ماروتى 2010

[Abdm]

شكرا اخى عبد الحى على ردك السريع و الفورى جزاك الله الف خيرا

معلش عندى استفسار هو انا هاخد قرض من البنك و اروح اشترى من المعرض و له هشترى السياره من البنك مباشر بدون معرض ( معلش اصلى ما فهمتش اوى اعذرنى خبرتى ضعيفه فى المواضيع ديه ) و اى بنك بيعمل كده اسمه ايه يعنى ؟؟؟ و لازم يبقى ليه حساب فيه ؟؟
و له هيدينى كده بضمان الوظيفه و له تحويل مرتب ؟؟؟ يعنى اعمل ايه ؟؟

شكرا ليك اوى
بسنت

حضرتك مش هتخدى قرض ولا حاجة . أغلب البنوك عندها نظام أسمة تمويل شراء سيارة عندك مثلا بنك التمويل المصرى السعودى ودة أفضل بنك وأقل فائدة ومش بيشترط تحويل المرتب ومش شرط يكون ليكى حساب عندة وموضوع أنة يعملك حساب عندة دية مصلحة وما فيهاش ضرر وهيعمل الحساب علشان السيارة وبتدفعى اللى معاكى المقدم وهو يقسط الباقى وفائدتة تقريبا من 6 % الى 7 % بالنسبة ليكى ويلية بنك hsbc ودة مكن يطلب تحويل مرتب .
كل اللى حضرتك هتعملية أنك هتجيبى عرض أسعار بالسيارة وثمنها اللى أنتى عايزها من المعرض اللى أنتى عايزاة اللى يعجبك وبيطلع من المعرض بسهولة وجواب مفردات مرتب ووصل نور أو تليفون وحاجات بسيطة كلها ممكن تيجيبيها وبيقسطلك بشيكات شهرية تدفعيها لو مش عاملة تحويل أو خصم المرتب من المنبع لو عاملة تحويل مرتب وتقدمى العرض الآسعار وكل الآوراق للبنك وبعد ما البنك يخلص الآجراءات بيسلمك العربية من عندة أو من المعرض أو أنت اللى بتروحى تستلميها حسب البنك والآتفاق
والله الموفق

[TheQueenMary]

تمام ..تمام أنا كده فهمت ...شكرا لك اوى ربنا يخليك للغلابه اللى زيى

ماروتى 2010 عامله ايه معاك انا قرأت فى احد المواضيع انك اشتريتها ...صحيح ؟؟؟
و هل تركيب الانذار و السنتر و الكاسيت ليها بوظ حاجه فيها و عمل تسرب حراره لكابينة السائق ؟؟؟

شكرا مره اخرى انت متعاون جدا جزاك الله خيرا و جعله فى ميزان حسناتك

[TheQueenMary]

ممكن ترشح لى اسم احسن معرض سيارات اقدر اجيب من عنده عرض الاسعار اللى قلتلى عليه اللى بنك التمويل المصر السعودى بيطلبه انا فى القاهره حى النزهه الجديده
معلش تقلت خالص خالص عليك يا استاذ عبد الحى بس اللى مطمعنى تعاونك معايا ...طمع بقى تقول ايه !!!

[Abdm]

ممكن ترشح لى اسم احسن معرض سيارات اقدر اجيب من عنده عرض الاسعار اللى قلتلى عليه اللى بنك التمويل المصر السعودى بيطلبه انا فى القاهره حى النزهه الجديده
معلش تقلت خالص خالص عليك يا استاذ عبد الحى بس اللى مطمعنى تعاونك معايا ...طمع بقى تقول ايه !!!

هو أنا ساكن فى الهرم لكن عندك السبع أوتو موتيف كويس جدا فى مصر الجديدة أو معارض مودرن موتورز فى مدينة نصر طريق المطار أو الهايكستب وعندك سمير ريان فى مدينة نصر . بس أفضل واحد السبع أوتوموتيف ت/ 26906684/26906685 - 107 ش عمر بن الخطاب مصر الجديدة -ألماظة أو 18 ش الحريةمصر الجديدة

تمام ..تمام أنا كده فهمت ...شكرا لك اوى ربنا يخليك للغلابه اللى زيى:m_yes[1]:

ماروتى 2010 عامله ايه معاك انا قرأت فى احد المواضيع انك اشتريتها ...صحيح ؟؟؟
و هل تركيب الانذار و السنتر و الكاسيت ليها بوظ حاجه فيها و عمل تسرب حراره لكابينة السائق ؟؟؟

شكرا مره اخرى انت متعاون جدا جزاك الله خيرا و جعله فى ميزان حسناتك:s_thum1[1]:

أنا معايا ألتو لكن أنا بعز الماروتى جدا جدا وبحبها و الحمد لله على كل حال . هو لحد دلوقتى ما حدش أشتكى من المشكلة دية
فأنا بضم صوتى لصوتك أن لو فى حد عندة مشاكل ناتجة من تركيب السنتر والآنذار والكاسيت يا ريت يقولنا . وجزاكم الله خيرا

[TheQueenMary]

شكرا شكرا على كل نصائحك الغاليه فادتنى جدا و اكيد هتفيد كثير اوى من اعضاء المنتدى الكرام
جزاك الله خيرا

[zalpany2000]

استاذة بسنت
اولا ربنا يوفقك في الشراء بإذن الله ويكرمك في العربية اللي انت عايزاها
و فعلا الاستاذ النشط جدا عبد الحي ماخلاش حاجه تتقال
بس لو حابة تعرفي تجربتي
انا برضو هيئة تدريس
اولا موضوع التقسيط .. انا مقسط مع بنك اسكندرية .. بدون مقدم خالص.. علي 7 سنوات
البنك بيشترط تحويل المرتب ...
بنك اسكندرية افضل البنوك معاملة بصراحة ... وفايدته برضو الاقل
هما شروطهم زي كل البنوك ان مبلغ القسط لا يتجاوز باي حال من الاحوال 50 % من إجمالي الدخل الشهري المثبت عندهم لحضرتك
والدخل ده مش المرتب المحول بس .. لا ممكن أي إثبات دخل تاني او hr
او حتي ضامن

و الموافقة مش بتاخد اكتر من 48 ساعة

انا لما اشتريت حجزت في التوكيل نفسه علي اساس انه الارخص و الاضمن .. بس طبعا اتلطعت 4 شهور علي ما استلمت
انا اعتقد بالنسبة لحضرتك هايبقي معرض محترم افضل ليكي
اعتقد برضو استاذ عبد الحي زي ما قالك
السبع محترمين جدا
و فيه اوتو سمير ريان انا اسمع عنهم كويسين
بس ايااااااااااااااكي والمصرية ... دووول لا لا لا

حاجه اخيرة ... انا باقترح علي حضرتك الالتو ال 800 المكيفة ... الصيف دااخل .. والتكييف في العربية مهم .. دي نقطة حابب الفت نظر حضرتك ليها ... و ده كان من أهم الاسباب اللي خليتني اجيب الالتو... الماروتي هايلة ... وممكن يتركبلها تكييف... بس موتور الالتو حتي ال 800 اقوي نسبيا من الماروتي
و هي نازلة بالتكييف
و فرق السعر يستاهل

عموما ربنا يوفقك
في الماروتي او الالتو
و طمنينا
ولو حضرتك استقريتي علي موضوع بنك اسكندرية .. بلغيني بس وانا ادي حضرتك كل التفاصيل .. واحاول اساعدك
تحياتي

[TheQueenMary]

ربنا يخليك يا دكتور حسام على النصيحه و فعلا زى ما حضرتك بتقول كده التكييف مهم جدا فى العربيه بس انا لو حبيت اجيب الالتو المكيفه 800 سىسى هتفرق اد ايه ؟؟
لو حبيت ادفع قسط مثلا 500 جنيه و مقدم 15000 جنيه هتعمل كام سنه ؟؟؟ و التوتل هيكون كام ؟؟؟
من فضلك فدنى فى الموضوع بتاع الالتو ده ؟؟؟ من حيث فرق الفلوس بينها بين الماروتى ؟؟؟
شكرا

[lido_pink2000]

شكرا اخى عبد الحى على ردك السريع و الفورى جزاك الله الف خيرا

معلش عندى استفسار هو انا هاخد قرض من البنك و اروح اشترى من المعرض و له هشترى السياره من البنك مباشر بدون معرض ( معلش اصلى ما فهمتش اوى اعذرنى خبرتى ضعيفه فى المواضيع ديه ) و اى بنك بيعمل كده اسمه ايه يعنى ؟؟؟ و لازم يبقى ليه حساب فيه ؟؟
و له هيدينى كده بضمان الوظيفه و له تحويل مرتب ؟؟؟ يعنى اعمل ايه ؟؟

شكرا ليك اوى
بسنت

يا بسنت بدون الدخول فى نقاشات دينية و جدال و من غير ماتتهمينى بالتعصب احب اقلك ان قروض البنوك حراااااااااااااااااااااااااااااااااااااااااااااااا اام بالاجماع و كل قرض جر نفع فهو ربا و الربا دة فى القران مش كلامى انا و عقابه بسم الله الرحمن الرحيم(يأيها الذين امنوا اتقوا الله و ذروا ما بقى من الربا ان كنتم مؤمنين.فأن لم تفعلوا فأذنوا بحرب من الله و رسوله فأن تبتم فلكم رؤوس اموالكم لا تظلمون ولا تظلمون)و اظن ان احنا مش اد حرب ربنا عشان ربنا يباركلك فى العربيه اللى حتركبيها و يكفيكى شر الطريق و ياريت متقوليش فى شيوخ بيقولوا مش حرام لان دول شيوخ السلطة فقط لكن باقى الشيوخ بالاجماع بيحرموا قروض البنوك زى الشيخ الشعراوى و القرضاوى و جاد الحق و محمد حسان و غيرهم كتير
و ده ينطبق بردة على الشرا من المعرض بوساطمة من البنك و ياريت تقبلى نصيحتى بصدر رحب

[TheQueenMary]

شكرا لنصيحتك لكن كما فهمت من استاذ عبد الحى هو ليس قرض انا هشترى العربيه من البنك بدون وساطه فى النص يعنى البنك هو اللى هيدينى العربيه و هدفع القسط ليه مباشرة متهيألى مش هيكون حرام (سلعه بالقسط عليها فوايد) كأى شىء يالتقسيط

[zalpany2000]

بحسبة بسيطة يا استاذة بسنت
لو بنتكلم في فائدة 7 % و قسط علي 5 سنوات
علي اعتبار ان سعر العربية 45000
يبقي قسط حضرتك الشهري 675 جنيه

[Abdm]

شكرا لنصيحتك لكن كما فهمت من استاذ عبد الحى هو ليس قرض انا هشترى العربيه من البنك بدون وساطه فى النص يعنى البنك هو اللى هيدينى العربيه و هدفع القسط ليه مباشرة متهيألى مش هيكون حرام (سلعه بالقسط عليها فوايد) كأى شىء يالتقسيط

هو فعلا ذى ما أنا نصحت حضرتك بالنسبة لبنك التمويل المصرى السعودى بيأخذ من حضرتك المقدم ويقسط معاكى تقسيط مباشر عن طريق تمويل السيارات بدون دخول المعرض وسيط

بحسبة بسيطة يا استاذة بسنت
لو بنتكلم في فائدة 7 % و قسط علي 5 سنوات
علي اعتبار ان سعر العربية 45000
يبقي قسط حضرتك الشهري 675 جنيه

القسط دة 675 ميزتة أنة هيقلل المدة والفائدة الكبيرة لكن لو حضرتك القسط دة كتير عليكى مفيش حل غير أنك تقسطى على 7 سنوات فى الحالة دية هيكون مبلغ القسط ذى ما أنت عايزة بالضبط بس مبلغ الفائدة هيزيد شوية صغيرين بس دة هو أفضل حل لو مش هتقدرى على قسط 5 سنوات
والله الموفق

[lido_pink2000]

لو تقسيط من البنك مباشرة يبقى بس تتاكدى ان البنك تملك العربية اولا قيبل البيع و ربنا يوفقك فى الشراء

[TheQueenMary]

و الله يا جماعه انتوا اخجلتونى و احرجتونى بتعاونكم الزائد عن الحدود معايا
جزاكم الله جميعا خيرا ... و ربنا يديم التعاون و الالفه فى هذا المنتدى الرائع ....رغم انى لسه مشتركه ..لكن و الله شعرت انى وسط اخوه اعزاء شكرا لكم جميعا على نصائحكم الغاليه
و ربنا يسهل و اعرف اشترى العربيه سواء كانت الماروتى او الالتو (هافكر و استخير و هحاول اقرر - لانى بصراحه محتاره و كنت هشترى فى الاول مستعمل ماروتى موديل مثلا 2004 او 2005 او فيات128 موديل تسعينات (95 - 96 ...) بس كلامكم عن التقسيط اغرانى بالزيرو و الزيرو زيرو برضه .... ربنا يسهل )

و ان شاء الله هبقى ابلغكم بعد ما اشترى
شكرا مره اخرى