عايز أشترى سوبارو إمبريزا ، لكن مش قادر آخد القرار

[عبدالله المصرى]

السلام عليكم و رحمة الله و بركاته

بإختصار نويت أشترى عربيه ، لكن ما كنتش أعرف إن الموضوع صعب للدرجه دى.

معاناتى فى شراء عربيه لخصتها فى موضوع سابق ، و أرجو قبل إستكمال كلامى هنا تطلعوا عليه فى الرابط التالى:

http://www.nilemotors.net/Nile/429185-a.html

بعد مناقشات و مراجعات و مقارنات كتيره وجدت إن أكتر إختيار مناسب لإحتياجاتى هو سوبارو إمبريزا (هاى لاين).

من أيام الطفوله كنت بحب معرفة العربيات بأنواعها و مواصفاتها ، و كنت أعرف إن ماركة سوباروا من الماركات اليابانيه المحترمه و عربياتها تتميز بالدفع الرباعى و مشاركتها القويه فى سباقات الراليات.

للأسف ما كنتش أتوقع إنى لما أنوى أشترى عربيه سوباروا أكون متردد بالشكل ده ، و السبب فى ده كله هو:
1- مفهوم متخلف منتشر بين المصريين و هو إنك لما تشترى عربيه لازم تكون أول مواصفاتها هو الإحتفاظ بسعرها فى إعادة البيع (بالبلدى: عربيه ليك و للسوق).
و أنا بصراحه مش فاهم هل أنا اللى هركب العربيه و لّا السوق ؟ ، و هل أنا ضامن عمرى علشان أبقى أبيعها بعد كده ؟ ، و حتى لو بعتها بعد كده و ما خسرتش فى تمنها كتير هل ساعتها هشترى برضه عربيه جديده لمجرد إنها ليها سوق ؟
2- مفهوم إنك لا ترحم و لا تخلى رحمة ربنا تنزل ، يعنى لو انت كرهت عربيه لمجرد إنها مش منتشره فى مصر و مش كويسه فى إعادة البيع يبقى لازم تفتى و تقول لأى حد عايز يشتريها إنها عربيه سيئه و تختلق أى عيوب فيها.

و لأضع نهايه لهذا التردد ، أحتاج إلى الإجابه على بعض الإستفسارات بخصوص العربيه و أتمنى ألا يجيب عنها إلا شخص يمتلكها بالفعل أو شخص لا يمتلكها و لكن عنده المرجع الموثوق فيه لكل معلوماته:
1- معدل إستهلاك البنزين (داخل المدينه و على الطرق السريعه).
و يفضل مقارنتها بعربيات أخرى من نفس الفئه لمعرفة ذلك نسبيا
2- توافر قطع الغيار (هل الوكيل فقط أم هناك مصادر أخرى).
و يفضل مقارنتها بعربيات أخرى من نفس الفئه لمعرفة ذلك نسبيا
3- أسعار قطع الغيار.
و يفضل مقارنتها بعربيات أخرى من نفس الفئه لمعرفة ذلك نسبيا
4- توافر مراكز الخدمه و الصيانه (هل الوكيل فقط أم هناك أماكن أخرى).
و يفضل مقارنتها بعربيات أخرى من نفس الفئه لمعرفة ذلك نسبيا
5- مستوى إهتمام الوكيل و خدمته للعملاء.
و يفضل مقارنتها بعربيات أخرى من نفس الفئه لمعرفة ذلك نسبيا
6- مستوى الإرتفاع عن الأرض و المطبات.
و يفضل مقارنتها بعربيات أخرى من نفس الفئه لمعرفة ذلك نسبيا
7- جودة التكييف.
و يفضل مقارنتها بعربيات أخرى من نفس الفئه لمعرفة ذلك نسبيا

آسف على الإطاله ،
شكرا مقدما

[Frozen_Pain]

https://www.facebook.com/groups/4729614106/

[ARKOON]

حضرتك شوف ايه اولوياتك وانا كنت قريت موضوع حضرتك قبل كدا وفيه مقارنة بين عربيات كتير وكنت حاسس انك شايف ان الكورلا هيا الاختيار الانسب وبلا شك دا قرار صعب بس في الحالة دي بتحسب ايه اهم اولوياتك بمعنى اعرف ناس كتير ما بيفرق معاهم موضوع الريسيل دا الفكرة انو يكون راكب عربية محدش راكبها ومش كدا بس العربية المنتشرة بنسباله وحشه كل واحد بيشوف الموضوع من وجهة نظره وطبعا السوبارو مفيش انتين يختلفوا عليها فلو حضرتك شايف انها مناسبة طبعا بعد ما اكيد عملت ابحاث عن العربية انا شايف انك تجمد قلبك وتتوكل على الله وربنا يوفقك للاختيار الأحسن وصلي استخاره وان شاء الله ربنا يكرمك يا فندم في اختيارك .. :) تحياتي

[Omar2017]

ممتازة جدا

[scientist9508]

بسم الله الرحمن الرحيم

الأخ الفاضل عبدالله المصرى

أنا لا أمتلك إمبريزا و لكن ما سوف اخبرك به صائب ودقيق جدآ و إن كان قليل و إن كان لا يجيب سوى القليل من تساؤلاتك

1 - مشكلة أعادة البيع (وهى المشكله الأخطر فى شراء أى سياره):

أود أن أخبر حضرتك أننى فى ذات الوقت الذى أساعد حضرت فى الوصول لقرار الشراء أساعد صديق مقرب لى أيضآ فى الشراء إلا إن مشكلة إعادة البيع بالنسبه له أمر مخيف جدآ
لن أطيل عليك و لن أفرض عليك رأى و لكن مسألة إعادة البيع هى فكره متمركزه داخل عقل أى إنسان و كما رأيت من تجاربى الشخصيه لا يمكن تغييرها مهما كانت حالته الماديه و لكنى سأخبرك بقول لا أدرى ما قيمته بالنسبه لك.
لا أنا و لا أنت و لا أى شخص يعلم متى و أين و كيف سيبيع سيارته التى لم يشتريها بعد فلا تشغل بالك بغيب لم يأتى بعد إلا أن تكون على علم بأن وضعك المالى لن يسمح لك بشراء أخرى إذا كان بيع ما عندك قيمته منخفضه

2 - توافر قطع الغيار خارج الوكيل:

من قال لا أعلم فقد أفتى. و إن كنت أود أن أخبر حضرتك أن ذلك سؤال لا داعى له لأن قطع الغيار من خارج الوكيل لن تكون أصليه و بالتالى أداء سيارتك لن يكون آداء سوبارو

3 - أسعار قطع الغيار:

من قال لا أعلم فقد أفتى

4 - توافر مراكز الصيانه:

بسؤال الوكيل تكون الإجابه أنا الصيانه للوكيل فقط (داخل القاهره يوجد مركزين الأول فى جسر السويس و الثانى فى المعادى)

5 - مستوى الإهتمام بخدمة العملاء:

من قال لا أعلم فقد أفتى

6 - الإرتفاع عن الأرض:

لم أجرب قيادتها فوق مطب صناعى ولكنى أعلم أن إرتفاعها مناسب (لا هو العالى الذى يفقد السياره الثبات و لا هو المنخفض الذى يجعلها صيد سهل للمطبات)

7 - جودة التكييف:

للأمانه أنا لم أجربه بشكل شخصى و لكننى طيلة حياتى لم أسمع عن سياره يابانيه الصنع و المنشأ (بالأخص عندما تكون قادمة من المصنع إلى مصر مباشرة) تكييفها ضعيف

الأخ عبدالله

أود أن أخبرك على إستحياء أن خوفك و ترددك مبالغ فيه قليلآ. إستخر الله و إفرح بعدها بقضاؤه عليك

هداك الله لأرشد أمرك و أقومه

السلام عليكم و رحمة الله و بركاته

[AlGazar2]

مبدأيا مبروك العربية الجديدة

ثانيا بالنسبة لتساؤلاتك
1 اعادة البيع السوبارو من العربيات الى تمنها بيقل فى اعادة البيع بس بيقل و بيثبت على كده و بيبقى حوالى 15 : 20 % فى اول سنة تقريبا بمعنى اصح الخسارة الكبيره فى اول 5 سنين بعد كده السعر بيثبت و بيبقى زى باقى العربيات الى فى نفس الفئة السعرية او اقل شويه من 5 : 10 % فى مقابل ان مصاريفها او صياناتها الدورية اقل من مثيلاتها و دى تجارب ناس و كاتبنها فى المنتدى هنا ان العربية كعفشه و موتور لغايه 150 الف مبيتصرفش عليهم حاجة غير الصيانات الدورية من تغيير زيوت و فلاتر و زيوت و تربيط عفشة فالموضوع معوض نفسه و زيها زى اغلب العربيات المحترمة فى مصر

2 بالنسبة لتوافر قطع الغيار التوكيل بتاعها بيوفرها و فى بعض المحلات بره بيبقى عندهم حاجتها برضه بس قليلين سواء جديد او استيراد

3 سعر قطع الغيار
زيها زى اى عربية يابانى فى السوق بس المقارنة تكون جديد اصلى فى التوكيل بجديد اصلى فى التوكيل هتلاقيهم زى بعض اذا مكانتش السوبارو ارخص و ممكن حاليا تدخل الكورى فى المقارنة بعد ارتفاع اسعار قطع غياره

4 مراكز الصيانة - توكيل فقط و ليه فرعين جسر السويس و المعادى و معرفش ليه تانى ولا لا عموما هى تبع ابو غالى و مراكز الصيانة مش كتير لان العربية مش منتشره بدرجة كبيره و مفيش ضغط على المركزين دول

5 مستوى الاهتمام بخدمة العملاء من كلام الاعضاء هنا ان التعامل من الوكيل ممتاز معاهم فى اى شكوى منهم و استجابتهم سريعة لاى شكاوى و ممكن حضرتك تشوف المواضيع القديمة هنا و من تجربه للحاج زمان مع ابو غالى كان كويس و مبيشتكيش منه و العربية كانت دايو

6 الارتفاع عن الارض حوالى 15 سم مش مرتفعه اوى و مش منخفضه اوى تعتبر فى المتوسط اعلى من التويوتا و الهوندا و اوطى من المتسوبيشى يعنى زيها زى باقى العربيات

7 التكييف بتاعها اتوقع انه ممتاز لان العربية يابانى ده اولا ثانيا الازاز بتاعها uv protected بيحمى من اشعه الشمس الضاره و الازاز الخلفى فامية بس اتوقع انها هتكون بطه بلدى مع التكييف لان الفتيس بتاعها cvt و دفع رباعى و موتور 1600

[eme5599]

بص يا باشا أنا كمان محتار بقالي فترة
بس في الفترة الأخيرة حصرت اختياراتي بناءاً على وسائل الأمان إللي بتقدمه العربية
فأختياراتي بقت بين الأربع عربيات دول و إللي يشتركوا أنهم
1- تحت 200 ألف جنيه
2- 6 أيرباج
3- esp

العربيات هم
سيات ليون من 160 إلى 189 "كل الفئات فيها 6 ايرباج و esp"
سبارو امبريزا 195 "الفئة الأقل إللي ب 175 فيها 2 ايرباج بس"
سيتروين c4 ب 179 "أخر سعر سمعته مش عارف زادت ولا لأ"
تويوتا أوريس من 173 إلى 220 "أخر سعر سمعته مش عارف زادت ولا لأ و كل الفئات فيه ايرباج و esp"


بالنسبة لأسئلتك
الحاجة إللي أقدر أفيدك فيها هو موضوع الارتفاع عن الأرض، العربية مش مرتفعة عن الأرض أنا شوفتها بنفسي و قستها بالشبر. هي تقريباً نفس ارتفاع الالنترا 2012 "كانت مأجرها في نفس اليوم" و أنا شايف أن الانترا واطية و حكت مني كذا مرة. في نفس اليوم أنا اتفرجت على الليون و كان ارتفاعها أحسن على عكس توقعاتي.

بانسبة للتوكيل أنا "أسمع" أنهم محترمين

أنا أقرب سيارة ليا دلوقتي هي الليون و بعدها الامبريزا عشان الليون هتوفرلي مبلغ محترم و بصراحة عملت تست درايف لليون و العربية ممتعة بجد.
بس بصراحة أنا لسة مشفتش ال c4 ممكن أما أشوفها تغير رأيي

بالنسبة لتوفير البنزين و بعد زيادة الأسعار سيات ليون لا تقارن. أعتقد أنها أكتر سيارة موفرة للبنزين في الفئة السهرية دي بلا منازع.

[tefafathy1]

و عليكم السلام و رحمه الله و بركاته..

بص يا باشا انا اتمنى انى اقدر اجاوب على أسألتك (( فى حدود اللى جربتو فقط )).

1- معدل إستهلاك البنزين (داخل المدينه و على الطرق السريعه).

الإستهلاك انا شايفه معقول جدا داخل المدينه و طبعا بيختلف على طريقة السواقه و الحرق, انما فى السفر فوق الممتاز ( يعنى لما فولت التانك و ثبت السرعه على حوالى 120 او 130 كان الأستهلاك 5.0 لتر لكل 100 كم و المسافه المتوقعه تقريبا 730 كم )

2- توافر قطع الغيار (هل الوكيل فقط أم هناك مصادر أخرى).

انا ماحاولتش اسأل على قطع غيار بره التوكيل بس بصراحه جوه التوكيل كل حاجة موجوده.

3- أسعار قطع الغيار.

بفضل الله ماحتجتش انى أغير اى حاجة حتى الان , بس اعتقد العادى زيها زى اى عربية يابانى بس يمكن أرحص شوية من هوندا و تويوتا.


4- توافر مراكز الخدمه و الصيانه (هل الوكيل فقط أم هناك أماكن أخرى).

مراكز الخدمه محدوده شوية ( جسر السويس و المعادى ) و الورشه و السمكره فى العبور, مقارنتا بباقى العربيات تعتبر قليلة جدا, بس عدم انتشار السوبارو بشكل كبير مسهل اوى موضوع الصيانه (يعنى انا عملت صيانة مرتين كنت مسافر و مستعجل بدون حجز مسبق) وده صعب اوى تلاقيه فى اى توكيل.

بالنسبة للخدمه ممتازة و متفاهمين جدا بصراحة و سعر الصيانه كويس نسبيا لباقى التوكيلات (يعنى اكتر من كيا بحوالى 40 جنيه و اقل من شيفورليه "منصور" و ده كلام الناس بس انا بصراحه معنديش فكره الفرق كام بالضبط فى منصور.

5- مستوى إهتمام الوكيل و خدمته للعملاء.

ممتاز , مقارنة بكيا.

6- مستوى الإرتفاع عن الأرض و المطبات.

الأرتفاع متوسط, أعلى من الهوندا , أقل من اللانسر , عادى مع المطبات الطبيعيه , بس بتحك فى حالة التحميل الكامل (يعنى خمس أفراد بالغين فى السياره ).

7- جودة التكييف.

ممتازه ما شاء الله, قوى جدا و سريع جدا.

مع شوية إضافات بأه زى:
- ثبات عالى و ممتاز.
-قوة فى الأداء و تحكم كامل ما شاء الله.
-وسع داخلى هايل (مقارنة مع الفانتازيا و اكبر كتير من الأسترا ).


و تحت أمرك فى أى أسئلة , أهم حاجة الإستخاره و ربنا يوفقك للى فيه الخير.

[blazer]

1- معدل إستهلاك البنزين (داخل المدينه و على الطرق السريعه).
3- أسعار قطع الغيار.
2- توافر قطع الغيار (هل الوكيل فقط أم هناك مصادر أخرى).
7- جودة التكييف.


6- مستوى الإرتفاع عن الأرض و المطبات.
النقط السابقة زيها زى اى عربيه بل ان السوبارو بتتميز ان استهلاكها لقطع غيار العافشه اقل من اى عربيه تانة و دا بسبب قوه تحملها و كمان جودة مكوناتها و كمان يابانى 100%


4- توافر مراكز الخدمه و الصيانه (هل الوكيل فقط أم هناك أماكن أخرى).

5- مستوى إهتمام الوكيل و خدمته للعملاء.
الصيانة لا ينصح بعملها غير فى الوكل و دا لان العربيه مش منتشرة و اسعار الوكيل زى اى وكيل اكيد مش رخيصة بس فى نفس الوقت مش مبالغ فيها و ممكن تبقى اقل كمان من هوندا و تويوتا و مازدا

العيب الوحيد هو نقطتين من راى
اعاده البيع ,, ودى هتفرق معاك طبعا لو انت معندكش استعداد تخسر لما تيجى تبيع
يعنى الامبريزا الى ب 175 لو قارنتها بلسيراتو او الكرولا ال ب 175 هتلاقى بعد 3 سنين الامبريزا تخسر ضعف الخساره تقريبا
و دا واضح موديلات 2010 الامبريزاكانت زيرو ب 160 و بتتباع لوقتى ب 95 الف تقربا او 100والسيراتو 2010 كانت ب 135 و بتتباع ب 100 و 105

وحاجة كمان هو انك مش هتلاقى قطع غير ليها بره الوكيل او بدائل لحجات الى مش لازم تتجاب اصلى زى الفوانيس او الصاج او الاكسسوار فهتضطر تجبهم استيراد او من الوكيل

[عماد الدين عزت]

عملية شراء سيارة جديدة فى منتهى الصعوبة بسبب ارتفاع ثمن السيارة وخصوصا فى مصر حيث تتعامل التوكيلات بعبارة اشترى العربية وانت وحظك مع الاخذ فى الاعتبار سعر اعادة البيع الذى يشكل عامل مؤثر فى قرار الشراء ولا اخفى امرا باننى معجب بالامبريزا فهى سيارة دفع رباعى يابانية الصنع ولكننى كنت سيارة لا تتجاوز 150 الف جنيه ولكن هذه السيارة ثمنها 175 الف وبذلك فكرت فى تويوتا اتوماتيك الفئة الثانية وفرق السعر حوالى 15 الف واسمى راكب تويوتا لما لها من سمعة ويعرف المحيطين بك قيمة السيارة التى تركبها من الناحية الاجتماعية وغزارة تجهيزاتها متفوقة على الامبريزا مع سهولة البيع وتوكيلها جيد واعتقد ان سعر الا مبريزا يجب ان لا يتجاوز 160 الف وفى النهاية ادعو الله ان تتوصل الى القرار الصحيح وتخطرتا بذلك مع خالص تحياتى

[tefafathy1]

عملية شراء سيارة جديدة فى منتهى الصعوبة بسبب ارتفاع ثمن السيارة وخصوصا فى مصر حيث تتعامل التوكيلات بعبارة اشترى العربية وانت وحظك مع الاخذ فى الاعتبار سعر اعادة البيع الذى يشكل عامل مؤثر فى قرار الشراء ولا اخفى امرا باننى معجب بالامبريزا فهى سيارة دفع رباعى يابانية الصنع ولكننى كنت سيارة لا تتجاوز 150 الف جنيه ولكن هذه السيارة ثمنها 175 الف وبذلك فكرت فى تويوتا اتوماتيك الفئة الثانية وفرق السعر حوالى 15 الف واسمى راكب تويوتا لما لها من سمعة ويعرف المحيطين بك قيمة السيارة التى تركبها من الناحية الاجتماعية وغزارة تجهيزاتها متفوقة على الامبريزا مع سهولة البيع وتوكيلها جيد واعتقد ان سعر الا مبريزا يجب ان لا يتجاوز 160 الف وفى النهاية ادعو الله ان تتوصل الى القرار الصحيح وتخطرتا بذلك مع خالص تحياتى

حضرتك ركبت عشان الناس... لكن صدقنى لو جربت تركب عشان نفسك كنت هتلاقى متعه و فرق تانى خالص.
الميزة الوحيدة فى التويوتا البارك اسيست، تعالى بقى لمميزات السوبارو:
1-دفع رباعى = ثبات عالمى + قوة مضاعفه
2- تقفيل يابانى و خامات انظف بكثيييير جدا عن التويوتا. ( مش تركى )
3- اعتمادية.

و بالتوفيق.

[eslamsubaru]

حضرتك ركبت عشان الناس... لكن صدقنى لو جربت تركب عشان نفسك كنت هتلاقى متعه و فرق تانى خالص.
الميزة الوحيدة فى التويوتا البارك اسيست، تعالى بقى لمميزات السوبارو:
1-دفع رباعى = ثبات عالمى + قوة مضاعفه
2- تقفيل يابانى و خامات انظف بكثيييير جدا عن التويوتا. ( مش تركى )
3- اعتمادية.

و بالتوفيق.

ضيف على ده :
4) وسائل الأمان أعلى من التويوتا بمراحل و اختبارات أمان السوبارو فى اوروبا و امريكا و اليابان تتفوق على باقى اليابانى بمراحل و تتفوق على الألمانى كمان.
5) عربية موفرة فى صياناتها عكس ما الناس فاهمة : قطعة غيار السوبارو بتجيبها الأن بنفس اسعار قطع غيار العربيات التانية فى توكيلاتها و قطعة غيار السوبارو بتقعد معاك من 2 الى 4 مرات اكتر من قطع الغيار الكورة و اليابانى التانى.
زمان من 5 سنين كان ممكن تقول قطع غيار السوبارو غالية انما دلوقتى و بمقارنة ارخص من الكورى كمان و ادخل و شوف اسعار قطع غيار السيراتو مثلا فى قسم كيا و انت تعرف.. ( و كلامى على اسعار القطع الأصلية مش المستوردة و الهاى كوبى و الكلام اللى مبيعمرش اصلا)

[WAEL .H]

بالنسبة للبنزين 95 ولا 92

[scientist9508]

إمبريزا 92 أو 95 . . . .و ال xv 95 فقط (مصدر المعلومه أبوغالى)

[eslamsubaru]

إمبريزا 92 أو 95 . . . .و ال xv 95 فقط (مصدر المعلومه أبوغالى)

مع احترامى لكلامك : السوبارو بتشتغل بال 92 عادى بكل موديلاتها : الامبريزا و الاكس فى و حتى الليجاسى 2000 سى سى و الفورستر 2000 سى سى .. لاكن زيها زى اى عربية حديثة بالسوق الشركة المنتجة تنصح ب 95 للحصول على اعلى اداء من الموتور و لكن كل العربيات مكتوب فالكتيب بتاعها ان لم يتوفر 95 فاستخدام 92 لا يشكل مشكلة اطلاقا ..
كل الفرق بين 95 و 92 مع العربيات الحديثة : هدوء صوت الموتور شوية و طبعا فرق فالسحب شوية .. و ممكن كركرة لو البنزين مش نظيف و ده ما اكثره فى مصر ..

انما السوبارو بكل موديلاتها بتشتغل بال 92 عادى .