه
يعني بلاش التحفز الغير مبرر ده
اولا انا بتكلم عن الموديل بتاعي وسبق وصورت الكتالوج وشوفتوا كلكم مكتوب فيه 3.6 لتر

وبعدين انا مش فاهم ازاي انك سحبت 0.75 لتر وبعدين العربيه بقت مقياسها مظبوط

يعني افهم من كده ان التوكيل كان بيحط 4 لتر ؟؟؟

مفيش تحفز و لا حاجة يا ابوعبدالله ... كل ما فى الامر ان حضرتك قلت ان العربية اصلا بتاخد 3.6 لتر, و ده كلام حضرتك تانى:

وعلى فكطره يا بشمهندس محمد
العربيه في الأساس بتاخد 3.6 لتر فعلا اصلا

اى حد يقرأ الكلام ده على طول هيفهم السريون, محدش دخل جواك و عرف نيتك ايه, و انها عربيتك السريون مو 2007 و لا ايه؟!!!!

اما بخصوص ان حضرتك حطيت الكتالوج, فطبعا حضرتك مشكور على الموضوع ده لكن الصراحة ان اللى عرف الفرق و لاحظه كان مهندس توفيق طه, و هو اللى نبه حضرتك للموضوع ده

بدليل المشاركة دى:

عالعموم يا حاج معاذ
العربيه لو ماشية بزيت زيادة او نقص الأتنين لهم نفس الضرر

ولو العربيه ماشية بزيادة زيت عمرها ما تمشي 40 الف مثلا وهيا بزيادة
كان الماتور انتهى من زمان

وانا اتأكدت دلوقتي بس علشان اعرفك ان مش كل حاجه لازم يكون لها فكره ولا حاجه
بس الواحد يستفسر ويسأل الأول وبعدين يتهم ويقول
قبل ما يجمع الناس ويعملها بلبلة في فكرهم من ناحية العربيه
الزيت اللي مكتوب في الكتالوج بيبقى 3.1 لتر بدون فلتر الزيت
يعني بدون تركيب الفلتر
والفلتر بياخد الكمية الباقيه واي خدمة يا معاذ

اما بخصوص سحب كمية الزيت الزيادة, فأنا الصراحة معرفش الكمية بالظبط اللى سحبتها لأن التوكيل نزل ليا كمية زيت انا معرفش هى قد ايه, و انا نزلت بره حوالى 0.25 لتر مع نفسى فى بنزينة.

لكن لو حضرتك مش واثق من كلامى, فالحمد لله فى مشاركتين موثقتين بالصور لسحب كمية الزيت الزيادة, لعضو اظن ليه مصداقية عالية أ. عمرو عمارة

سحب عمرو عمارة للزيت الخاص بسيارته


سحب عمرو عمارة للزيت الخاص بسيارة askoda


--------------------------------------------------

حاجه اخرى وانا بتكلم فيها كأخ وناصح وليس شئ اخر يعني
اعذروني المثل بيقول من حكم في ماله فما ظلم
هل مش من حق التوكيل انك تكتب ورقة انك انت اللي عاوز تحط 3 لتر زيت .... ؟؟؟؟

والله انا شايف ان لو انا متأكد من شئ جدا وهما طالبوني بأني امضي على مسؤوليتي بذلك فانا معنديش مشكلة
طالما هما اللي بيكدبوا او هما اللي بيعملوا الغلط
فانا مش فارقه معايا
لأن الماتور لو حصله شئ هيبقى فعلا كلامهم صح وانا اللي كلامي غلط
طيب لو كلامي انا اللي صح وكلامهم هو اللي غلط يبقى انا معنديش اي مشكلة لأن الورقة بتكتب فيها انك انت اللي عاوز تحط 3 لتر بس
خلاص مش انت متأكد من الكلام ايه المشكلة اني اعترف به رسمي لو حصل مشكلة في العربيه الورقة مكتوب فيها كلام واضح

طيب لو التوكيل طلع كلامه صح وبعد ما حطلك 3 لتر زيت والعربيه حصل فيها مشكلة
مين اللي يتحاسب في الموضوع
هما كشركة مش هيقدروا يثبتوا انك انت اللي اكنت عاوز 3 لتر بس

انا شايف ان الموضوع عادي واللي عاوز يحط 3 لتر يحطهم ويبقى ضامن لذلك بما انه متاكد من كده

وبرضه انا نفسي الناس تفكر بفكر من يدير التوكيل او صاحب الوكيل نفسه وهو هيفهم كلامي

وشكرا يا معاذ

الخلاف الجوهرى اللى بينا يا ابوعبدالله سببه حاجة مهمة ان حضرتك بتقول كلام مع ان أنا معايا حاجة مكتوبة من Daihatsu نفسها الا و هى الكتالوج الخاص بهم و مكتوب فيه كمية الزيت 3.1 لتر.

يعنى مفيش حكاية كلام التوكيل و كلامى و كلامنا ده, الموضوع عبارة عن حاجة مكتوبة و المفروض انها موثقة, و اللى بيحصل كان غير كده (بيتحط كمية مختلفة عن المذكورة فى الكتالوج)بغض النظر عن الاسباب او ان التوكيل معاه repair manual

احنا كل اللى طالبينه كان شرح للاختلاف ده و بس.

يعنى انا مجبتش ال 3.1 لتر دى من عندى, و لا شفتها فى رؤية مثلا و صحيت الصبح و قلت لكم يا جماعة احنا من النهارده نحط فى عربياتنا 3.1 لتر علشان انا جالى هاتف فى المنام و قالى كده!!!

ده كتالوج مكتوب فيه الرقم ده, و لازم يبقى عندى سبب مقنع و واضح انى أعمل غيره, و ده لا يقلل من شأن الناس فى التوكيل خالص, بس انا اللى اتعودت عليه انى افهم الحاجة المفروض تتعمل و اقتنع بأسبابها مش حد يقولى حاجة امشى وراه و خلاص (الكلام ده عموما مش على التوكيل).

يا رب تكون وجهة النظر دى وصلت لحضرتك.

[أبو عبدالله]

حاجه بس صغيره يا دكتور معاذ احب ان اوضحها
هو انا اكيد أؤكد لحضرتك ان المهندس توفيق طلبني وقالي ان الكتالوج مكتوب فيه 3.1 لتر بدون فلتر فعلا وان هو قال كده في المنتدى
بس حضرتك المشاركة بتاعتي دي اللي انت اقتبستها كانت يوم ما كلمني ولكن في الصباح ولكن المهندس توفيق قالي وكلمني علي الموضوع يومها بالليل
يعني انا مقولتش كده علشان المهندس توفيق طلبني وقالي
وانما انا كنت ببحث في الموضوع وتأكدت من الكلام وكتبته هنا حتى مكنتش لسه شوفت الكتالوج بنفسي
ولما كلمني المهندس توفيق قلتله انا عارف ولكن بصراحه لسه مبصتشي في الكتالوج لأني مكنتش لسه مروحتش البيت فعلا
ولما روحت وشوفته صورته ونزلت الصورة

أرسل أصلا بواسطة أبو عبدالله
عالعموم يا حاج معاذ
العربيه لو ماشية بزيت زيادة او نقص الأتنين لهم نفس الضرر

ولو العربيه ماشية بزيادة زيت عمرها ما تمشي 40 الف مثلا وهيا بزيادة
كان الماتور انتهى من زمان

وانا اتأكدت دلوقتي بس علشان اعرفك ان مش كل حاجه لازم يكون لها فكره ولا حاجه
بس الواحد يستفسر ويسأل الأول وبعدين يتهم ويقول
قبل ما يجمع الناس ويعملها بلبلة في فكرهم من ناحية العربيه
الزيت اللي مكتوب في الكتالوج بيبقى 3.1 لتر بدون فلتر الزيت
يعني بدون تركيب الفلتر
والفلتر بياخد الكمية الباقيه واي خدمة يا معاذ

ده توضيح بس لأن كلامك بيوحيلي بشئ معين فحبيت اوضح الموضوع مش اكتر ولا اقل

طبعا المهندس توفيق كان مشكور انه بحث في الموضوع فعلا
ولكن انا بؤكدلك اني مشاركتي دي اللي اشرت اليها كانت قبل مكالمته ليا

وعالعموم ربنا يصلح الحال وان شاء الله الامور تتحل وميبقاش فيه مشكلة بإذن الله بس يكون الكلام براحه مش اكتر ولا أقل

وبخصوص الأسعار يا معاذ
احب ان اعطيك أمثلة كنت دائما تشير لتوكيل رينو في المواضيع دي
شوف توكيل رينو علشان يعمل شوية سمكره في الميجان لأخ فاضل في المنتدى
طلب منه كام ؟؟؟؟؟
واكيد حضرتك شوفت الموضوع بنفسك
ولكن انا حبيت اوضح ان التوكيلات كلها كده وبيبقى لها اسعار لفئة معينة من الناس خصوصا التأمين

واكيد شوفت رد أخونا محمد مصطفى انه تقريبا لما عمل شغل في السيريون بتاعته قريب من اللي هيتعمل للميجان اطلب منه حوالي نصف المبلغ بالظبط

ده مثال للتوضيح ليس اقل ولا اكثر

[معاذ الشرباصى]

حاجه بس صغيره يا دكتور معاذ احب ان اوضحها
هو انا اكيد أؤكد لحضرتك ان المهندس توفيق طلبني وقالي ان الكتالوج مكتوب فيه 3.1 لتر بدون فلتر فعلا وان هو قال كده في المنتدى
بس حضرتك المشاركة بتاعتي دي اللي انت اقتبستها كانت يوم ما كلمني ولكن في الصباح ولكن المهندس توفيق قالي وكلمني علي الموضوع يومها بالليل
يعني انا مقولتش كده علشان المهندس توفيق طلبني وقالي
وانما انا كنت ببحث في الموضوع وتأكدت من الكلام وكتبته هنا حتى مكنتش لسه شوفت الكتالوج بنفسي
ولما كلمني المهندس توفيق قلتله انا عارف ولكن بصراحه لسه مبصتشي في الكتالوج لأني مكنتش لسه مروحتش البيت فعلا
ولما روحت وشوفته صورته ونزلت الصورة



ده توضيح بس لأن كلامك بيوحيلي بشئ معين فحبيت اوضح الموضوع مش اكتر ولا اقل

طبعا المهندس توفيق كان مشكور انه بحث في الموضوع فعلا
ولكن انا بؤكدلك اني مشاركتي دي اللي اشرت اليها كانت قبل مكالمته ليا

وعالعموم ربنا يصلح الحال وان شاء الله الامور تتحل وميبقاش فيه مشكلة بإذن الله بس يكون الكلام براحه مش اكتر ولا أقل

ابوعبدالله

انا بتكلم بالراحة جدا.

بس اللى مستغربه فقط هو كلام حضرتك الغريب اللى بتناقض مع الكتالوجات!!

اما بخصوص المشاركة ... و موضوع مهندس توفيق طه
هو فعلا مهندس توفيق اللى اكتشف الفرق
لكن مش ده بس اللى انا بعلق عليه
حضرتك عربيتكم مو 2007 بتاخد 3.3 لتر بدون فلتر و 3.6 لتر بالفلتر .... مفيش 3.1 بدون الفلتر دى

و ده الكتالوج اللى حضرتك مصوره



هو ممكن بس الامر يكون اختلط على حضرتك او حاجة, عادى و بتحصل معانا كلنا ... المهم ان المعلومة الصح بنوصل لها فى الاخر.

مش عيب ان حد يقول معلومة غلط خالص ... لأننا مش انبياء او معصومين من الخطأ, احنا كلنا بشر, بس الاهم انه لو اكتشف عدم صحتها يتداركها لأن عليه التزام ادبى تجاه القراء لتصحيحها بما ان الناس بتثق فى كلامه و بتعول عليه فى اجابة استشاراتهم و استفساراتهم.

وبخصوص الأسعار يا معاذ
احب ان اعطيك أمثلة كنت دائما تشير لتوكيل رينو في المواضيع دي
شوف توكيل رينو علشان يعمل شوية سمكره في الميجان لأخ فاضل في المنتدى
طلب منه كام ؟؟؟؟؟
واكيد حضرتك شوفت الموضوع بنفسك
ولكن انا حبيت اوضح ان التوكيلات كلها كده وبيبقى لها اسعار لفئة معينة من الناس خصوصا التأمين

واكيد شوفت رد أخونا محمد مصطفى انه تقريبا لما عمل شغل في السيريون بتاعته قريب من اللي هيتعمل للميجان اطلب منه حوالي نصف المبلغ بالظبط

ده مثال للتوضيح ليس اقل ولا اكثر

حتة الاسعار دى انا الصراحة مش فاهم دخلها ايه بموضوعنا هنا عن الزيت يا ابوعبدالله؟!!

[أبو عبدالله]

سبحان الله

يا استاذ معاذ انا والحمد لله عندي الكفاية من الشجاعة الأدبية اني اعترف اني اخطأ لأنها ليست سبه او عيبه
ولكن لما اكون اخطأت

مش عارف ليه حاسس انك مصمم أني اخطات

وعالعموم انا غلطانلك يا أخي ومتأسف اني اتكلمت على موديل 2007 فقط
ومتأسف اني دخلت في الموضوع ده اساسا

وانا اتأسفت اهه علشان ملقيش في ثنايا الكلام كلام يوحي بشئ اراه ليس موجود
ولكن انا بتأسف الآن على ان اللي بلغني بموضوع الزيت كان قالي 3.11 بدل 3.3 ولما كلمني المهندس توفيق وبصيت في الكتالوج اكتشفت فعلا انه 3.3 يعني مكنش اساسا خطأ متعمد او مقصود
واتأسف اني دخلت اتلكمت اساسا في الموضوع

وصدقني عندما اعطي معلومة خطأ سوف اقوم بمراجعتها والاعتذار عنها لأني لا ارى ان هذا عيب في حقي ولا تنقيص ولكن بالعكس ارى ان الأستمرار في الخطأ هو عين الغباء بذاته

ولكن كل ده ليس في موقفنا هنا اللي انت مصمم انك تحسسني اني بقول كلام غلط ولا اتراجع فيه وعالعموم سبق وقولت معلومات وعندما اكتشف انها غير صحيحه بتراجع فيها يعني شئ ليس من الصعب عليا اني افعله

ولكن شكرا على الحوار المثمر جدا

_________
تم تعديل المشاركة

إدارة المنتدى2
(إ.م.2)

[عمرو عمارة]

لا.....بل خمس معطيات:

1- كتالوج
2- صور المقياس بتاعتنا
3- سحب الزيت
4- مقاس الزيت مضبوط قبل عمل صيانة الـ5 ألاف ( زيت الفابريقة )
5- بدء ظهور مشكلة بجوان غطاء التكيهات عند بعض الملاك

وأنا أُرجح بشدة أن سبب تلف جوان غطاء التكيهات هو الزيت الزيادة الي بدوره بيؤدي الى:

1-جهد عالي على الموتور مما يسبب الى إرتفاع درجة حرارته عن الحد الطبيعي أو المعقول ولكن ليس لحد الخطورة وبالتالي يؤدي الي التقليل من العمر الإفتراضي للجوانات

2- ضغط عالي داخل الموتور ( يزيد مع القرص ) مما يجعل الزيت يتسرب من نقطة ضعيفة أوجدها في غطاء التكيهات والتي كانت درجة حرارة الموتور العالية سبباً في تلفهِ

من أحدث الفتاوي التي أصدرها التوكيل بخصوص إختلاف كمية الزيت المذكورة في الكتالوج بين موديلات 2007 و2008 أن اليابان قللت من كمية الزيت المستخدم في سياراتها لتتوافق مع المعاير البيئية.....مع العلم أن حجم الكارتيرة واحد وبنفس رقم قطعة الغيار.....وده عكس الكلام الي ذاكره م/أحمد عبد الوهاب مدير الصيانة "تم تغيير حجم الكرتيرة بين موديلات 2007 و 2008 (2009 نفس 2008) و الارقام المذكورة فى الكتالوجات سليمة "

ولو قلنا إفتراضاً إن الفتوى دي صحيحة فده بيؤكد أيضاً الإختلاف بين مواتير 2007 والأحدث وأكيد لو اليابان عايزة تراعي جزئية معاير البيئة مش مجرد هتقلل من كمية الزيت المستخدمة ولكن بعمل بعض التعديلات الداخلية للموتور لإستيعاب كمية زيت أقل

أما بخصوص الورقة الي بمضي عليها فطبعاً ده شىء غير مقبول
طيب أنا موافق إنه يحطلي كمية الزيت الي هو شايفها صح.....بس يخليني أنا أمضيه على تعهد إن الموتور يفضل في الضمان لحد 300ألف كم .....لأن المشكلة دي بتظهر على المدى البعيد ومعتقدش إنها ممكن تظهر قبل الـ100ألف كم لو الواحد مابيقرص على العربية وبالشكل الي هو بيحاول يضمن بيها حقه أكيد بعد فترة الضمان هو مش هايعرفك

طيب تعالوا نتكلم بالبلدي شوية......من غير أرقام ولا كاتالوجات ولا الكميات المسحوبة ولا اليابان ولا الهند :
في علامتين لازم الزيت يبقى بينهم زاد عن العلامة الأعلى يسبب ضرر للموتور...قل عن العلامة الادنى يسبب ضرر للموتور

إنتهى الكلام

[Ahmed-Moustafa]

السلام عليكم و رحمة الله و بركاته
من كام يوم عملت صيانة ال 20000 كم و عند تسليم العربية لمهندس الإستقبال قلتله انا عايز 3 لتر زيت فقط. قاللى زى ماتحب بس الأستاذ ياسر كان موجود من كام يوم و طلب برضه 3 لتر لكن رجع فى كلامه و قال خليهم 4 لتر زى كل مرة ( بس ماقلش رجع فى كلامه ليه بس أنا عرفت بعد كدة ) المهندس قالى إن ده هيكون على مسؤليتك قلتله مافيش مشكلة مادام حاجة صح إيه المانع وكتب فى إستمارة إستلام العربية 3 لتر زيت فقط على مسؤلية العميل و مضيت على الإستمارة زى كل مرة ( غالباً الأستاذ ياسر قلق من موضوع الإمضة دى )
أنا مش عارف أحدد بالظبط العربية فاقت بسبب إية لإن دى كانت صيانة 20000 وفيها تغير الزيت و فلتر الهواء و تربيط العفشة و باقى الحاجات طبعاً كل ده بيخلى العربية تفرق و خصوصاُ إنى إتأخرت حوالى 2500 كم على ال 20000 كم
بس تاى يوم إتأكدت من مقاس الزيت و كان بين العلامتيين و أقرب للعلامة اللى فوق
===========

الدكتور معاذ كلمنى من كام يوم علشان أتكلم مع مهندس أسامة سعد مدير عام ديهاتسو بخصوص المشكلة دى - دخلت للمهندس أسامة بس بصعوبة شوية نظراُ لإنشغاله وكمان رحت من غير ميعاد سابق. المهم مهندس محمد عبد الصمد قابلنى الأول وأكدلى معلومة كمية الزين للموديل 2008 و 2009 إنها 2.9 بدون فلتر و 3.1 بفلتر و قلتله إن مركز الصيانة مش مقتنع بالموضوع ده و بيمضونا على إقرار بالمسؤلية إستغرب من الكلام ده
و دخلت بعد كدة لمهندس أسامة و الرجل كان فى منتهى الود و سعة الصدر و قالى بخصوص موضوع الزيت شوفو إيه اللى يناسبكم وإنهم الأول كانو بيجيبو براميل زيت كبيرة بس الناس ماعجبهاش الكلام ده و خافو إن ده يكون زيت أى كلام فجابو العبوات اللى بيحطولنا منها دلوقتى
وقالى لو تحبو نجيب جراكن 4 لتر بدل العبوات ال 1 لتر و نحط 3.1 لتر و العميل ياخد الباقى مافيش مانع بس الخوف إن الزيت يتأكسد لما يتركن فترة طويلة وقال كل الخيارات متاحة قدامكم و شوفوا اللى يريحكم و إحنا نعمله
و قلتله على موضوع الإقرارات و قالى لا طبعا مافيش حاجة من دى خالص و الموضوع ده هايتحل
و أخيراً طلبت منه يكون فيه قناة إتصال مباشرة معاه من خلال اللقاء معه 3 أو 4 أعضاء فى زيارة سريعة لمناقشة أراء ملاك الديهاتسو و مشاكلهم و مقترحاتهم ووافق برحابة صدر و قالى كمان نبقى نحدد موعد علشان كمان يجيب مدير التسويق يحضر معانا
و كرر طلبه منى تانى اللى كنت قلته قبل كدة من زيارة مركز أبو رواش للمشاركة فى إختيار بعض اللمسات الأخيرة ليكون المكان مريح للعملاء ووعدته إن هشوف إيه اللى تم فى الموضوع ده لأنى عرضته على المنتدى قبل كده - بس طبعا ماجبتش سيرة فى المنتدى لإنى عرفت بعد كدة إن الموضوع خلص خلاص و إن فيه ناس هاتروح و طبعاً أنا مش منهم لأنى ماعرفتش إلا بالصدفة زى حضراتكم دلوقتى ماعرفتم

معلش طولت عليكم بس كان لازم أوصل الكلام بالتفصيل و ده كمان مش تفصيل قوى

[أبو عبدالله]

شكرا يا احمد على مجهودك الجميل وبحثك في الموضوع
امام بخصوص زيارة مركز ابو رواش فيظهر ان هناك لبس في الموضوع بتاع الزيارة بتاعت ابورواش

[أبو عبدالله]

المهندس قالى إن ده هيكون على مسؤليتك قلتله مافيش مشكلة مادام حاجة صح إيه المانع وكتب فى إستمارة إستلام العربية 3 لتر زيت فقط على مسؤلية العميل و مضيت على الإستمارة زى كل مرة ( غالباً الأستاذ ياسر قلق من موضوع الإمضة دى )

هو ده اللي انا قولت عليه في مشاركاتي السابقة
ان بما اني متاكد من اللي بعمله وانه صح ايه اللي يخوفني اني امضيلهم على كده ان انا اللي قولت عاوز 3 لتر زيت

هو الحق بيزعل الناس ولا ايه

[عمرو عمارة]

أخبار جميلة طبعاً يا أحمد باشا جزاكم الله خيراً

في أخبار جميلة أكتر من إدارة دايهاتسو عرفتها إمبارح من معاذ......بس مش هحرقها وأخويا معاذ إن شاء الله هيبلغنا بالتفاصيل عند التنفيذ

[Ahmed-Moustafa]

أخبار جميلة طبعاً يا أحمد باشا جزاكم الله خيراً

في أخبار جميلة أكتر من إدارة دايهاتسو عرفتها إمبارح من معاذ......بس مش هحرقها وأخويا معاذ إن شاء الله هيبلغنا بالتفاصيل عند التنفيذ

إيه هيوزعو علينا عربيات جديدة ولا إيه ؟

[aliabutaleb]

هو ده اللي انا قولت عليه في مشاركاتي السابقة
ان بما اني متاكد من اللي بعمله وانه صح ايه اللي يخوفني اني امضيلهم على كده ان انا اللي قولت عاوز 3 لتر زيت

هو الحق بيزعل الناس ولا ايه

سؤال بسيط يابو عبد الله
ليه لا يلزم مالكي التيريوس بالتوقيع على نفس الإقرار بالرغم من ان مانيوال العربية بيوضح كمية زيت أكتر من السيريون (أظن 3.2 لتر) ومع ذلك التوكيل بيحط لمالكي التيريوس 3 لتر وبيحاسبهم على 3 لتر؟ (طبعاً الكلام ده بالنسبة لموديلات 2008)
الكلام ده من فاتورة صيانة زميل لي في العمل على فكرة شفتها بعيني
ولا هي الاقرارات دي بيلزموا بيها ناس ناس؟

بنفس المنطق اللي حضرتك بتتكلم بيه
لو افترضنا ان الصيانة الدورية مثلاً بتتكون من 10 بنود
بند فحص الزيوت
بند فحص فلتر هواء
وبند تربيط عفشة
إلى آخره
ولقينا التوكيل بيلزمنا بتوقيع 10 إقرارات لكل بند من البنود دي ان كل ده بيتم على مسئوليتنا يبقى احنا مطالبين إننا نوقع بحجة إننا مطالبين بإقرار حاجة عارفين إنها صح؟ يبقى نوقع من غير خوف؟
ولا مجرد إن التوكيل بيعمل حاجة بتتفق مع مانيوال العربية المفترض اننا ولا امضي اقرار ولا أمضيهم على إقرار؟

[أبو عبدالله]

سؤال بسيط يابو عبد الله
ليه لا يلزم مالكي التيريوس بالتوقيع على نفس الإقرار بالرغم من ان مانيوال العربية بيوضح كمية زيت أكتر من السيريون (أظن 3.2 لتر) ومع ذلك التوكيل بيحط لمالكي التيريوس 3 لتر وبيحاسبهم على 3 لتر؟ (طبعاً الكلام ده بالنسبة لموديلات 2008)
الكلام ده من فاتورة صيانة زميل لي في العمل على فكرة شفتها بعيني
ولا هي الاقرارات دي بيلزموا بيها ناس ناس؟

بنفس المنطق اللي حضرتك بتتكلم بيه
لو افترضنا ان الصيانة الدورية مثلاً بتتكون من 10 بنود
بند فحص الزيوت
بند فحص فلتر هواء
وبند تربيط عفشة
إلى آخره
ولقينا التوكيل بيلزمنا بتوقيع 10 إقرارات لكل بند من البنود دي ان كل ده بيتم على مسئوليتنا يبقى احنا مطالبين إننا نوقع بحجة إننا مطالبين بإقرار حاجة عارفين إنها صح؟ يبقى نوقع من غير خوف؟
ولا مجرد إن التوكيل بيعمل حاجة بتتفق مع مانيوال العربية المفترض اننا ولا امضي اقرار ولا أمضيهم على إقرار؟

كلام جميل طيب تفتكر انت ليه بيعملوا كده
وليه في التيريوس بيعملوا كده والسيريون لأ
يعني لو هما غلطانين ليه بيغلطوا في السيريون ومش بيغلطوا في التيريوس مع ان اللي بيعمله صيانة لدي هو هو اللي بيعمل صيانة لدي

وهو ده اللي اقصده من الكلام ده كله
ليه اخلي التوكيل غلط في شئ وفي شئ اخر مماثل مع موديل اخر اقول انه بيحطه صح

يبقى اكيد في حاجه ماشيين عليها وده مش دفاع ولكن كل حاجه بالعقل
اللي خلاهم يحطوا هنا 3 لتر يخليهم يحطوا في السيريون نفس الموضوع
بس ليه لأ مش عارف بصراحه

[aliabutaleb]

وهو ده اللي اقصده من الكلام ده كله
ليه اخلي التوكيل غلط في شئ وفي شئ اخر مماثل مع موديل اخر اقول انه بيحطه صح

لأن على حد علمي التيريوس كلها بكل موديلاتها بيتحط لها نفس الكمية
إنما السيريون الاختلاف في الموديل على حسب السنة عمل اختلاف مع كمية الزيت التي ينصح بها من الصانع.
يعني زي مانا فاهمها بالبلدي الصانع لخبط التوكيل في السيريون انما ملخبطهوش في التيريوس
وأكبر دليل إنهم عرفوا غلطهم بس بيكابروا في الاعتراف بيه
إن كل اللي بيروح يعمل صيانة للسيريون من بعد ما أثير الموضوع هنا في نايل موتورز سواء اتكلم في كمية الزيت أو متكلمش كمية الزيت عنده بقت مظبوطة عند الماكس

[أبو عبدالله]

لأن على حد علمي التيريوس كلها بكل موديلاتها بيتحط لها نفس الكمية
إنما السيريون الاختلاف في الموديل على حسب السنة عمل اختلاف مع كمية الزيت التي ينصح بها من الصانع.
يعني زي مانا فاهمها بالبلدي الصانع لخبط التوكيل في السيريون انما ملخبطهوش في التيريوس
وأكبر دليل إنهم عرفوا غلطهم بس بيكابروا في الاعتراف بيه
إن كل اللي بيروح يعمل صيانة للسيريون من بعد ما أثير الموضوع هنا في نايل موتورز سواء اتكلم في كمية الزيت أو متكلمش كمية الزيت عنده بقت مظبوطة عند الماكس

والله يا ابو حمزه انا في حاجه مش فاهمها ومش اعرف اوصلها
وعالعموم ربنا ييسر الأمر ونعرف ايه المشكلة بالظبط

[معاذ الشرباصى]

أخبار جميلة طبعاً يا أحمد باشا جزاكم الله خيراً

في أخبار جميلة أكتر من إدارة دايهاتسو عرفتها إمبارح من معاذ......بس مش هحرقها وأخويا معاذ إن شاء الله هيبلغنا بالتفاصيل عند التنفيذ

عمرو باشا

ده اول خبر حلو, متمثل فى تواجد السيدى مى عبدالحميد (مدير خدمة العملاء فى دايهاتسو-مصر) بصورة رسمية معانا هنا فى المنتدى.

و الخبر التانى الحلو, إن شاء الله السيدة مى بنفسها هتعلنه هنا فى المنتدى فى القريب العاجل.